ຂ່າວຫຼ້າສຸດ

ເທ​ຄວັນ​ໂດ ນວ ຕັ້ງ​ເປົ້າ 2 ຫຼຽນ​ຄຳ ຊຽງ​ຂວາງ ເກມ

584 17 ມ.ກ. 2020 ວົງຈອນກີລາ
ເທ​ຄວັນ​ໂດ ນວ ຕັ້ງ​ເປົ້າ 2 ຫຼຽນ​ຄຳ ຊຽງ​ຂວາງ ເກມ

     ທ່ານ ກໍລະກົດ ສີ​ເມືອງ​ຊອງ ເລຂາທິການ​ສະຫະພັນ​ກີລາ​ເທ​ຄວັນ​ໂດ ນະຄອນຫຼວງ​ວຽງ​ຈັນ (ນວ) ໃຫ້​ສຳພາດ​ເມື່ອ​ບໍ່​ດົນ​ມາ​ນີ້​ວ່າ: ຕາມ​ການ​ມອບ​ໝາຍ​ຂອງ​ທ່ານ​ເຈົ້າ​ຄອງ ນວ ກໍ​ຄື ພະ​ແນກ​ສຶກ​ສາ​ທິ​ການ ແລະ ກີລາ ນວ ແລະ ພະ​ແນກ​ແຜນການ ແລະ ການ​ລົງທຶນ ທີ່​ໄດ້​ຕິດຕາມ​ໃກ້ຊິດ​ຕິດ ແທດ​ຊີ້​ນຳ​ນຳພາ​ໂດຍ​ກົງ​ຕໍ່​ທັບ​ນັກກີລາ​ເທ​ຄວັນ​ໂດ ນວ ເພື່ອ​ກຽມ​ເຂົ້າ​ຮ່ວມ​ສ້າງ​ຜົນງານ ໃນ​ຊຽງ​ຂວາງ ເກມ 2020 ເຊິ່ງ​ຈະ​ຈັດ​ຂຶ້ນ​ໃນ​ລະຫວ່າງ​ວັນ 22 ມີນາ ຫາ 1 ເມສາ 2020 ສະນັ້ນ ເພື່ອ​ເຮັດ​ໃຫ້​ຄວາມ​ໄວ້​ເນື້ອ​ເຊື່ອ​ໃຈ ແລະ ການ​ມອບ​ໝາຍ​ໜ້າທີ່​ອັນ​ສຳຄັນ​ຄັ້ງ​ນີ້​ປະສົບ​ຜົນສຳເລັດ ທາງ​ຄະນະ​ສະຫະພັນ​ເທ​ຄວັນ​ໂດ ນວ ຈຶ່ງ​ໄດ້​ມີ​ການ​ປືກ​ສາ​ຫາລື​ວາງ​ແຜນ​ຢ່າງ ຮອບດ້ານ ເພື່ອ​ຮັບປະກັນ​ສູ້​ຊົນ​ເຮັດ​ໃຫ້​ຄວາມ​ຄາດ​ຫວັງ​ຂອງ​ທັບ​ເທ​ຄວັນ​ໂດ ນວ ທີ່​ຕັ້ງ​ເປົ້າ​ໝາຍ​ໄວ້​ຢ່າງ​ໜ້ອຍ 2 ຫຼຽນ​ຄຳ ປະສົບ​ຜົນ​ເປັນ​ຈິງ ໂດຍ​ໄດ້​ມີ​ການ​ຄັດ​ເລືອກ​ເອົາ​ນັກກີລາ ຈາກ 5 ສະໂມສອນ ປະກອບ​ມີ ໂຮງຮຽນ​ພອນ​ສະຫວັນ​ກີລາ-ກາ​ຍະ​ກຳ ສະໂມສອນ​ເສືອ​ນ້ອຍ ສະໂມສອນ​ລ້ານ​ຊ້າງ ສະໂມສອນ​ຕາວັນ ສະໂມສອນ​ນັນ​ດາ ທັງ​ໝົດ 16 ຄົນ ໃນ​ນັ້ນ ມີ​ປະເພດ​ຕໍ່ສູ້ ແລະ​ປະເພດ​ຟ້ອນ​ປຸມ​ເຊ້ ລວມ​ທັງ​ຄູ​ເຝິກ​ອີກ 3 ທ່ານ.

      ສຳລັບ​ເຫດຜົນ​ທີ່​ສົ່ງ​ນັກກີລາ​ໜ້ອຍ ກໍ​ຍ້ອນ​ວ່າ​ງົບ​ມີ​ຈຳກັດ ແລະ ທາງ​ສະຫະພັນ​ເທ​ຄວັນ​ໂດ​ແຫ່ງ​ຊາດ ໄດ້​ມີ​ການ​ຄັດ​ຈ້ອນ ແລະ ອາ​ນຸ​ຍາດ​ໃຫ້​ນັກກີລາ​ທີ່​ໄດ້​ມາດຕະຖານ ຫຼື ມີ​ຄະແນນ​ທີ່​ສະ​ສົມ​ເຂົ້າ​ຮ່ວມ​ລາຍການ​ຂອງ​ສະຫະພັນ ໃນ​ລະດັບ 120 ຄະແນນ​ຂຶ້ນ​ໄປ ຈຶ່ງ​ສາມາດ​ເຂົ້າ​ຮ່ວມ​ແຂ່ງຂັນ ຊຽງ​ຂວາງ ເກມ ໄດ້ ນອກຈາກ​ນັ້ນ ຍັງ​ມີ​ຕົວ​ເລກ​ພິເສດ ເຊິ່ງ​ແຕ່​ລະ​ແຂວງ​ສາມາດ​ສົ່ງ​ນັກກີລາ​ເພີ່ມ​ອີກ​ພຽງ 2 ຄົນ ກໍ​ຄື ຍິງ 1 ຄົນ ແລະ ຊາຍ 1 ຄົນ. 

