ຂ່າວຫຼ້າສຸດ

ງານບຸນມະໂຫລານເທສະການກຸດຈີນ ປະຈຳປີ 2020 ຈັດຂຶ້ນຢ່າງຄຶກຄື້ນ

1.025 15 ມ.ກ. 2020 ຂ່າວໜ້າ​ໜຶ່ງ
ງານບຸນມະໂຫລານເທສະການກຸດຈີນ ປະຈຳປີ 2020 ຈັດຂຶ້ນຢ່າງຄຶກຄື້ນ

   ສູ­ນວັດ­ທະ­ນະ­ທຳ​ຈີນ ປະ­ຈຳ ສປປ ລາວ ຮ່ວມ​ກັບ​ພະ​ແນກ​ວັດ­ທະ­ນະ­ທຳ ວິ­ທະ­ຍຸ-ໂທລະ­ພາບ ແລະ ການ­ທ່ອງ­ທ່ຽວ ນະ­ຄອນ​ເສິງ​ຕູ່ ສປ ຈີນ ໄດ້​ຈັດ​ງານ “ບຸນ­ມະ­ໂຫ­ລານ ເທ​ສະ­ການ​ກຸດ​ຈີນ” ປະ­ຈຳ​ປີ 2020 ຂຶ້ນ​ຢ່າງ​ຄຶກ­ຄື້ນ ໃນ​ລະ­ຫວ່າງ​ວັນ​ທີ 11-12 ມັງ­ກອນ 2020 ຢູ່​ຫໍ​ວັດ­ທະ­ນະ­ທຳ​ແຫ່ງ​ຊາດ ນະ­ຄອນ­ຫຼວງ​ວຽງ​ຈັນ ໂດຍ​ມີ ທ່ານ ກິ​ແກ້ວ ໄຂ​ຄຳ​ພິ­ທູນ ລັດ­ຖະ­ມົນ­ຕີ ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ທ່ານ ຈ່ຽງ​ຈ້າຍ​ຕົ່ງ ເອກ​ອັກ​ຄະ​ລັດ​ຖະ​ທູດ​ຈີນ ປະ­ຈຳ ສປປ ລາວ ມີ​ບັນ­ດາ​ທູ­ຕາ­ນຸ­ທູດ​ປະ­ເທດ​ຕ່າງໆ ປະ­ຈຳ ສປປ ລາວ ພີ່­ນ້ອງ​ຊາວ​ລາວ ຊາວ​ຈີນ ພ້ອມ​ດ້ວຍ​ຊາວ​ຈີນ​ພົ້ນ​ທະ­ເລ​ເຂົ້າ​ຮ່ວມ.

   ໃນ​ງານ​ເທ​ສະ­ການ​ກຸດ​ຈີນ​ປີ​ນີ້ ເຕັມ​ໄປ​ດ້ວຍ​ບັນ­ຍາ­ກາດ​ອັນ​ຄຶກ­ຄື້ນ​ມ່ວນ­ຊື່ນ ເຊິ່ງ​ນັກ­ສະ­ແດງ​ຈາກ​ໂຮງ­ຮຽນ​ວັດ­ທະ­ນະ­ທຳ ແລະ ສິ­ລະ​ປະ ນະ­ຄອນ​ເສິງ​ຕູ່ ໄດ້​ນຳ​ເອົາ​ການ­ສະ­ແດງ​ທີ່​ໜ້າ​ຕື່ນ­ເຕັ້ນ​ມາ​ສະ­ແດງ​ໃຫ້​ໄດ້​ເບິ່ງ​ໄດ້​ຊົມ ເປັນ­ຕົ້ນ ບົດ​ຟ້ອນ ຮ້ອງ­ເພງ ກາ​ຍະ​ສິນ ສະ­ແດງ​ງິ້ວ ວູ​ຊູ ມາ­ຍາ​ກົນ ແລະ ອື່ນໆ.

   ພ້ອມ​ນີ້ ຍັງ​ມີ​ກິດ­ຈະ­ກຳ​ຈັບ​ສະ­ຫຼາກ ແຈກ​ຂອງ​ລາ­ງວັນ​ໃຫ້​ຜູ້​ໂຊກ​ດີ ທີ່​ເຂົ້າ​ຮ່ວມ​ງານ ອີກ​ຫຼາກ​ຫຼາຍ​ລາ­ງວັນ ເຊັ່ນ: ຜະ­ລິດ​ຕະ​ພັນ​ຮຸ່ນ​ໃໝ່​ລ້າ​ສຸດ​ຈາກ​ໂທລະ­ສັບ​ມື​ຖື​ຫົວ​ເຫວີຍ ແລະ ອັອບ​ໂປ້ ນອກ​ນັ້ນ ຍັງ​ມີ​ໂມງ ສາຍ​ຟັງ​ຫູ ຕຸກ­ກະ­ຕາ ແລະ ອື່ນໆ.

