ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 15-01-2020

1.404 15 ມ.ກ. 2020 ຫົວຂໍ້ຂ່າວອື່ນໆ

   ພົບ​ກັນ​ປະ­ຈຳ​ວັນ​ນີ້ ຂໍ​ເລີ່ມ​ຈາກ​ເລື່ອງ​ປະ­ເທດ​ໂຮນ​ລັງ ປັບ​ຫຼຸດ​ຄວາມ​ໄວ​ສູງ​ສຸດ​ໃນ​ການ​ຂັບ​ລົດ ແລະ ເລື່ອງ​ທາງ​ການ​ອິນ​ເດຍ ເປີດ​ກວ້າງ​ນະ­ໂຍ­ບາຍ​ໃຫ້​ສັນ­ຊາດ.

   ທີ່ ໂຮນ​ລັງ: ຂ່າວ​ຕ່າງ­ປະ­ເທດ​ໃນ​ກາງ​ເດືອນ​ພະ­ຈິກ ປີ 2019 ບອກ​ໃຫ້​ຮູ້​ວ່າ: ນັບ​ແຕ່​ປີ 2020 ເປັນ­ຕົ້ນ​ໄປ ການ​ຂັບ​ລົດ​ໃນ​ຄວາມ​ໄວ​ສູງ​ສຸດ​ຢູ່​ປະ­ເທດ​ໂຮນ​ລັງ ຈະ​ຫຼຸດ​ລົງ​ຈາກ 130 ກິ­ໂລ­ແມັດ/ໂມງ ມາ​ເປັນ 100 ກິ­ໂລ­ແມັດ/ໂມງ ທັງ​ນີ້ ກໍ​ເພື່ອ​ໃຫ້​ເປັນ​ໄປ​ຕາມ​ມາດ­ຕະ­ຖານ​ຂອງ​ບັນ­ດາ​ປະ­ເທດ​ສະ­ມາ­ຊິກ​ສະ­ຫະ­ພາບ​ເອີ​ຣົບ ເຊິ່ງ​ປະ­ເທດ​ໂຮນ​ລັງ​ກໍ​ເປັນ​ສະ­ມາ­ຊິກ​ດ້ວຍ ການ​ຂັບ​ຂີ່​ໃນ​ຄວາມ​ໄວ​ສູງ​ສຸດ 130 Km/ໂມງ ຕາມ​ກົດ­ໝາຍ​ເກົ່າ​ຂອງ​ປະ­ເທດ​ນີ້​ນັ້ນ ໄດ້​ເປັນ­ຕົ້ນ​ເຫດ​ກໍ່­ໃຫ້­ເກີດ​ອາຍ​ອາ​ໂມ​ເນຍ ອົກ​ຊີ​ເດິ​ນິ​ຕຼູ ເຊິ່ງ​ເປັນ​ທາດ​ພິດ​ສ້າງ​ມົນ​ລະ​ພິດ​ທາງ​ອາ­ກາດ ເຊິ່ງ​ຖື​ວ່າ​ເປັນ​ການ​ລະ­ເມີດ​ກົດ­ໝາຍ​ຄວບ​ຄຸມ​ມົນ​ລະ​ພິດ​ຂອງ​ສະ­ຫະ­ພາບ​ເອີ​ຣົບ.

