ຂ່າວຫຼ້າສຸດ

ພຸດທະພານິດ

3.290 15 ມ.ກ. 2020 ນານາສາລະ

   ໃນ​ຍຸກ​ເສດ­ຖະ­ກິດ​ປາກ​ທ້ອງ​ເປັນ​ໃຫຍ່ ການ​ຄ້າ­ຂາຍ​ມີ​ຂີດ​ແຂ່ງ­ຂັນ​ກັນ​ສູງ​ຕ່າງ​ຝ່າຍ ກໍ​ສະ­ແຫວງ­ຫາ​ປະ­ໂຫຍດ​ໃຫ້​ໄດ້​ຫຼາຍ​ທີ່​ສຸດ ນີ້​ແມ່ນ​ສ່ວນ​ໜຶ່ງ​ຂອງ​ໝາກ­ຜົນ​ທຶນ​ນິ­ຍົມ ສະ­ຕະ­ວັດ​ທີ 21 ເຊິ່ງ​ມັນ​ໄດ້​ແຜ່​ລາມ​ເຂົ້າ​ໄປ​ໃນ​ສາ­ສະ­ໜາ​ເຊັ່ນ: ບ້ານ​ເຮົາ​ຈະ​ໄດ້​ຍິນ​ຄຳ​ວ່າ: ພຸດ​ທະ​ພາ­ນິດ ທີ່​ກິນ​ຄວາມ​ໝາຍ​ກວ້າງ ແລະ ມີ​ພຶດ­ຕິ​ກຳ​ຫຼາກ​ຫຼາຍ​ຮູບ​ແບບ​ເພື່ອ​ມຸ່ງ​ໄປ​ສູ່​ການ​ສະ​ສົມ​ຊັບ ໃນ​ນີ້​ບຸນ​ຈຶ່ງ​ອາດ​ຖືກ​ຕີ​ເປັນ​ລາ­ຄາ​ແລ້ວ​ພາ­ກັນ​ຂາຍ​ບຸນ​ກິນ.

   ຖ້າ​ຈະ​ໃຫ້​ເວົ້າ​ກົງ​ໄປ​ກົງ​ມາ​ສັງ­ຄົມ​ຊາວ​ພຸດ​ປະ­ເທດ​ໃກ້​ຄຽງ​ບ້ານ​ເຮົາ ກໍ​ມີ​ຕົວ­ຢ່າງ​ໃຫ້​ເຫັນ​ວ່າ: ພວກ​ເຂົາ​ຂາຍ​ນາ­ລົກ-ຂາຍ​ສະ­ຫວັນ​ກິນ ເພື່ອ​ມຸ່ງ​ໄປ​ສູ່​ໂລກ​ຂອງ​ວັດ­ຖຸ​ນິ­ຍົມ ການ​ແຂ່ງ­ຂັນ​ໃຊ້ ຫຼື ສະ​ສົມ​ວັດ­ຖຸ​ລາ­ຄາ​ແພງ​ທີ່​ເຂົາ​ຖື​ເປັນ­ຄວາມ​ປາດ​ຖະ​ໜາ ຈົນ​ພາ­ກັນ​ໝູນ​ໃຊ້​ຫຼັກ​ທຳ​ຄຳ​ສອນ​ໄປ​ໃນ​ທາງ​ບ່ຽງ​ເບນ-ລໍ້​ລວງ ຫຼື ສອນ​ແບບ​ປະ­ຈົບ­ປະ­ແຈງ ຂໍ​ພຽງ​ໃຫ້​ຖືກ​ໃຈ​ຜູ້​ຟັງ​ຍອມ​ຈົກ​ຖົງ​ໂມ­ທະ­ນາ​ບຸນ​ຖື​ເປັນ­ຄວາມ​ສຳ­ເລັດ ເຊິ່ງ​ຕ່າງ​ກັບ​ຫຼັກ ການ​ເດີມ​ທີ່​ພະ­ພຸດ­ທະ­ເຈົ້າ​ສອນ ຫຼື ເທດ​ໃຫ້​ຄົນ­ຮູ້​ແຈ້ງ-ເກີດ​ປັນ­ຍາ​ຄື​ໃຫ້​ຮູ້ ຊົ່ວ-ດີ ແລະ ຜິດ-ຖືກ.

