ຂ່າວຫຼ້າສຸດ

ເຂດເສດຖະກິດພິເສດ 12 ແຫ່ງ ສາມາດດຶງດູດການລົງທຶນ ໄດ້ 202 ບໍລິສັດ

1.401 16 ມ.ກ. 2020 ຂ່າວໜ້າ​ໜຶ່ງ
ເຂດເສດຖະກິດພິເສດ 12 ແຫ່ງ ສາມາດດຶງດູດການລົງທຶນ ໄດ້ 202 ບໍລິສັດ

   ຫ້ອງ­ການ​ສົ່ງ­ເສີມ ແລະ ຄຸ້ມ​ຄອງ​ເຂດ​ເສດ­ຖະ­ກິດ​ພິ­ເສດ ກະ­ຊວງ​ແຜນ­ການ ແລະ ການ​ລົງ­ທຶນ ຈັດ​ກອງ​ປະ­ຊຸມ​ວຽກ​ງານ​ການ​ພັດ­ທະ­ນາ ແລະ ຄຸ້ມ​ຄອງ​ເຂດ​ເສດ­ຖະ­ກິດ​ພິ­ເສດ ປະ­ຈຳ​ປີ 2019 ໃນ​ວັນ​ທີ 14 ມັງ­ກອນ 2020 ທີ່​ຫ້ອງ­ການ​ດັ່ງ­ກ່າວ ໂດຍ​ການ​ເຂົ້າ​ຮ່ວມ​ເປັນ​ປະ­ທານຂອງ​ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ແຜນ­ການ ແລະ ການ​ລົງ­ທຶນ ມີ​ບັນ­ດາ​ລັດ­ຖະ­ມົນ­ຕີ-ຮອງ​ລັດ­ຖະ­ມົນ­ຕີ ຫົວ­ໜ້າ​ຫ້ອງ­ການ​ສົ່ງ­ເສີມ ແລະ ຄຸ້ມ​ຄອງ​ເຂດ​ເສດ­ຖະ­ກິດ​ພິ­ເສດ ພ້ອມ​ດ້ວຍ​ບັນ­ດາ​ເຈົ້າ­ແຂວງ-ຮອງ​ເຈົ້າ­ແຂວງ ແລະ ບັນ­ດາ​ຜູ້­ຕາງ­ໜ້າ​ຈາກ 12 ເຂດ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

