ຂ່າວຫຼ້າສຸດ

ສືບຕໍ່ກໍ່ສ້າງ ແລະ ສ້ອມແປງເສັ້ນທາງທີ່ເປ່ເພຫຼາຍເສັ້ນໃຫ້ສຳເລັດ

896 16 ມ.ກ. 2020 ຂ່າວໜ້າ​ໜຶ່ງ
ສືບຕໍ່ກໍ່ສ້າງ ແລະ ສ້ອມແປງເສັ້ນທາງທີ່ເປ່ເພຫຼາຍເສັ້ນໃຫ້ສຳເລັດ

   ພະ​ແນກ​ໂຍທາ​ທິ​ການ ແລະ ຂົນສົ່ງ ນະຄອນຫຼວງ​ວຽງ​ຈັນ (​ຍທຂ ນວ) ເປັນ​ພະ​ແນກ​ໜຶ່ງ​ທີ່​ຮັບ​ຜິດ ຊອບ​ວຽກ​ພື້ນຖານ​ໂຄງ​ລ່າງ​ຢູ່​ພາຍ​ໃນ ນວ ປີ 2019 ໄດ້​ສຸມ​ໃສ່​ຈັດ​ຕັ້ງ​ປະຕິບັດ 4 ວຽກ​ຫຼັກ ເປັນຕົ້ນ ການ​ຄຸ້ມ​ຄອງ​ວຽກ​ງານ​ຂະແໜງ​ຂົວ​ທາງ ວຽກ​ງານ​ກໍ່ສ້າງ​ທາງນ້ຳ ວຽກ​ງານ​ຄຸ້ມ​ຄອງ​ການ​ຂົນສົ່ງ​ແກ້​ໄຂ​ການ​ສັນຈອນ​ແອ​ອັດ ແລະ ວຽກ​ງານ​ເຄຫາ​ຜັງເມືອງ.

   ທ່ານ ສຸ​ລິ​ວັນ ພົມ​ມະຫາ​ໄຊ ຮອງ​ຫົວໜ້າ​ພະ​ແນກ ​ຍທຂ ນວ ໃຫ້​ສຳພາດ​ວັນ​ທີ 10 ມັງກອນ 2020 ວ່າ:ການຈັດຕັ້ງ​ວຽກ​ງານ​ຂົວ​ທາງ​ເປັນ​ວຽກ​ໜຶ່ງ​ໃນ 4 ວຽກ​ຫຼັກ​ທີ່​ໄດ້​ສຸມ​ໃສ່ ໃນ 1 ປີຜ່ານມາ​ໄດ້​ເອົາໃຈໃສ່​ແກ້​ໄຂ​ຜົນ​ກະທົບ​ຈາກ​ໄພພິບັດ​ທາງ​ທຳ​ມະ​ຊາດ​ທີ່​ເຮັດ​ໃຫ້​ເສັ້ນທາງ​ເປ່​ເພ ເປັນ​ຂຸມ​ເປັນ​ບວກ​ໜ້າ​ທາງ​ຖືກ​ທຳລາຍ 36 ເສັ້ນທາງ ໄດ້​ສ້ອມແປງ ແລະ ກໍ່ສ້າງ​ຄືນ​ບາງ​ເສັ້ນທາງ ເປັນຕົ້ນ ໄດ້​ປົກ​ປັກ​ຮັກສາ​ເສັ້ນທາງ​ດ້ວຍ​ການ​ຖົມ​ຂຸມ​ເປັນ​ບໍ່ ແລະ ຕາບ​ໜ້າ​ທາງ​ຄືນ​ຕາມ​ເສັ້ນທາງ​ທີ່​ເສຍ​ຫາຍ​ຕ່າງໆ 2.400 ກວ່າ​ຂຸມ ໃນ​ນັ້ນ ເນື້ອທີ່​ຕາບ​ຢາງ 3.513 ຕາ​ແມັດ ໂດຍ​ນຳ​ໃຊ້​ຢາງ 7.977 ເປົາ ລົງ​ດິນ​ຖົມ​ຂຸມ 262 ແມັດ​ກ້ອນ ປ່ຽນ​ຝາ​ຮ່ອງນ້ຳ 28 ຝາ ປ່ຽນ​ຝາ​ຂຸມ​ພັກ​ນ້ຳ 43 ຝາ ປ່ຽນ​ຝາ​ຕະ​ແກງ​ຂຸມ​ຮັບ​ນ້ຳ 64 ຝາ ແລະ ລວງ​ຮ່ອງ​ເອົາ​ຂີ້​ດິນ​ອອກ​ຈາກ​ຮ່ອງ​ແຄມ​ທາງ 150 ກວ່າ​ແມັດ ຜ່ານ​ການຈັດຕັ້ງ​ປະຕິບັດ​ສາມາດ​ປ້ອງ​ກັນ​ເບື້ອງ​ຕົ້ນ​ບໍ່​ໃຫ້​ຖະໜົນ​ຫົນທາງ​ຖືກ​ທຳລາຍ​ເປ່​ເພ​ເສຍ​ຫາຍ​ຈາກ​ການ​ສັນຈອນ ຢືດ​ອາຍຸ​ການ​ນຳ​ໃຊ້​ຖະໜົນ​ຫົນທາງ​ໃຫ້​ຍາວ​ຂຶ້ນ ເຮັດ​ໃຫ້ການ​ສັນຈອນ​ມີ​ຄວາມ​ສະດວກ ແລະ ປອດ​ໄພ​ຂຶ້ນ ສາມາດ​ປະຢັດ​ງົບປະມານ​ທີ່​ຈະ​ນຳ​ມາ​ໃຊ້​ສ້ອມແປງ ແລະ ຟື້ນ​ຟູ ທັງ​ໄດ້​ສ້ອມແປງ ແລະ ປົກ​ປັກ​ຮັກສາ​ທາງ​ຫຼວງ​ແຫ່ງ​ຊາດ​ທາງ​ເລກ 10 ເລກ 11 ເລກ 13 ເໜືອ 13 ໃຕ້ ຢ່າງ​ເປັນ​ປົກກະຕິ​ປະຕິບັດ​ສຳເລັດ 95% ຖາງ​ຫຍ້າ​ແຄມ​ທາງ​ຫຼວງ​ແຫ່ງ​ຊາດ 4 ເສັ້ນ​ສຳເລັດ 100% .

