ຂ່າວຫຼ້າສຸດ

ກອງປະຊຸມສະພາປະຊາຊົນນະຄອນຫຼວງ ຈະຈັດຂຶ້ນອາທິດໜ້າ

1.303 16 ມ.ກ. 2020 ຂ່າວໜ້າ​ໜຶ່ງ
ກອງປະຊຸມສະພາປະຊາຊົນນະຄອນຫຼວງ ຈະຈັດຂຶ້ນອາທິດໜ້າ

   ວັນ​ທີ 15 ມັງ­ກອນ 2020 ທີ່​ຫ້ອງ​ວ່າ­ການ​ນະ­ຄອນ­ຫຼວງ​ວຽງ​ຈັນ (ນວ) ທ່ານ ສາ­ລະ​ພິດ ສູນ​ວໍ­ລະ​ວົງ ເລ­ຂາ­ທິ­ການ​ສະ­ພາ​ປະ­ຊາ­ຊົນ ນວ ໄດ້​ຖະ­ແຫຼງ​ຂ່າວ​ກ່ຽວ​ກັບ​ການ​ກະ­ກຽມ ແລະ ດຳ­ເນີນ​ກອງ​ປະ­ຊຸມ​ສະ­ໄໝ​ສາ­ມັນ ເທື່ອ​ທີ 8 ຂອງ​ສະ­ພາ​ປະ­ຊາ­ຊົນ ນວ ຊຸດ​ທີ I ເພື່ອ​ແຈ້ງ​ມາ​ຍັງ​ບັນ­ດາ​ພະ­ນັກ­ງານ-ລັດ​ຖະ ກອນ ທະ­ຫານ ຕຳ­ຫຼວດ ຕະ­ຫຼອດ​ຮອດ​ປະ­ຊາ­ຊົນ​ບັນ­ດາ­ເຜົ່າ​ໃນ​ທົ່ວ ນວ ໄດ້​ຮັບ​ຊາບ.

