ຂ່າວຫຼ້າສຸດ

ເປີດນຳໃຊ້ເສັ້ນທາງ 4B ເມືອງຫົງສາ-ຊຽງແມນ

1.305 16 ມ.ກ. 2020 ຂ່າວໜ້າ​ໜຶ່ງ
ເປີດນຳໃຊ້ເສັ້ນທາງ 4B ເມືອງຫົງສາ-ຊຽງແມນ

   ພິ­ທີ​ເປີດ​ນຳ​ໃຊ້​ເສັ້ນ­ທາງ 4B ເມືອງ​ຫົງ​ສາ ແຂວງ​ໄຊ​ຍະ​ບູ​ລີ ຫາ ບ້ານ​ຊຽງ​ແມນ ເມືອງ​ຈອມ​ເພັດ ແຂວງ​ຫຼວງ​ພະ​ບາງ ຈັດ​ຂຶ້ນ​ວັນ​ທີ 14 ມັງ­ກອນ 2020 ທີ່​ເມືອງ​ຈອມ​ເພັດ ມີ​ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ທ່ານ ບຸນ​ຈັນ ສິນ​ທະ​ວົງ ລັດ­ຖະ­ມົນ­ຕີ​ກະ­ຊວງ​ໂຍ­ທາ​ທິ​ການ ແລະ ຂົນ­ສົ່ງ ທ່ານ ຄຳ​ຂັນ ຈັນ­ທະ​ວີ​ສຸກ ເຈົ້າ­ແຂວງ​ຫຼວງ​ພະ​ບາງ ທ່ານ ພິ​ຣະ​ເມດ​ວຸດ ທິ​ທອນ​ເນ​ທິ​ຣັກ ປະ­ທານ​ອົງ­ການ​ນີ​ດາ ພ້ອມ​ດ້ວຍ​ຄະ­ນະ​ການ​ນຳ​ລາວ-ໄທ ບໍ­ລິ­ສັດ​ຮັບ​ເໝົາ​ກໍ່­ສ້າງ ແລະ ພະ­ນັກ­ງານ​ວິ­ຊາ​ການ​ກ່ຽວ­ຂ້ອງ​ເຂົ້າ​ຮ່ວມ.

   ທ່ານ ແພງ ດວງ​ເງິນ ຫົວ­ໜ້າ​ກົມ​ຂົວ​ທາງ ກ່າວ​ວ່າ: ໂຄງ­ການ​ກໍ່­ສ້າງ​ເສັ້ນ­ທາງ​ເມືອງ​ຫົງ​ສາ​ຫາ​ຊຽງ​ແມນ ເມືອງ​ຈອມ​ເພັດ ແມ່ນ​ໂຄງ­ການ​ຍຸດ​ທະ​ສາດ​ຂອງ​ລັດ­ຖະ­ບານ​ລາວ ແລະ ລັດ­ຖະ­ບານ​ໄທ ເປັນ​ເສັ້ນ­ທາງ​ປູ­ຢາງ​ສອງ​ຊັ້ນ​ເລກ 4B ຈາກ​ບ້ານ​ນາ​ປຸ່ງ ເມືອງ​ຫົງ​ສາ ຫາ ບ້ານ​ຊຽງ​ແມນ ເມືອງ​ຈອມ​ເພັດ ໂດຍ​ແມ່ນ ບໍ­ລິ­ສັດ ຊໍ​ທະ­ວີ​ກໍ່­ສ້າງ ຈຳ­ກັດ ແຫ່ງ​ປະ­ເທດ​ໄທ ເປັນ​ຜູ້​ຮັບ​ເໝົາ​ກໍ່­ສ້າງ ໂຄງ­ການ​ໄດ້​ເຊັນ​ສັນ­ຍາ​ກໍ່­ສ້າງ​ວັນ​ທີ 14 ສິງ­ຫາ 2015 ແລະ ຕາມ​ສັນ­ຍາ 32 ເດືອນ​ໃຫ້​ສຳ­ເລັດ ແຕ່​ອີງ­ໃສ່​ເງື່ອນ­ໄຂ​ການ​ຍົກ­ຍ້າຍ​ສິ່ງ​ກີດ­ຂວາງ ແລະ ການ​ນຳ​ເຂົ້າ​ອຸ­ປະ­ກອນ​ການ​ກໍ່­ສ້າງ​ຕ່າງໆ​ບໍ່​ເປັນ​ໄປ​ຕາມ​ກຳ­ນົດ ຈຶ່ງ​ເຮັດ​ໃຫ້­ການ​ກໍ່­ສ້າງ​ລ້າ​ຊ້າ​ເກີນ​ກຳ­ນົດ 12 ເດືອນ.

   ໂຄງ­ການ​ກໍ່­ສ້າງ​ເສັ້ນ­ທາງ​ຫົງ​ສາ-ຊຽງ​ແມນ​ໄດ້​ຮັບ​ການ​ສະ­ໜັບ­ສະ­ໜູນ​ດ້ານ​ການ​ເງິນ​ຈາກ​ລັດ­ຖະ­ບານ​ໄທ ກໍ​ຄື ສຳ­ນັກ­ງານ​ຄວາມ​ຮ່ວມ​ມື​ພັດ­ທະ­ນາ​ເສດ­ຖະ­ກິດ​ກັບ​ປະ­ເທດ​ເພື່ອນ​ບ້ານ (ອົງ­ການ​ມະ­ຫາ­ຊົນ ຫຼື NEDA ແຫ່ງ​ປະ­ເທດ​ໄທ) 1.977 ລ້ານ​ບາດ ຫຼື ປະ­ມານ 578,96 ຕື້​ກີບ ໃນ​ນີ້ ເປັນ​ເງິນ​ກູ້​ຢືມ 80% ແລະ ເງິນ​ຊ່ວຍ­ເຫຼືອ​ລ້າ 20% ເຊິ່ງ​ເສັ້ນ­ທາງ​ມີ​ຄວາມ​ຍາວ 114 ກິ­ໂລ­ແມັດ ເປັນ​ທາງ​ປູ­ຢາງ​ສອງ​ຊັ້ນ​ໜ້າ​ທາງ​ລົດ​ແລ່ນ​ມີ 2 ຊ່ອງ​ຈະ­ລາ­ຈອນ ຄວາມ​ກວ້າງ​ໜ້າ​ທາງ​ເຂດ​ທົ່ງ­ພຽງ 9 ແມັດ ເຂດ​ຫຼຸບ​ໂນນ 8 ແມັດ ແລະ ເຂດ​ພູ​ດອຍ 7 ແມັດ ມີ​ຂົວ 8 ແຫ່ງ.

ຂ່າວທີ່ກ່ຽວຂ້ອງ