   ສ່ວນ​ວຽກ​ສ້ອມແປງ​ທາງ​ທີ່​ນຳ​ໃຊ້​ງົບປະມານ​ກອງ​ທຶນ​ບ້ວງ 20% ປະຈຳ​ປີ 2019 ຈຳນວນ 7.489 ລ້ານ​ກີບ ໄດ້​ນຳ​ໃຊ້​ເຂົ້າ​ໃນ​ການ​ສ້ອມແປງ​ຂົວ​ທາງ ແລະ ຮ່ອງ​ລະບາຍ​ນ້ຳ ລວມ​ມີ 33 ໂຄງການ ມອບ​ໃຫ້​ຫ້ອງການ ​ຍທຂ ເມືອງ ຈັດ​ຕັ້ງ​ປະຕິບັດ 19 ໂຄງການ ສາມາດ​ຈັດ​ຕັ້ງ​ປະຕິບັດ ສຳເລັດ 90% ນອກ​ນັ້ນ ໄດ້​ສ້ອມແປງ​ຟື້ນ​ຟູ​ເສັ້ນທາງ​ທີ່​ໄດ້​ຮັບ​ຜົນ​ກະທົບ​ຈາກ​ໄພພິບັດ​ທຳ​ມະ​ຊາດ 9 ໂຄງການ ປະຕິບັດ​ໄດ້ 75% ສ້ອມແປງ​ທາງ​ທີ່​ໃຊ້​ງົບປະມານ ປະຈຳ​ປີ 2019 ຂອງ ນວ 2 ໂຄງການ ມູນ​ຄ່າ 141 ລ້ານ​ກີບ ສຳເລັດ 100% ສືບຕໍ່​ຈັດ​ຕັ້ງ​ປະຕິບັດ​ໂຄງການ​ກໍ່ສ້າງ​ເສັ້ນທາງ​ສາຍ​ຫຼັກ​ຄື: ໂຄງການ​ກໍ່ສ້າງ​ທາງ​ຈີ່ນາຍ​ໂມ້-ບໍ່​ໂອ-ຊາຍ​ຟອງ​ເໜືອ ຍາວ 12 ກິໂລແມັດ ສຳເລັດ 100% ໂຄງການ​ເສັ້ນທາງ​ຕານ​ມີ​ໄຊ-ສາມ​ແຍກ​ສີ​ເກີດ ຍາວ 9,3 ກິໂລແມັດ ສຳເລັດ 78% ໂຄງການ​ກໍ່ສ້າງ​ເສັ້ນທາງ​ແຕ່​ດອນ​ນົກ​ຂຸ້ມ-ກຳແພງ​ເມືອງ-ຊຽງ​ດາ-ທາງ 450 ປີ ສຳເລັດ 76% ໂຄງການ​ກໍ່​ເສັ້ນທາງ​ເຊື່ອມ​ຕໍ່​ໝາຍ​ເລກ 0121-ສົ້ນ​ຂົວ​ນ້ຳ​ງື່ມ ບ້ານ​ທ່າ​ກົກ​ໄຮ ເມືອງ​ປາກ​ງື່ມ ສຳເລັດ 20% ໂຄງການ​ທີ່​ນຳ​ໃຊ້​ທຶນ​ສົມທົບ 5% ຂອງ​ລັດຖະບານ (ບ້ວງ​ເງິນ​ກູ້​ດອກ​ເບ້ຍ​ຕ່ຳ​ຈາກ​ຈີນ) ກໍ່ສ້າງ​ເສັ້ນທາງ​ຮ່ອມ​ເຊື່ອມ​ຕໍ່​ລະຫວ່າງ​ບ້ານ-ບ້ານ-ເມືອງ 32 ໂຄງການ ສຳເລັດ 95% ທັງ​ໄດ້​ສູ້​ຊົນ​ຈັດ​ຕັ້ງ​ປະຕິບັດ​ໄກ່​ເກ່ຍ​ສິ່ງ​ກີດຂວາງ​ຕາມ​ແລວ​ທາງ ໂດຍ​ສະເພາະ ໂຄງການ​ທີ່​ສຳຄັນ ແລະ ເປັນ​ໂຄງການ ບຸລິມະສິດ​ເຊັ່ນ: ວຽກ​ປະສານ​ງານ​ລົດໄຟ​ໄລຍະ ນວ ຍາວ 39,81 ກິໂລແມັດ​ຜ່ານ 2 ເມືອງ ໄກ່​ເກ່ຍ ແລະ ມອບ​ພື້ນ​ທີ່​ແລ້ວ 39,51 ກິໂລແມັດ ເທົ່າ​ກັບ 99,25% ທາງ​ດ່ວນ​ວຽງ​ຈັນ-ວັງ​ວຽງ ໄລຍະ ນວ ຍາວ 31 ກິໂລແມັດ ໄກ​ເກ່ຍ ແລະ ຈ່າຍ​ເງິນ​ຊົດ​ເຊີຍ​ສຳເລັດ 93% ທາງ​ດ່ວນ​ໝາຍ​ເລກ 1 ແຕ່​ໂນນ​ຫວາຍ-ດົງ​ໝາກຄາຍ ຍາວ 15 ກິໂລແມັດ ໄກ່​ເກ່ຍ ແລະ ໄດ້​ຈ່າຍ​ເງິນ​ຊົດ​ເຊີຍ​ສຳເລັດ 30% ຂອງ​ຈຳນວນ​ທີ່​ຖືກ​ຜົນ​ກະທົບ.