     ໃນ​ການ​ຫ້າງ​ຫາ​ກະກຽມ​ທັບ​ນັກກີລາ​ເທ​ຄວັນ​ໂດ ນວ ໄດ້​ມີ​ການ​ວາງ​ແຜນການ​ເຝິກຊ້ອມ​ອອກ​ເປັນ 3 ໄລຍະ ຄື: ໄລຍະ​ເຕົ້າໂຮມ ໄລຍະ​ທີ 2 ແມ່ນ​ໄລຍະ​ເຝິກຊ້ອມ​ເຕັກນິກ ແທັກ​ຕິກ​ໃຫ້​ເຂັ້ມ​ຂຸ້ນ ແລະ ໄລຍະ​ທີ 3 ເປັນ​ໄລຍະ​ເຂົ້າ​ຮ່ວມ​ແຂ່ງຂັນ​ຍາດ​ເອົາ​ຫຼຽນ ແນວໃດ​ກໍ​ຕາມ ການ​ແຂ່ງຂັນ​ເທ​ຄວັນ​ໂດ ຊຽງ​ຂວາງ ເກມ 2020 ໄດ້​ນຳ​ໃຊ້​ອຸປະກອນ​ທີ່​ທັນ​ສະໄໝ​ລະດັບ​ສາກົນ ເປັນຕົ້ນ​ແມ່ນ​ອຸປະກອນ​ທາງ​ດ້ານ​ເອ​ເລັກ​ໂຕຼ​ນິກ ເຊິ່ງ​ເປັນ​ບັນຫາ​ສຳຄັນ​ໃຫ້​ແກ່​ນັກກີລາ​ຂອງ​ພວກ​ເຮົາ ທີ່​ບໍ່​ໄດ້​ເຝິກຊ້ອມ​ໃນ​ລະ ບົບ​ນີ້ ຍ້ອນ​ວ່າ​ງົບປະມານ​ບໍ່​ພຽງພໍ ແຕ່​ກໍ​ມີ​ວິທີ​ແກ້​ໄຂ​ບັນຫາ​ດັ່ງກ່າວ ໂດຍ​ຈະ​ພະຍາຍາມ​ນຳພາ​ນັກ​ກີ ລາ​ທັງ​ໝົດ​ເຂົ້າ​ຮ່ວມ​ແຂ່ງຂັນ​ທົດ​ສອບ​ຄວາມ​ສາມາດ ລາຍການ​ແຂ່ງຂັນ​ທີ່​ປະເທດ​ເພື່ອນ​ບ້ານ ກໍ​ຄື ປະເທດ​ໄທ ທີ່​ນຳ​ໃຊ້​ອຸປະກອນ​ທັນ​ສະໄໝ​ໃຫ້​ໄດ້​ຢ່າງ​ຕໍ່​ເນື່ອງ ເພື່ອ​ມາ​ປະ​ເມີນ ແລະ ແກ້​ໄຂ​ໃຫ້​ໄດ້​ຮັບ​ໝາກຜົນ​ຕາມ​ແຜນການ​ທີ່​ວາງ​ໄວ້.

    ການ​ແຂ່ງຂັນ​ເທ​ຄວັນ​ໂດ ຊຽງ​ຂວາງ ເກມ 2020 ຄາດ​ວ່າ​ຈະ​ມີ 10 ກວ່າ​ພາກສ່ວນ​ເຂົ້າ​ຮ່ວມ ເປັນຕົ້ນ​ແມ່ນ ໂດຍ​ຈະ​ມີ​ການ​ຊີງ​ທັງ​ໝົດ 25 ລາຍການ ໃນ​ນັ້ນ ປະເພດ​ຟ້ອນ​ປຸ້ມ​ເຊ້ ມີ 5 ລາຍການ ປະກອບ​ມີ ປະເພດ​ດ່ຽວ​ຍິງ-ຊາຍ ທີມ​ຄູ່​ປະສົມ ແລະ ທີມ​ຍິງ-ທີມ​ຊາຍ ສ່ວນ​ອີກ 20 ລາຍການ ແມ່ນ​ປະເພດ​ຕໍ່ສູ້​ປ້ອງ​ກັນ​ຕົວ ໃນ​ນັ້ນ ຍິງ 10 ລາຍການ ແລະ ຊາຍ 10 ລາຍການ ສະເພາະ​ເທ​ຄວັນ​ໂດ ນວ ສົ່ງ​ເຂົ້າ​ຮ່ວມ 16 ຄົນ ຊີງ 16 ລາຍການ ໃນ​ນັ້ນ ປະເພດ​ຟ້ອນ​ມີ​ພຽງ​ລາຍການ​ດຽວ ຄື: ປະເພດ​ຟ້ອນ​ດ່ຽວ​ຍິງ. 

ຂ່າວທີ່ກ່ຽວຂ້ອງ