ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 16-01-2020

1.630 16 ມ.ກ. 2020 ຫົວຂໍ້ຂ່າວອື່ນໆ

   ເລື່ອງ​ທີ່​ສັນ​ຫາ​ມາ​ເລົ່າ​ມື້­ນີ້ ລວມ​ມີ​ບັນ­ຫາ​ຮຽກ­ຮ້ອງ​ເພື່ອ​ເສລີ­ພາບ​ທາງ​ເພດ​ຢູ່​ມຽນ​ມາ ກົດ­ໝາຍ​ກ່ຽວ​ກັບ​ອາ­ກາດ​ຂອງ ນິວ​ຊີ​ແລນ ສຸດ​ທ້າຍ​ແມ່ນ​ມາດ​ຕະ­ການ​ສະ​ແກນ​ໃບ​ໜ້າ​ເພື່ອ​ເຂົ້າ​ເວັບ​ໄຊ​ອິນ​ເຕີ​ເນັດ​ຢູ່​ອົດ​ສະ​ຕຣາ​ລີ.

   ທີ່ ມຽນ​ມາ: ມີ​ຂ່າວ​ຈາກ​ມຽນ​ມາ ປະ­ເທດ​ບ້ານ​ໃກ້​ເຮືອນ​ຄຽງ​ຂອງ​ລາວ​ພວກ​ເຮົາ ທີ່​ບອກ​ວ່າ​ຢູ່​ປະ­ເທດ​ນີ້ ໄດ້​ມີ​ຂະ​ບວນ​ຮຽກ­ຮ້ອງ​ຄວາມ​ສະ­ເໜີ​ພາບ​ທາງ​ເພດ ໂດຍ​ໄດ້​ທວງ​ໃຫ້​ທາງ​ການ​ຍົກ­ເລີກ ມາດ­ຕາ 377 ຂອງ​ກົດ­ໝາຍ​ກ່ຽວ­ຂ້ອງ​ທີ່​ຫ້າມ​ພຶດ­ຕິ​ກຳ​ທີ່​ເປັນ​ການ​ຮັກ​ຮ່ວມ​ເພດ ໂດຍ​ມີ​ບົດ​ລົງ­ໂທດ​ຈຳ​ຄຸກ​ສູງ​ສຸດ 10 ປີ.

   ຂ່າວ​ບອກ​ວ່າ: ມຽນ​ມາ ເປັນ​ໜຶ່ງ​ໃນ​ຫຼາຍ​ກວ່າ 40 ປະ­ເທດ​ທີ່​ຍັງ​ນຳ​ໃຊ້​ກົດ­ໝາຍ​ຫ້າມ​ເລື່ອງ​ຮັກ​ຮ່ວມ​ເພດ ສ່ວນ​ຢູ່​ໃນ​ອາ​ຊຽນ​ນີ້​ກໍ​ມີ 3 ປະ­ເທດ ເຊັ່ນ: ມຽນ​ມາ ສິງ­ກະ­ໂປ ແລະ ມາ​ເລ​ເຊຍ ທີ່​ພວມ​ຊຸກ­ຍູ້​ໃຫ້​ລັດ­ຖະ­ບານ​ເປີດ​ກວ້າງ​ສິດ​ເສລີ­ພາບ​ເລື່ອງ​ເພດ ໂດຍ​ໄດ້​ຮຽກ­ຮ້ອງ​ໃຫ້​ທາງ​ການ​ຍົກ­ເລີກ​ມາດ​ຕະ­ການ​ຫ້າມ ແລະ ລົງ­ໂທດ​ຜູ້​ມີ​ພຶດ­ຕິ​ກຳ​ຮັກ​ຮ່ວມ​ເພດ.