   ກອງ​ປະ­ຊຸມ​ຈະ​ໄດ້​ຈັດ​ຂຶ້ນ​ວັນ​ທີ 20-24 ມັງ­ກອນ 2020 ທີ່​ຫ້ອງ​ປະ­ຊຸມ​ສຳ­ນັກ­ງານ​ປົກ­ຄອງ ນວ ເພື່ອ​ພິ­ຈາ­ລະ­ນາ ແລະ ຮັບ­ຮອງ​ເອົາ​ບັນ­ຫາ​ສຳ­ຄັນ​ຕ່າງໆ​ຂອງ ນວ ເປັນ­ຕົ້ນ ພິ­ຈາ­ລະ­ນາ ແລະ ຮັບ­ຮອງ​ເອົາ​ຜົນ​ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແລະ ແຜນ​ງົບ­ປະ­ມານ ປີ 2019 ແລະ ທິດ​ທາງ​ແຜນ­ການ​ປີ 2020 ພິ­ຈາ­ລະ­ນາ ແລະ ຮັບ­ຮອງ​ການ​ສະ­ຫຼຸບ​ຂາດ​ຕົວ ການ­ເຄື່ອນ­ໄຫວ​ວຽກ​ງານ​ຂອງ​ອົງ­ການ​ກວດ​ສອບ​ປະ­ຈຳ​ພາກ​ກາງ​ປີ 2019 ທິດ​ທາງ​ແຜນ­ການ­ເຄື່ອນ­ໄຫວ​ປີ 2020 ແລະ ຜົນ​ການ​ສະ­ຫຼຸບ​ຂາດ​ຕົວ​ການ­ຈັດ­ຕັ້ງ​ປະ­ຕິ­ບັດ​ແຜນ​ງົບ­ປະ­ມານ​ແຫ່ງ​ລັດ​ປີ 2018 ພິ­ຈາ­ລະ­ນາ ແລະ ຮັບ­ຮອງ​ເອົາ​ການ­ຈັດ­ຕັ້ງ​ປະ­ຕິ­ບັດ​ແຜນ­ການ ເຄື່ອນ​ໄຫວ​ວຽກ​ງານ ປີ 2019 ແລະ ທິດ​ທາງ​ແຜນ­ການ­ເຄື່ອນ­ໄຫວ​ວຽກ​ງານ​ປີ 2020 ຂອງ​ອົງ­ການ​ໄອ​ຍະ​ການ​ປະ­ຊາ­ຊົນ ແລະ ສານ​ປະ­ຊາ­ຊົນ ນວ ພິ­ຈາ­ລະ­ນາ ແລະ ຮັບ­ຮອງ​ເອົາ​ການ­ຈັດ­ຕັ້ງ​ປະ­ຕິ­ບັດ​ແຜນ­ການ­ເຄື່ອນ­ໄຫວ​ວຽກ​ງານ ປີ 2019 ແລະ ທິດ​ທາງ​ແຜນ­ການ­ເຄື່ອນ­ໄຫວ​ວຽກ​ງານ ປີ 2020 ຂອງ​ສະ­ພາ​ປະ­ຊາ­ຊົນ ນວ ຮັບ​ຟັງ​ການ​ຊີ້​ແຈງ​ການ­ຈັດ­ຕັ້ງ​ປະ­ຕິ­ບັດ​ຄຳ​ຕັດ­ສິນ​ຂອງ​ສານ ປີ 2019 ແລະ ທິດ​ທາງ​ແຜນ­ການ ປີ 2020 ຮັບ​ຟັງ​ການ​ລາຍ​ງານ ແລະ ຊີ້​ແຈງ​ຜົນ​ການ​ດຳ­ເນີນ​ຄະ­ດີ​ຂອງ​ອົງ­ການ​ສືບ­ສວນ​ສອບ​ສວນ​ຂອງ​ເຈົ້າ​ໜ້າ­ທີ່​ຕຳ­ຫຼວດ ແລະ ວຽກ​ງານ​ຄ້າຍ​ຄຸມ​ຂັງ​ດັດ​ສ້າງ ປີ 2019 ແລະ ທິດ​ທາງ​ແຜນ­ການ ປີ 2020 ພິ­ຈາ­ລະ­ນາ​ວຽກ​ງານ​ການ​ປະ​ເມີນ​ຜົນ​ການ​ປະ­ຕິ­ບັດ​ໜ້າ­ທີ່​ຂອງ​ບຸ​ຄະ­ລາ​ກອນ​ທີ່​ດຳ­ລົງ​ຕຳ­ແໜ່ງ​ທີ່​ສະ­ພາ​ປະ­ຊາ­ຊົນ ນວ ຊຸດ​ທີ I ເລືອກ​ຕັ້ງ ແລະ ຮັບ­ຮອງ​ເອົາ​ການ​ແຕ່ງ­ຕັ້ງ ພ້ອມ​ນີ້ ກອງ​ປະ­ຊຸມ​ຍັງ​ຈະ​ໄດ້​ພິ­ຈາ­ລະ­ນາ ແລະ ຮັບ­ຮອງ​ເອົາ​ນິ­ຕິ​ກຳ 4 ສະ­ບັບ ຂອງ ນວ ພ້ອມ​ທັງ​ພິ­ຈາ­ລະ­ນາ​ການ​ສັບ​ຊ້ອນ ແລະ ແຕ່ງ­ຕັ້ງ​ບຸ​ຄະ­ລາ​ກອນ​ບາງ​ຕຳ­ແໜ່ງ​ຂອງ​ອົງ­ການ​ປົກ­ຄອງ ນວ ນອກ​ນັ້ນ​ກອງ​ປະ­ຊຸມ​ຈະ​ໄດ້​ຮັບ​ຟັງ​ການ​ຊີ້​ແຈງ​ບາງ​ບັນ­ຫາ​ພົ້ນ​ເດັ່ນ​ຈາກ​ອົງ­ການ​ປົກ­ຄອງ ນວ ອີກ​ຈຳ­ນວນ​ໜຶ່ງ.

   ດັ່ງ­ນັ້ນ ຈຶ່ງ​ຂໍ​ເຊີນ­ຊວນ​ບັນ­ດາ​ອົງ​ການ­ຈັດ­ຕັ້ງ​ພັກ-ລັດ ອົງ​ການ­ຈັດ­ຕັ້ງ​ສັງ­ຄົມ​ທຸກ​ພາກ­ສ່ວນ ພະ­ນັກງານ ທະ­ຫານ ຕຳ­ຫຼວດ ຕະ­ຫຼອດ​ຮອດ​ປະ­ຊາ­ຊົນ​ບັນ­ດາ­ເຜົ່າ​ໃນ​ທົ່ວ​ປະ­ເທດ ໂດຍ​ສະ­ເພາະ ຊາວ ນວ ຈົ່ງ​ໃຫ້­ການ​ຕິດ­ຕາມ​ຂ່າວ­ສານ​ທາງ​ໂທລະ­ພາບ ວິ­ທະ­ຍຸ​ກະ­ຈາຍ­ສຽງ ສື່​ສິ່ງ​ພິມ​ຕ່າງໆ ແລະ ສາ­ມາດ​ມີ​ຄຳ​ເຫັນ ຫຼື ຄຳ​ສະ­ເໜີ​ຜ່ານ​ທາງ​ໂທລະ­ສັບ​ສາຍ​ດ່ວນ ໝາຍ​ເລກ 1156 (ຫຼື ໝາຍ​ເລກ­ໂທລະ­ສັບ 021 260242) ຕໍ່​ກອງ​ປະ­ຊຸມ​ສະ­ໄໝ​ສາ­ມັນ ເທື່ອ​ທີ 8 ຂອງ​ສະ­ພາ​ປະ­ຊາ­ຊົນ ນວ ຄັ້ງ​ນີ້​ດ້ວຍ.

ຂ່າວທີ່ກ່ຽວຂ້ອງ