   ທ່ານ ສອນ​ໄຊ ສີ​ພັນ​ດອນ ໄດ້​ກ່າວ​ວ່າ ການ​ພັດ­ທະ­ນາ​ເຂດ​ເສດ­ຖະ­ກິດ​ພິ­ເສດ ຢູ່ ສປປ ລາວ ໄດ້​ມີ​ຈຸດ​ພິ­ເສດ ແລະ ມີ​ຄຸນ​ລັກ­ສະ­ນະ​ແຕກ​ຕ່າງ​ກັບ​ການ​ພັດ­ທະ­ນາ​ເຂດ​ເສດ­ຖະ­ກິດ​ພິ­ເສດ​ຢູ່​ປະ­ເທດ​ອື່ນໆ ເນື່ອງ​ຈາກ​ປະ­ເທດ​ອື່ນ​ລັດ­ຖະ­ບານ ເປັນ​ຜູ້​ພັດ­ທະ­ນາ​ພື້ນ­ຖານ​ໂຄງ​ລ່າງ​ທີ່​ຈຳ­ເປັນ​ໃຫ້​ນະ­ໂຍ­ບາຍ​ສົ່ງ­ເສີມ​ພິ­ເສດ ແລະ ສ້າງ​ເງື່ອນ­ໄຂ​ທີ່​ອຳ­ນວຍ​ຄວາມ​ສະ­ດວກ​ໄວ້​ລໍ­ຖ້າ​ເພື່ອ​ໃຫ້​ນັກ​ລົງ­ທຶນ ເຂົ້າ​ມາ​ລົງ­ທຶນ​ໃນ​ກິດ­ຈະ­ການ​ຕ່າງໆ​ຕາມ​ເປົ້າ​ໝາຍ​ທີ່​ລັດ­ຖະ­ບານ​ໄດ້​ກຳ­ນົດ​ໄວ້ ສ່ວນ​ປະ­ເທດ​ເຮົາ​ຍ້ອນ​ເຫັນ​ໄດ້​ທ່າ­ແຮງ ແລະ ຄວາມ​ສຳ­ຄັນ​ຂອງ​ການ​ພັດ­ທະ­ນາ​ເສດ­ຖະ­ກິດ​ໃຫ້​ມີ​ຄວາມ​ຫຼາຍ​ປະ­ເພດ ບວກ​ກັບ​ເງື່ອນ­ໄຂ​ທີ່​ຕັ້ງ​ພູມ​ສັນ­ຖານ ທີ່​ບໍ່​ມີ​ຊາຍ​ແດນ​ຕິດ​ຈອດ​ກັບ​ທະ­ເລ ແລະ ງົບ­ປະ­ມານ​ຂອງ​ລັດ​ມີ​ຈຳ­ນວນ​ຈຳ­ກັດ ຈຶ່ງ​ໄດ້​ສົ່ງ­ເສີມ​ໃຫ້​ຜູ້​ພັດ­ທະ­ນາ​ເອ­ກະ​ຊົນ​ທັງ​ພາຍ​ໃນ ແລະ  ຕ່າງ­ປະ­ເທດ​ເຂົ້າ​ມາ​ລົງ­ທຶນ ໂດຍ​ການ​ໃຫ້​ນະ­ໂຍ­ບາຍ​ສົ່ງ­ເສີມ​ພິ­ເສດ ແນ­ໃສ່​ການ​ພັດ­ທະ­ນາ​ພື້ນ­ຖານ​ໂຄງ​ລ່າງ ການ​ຜະ­ລິດ​ເພື່ອ​ສົ່ງ​ອອກ​ຍົກ​ລະ­ດັບ​ສີ­ມື​ແຮງ​ງານ ແລະ ຖ່າຍ​ທອດ​ເຕັກ​ໂນ​ໂລ​ຊີ​ທີ່​ທັນ​ສະ­ໄໝ.

