ຂ່າວຫຼ້າສຸດ

ຖວທ ຫາດຊາຍຟອງ ສຸມໃສ່ 3 ວຽກໃຫຍ່

1.005 16 ມ.ກ. 2020 ຂ່າວໜ້າ​ໜຶ່ງ
ຖວທ ຫາດຊາຍຟອງ ສຸມໃສ່ 3 ວຽກໃຫຍ່

   ເພື່ອ​ເປັນ​ການ­ຈັດ­ຕັ້ງ​ຜັນ​ຂະ­ຫຍາຍ​ມະ­ຕິ​ກອງ​ປະ­ຊຸມ​ໃຫຍ່ ຄັ້ງ​ທີ VI ຂອງ​ອົງ­ຄະ​ນະ​ພັກ ແຜນ​ຍຸດ​ທະ​ສາດ​ການ​ພັດ­ທະ­ນາ ແລະ ສົ່ງ­ເສີມ​ວຽກ​ງານ​ຖະ­ແຫຼງ​ຂ່າວ ວັດ­ທະ­ນະ­ທຳ-ທ່ອງ​ທ່ຽວ ຂອງ​ພະ​ແນກ ຖວ​ທ ນວ ເພື່ອ​ເປັນ​ການ​ຕີ​ລາ­ຄາ​ຄືນ​ການ­ເຄື່ອນ­ໄຫວ​ວຽກ​ງານ​ໃນ​ໄລ­ຍະ 1 ປີ ທີ່​ຜ່ານ​ມາ ແລະ ແຜນ­ການ­ເຄື່ອນ­ໄຫວ​ປະ­ຈຳ​ປີ 2020 ຂອງ​ຫ້ອງ­ການ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ​ເມືອງ​ຫາດ​ຊາຍ​ຟອງ ນະ­ຄອນ­ຫຼວງ​ວຽງ​ຈັນ.

   ໃນ​ວັນ​ທີ 09 ມັງ­ກອນ ທີ່​ຜ່ານ​ມາ ຫ້ອງ­ການ ຖວ​ທ ເມືອງ​ຫາດ​ຊາຍ​ຟອງ ໄດ້​ຈັດ​ກອງ​ປະ­ຊຸມ​ສະ­ຫຼຸບ​ວຽກ​ງານ​ປະ­ຈຳ​ປີ 2019 ແລະ ແຜນ­ການ​ປີ 2020 ຂຶ້ນ ທີ່​ຫ້ອງ​ວ່າ­ການ​ປົກ­ຄອງ​ເມືອງ​ຫາດ​ຊາຍ​ຟອງ ພາຍ​ໃຕ້​ການ​ເປັນ​ປະ­ທານ​ຂອງ​ທ່ານ ບຸນ​ຍັງ ລັດ­ຕະ­ນະ​ພັນ ຫົວ­ໜ້າ​ຫ້ອງ­ການ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ເມືອງ​ຫາດ​ຊາຍ​ຟອງ ໂດຍ​ການ​ເຂົ້າ​ຮ່ວມ​ຂອງ​ທ່ານ ສຸກ​ສະ­ຫວັນ ບຸດ​ຕະ​ວົງ ຮອງ​ເຈົ້າ­ເມືອງ​ຫາດ​ຊາຍ​ຟອງ ທັງ​ເປັນ​ສະ­ມາ­ຊິກ​ສະ­ພາ ນວ ແລະ ທ່ານ​ນາງ ວິ­ໄລ​ວອນ ຈັນ­ທະ​ລາ­ຕີ ຫົວ­ໜ້າ​ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ມີ​ຫົວ­ໜ້າ​ຫ້ອງ­ການ​ອ້ອມ​ຂ້າງ ນາຍ­ບ້ານ ບັນ­ດາ​ເຈົ້າ​ຂອງ​ທຸ­ລະ​ກິດ​ເຮືອນ​ພັກ ຮ້ານ​ອາ­ຫານ​ພາຍ​ເມືອງ​ເຂົ້າ​ຮ່ວມ.