   ກົດ­ໝາຍ​ກຳ­ນົດ​ຄວາມ​ໄວ​ສູງ​ສຸດ (ຈາກ 130 ມາ​ເປັນ 100Km/ໂມງ) ໃໝ່​ສະ­ບັບ​ນີ້ ແມ່ນ​ຂໍ້​ລິ​ເລີ່ມ​ຂອງ​ທ່ານ ມາກ ລູດ ນາ­ຍົກ​ລັດ​ຖະ​ມັນ​ຕີ​ໂຮນ​ລັງ ພາຍ­ຫຼັງ​ສານ​ສູງ​ຂອງ​ປະ­ເທດ​ນີ້​ໄດ້​ພິ­ຈາ­ລະ­ນາ​ວ່າ ຄວາມ​ໄວ​ສູງ​ສຸດ​ໃນ​ການ​ຂັບ​ຂີ່​ທີ່​ກຳ­ນົດ​ຢູ່​ກົດ­ໝາຍ​ສະ­ບັບ​ເກົ່າ​ນັ້ນ ຂັດ​ກັບ​ກົດ­ໝາຍ​ຂອງ​ສະ­ຫະ­ພາບ​ເອີ​ຣົບ ການ​ຂັບ​ຂີ່​ໃນ​ຄວາມ​ໄວ​ສູງ​ສຸດ 100 Km/ໂມງ ຕາມ​ກົດ­ໝາຍ​ສະ­ບັບ​ໃໝ່​ນີ້ ກວມ​ເອົາ​ໄລ­ຍະ​ແຕ່ 7:00-18:00 ໂມງ.

   ທີ່ ອິນ​ເດຍ: ໃນ​ວັນ​ທີ 12 ເດືອນ​ທັນ­ວາ ປີ 2019 ລັດ​ຖະ​ສະ­ພາ​ອິນ​ເດຍ​ໄດ້​ລົງ​ຄະ­ແນນ​ສຽງ​ຮັບ­ຮອງ​ເອົາ​ກົດ­ໝາຍ​ວ່າ​ດ້ວຍ​ສັນ­ຊາດ ສະ­ບັບ​ປັບ­ປຸງ ດ້ວຍ​ສຽງ​ສ່ວນ​ຫຼາຍ​ລະ­ດັບ​ສູ​ສີ ຄື: 125 ສຽງ​ເຫັນ​ດີ ຕໍ່ 105 ສຽງ​ຄັດ­ຄ້ານ ເປັນ​ກົດ­ໝາຍ​ທີ່​ມີ​ລັກ­ສະ­ນະ​ເປີດ​ກວ້າງ​ຕາມ​ຫຼັກ​ມະ­ນຸດ­ສະ­ທຳ ເພາະ​ໄດ້​ກຳ­ນົດ​ກ່ຽວ​ກັບ​ການ​ມອບ​ສັນ­ຊາດ​ອິນ​ເດຍ ໃຫ້​ແກ່​ຜູ້​ອົບ​ພະ​ຍົບ​ທີ່​ເຂົ້າ​ໄປ​ອາ­ໄສ​ຢູ່​ອິນ​ເດຍ​ແບບ​ຜິດ​ກົດ­ໝາຍ ສ່ວນ​ກົດ­ໝາຍ​ສັນ­ຊາດ​ສະ­ບັບ​ເກົ່າ​ຂອງ​ອິນ​ເດຍ​ນັ້ນ ໄດ້​ກຳ­ນົດ​ຫ້າມ​ມອບ​ສັນ­ຊາດ​ໃຫ້​ແກ່​ຜູ້​ອົບ​ພະ​ຍົບ ຫຼື ບຸກ­ຄົນ​ທີ່​ລັກ­ລອບ​ເຂົ້າ​ເມືອງ​ຢ່າງ​ເດັດ­ຂາດ ສ່ວນ​ບຸກ­ຄົນ​ຕ່າງ­ປະ­ເທດ​ທີ່​ມີ​ສິດ​ຍື່ນ​ຄຳ​ຮ້ອງ​ຂໍ​ສັນ­ຊາດ​ອິນ​ເດຍ ຕ້ອງ​ແມ່ນ​ຜູ້​ທີ່​ໄດ້​ອາ­ໄສ​ຢູ່ ຫຼື ເຮັດ​ວຽກ​ໃຫ້​ທາງ​ການ​ຂອງ​ອິນ​ເດຍ​ຢູ່​ໃນ​ປະ­ເທດ​ອິນ​ເດຍ​ມາ​ແລ້ວ​ຢ່າງ​ໜ້ອຍ 11 ປີ ສ່ວນ​ກົດ­ໝາຍ​ສະ­ບັບ​ປັບ­ປຸງ​ນີ້ ນອກ­ຈາກ​ກຳ­ນົດ​ໃຫ້​ສັນ­ຊາດ​ແກ່​ຊາວ​ອົບ​ພະ​ຍົບ ກໍ​ຄື ບຸກ­ຄົນ​ທີ່​ເຂົ້າ​ເມືອງ​ແບບ​ຜິດ​ກົດ­ໝາຍ​ນີ້ ຍັງ​ໄດ້​ກວມ​ເອົາ​ຊົນ­ເຜົ່າ​ນ້ອຍ​ທີ່​ແຍກ​ຕົວ​ອອກ​ຈາກ​ສັງ­ຄົມ ເພື່ອ​ຫຼົບ​ຫຼີກ​ການ​ກົດ​ຂີ່​ຂູດ​ຮີດ​ທາງ​ສັງ­ຄົມ ແລະ ສາ­ສະ­ໜາ ຈາກ 3 ປະ­ເທດ​ໃກ້​ຄຽງ ເຊິ່ງ​ໄດ້­ແກ່ ອາ​ຟະ​ກາ​ນິດ​ສະ­ຖານ ບັງ​ກລາ​ເທດ ແລະ ປາ​ກິດ​ສະ­ຖານ ແນວ­ໃດ​ກໍ​ດີ ພົນ­ລະ­ເມືອງ​ຈາກ​ປະ­ເທດ​ເຫຼົ່າ​ນີ້ ຕ້ອງ​ໄດ້​ຍື່ນ​ຄຳ​ຮ້ອງ​ຂໍ​ສັນ­ຊາດ​ຢ່າງ​ເປັນ​ທາງ​ການ ແລະ ຕ້ອງ​ມີ​ຫຼັກ​ຖານ​ພິ­ສູດ​ວ່າ​ຕົນ​ໄດ້​ເຂົ້າ​ໄປ​ອິນ​ເດຍ ກ່ອນ​ປີ 2015 ແລະ ຕ້ອງ​ບໍ່​ແມ່ນ​ຊົນ­ເຜົ່າ​ທີ່​ນັບ­ຖື​ສາ­ສະ­ໜາ​ມຸດ​ສະ​ລິມ.