   ພາຍ​ໃຕ້​ການ​ຊີ້​ນຳ​ຂອງ​ກົມ​ການ­ເມືອງ​ສູນ​ກາງ​ພັກ ແລະ ລັດ­ຖະ­ບານ ເຫັນ​ວ່າ​ວຽກ​ງານ​ດັ່ງ­ກ່າວ​ໄດ້​ມີ​ຄວາມ​ຄືບ​ໜ້າ ແລະ ປະ­ກອບ­ສ່ວນ​ສຳ­ຄັນ​ຕໍ່​ກັບ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ໂດຍ​ສະ­ເພາະ ການ​ພັດ­ທະ­ນາ​ພື້ນ­ຖານ​ໂຄງ​ລ່າງ ການ​ສ້າງ​ຕົວ​ເມືອງ​ໃໝ່​ໃນ​ຊົນ­ນະ­ບົດ​ໃຫ້​ມີ​ໃບ​ໜ້າ​ໃໝ່ ຍົກ​ລະ­ດັບ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ ບ່ອນ​ທີ່​ເຂດ​ເສດ­ຖະ­ກິດ​ພິ­ເສດ​ຕັ້ງ​ຢູ່ ສ້າງ​ໜໍ່​ແໜງ ທາງ​ດ້ານ​ອຸດ­ສາ­ຫະ­ກຳ ການ​ຖ່າຍ​ທອດ​ເຕັກ​ໂນ​ໂລ​ຊີ ສ້າງ​ວຽກ​ເຮັດ​ງານ​ທຳ​ໄປ​ຄ່ຽງ​ຄູ່​ກັບ​ການ​ຍົກ​ລະ­ດັບ​ສີ­ມື​ແຮງ​ງານ​ໃຫ້​ປະ­ຊາ­ຊົນ​ໃນ​ທາງ​ກົງ ແລະ ທາງ​ອ້ອມ ສ້າງ​ຖານ​ລາຍ​ຮັບ​ໃໝ່​ໃຫ້​ກັບ​ລັດ­ຖະ­ບານ ແລະ ອື່ນໆ ນອກ­ຈາກ​ນັ້ນ ການ​ພັດ­ທະ­ນາ​ເຂດ​ເສດ­ຖະ­ກິດ​ພິ­ເສດ ຍັງ​ໄດ້​ສ້າງ​ຄວາມ​ເຊື່ອ​ໝັ້ນ ສາ­ມາດ​ດຶງ​ເອົາ​ບໍ­ລິ­ສັດ​ລາຍ​ໃຫຍ່​ທີ່​ມີ​ຊື່​ສຽງ ແລະ ມີ​ຄຸນ​ນະ​ພາບ​ຈາກ​ຕ່າງ­ປະ­ເທດ​ເຂົ້າ​ມາ​ລົງ­ທຶນ​ນັບ​ມື້​ນັບ​ຫຼາຍ​ຂຶ້ນ ໂດຍ​ສະ­ເພາະ ຢູ່​ເຂດ​ສະ­ຫວັນ-ເຊ​ໂນ (ຈຸດ C) ເຂດ​ກວມ​ລວມ​ໄຊ​ເສດ​ຖາ ເຂດ​ນິ­ຄົມ​ອຸດ­ສາ­ຫະ­ກຳ ການ​ຄ້າ​ວຽງ​ຈັນ-ໂນນ​ທອງ ເຂດ​ບໍ່​ເຕ່ນ​ແດນ​ງາມ ແລະ ເຂດ​ສາມ​ລ່ຽມ​ຄຳ ມາ​ຮອດ​ປັດ­ຈຸ­ບັນ​ກໍ​ໄດ້​ມີ​ບໍ­ລິ­ສັດ​ເຂົ້າ​ມາ​ລົງ­ທຶນ​ທັງ​ໝົດ 806 ບໍ­ລິ­ສັດ ສຳ­ລັບ​ປີ 2019 ໄດ້​ມີ​ບໍ­ລິ­ສັດ​ເຂົ້າ​ມາ​ລົງ­ທຶນ 202 ບໍ­ລິ­ສັດ ມອບ​ພັນ­ທະ​ເຂົ້າ​ງົບ­ປະ­ມານ​ຂອງ​ລັດ​ໄດ້ 122,09 ຕື້​ກີບ ສົ່ງ​ອອກ​ສິນ­ຄ້າ​ໄດ້ 394,4 ລ້ານ​ໂດ​ລາ​ສະ­ຫະ­ລັດ ແລະ ສ້າງ​ວຽກ​ເຮັດ​ງານ​ທຳ​ໄດ້ 26.756 ຄົນ (ລາວ 2.607 ຄົນ ກວມ​ເອົາ 9,74%) ຜົນ­ສຳ­ເລັດ​ທີ່​ຍາດ​ມາ​ໄດ້​ນັ້ນ ກໍ່​ຍ້ອນ​ການ​ເອົາ­ໃຈ­ໃສ່ ແລະ ຊີ້​ນຳ​ຢ່າງ​ໃກ້­ຊິດ​ຈາກ​ທຸກ​ພາກ­ສ່ວນ​ທັງ​ສູນ​ກາງ ແລະ ທ້ອງ­ຖິ່ນ ບວກ​ກັບ​ຄວາມ​ຕັ້ງ­ໃຈ ຄວາມ​ຈິງ​ໃຈ​ຂອງ​ຜູ້​ພັດ­ທະ­ນາ ແລະ ຜູ້​ລົງ­ທຶນ​ແຕ່​ລະ​ເຂດ​ທີ່​ໄດ້​ເອົາ­ໃຈ­ໃສ່​ຂົນ­ຂວາຍ​ການ​ລົງ­ທຶນ​ເຂົ້າ​ມາ​ໃນ​ເຂດ​ໃຫ້​ນັບ​ມື້​ນັບ​ຫຼາຍ​ຂຶ້ນ ພ້ອມ​ກັນ​ນີ້ ຍັງ​ໄດ້​ຍົກ​ໃຫ້​ເຫັນ​ເປັນ​ບາງ​ຈຸດ​ທີ່​ຍັງ​ເປັນ​ສິ່ງ​ທ້າ​ທາຍ​ໃນ​ການ​ພັດ­ທະ­ນາ ແລະ ຄຸ້ມ​ຄອງ ຂສພ ທີ່​ຈະ​ຕ້ອງ​ໄດ້​ສືບ­ຕໍ່​ແກ້​ໄຂ​ໃນ­ຕໍ່­ໜ້າ.

ຂ່າວທີ່ກ່ຽວຂ້ອງ