ຂ່າວຫຼ້າສຸດ

ປັບປຸງກໍ່ສ້າງກອງທັບ ໃຫ້ມີການຫັນປ່ຽນຢ່າງຕັ້ງໜ້າ

1.375 16 ມ.ກ. 2020 ຂ່າວໜ້າ​ໜຶ່ງ
ປັບປຸງກໍ່ສ້າງກອງທັບ ໃຫ້ມີການຫັນປ່ຽນຢ່າງຕັ້ງໜ້າ

   ກອງ​ປະ­ຊຸມ​ວຽກ​ງານ​ປ້ອງ​ກັນ​ຊາດ ປະ­ຈຳ​ປີ 2019 ແລະ ທິດ​ທາງ​ແຜນ­ການ ປີ 2020 ຈັດ​ຂຶ້ນ​ວັນ​ທີ 15-16 ມັງ­ກອນ 2020 ທີ່​ກະ­ຊວງ​ປ້ອງ​ກັນ​ປະ­ເທດ ເປັນ​ປະ­ທານ​ຂອງ​ທ່ານ ພົນ​ເອກ ຈັນ​ສະ­ໝອນ ຈັນ​ຍາ​ລາດ ລັດ­ຖະ­ມົນ­ຕີ​ກະ­ຊວງ​ປ້ອງ​ກັນ​ປະ­ເທດ ມີ​ບັນ­ດາ​ຮອງ​ລັດ­ຖະ­ມົນ­ຕີ ຫົວ­ໜ້າ​ກົມ​ໃຫຍ່ ກອງ​ບັນ­ຊາ​ການ ນາຍ ແລະ ພົນ­ທະ­ຫານ ອ້ອມ​ຂ້າງ​ກະ­ຊວງ​ເຂົ້າ​ຮ່ວມ.

   ທ່ານ ພົນ​ເອກ ຈັນ​ສະ­ໝອນ ຈັນ​ຍາ​ລາດ ກ່າວ​ວ່າ: ປີ 2019 ພາຍ​ໃຕ້​ການ​ຊີ້​ນຳ-ນຳ­ພາ​ຂອງ​ຄະ­ນະ​ພັກ​ກະ­ຊວງ ກໍ​ຄື ຄະ­ນະ​ພັກ​ຄະ­ນະ​ບັນ­ຊາ​ແຕ່​ລະ​ຂັ້ນ​ໃນ​ການ­ຈັດ­ຕັ້ງ​ປະ­ຕິ­ບັດ​ແນວ­ທາງ​ນະ­ໂຍ­ບາຍ​ຂອງ​ພັກ ແລະ ວຽກ​ງານ​ຈຸດ​ສຸມ​ຂອງ​ລັດ­ຖະ­ບານ ພວກ​ເຮົາ​ສາ­ມາດ​ຍາດ​ໄດ້​ຜົນ­ສຳ­ເລັດ​ຫຼາຍ​ດ້ານ​ພົ້ນ​ເດັ່ນ​ກອງ​ປະ­ຊຸມ​ຄົບ​ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ ຄັ້ງ​ທີ 8 ສະ­ໄໝ​ທີ X ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 8 ຂອງ​ສະ­ພາ​ແຫ່ງ​ຊາດ ຊຸດ​ທີ VIII ແລະ ກອງ​ປະ­ຊຸມ​ອື່ນໆ ພ້ອມ​ນັ້ນ ຍັງ​ຮັບ­ປະ­ກັນ​ສະ­ຖຽນ​ລະ​ພາບ​ທາງ​ດ້ານ​ການ­ເມືອງ ຄວາມ​ສະ­ຫງົບ ຄວາມ​ເປັນ​ລະ­ບຽບ​ຮຽບ​ຮ້ອຍ​ໃນ​ສັງ­ຄົມ ແກ້​ໄຂ​ຄວາມ­ທຸກ​ຍາກ​ຂອງ​ປະ­ຊາ­ຊົນ​ຢ່າງ​ໜັກ​ແໜ້ນ ແລະ ທົ່ວ​ເຖິງ​ມີ​ຜົນ­ສຳ­ເລັດ​ເປັນ​ຢ່າງ​ດີ ເຮັດ​ໃຫ້​ບົດ­ບາດ​ອິດ​ທິ​ພົນ​ຂອງ​ຊາດ​ພົ້ນ​ເດັ່ນ​ຂຶ້ນ​ໃນ​ເວ­ທີ​ສາ­ກົນ ແລະ ພາກ​ພື້ນ ໃນ​ນັ້ນ ກອງ­ທັບ​ເຮົາ​ໄດ້​ເປັນ​ກຳ­ລັງ​ຫຼັກ​ແຫຼ່ງ​ໃນ​ການ​ປ້ອງ​ກັນ​ບັນ­ດາ​ວັນ​ບຸນ ແລະ ກອງ​ປະ­ຊຸມ​ສຳ­ຄັນ​ຕ່າງໆ ມີ​ຄວາມ​ສະ­ຫງົບ 100% ສ້າງ​ຄວາມ​ເຊື່ອ​ໝັ້ນ ແລະ ຄວາມ​ໄວ້​ວາງ­ໃຈ​ຈາກ​ການ​ນຳ​ພັກ-ລັດ ກໍ​ຄື ປະ­ຊາ­ຊົນ​ບັນ­ດາ­ເຜົ່າ.