   ໃນ​ພິ­ທີ ທ່ານ ບຸນ​ຍັງ ລັດ­ຕະ­ນະ​ພັນ ກ່າວ​ວ່າ: ຫ້ອງ­ການ ຖວ​ທ ຫາດ​ຊາຍ​ຟອງ ພວກ​ເຮົາ​ມີ​ພາ­ລະ​ບົດ­ບາດ​ເປັນ​ເສ­ນາ​ທິ​ການ​ໃຫ້​ແກ່​ພະ​ແນກ ຖວ​ທ.ນວ ຕາມ​ສາຍ​ຕັ້ງ ທັງ​ເປັນ​ເສ­ນາ​ທິ​ການ​ໃຫ້​ແກ່​ຫ້ອງ​ວ່າ​ການ­ເມືອງ​ຫາດ​ຊາຍ​ຟອງ ຕາມ​ສາຍ​ຂວາງ ປະ­ກອບ​ມີ 3 ວຽກ​ງານ​ໃຫຍ່ ຄື: ວຽກ​ງານ​ຖະ­ແຫຼງ​ຂ່າວ ວຽກ​ງານ​ວັດ­ທະ­ນະ­ທຳ ວຽກ​ງານ​ທ່ອງ​ທ່ຽວ ດ້ານ​ວຽກ​ງານ​ຖະ­ແຫຼງ​ຂ່າວ: ຫ້ອງ­ການ​ພວກ​ເຮົາ​ໄດ້​ສົມ­ທົບ​ແໜ້ນ​ກັບ​ນັກ​ຂ່າວ​ໂທລະ­ພາບ-ວິ­ທະ­ຍຸ ນວ ໜັງ­ສື­ພິມ​ວຽງ​ຈັນ​ໃໝ່ ແລະ ອື່ນໆ ສະ­ເໜີ​ຂ່າວ​ກອງ​ປະ­ຊຸມ-ຂະ​ບວນ​ການ​ຕ່າງໆ​ທີ່​ການ­ຈັດ­ຕັ້ງ​ພາຍ​ໃນ​ເມືອງ​ຈັດ​ຂຶ້ນ ພ້ອມ​ທັງ​ເກັບ​ກຳ​ສຳ­ພາດ​ຄອບ­ຄົວ​ຕົວ​ແບບ​ດ້ານ​ການ​ຜະ­ລິດ​ຂອງ​ແຕ່​ລະ​ບ້ານ ວຽກ​ງານ​ວັດ­ທະ­ນະ­ທຳ ໄດ້​ເຂົ້າ​ຮ່ວມ​ກັບ​ບັນ­ດາ​ຫ້ອງ­ການ​ທີ່​ກ່ຽວ­ຂ້ອງ​ລົງ​ກວດ­ກາ-ອອກ​ອະ­ນຸ­ຍາດ​ການ​ກໍ່­ສ້າງ ການ​ປະ­ຕິ­ສັງ­ຂອນ ການ​ບູ­ລະ­ນະ​ຕ່າງໆ ບໍ່​ວ່າ​ຈະ​ເປັນ ຫໍ­ໄຕ ພັດ​ທະ​ສິມ​ມາ ກຸດ­ຕິ ສາ­ລາ ຫຼື ພະ​ພຸດ​ທະ​ຮູບ​ຂອງ​ວັດ ວຽກ​ງານ​ທ່ອງ​ທ່ຽວ ໄດ້​ລົງ​ຕິດ­ຕາມ ກວດ­ກາ ອອກ​ອະ­ນຸ­ຍາດ ແກ້​ໄຂ​ປາ­ກົດ­ການ​ຫຍໍ້­ທໍ້ ເຮັດ​ບົດ​ບັນ­ທຶກ​ກ່າວ​ເຕືອນ​ບັນ­ດາ​ຫົວ­ໜ່ວຍ​ທຸ­ລະ​ກິດ ເຊັ່ນ: ຮ້ານ​ອາ­ຫານ 59 ແຫ່ງ ຮ້ານ​ກິນ​ດື່ມ 10 ແຫ່ງ ຮ້ານ​ບັນ­ເທີງ 2 ແຫ່ງ ຣີ​ສອດ 2 ແຫ່ງ ເຮືອນ​ພັກ 16 ແຫ່ງ ໂຮງ­ແຮມ 10 ແຫ່ງ ສະ­ຖານ­ທີ່​ທ່ອງ​ທ່ຽວ 4 ແຫ່ງ.

   ພ້ອມ​ນີ້ ກອງ​ປະ­ຊຸມ​ຍັງ​ໄດ້​ຮັບ​ກຽດ​ຈາກ​ທ່ານ​ນາງ ວິ­ໄລ​ວອນ ຈັນ­ທະ​ລາ­ຕີ ມີ​ຄຳ​ເຫັນ​ໂອ້​ລົມ​ກ່ຽວ​ກັບ​ວຽກ​ງານ​ໃນ​ຂົງ­ເຂດ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ພາຍ​ໃນ​ເມືອງ​ຫາດ​ຊາຍ​ຟອງ ເວົ້າ​ລວມ ເວົ້າ​ສະ­ເພາະ ພາຍ​ໃນ​ນະ­ຄອນ­ຫຼວງ ກໍ​ຄື ໃນ​ປະ­ເທດ​ລາວ​ຂອງ​ພວກ​ເຮົາ ພ້ອມ​ທັງ​ແກ້​ໄຂ​ຂໍ້​ຂ້ອງ​ໃຈ ກ່ຽວ​ກັບ​ບັນ­ຫາ​ປ້າຍ​ໂຄ­ສະ­ນາ ຮ້ານ​ອາ­ຫານ ໂຮງ­ແຮມ ເຮືອນ​ພັກ ແລະ ສະ­ຖານ​ບັນ­ເທີງ ພາຍ​ໃນ​ເມືອງ​ຫາດ​ຊາຍ​ຟອງ​ຕື່ມ​ອີກ​ດ້ວຍ.

ຂ່າວທີ່ກ່ຽວຂ້ອງ