   ກົດ­ໝາຍ​ສັນ­ຊາດ​ສະ­ບັບ​ປັບ­ປຸງ​ຂອງ​ອິນ​ເດຍ ສະ­ບັບ​ນີ້ ຍັງ​ໄດ້​ກຳ­ນົດ​ສິດ​ໃຫ້​ທາງ​ການ​ສາ­ມາດ​ຖອນ​ສັນ­ຊາດ​ຄືນ​ໄດ້ ຖ້າ​ບຸກ­ຄົນ​ທີ່​ໄດ້​ສັນ­ຊາດ​ກໍ່​ຄະ­ດີ​ທີ່​ມີ​ຄວາມ​ຜິດ​ຂັ້ນ​ຮ້າຍ​ແຮງ ກົດ­ໝາຍ​ສະ­ບັບ​ນີ້ ໄດ້​ສ້າງ​ຄວາມ​ກັງ­ວົນ​ໃຫ້​ຫຼາຍ​ຝ່າຍ​ທີ່​ຖື​ວ່າ​ກົດ­ໝາຍ​ມີ​ເນື້ອ​ໃນ​ເລືອກ​ປະ­ຕິ­ບັດ ເພາະ​ມີ​ການ​ຈຳ­ແນກ​ສາ­ສະ­ໜາ ເຊິ່ງ​ບໍ່​ສອດ­ຄ່ອງ​ກັບ​ຫຼັກ­ການ​ພື້ນ­ຖານ​ຂອງ​ລັດ​ຖະ​ທຳ​ມະ­ນູນ​ອິນ​ເດຍ.

ຂ່າວທີ່ກ່ຽວຂ້ອງ