   ສຳລັບ​ແຜນການ​ຈຸດ​ສຸມ 3 ເດືອນ​ຕົ້ນ​ປີ 2020 ສືບຕໍ່​ສ້ອມແປງ​ຖະໜົນ​ຫົນທາງ​ທີ່​ເປັນ​ຂຸມ​ເປັນ​ບໍ່​ຕາມ​ເສັ້ນທາງ​ສາຍ​ຕ່າງໆ ດ້ວຍ​ການ​ຖົມ​ຂຸມ ຕາບ​ຢາງ ປ່ຽນ​ຝາ​ຂຸມ​ພັກ​ນ້ຳ ລວງ​ຮ່ອງ​ລະບາຍ​ນ້ຳ​ແຄມ​ທາງ​ທີ່​ອຸດ​ຕັນ​ຕາມ​ສາຍ​ທາງ​ຕ່າງໆ ສຸມ​ໃສ່​ສ້ອມແປງ ແລະ ຖາງ​ຫຍ້າ​ທາງ​ຫຼວງ​ແຫ່ງ​ຊາດ ສ້ອມແປງ​ເສັ້ນທາງ​ທີ່​ນຳ​ໃຊ້​ງົບປະມານ​ບ້ວງ​ກອງ​ທຶນ​ທາງ​ກະຊວງ ​ຍທຂ ມອບ​ໃຫ້ ນວ ໃຫ້​ສຳເລັດ 100% ສ້ອມແປງ ແລະ ຟື້ນ​ຟູ​ໂຄງການ​ໄພພິບັດ​ໃຫ້​ສຳເລັດ 100% ແລະ ສືບຕໍ່​ກໍ່ສ້າງ​ໂຄງການ​ທີ່​ຍັງ​ຄ້າງ​ຄາ​ໃຫ້​ສຳເລັດ​ຕາມ​ແຜນການ​ທີ່​ວາງ​ໄວ້.

ຂ່າວທີ່ກ່ຽວຂ້ອງ