   ຢູ່ ສປ ຈີນ: ຫວ່າງ​ບໍ່​ດົນ​ມາ​ນີ້​ກໍ​ໄດ້​ມີ​ການ​ປັບ­ປຸງ​ກົດ­ໝາຍ​ຄອບ­ຄົວ ໂດຍ​ໄດ້​ຢຶດ​ໝັ້ນ​ຫຼັກ­ການ​ທີ່​ວ່າ ການ​ແຕ່ງ­ດອງ ຫຼື ການ​ສ້າງ​ຄອບ­ຄົວ​ນັ້ນ ຕ້ອງ​ມີ​ຂຶ້ນ​ລະ­ຫວ່າງ​ເພດ​ຍິງ​ກັບ​ເພດ​ຊາຍ​ເທົ່າ​ນັ້ນ ຈຶ່ງ​ຈະ​ຖື​ວ່າ​ຖືກ­ຕ້ອງ​ຕາມ​ກົດ­ໝາຍ ແລະ ສອດ ຄ່ອງ​ກັບ​ຮີດ­ຄອງ​ປະ­ເພ­ນີ​ອັນ​ດີ­ງາມ​ຂອງ​ຈີນ ເຊິ່ງ​ກໍ​ແປ​ໄດ້​ຄວາມ​ໝາ­ຍວ່າ ກົດ­ໝາຍ ສປ ຈີນ ຈະ​ປະ­ຕິ­ເສດ​ການ​ແຕ່ງ­ດອງ​ລະ­ຫວ່າງ​ຄົນ​ເພດ​ດຽວ​ກັນ (ບົດ​ນີ້​ຮຽບ​ຮຽງ​ຈາກ​ໜັງ­ສື­ພິມ “ຜູ້​ແທນ​ປະ­ຊາ­ຊົນ” ຂອງ​ສະ­ພາ​ແຫ່ງ​ຊາດ ສະ­ບັບ​ທີ 630 ກາງ​ເດືອນ​ພະ­ຈິກ 2019).

   ທີ່ ນິວ​ຊີ​ແລນ: ກົດ­ໝາຍ​ວ່າ​ດ້ວຍ​ອາ­ກາດ​ທີ່​ຟັງ​ສີ​ແປກໆ​ຫູ​ນີ້ ໄດ້​ຖືກ​ຮັບ­ຮອງ​ເອົາ​ໃນ​ກາງ​ເດືອນ​ພະ­ຈິກ ປີ 2019 ຢູ່​ລັດ​ຖະ​ສະ­ພາ​ປະ­ເທດ​ນິວ​ຊີ​ແລນ ດ້ວຍ​ຄະ­ແນນ​ສຽງ​ຈາກ​ສະ­ມາ­ຊິກ​ລັດ​ຖະ​ສະ­ພາ​ເກືອບ​ທັງ​ໝົດ ເຈົ້າ­ກີ້­ເຈົ້າ­ການ​ໃນ​ການ​ຮ່າງ​ກົດ­ໝາຍ​ສະ­ບັບ​ນີ້ ໄດ້­ແກ່ ກະ­ຊວງ​ການ​ຄວບ​ຄຸມ​ການ​ປ່ຽນ­ແປງ​ສະ­ພາບ​ດິນ​ຟ້າ​ອາ­ກາດ​ຂອງ​ປະ­ເທດ​ນີ້​ເອງ.

   ການ​ຮັບ­ຮອງ​ເອົາ​ກົດ­ໝາຍ​ວ່າ​ດ້ວຍ​ອາ­ກາດ ໄດ້​ເຮັດ​ໃຫ້​ນິວ​ຊີ​ແລນ ກາຍ­ເປັນ​ປະ­ເທດ​ອອກ​ໜ້າ​ພາ​ທາງ​ໝູ່ ໃນ​ການ​ແກ້​ໄຂ​ບັນ­ຫາ​ການ​ປ່ຽນ­ແປງ​ຂອງ​ສະ­ພາບ​ດິນ​ຟ້າ​ອາ­ກາດ ທີ່​ສອດ­ຄ່ອງ​ກັບ​ເປົ້າ​ໝາຍ​ການ​ຫຼຸດ­ຜ່ອນ​ພາ­ວະ​ໂລກ​ຮ້ອນ ຕາມ​ຂໍ້​ຕົກ­ລົງ​ຂອງ​ກອງ​ປະ­ຊຸມ​ລະ­ດັບ​ໂລກ​ຢູ່​ນະ­ຄອນ­ຫຼວງ​ປາ​ຣີ ປະ­ເທດ​ຝຣັ່ງ ໃນ​ປີ 2015.

