ຂ່າວຫຼ້າສຸດ

ອາ​ນຸ​ສອນ ຄວ້າ​ອັນ​ດັບ 1 ແລ່ນ​ຂ້າມ​ຮົ້ວ 110 ແມັດ

1.176 17 ມ.ກ. 2020 ວົງຈອນກີລາ
ອາ​ນຸ​ສອນ ຄວ້າ​ອັນ​ດັບ 1 ແລ່ນ​ຂ້າມ​ຮົ້ວ 110 ແມັດ

   ອາ​ນຸ​ສອນ ໄຊ​ສາ ນັກ​ແລ່ນ​ທີມ​ຊາດ​ລາວ ປະເພດ​ແລ່ນ​ຂ້າມ​ຮົ້ວ 110 ແມັດ ຊາຍ ສ້າງ​ຜົນງານ​ເດັ່ນ​ແຕ່​ຕົ້ນ​ປີ ສາມາດ​ຄວ້າ​ອັນ​ດັບ 1 ການ​ແຂ່ງຂັນ​ກີລາ​ມະຫາວິທະຍາໄລ ທົ່ວ​ປະເທດ​ໄທ ຄັ້ງ​ທີ 47 ຫຼື The Sun Games 2020 ທີ່​ມະຫາວິທະຍາໄລ​ຣັງ​ສິດ ຈັງຫວັດ​ປະທຸມ​ທານີ ປະເທດ​ໄທ ໃນ​ວັນ​ທີ 14 ມັງກອນ 2020.

    ການ​ແຂ່ງຂັນ​ຄັ້ງ​ນີ້ ຈັດ​ຂຶ້ນ​ລະຫວ່າງ​ວັນ​ທີ 10-19 ມັງກອນ 2020 ໂດຍ ອາ​ນຸ​ສອນ ເຂົ້າ​ຮ່ວມ​ໃນ​ນາມ​ນັກ​ສຶກ​ສາ​ມະຫາວິທະຍາໄລ​ກຸງ​ເທບ​ທົນ​ບູ​ຣີ ປະເພດ​ແລ່ນ​ຂ້າມ​ຮົ້ວ 110 ແມັດ​ຊາຍ ເຊິ່ງ​ມີ​ນັກ ກີລາ​ເຂົ້າ​ຮ່ວມ 16 ຄົນ ຈາກ​ມະຫາວິທະຍາໄລ​ທົ່ວ​ປະເທດ​ໄທ ປາກົດ​ວ່າ: ອາ​ນຸ​ສອນ ຜ່ານ​ຮອບ​ຄັດ​ເລືອກ​ສູ່​ຮອບ​ຊີງ​ກັບ​ນັກກີລາ​ອີກ 7 ຄົນ.

    ຜ່ານ​ການ​ແຂ່ງຂັນ​ໃນ​ຮອບ​ຊີງ​ຊະນະ​ເລີດ ອາ​ນຸ​ສອນ ອອກ​ຕົວ​ດີ ແລະ ເຂົ້າ​ເສັ້ນ​ໄຊ​ເປັນ​ຄົນ​ທຳ​ອິດ ດ້ວຍ​ເວລາ 14,16 ວິນາທີ ໄວ​ກວ່າ​ອັນ​ດັບ 2 ພານຸ​ວັນ ຂວັນ​ຢືນ ຈາກ​ມະຫາວິທະຍາໄລ​ການ​ກີລາ​ແຫ່ງ​ຊາດ​ໄທ 58 ລິບດາ ອາ​ນຸ​ສອນ ຄວ້າ​ຫຼຽນ​ຄຳ​ມາ​ຄອງ​ຕາມ​ເປົ້າ​ໝາຍ.

    ກ່ອນ​ໜ້າ​ນີ້ ອາ​ນຸ​ສອນ ໄດ້​ຫຼຽນ​ທອງ ໃນ​ຊີເກມ 2019 ທີ່​ຟີ​ລິບ​ປິນ ດ້ວຍ​ຜົນງານ​ຄອງ​ໃຈ​ຜູ້​ຊົມ ອອກ​ຕົວ​ດີ ແລ່ນ​ສູ​ສີ​ກັບ​ຕົວ​ເຕັງ​ຂອງ​ເຈົ້າພາບ​ຟີ​ລິບ​ປິນ ແລະ ແຊັມ​ເກົ່າ​ຈາກ​ມາ​ເລ​ເຊຍ ຈົນ​ເຖິງ​ໄລຍະ​ສຸດ​ທ້າຍ ເສຍ​ໃຫ້ ອັນ​ດັບ​ທີ 1 ແລະ ອັນ​ດັບ​ທີ 2 ພ້ຽງ​ສ້ຽວ​ວິນາທີ.

ຂ່າວທີ່ກ່ຽວຂ້ອງ