   ນອກ​ນັ້ນ ຍັງ​ມີ​ກາ­ນວາງ­ສະ­ແດງ​ອາ­ຫານ​ຈີນ ວາງ­ສະ­ແດງ ດ້ານ​ປະ­ເພ­ນີ​ຈີນ ການ​ຫຼິ້ນ​ເກມ​ແບບ​ພື້ນ­ເມືອງ​ຂອງ​ຈີນ ແລະ ກິດ­ຈະ­ກຳ​ອື່ນໆ ອີກ​ຢ່າງ​ຫຼວງ­ຫຼາຍ ພ້ອມ​ນີ້ ບັນ­ດາ​ພໍ່­ຄົວ​ທີ່​ມີ​ຊື່​ສຽງ​ຂອງ​ຈີນ ກໍ​ໄດ້​ສະ­ແດງ​ເຕັກ­ນິກ ແລະ ວັດ­ທະ­ນະ­ທຳ ການ​ປຸງ​ແຕ່ງ­ອາ­ຫານ​ຈີນ ອາ­ຫານ​ທີ່​ມີ​ສີ­ສັນ​ສວຍ​ງາມ ກິ່ນ​ທີ່​ຫອມ​ຫວານ ແລະ ລົດ​ຊາດ​ທີ່​ແຊບ​ຊ້ອຍ​ຂອງ​ຈີນ ວາງ­ສະ­ແດງ​ຮູບ­ແຕ້ມ​ນ້ຳ­ຕານ ຮູບ­ແຕ້ມ​ເປືອກ​ໄຂ່ ການ​ປັ້ນ​ຕຸກ­ກະ­ຕາ​ແປ້ງ ໜັງ​ປະ​ລັດ​ຕື້ ແລະ ກາ­ນວາງ­ສະ­ແດງ​ອື່ນໆ ທີ່​ເປັນ​ປະ­ເພ­ນີ​ພື້ນ­ເມືອງ​ຂອງ ສປ ຈີນ.

   ງານ “ບຸນ­ມະ­ໂຫ­ລານ ເທ​ສະ­ການ​ກຸດ​ຈີນ” ເລີ່ມ​ຈັດ​ທີ່ ສປປ ລາວ ຕັ້ງ­ແຕ່ ປີ 2015 ເປັນ­ຕົ້ນ​ມາ ເຊິ່ງ​ປີ​ນີ້​ກໍ່​ເປັນ​ປີ​ທີ 6 ເປັນ​ງານ​ບຸນ​ທີ່​ສຳ­ຄັນ ເພື່ອ​ໃຫ້​ມວນ​ຊົນ​ລາວ ຊາວ​ຈີນ ແລະ ຊາວ​ຈີນ​ພົ້ນ​ທະ­ເລ ໄດ້​ສຳ­ຜັດ​ກັບ​ວັດ­ທະ­ນະ­ທຳ​ອັນ​ດີ­ງາມ​ຂອງ ສປ ຈີນ ທັງ​ເປັນ​ການ​ຊົມ­ເຊີຍ​ຕໍ່​ຜົນ­ສຳ­ເລັດ​ອັນ​ຈົບ­ງາມ​ຂອງ​ປີ​ທ່ອງ​ທ່ຽວ​ລາວ-ຈີນ 2019 ທີ່​ຜ່ານ​ມາ ພ້ອມ​ນັ້ນ ກໍ່​ເປັນ​ການ​ເປີດ​ສັກ­ກະ­ຫຼາດ​ໃໝ່ ແຫ່ງ​ການ​ຮ່ວມ​ມື​ແລກ­ປ່ຽນ​ທາງ​ດ້ານ​ວັດ­ທະ­ນະ­ທຳ ແລະ ທ່ອງ​ທ່ຽວ ລາວ-ຈີນ ໃຫ້​ນັບ​ມື້​ກ້າວ​ສູ່​ລວງ​ເລີກ ແລະ ແຕກ​ດອກ​ອອກ​ຜົນ​ຍິ່ງໆ​ຂຶ້ນ.

ຂ່າວທີ່ກ່ຽວຂ້ອງ