   ກົດ­ໝາຍ​ວ່າ​ດ້ວຍ​ອາ­ກາດ​ຂອງ​ນິວ​ຊີ​ແລນ ໄດ້​ຕັ້ງ​ເປົ້າ​ໝາຍ​ຫຼຸດ­ຜ່ອນ​ການ​ປ່ອຍ​ທາດ​ອາຍ​ກາກ​ບອນ​ໃຫ້​ເຫຼືອ​ສູນ ແປ​ວ່າ​ໃຫ້​ໄດ້​ເຕັມ 100% ພາຍ​ໃນ​ປີ 2050 ກົດ­ໝາຍ​ສະ­ບັບ​ນີ້​ຍັງ​ໄດ້​ກຳ­ນົດ​ເປົ້າ​ໝາຍ​ຫຼຸດ­ຜ່ອນ​ການ​ປ່ອຍ​ທາດ​ອາຍ​ເຮືອນ​ແກ້ວ ໂດຍ​ໄດ້​ສ້າງ​ເປັນ​ຂໍ້​ບັງ­ຄັບ​ທາງ​ກົດ­ໝາຍ ເຊິ່ງ​ລັດ­ຖະ­ບານ​ຕ້ອງ​ມີ​ງົບ­ປະ­ມານ ແລະ ມາດ​ຕະ­ການ​ໃນ​ພາກ​ປະ­ຕິ­ບັດ​ຕົວ​ຈິງ​ອີກ​ດ້ວຍ.

   ທີ່ ອົດ​ສະ​ຕຣາ​ລີ: ມີ​ຂ່າວ​ອອກ​ມາ​ຈາກ​ປະ­ເທດ​ອົດ​ສະ​ຕຣາ​ລີ ໃນ​ທ້າຍ​ປີ 2019 ວ່າ: ລັດ​ຖະ​ສະ­ພາ​ຂອງ​ປະ­ເທດ​ນີ້ ໄດ້​ກະ­ກຽມ​ອອກ​ກົດ­ໝາຍ​ວ່າ​ດ້ວຍ​ການ​ໃຊ້​ອິນ​ເຕີ​ເນັດ​ທີ່​ມີ​ການ​ຈຳ­ກັດ​ອາ­ຍຸ ຮ່າງ​ກົດ­ໝາຍ​ສະ­ບັບ​ນີ້​ຈະ​ກຳ­ນົດ​ໃຫ້​ຜູ້​ໃຊ້​ອິນ​ເຕີ​ເນັດ ສະ​ແກນ​ໃບ​ໜ້າ​ຂອງ​ຕົນ​ເອງ​ກ່ອນ​ຈະ​ເຂົ້າ​ເວັບ​ໄຊ ເພື່ອ​ຢັ້ງ­ຢືນ​ວ່າ​ຜູ້​ໃຊ້​ຢູ່​ໃນ​ເກນ​ອາ­ຍຸ ທີ່​ຈະ​ເຂົ້າ​ເບິ່ງ​ລາຍ­ການ​ທີ່​ກ່ຽວ­ຂ້ອງ​ໄດ້ ທັງ​ນີ້ ກໍ​ເພື່ອ​ປ້ອງ​ກັນ​ບໍ່​ໃຫ້​ຜູ້​ຢູ່​ໃນ​ເກນ​ອາ­ຍຸ​ຕ້ອງ​ຫ້າມ ເຂົ້າ​ເຖິງ​ເວັບ​ໄຊ​ທີ່​ບໍ່​ເໝາະ​ສົມ ເຊັ່ນ: ເລື່ອງ​ທີ່​ມີ​ເນື້ອ​ໃນ​ໃຊ້​ຄວາມ​ຮຸນ​ແຮງ ການ​ພະ­ນັນ ເນື້ອ​ໃນ​ລາ­ມົກ (ກາ​ຕູນ​ຜູ້​ໃຫຍ່) ດັ່ງ­ນີ້​ເປັນ­ຕົ້ນ ການ​ສະ​ແກນ​ໃບ​ໜ້າ​ເພື່ອ​ຢັ້ງ­ຢືນ​ເກນ​ອາ­ຍຸ​ຂອງ​ຜູ້​ຊົມ­ໃຊ້ ກ່ອນ​ຈະ​ເຂົ້າ​ເຖິງ​ເວັບ​ໄຊ​ໄດ້​ນັ້ນ ປະ­ເທດ​ແດນ​ມາກ ແລະ ອິ​ຕາ​ລີ ໄດ້​ເຄີຍ​ປະ­ຕິ­ບັດ​ມາ​ກ່ອນ​ໜ້າ​ແລ້ວ.

ຂ່າວທີ່ກ່ຽວຂ້ອງ