   ຍາ​ທ່ານ ງອນ ດຳ­ລົງ​ບຸນ ປະ­ທານ​ສົງ​ລາວ ເພິ່ນ​ເຄີຍ​ເທດ​ສອນ​ໄວ້​ວ່າ: ໂກນ​ໄມ້​ຖືກ​ໃຈ​ກະ­ຮອກ ພະ​ກອກ​ວອກ​ກອກ​ແວກ​ຖືກ​ໃຈ​ຍາດ​ໂຍມ ຖ້າ​ເຮົາ​ຕີ​ຄວາມ​ໃຫ້​ແຈ້ງ​ດ້ວຍ​ປັນ­ຍາ​ໝາຍ​ຄວາມ​ວ່າ: ການ​ເທດ-ການ​ສອນ ຫຼື ພຶດ­ຕິ​ກຳ​ຊາວ​ພຸດ​ເອງ​ກຳ­ລັງ​ສັ່ນ​ຄອນ ແລະ ຫຼຸດ​ຖອຍ ເບິ່ງ​ຄື​ວ່າ: ການ​ຮັກ­ສາ​ສັດ­ທາ​ໄດ້​ແຕ່​ການ​ສ້າງ​ປັນ­ຍາ​ນັ້ນ​ຍັງ​ຫ່າງ​ໄກ ການ​ເຮັດ­ບຸນ​ຂອງ​ຊາວ​ພຸດ​ທຸກ​ມື້­ນີ້ ຈຶ່ງ​ເປັນ​ທີ່​ສົງ­ໄສ​ຂອງ​ຊາວ​ພຸດ​ບາງ​ພວກ​ບາງ​ກຸ່ມ​ວ່າ​ເຮັດ­ບຸນ​ແບບ​ໃດ​ຖືກ​ແທ້ ຫຼື ເຮັດ­ບຸນ​ແບບ​ໃດ​ເພື່ອ​ສ້າງ​ສະ­ຕິ​ປັນ­ຍາ​ໃຫ້​ເກີດ​ຂຶ້ນ ຫຼື ວ່າ​ເຮົາ​ຈະ​ຍິນ​ດີ​ພຽງ​ແຕ່​ມີ​ສັດ­ທາ ແລະ ພິ­ທີ­ກຳ​ທີ່​ຍັງ​ບໍ່​ແມ່ນ​ແກ່ນ​ຂອງ​ສາ­ສະ­ໜາ.

   ພຸດ​ທະ​ພາ­ນິດ ແມ່ນ​ຂະ​ບວນ​ການ​ໜຶ່ງ​ຂອງ​ຊາວ​ພຸດ​ບາງ​ກຸ່ມ ບາງ​ພວກ​ທີ່​ໝູນ​ໃຊ້​ພຸດ​ທະ​ສາ­ສະ­ໜາ​ເປັນ​ເຄື່ອງ­ມື​ຫາ​ກິນ ເຊິ່ງ​ມີ​ບຸນ​ເປັນ​ໂຕ​ນຳ​ທາງ​ຢ່າ​ລືມ​ວ່າ: ບຸນ​ຄື​ການ​ສ້າງ​ຄວາມ​ດີ ຕາບ­ໃດ​ຊາວ​ພຸດ​ຍັງ​ຂາດ​ປັນ­ຍາ​ທີ່​ຈະ​ຮູ້​ວ່າ: ອັນ​ໃດ​ຄື​ບຸນ​ແທ້-ບຸນ​ປອມ ແລະ ອັນ​ໃດ​ຄື​ສັດ­ທາ ແລະ ປັນ­ຍາ ບຸນ​ທີ່​ວ່າ​ນັ້ນ​ກໍ​ຍັງ​ນຳ​ທາງ​ບັງ​ໜ້າ​ເປັນ​ຂໍ້​ອ້າງ​ແກ່​ກຸ່ມ​ຄົນ​ແອບ​ແຝງ​ໄດ້...!

ຂ່າວທີ່ກ່ຽວຂ້ອງ