   ຄຽງ​ຄູ່​ກັບ​ຜົນ­ສຳ­ເລັດ​ທີ່​ກ່າວ​ມາ​ນັ້ນ ​ກໍ​ຍັງ​ມີ​ຂໍ້­ຄົງ­ຄ້າງ​ຫຼາຍ​ບັນ­ຫາ​ທີ່​ຈະ​ຕ້ອງ​ໄດ້​ສຸມ​ໃສ່​ແກ້​ໄຂ ດັ່ງ­ນັ້ນ​ກອງ​ປະ­ຊຸມ​ຄັ້ງ​ນີ້ ຈະ​ໄດ້​ພ້ອມ​ກັນ​ສັງ­ເກດ-ຕີ​ລາ­ຄາ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ໃນ​ປີ­ຜ່ານ­ມາ ໂດຍ​ສະ­ເພາະ 4 ໜ້າ­ທີ່​ໃຫຍ່ 26 ແຜນ­ການ ທີ່​ຄະ­ນະ​ພັກ​ກະ­ຊວງ​ວາງ​ອອກ ເພື່ອ​ຄວາມ​ເປັນ​ເອ­ກະ​ພາບ​ໃນ​ການ​ປັບ­ປຸງ​ກໍ່­ສ້າງ​ກອງ­ທັບ​ໃຫ້​ມີ​ການ​ຫັນ­ປ່ຽນ​ຢ່າງ​ຕັ້ງ­ໜ້າ ພ້ອມ​ນັ້ນ ຈະ​ໄດ້​ພ້ອມ​ກັນ​ຄົ້ນ­ຄວ້າ​ເປັນ​ເອ­ກະ​ພາບ​ທິດ​ທາງ​ແຜນ­ການ​ທີ່​ຈະ​ສຸມ​ໃສ່​ປະ­ຕິ­ບັດ​ປີ 2020 ເຊິ່ງ​ໃນ​ການ​ຄົ້ນ­ຄວ້າ​ຕ້ອງ​ຍົກ​ສູງ​ຈິດ­ໃຈ​ເປັນ​ເຈົ້າ​ຕົນ​ເອງ ເສີມ​ຂະ­ຫຍາຍ​ປະ­ຊາ­ທິ­ປະ­ໄຕ ມີ​ຄວາມ​ຮັບ­ຜິດ­ຊອບ​ໃນ​ການ​ເບິ່ງ​ບັນ­ຫາ ຕີ​ລາ­ຄາ​ສະ­ພາບ​ການ​ໃຫ້​ຖືກ­ຕ້ອງ ພາ­ວະ​ວິ­ໄສ ຕ້ອງ​ເບິ່ງ​ຄືນ​ບັນ­ດາ​ໜ້າ​ວຽກ​ທີ່​ເຮັດ​ໄດ້ ບັນ­ຫາ​ຫຍໍ້­ທໍ້​ຂໍ້­ຄົງ­ຄ້າງ ເພື່ອ​ຮັບ­ປະ­ກັນ​ໃຫ້​ແກ່​ການ​ກຳ­ນົດ​ທິດ​ທາງ​ວຽກ​ຈຸດ​ສຸມ​ໃນ​ປີ 2020 ໃຫ້​ແທດ­ເໝາະ​ກັບ​ສະ­ພາບ​ແວດ​ລ້ອມ​ຕົວ​ຈິງ​ຂອງ​ກອງ­ທັບ ບົນ​ພື້ນ­ຖານ​ຊຸກ­ຍູ້​ຂະ​ບວນ​ການ​ປະ­ຕິ­ບັດ​ໜ້າ­ທີ່​ວຽກ​ງານ​ຕ່າງໆ ດ້ວຍ​ຈິດ­ໃຈ​ບຸກ​ທະ­ລຸ​ໃຫ້​ມີ​ການ​ຫັນ­ປ່ຽນ​ທີ່​ຕັ້ງ­ໜ້າ​ກວ່າ​ເກົ່າ ແລະ ເກີດ​ໝາກ­ຜົນ​ຕົວ​ຈິງ.

ຂ່າວທີ່ກ່ຽວຂ້ອງ