ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 14-01-2020

1.562 14 ມ.ກ. 2020 ຫົວຂໍ້ຂ່າວອື່ນໆ

   ມື້­ນີ້​ມີ​ເລື່ອງ​ເດັດໆ​ກ່ຽວ​ກັບ​ມາດ​ຕະ­ການ​ຕ້ານ​ການ​ສໍ້​ລາດ​ບັງ​ຫຼວງ-ການ​ທຸດ­ຈະ­ລິດ ແລະ ເລື່ອງ​ການ​ສະ­ກັດ​ຄຳ​ຄິດ​ເຫັນ​ດ້ານ​ການ​ພັດ­ທະ­ນາ​ຢູ່​ຫວຽດ­ນາມ ສຸດ​ທ້າຍ​ແມ່ນ​ເລື່ອງ​ຄະ­ດີ​ເຖົ້າ​ຫົວ​ງູ​ຢູ່​ມາ​ເລ​ເຊຍ.

   ທີ່ ຫວຽດ­ນາມ: ໃນ​ຄວາມ​ພະ­ຍາ­ຍາມ​ເພື່ອ​ຕ້ານ​ການ​ສໍ້​ລາດ​ບັງ​ຫຼວງ ແລະ ສະ­ກັດ​ກັ້ນ​ການ​ທຸດ­ຈະ­ລິດ​ນັ້ນ ໃນ​ຊຸມ​ປີ​ຫຼັງໆ​ມາ​ນີ້ ທາງ​ການ​ຫວຽດ­ນາມ ໄດ້​ມີ​ມາດ​ຕະ­ການ​ຕົວ​ຈິງ​ທີ່​ຄວນ​ເບິ່ງ​ໄວ້​ເປັນ​ບົດ­ຮຽນ.

   ໃນ​ເມື່ອ​ກ່ອນ​ລັດ­ຖະ­ບານ​ຫວຽດ­ນາມ ໄດ້​ອອກ​ຂໍ້​ກຳ­ນົດ​ໃຫ້​ພະ­ນັກ­ງານ​ລັດ​ສາ­ມາດ​ຮັບ​ຂອງ­ຂວັນ​ໃນ​ມູນ​ຄ່າ​ບໍ່​ເກີນ 500.000 ດົງ ໂດຍ​ບໍ່​ຈຳ­ເປັນ​ຕ້ອງ​ລາຍ​ງານ​ໃຫ້​ທາງ​ການ​ຊາບ ແຕ່​ຕົກ​ມາ​ໃນ​ວັນ​ທີ 3 ເດືອນ​ຕຸ­ລາ ປີ 2019 ກໍ​ໄດ້​ມີ​ຂ່າວ​ໃໝ່​ທີ່​ບອກ​ວ່າ ທາງ​ການ​ຫວຽດ­ນາມ ໄດ້​ອອກ​ຂໍ້​ກຳ­ນົດ​ໃໝ່​ທີ່​ກຳ­ນົດ​ໃຫ້​ພະ­ນັກ­ງານ​ຂອງ​ລັດ​ຕ້ອງ​ລາຍ​ງານ​ກ່ຽວ​ກັບ​ການ​ຮັບ​ຂອງ­ຂວັນ ເຖິງ​ແມ່ນ​ຈະ​ມີ​ມູນ​ຄ່າ​ພຽງ​ເລັກ​ນ້ອຍ​ກໍ​ຕາມ ນອກ​ນັ້ນ ຍັງ​ຕ້ອງ​ລາຍ​ງານ​ກ່ຽວ​ກັບ​ຄວາມ​ສຳ­ພັນ​ຂອງ​ຕົນ​ກັບ​ຜູ້​ທີ່​ໃຫ້​ຂອງ­ຂວັນ​ອີກ​ດ້ວຍ.

   ຂະ​ບວນ​ການ​ຕ້ານ​ການ​ສໍ້​ລາດ​ບັງ​ຫຼວງ​ຢູ່​ຫວຽດ­ນາມ​ນັ້ນ ເຮັດ​ກັນ​ຢ່າງ​ແຂ່ງ­ຂັນ ດ້ວຍ​ຮູບ​ການ​ອອກ​ຂໍ້​ກຳ­ນົດ ຂໍ້​ບັງ­ຄັບ​ຫ້າມ​ພະ­ນັກ­ງານ​ລັດ ສະ­ມາ­ຊິກ​ພັກ ຮັບ​ສິ່ງ​ຕອບ​ແທນ​ໃດໆ​ເປັນ​ຄ່າ​ໃຫ້​ບໍ­ລິ­ການ​ຂອງ​ຕົນ ນອກ­ຈາກ​ນັ້ນ ຍັງ​ມີ​ລະ­ບຽບ​ເຫຼັກ​ທີ່​ກຳ­ນົດ​ໃຫ້​ພະ­ນັກ­ງານ​ຂັ້ນ​ຫົວ­ໜ້າ​ຕ້ອງ​ຮັບ­ຜິດ­ຊອບ​ຕໍ່​ພຶດ­ຕິ​ກຳ​ທຸດ­ຈະ­ລິດ​ທຸກ​ຮູບ​ແບບ ໃນ​ການ​ແຕ່ງ­ຕັ້ງ ແລະ ຍົກ­ຍ້າຍ​ພະ­ນັກ­ງານ​ຂອງ​ເຫຼົ່າ​ພະ­ນັກ­ງານ​ກ່ຽວ­ຂ້ອງ​ທີ່­ຢູ່​ໃຕ້​ການ​ຄຸ້ມ​ຄອງ​ຂອງ​ຕົນ.

   ອີກ​ຂ່າວ​ໜຶ່ງ​ກ່ຽວ​ກັບ​ຫວຽດ­ນາມ ນັ້ນ ກໍ​ຄື ເລື່ອງ​ນະ­ໂຍ­ບາຍ “ຜະ­ລິດ​ທີ່​ຫວຽດ­ນາມ” (Made in Vietnam) ເຊິ່ງ​ໄດ້​ຮັບ​ການ​ລິ​ເລີ່ມ ແລະ ເປີດ­ເຜີຍ​ໂດຍ​ທ່ານ​ນາ­ຍົກ­ລັດ­ຖະ­ມົນ­ຕີ​ຫວຽດ­ນາມ ໃນ​ກອງ​ປະ­ຊຸມ​ເວ­ທີ​ເຕັກ​ໂນ​ໂລ​ຊີ​ແຫ່ງ​ຊາດ ຈັດ​ຂຶ້ນ​ໃນ​ເດືອນ​ມິ­ຖຸ­ນາ ປີ 2019 ນະ­ໂຍ­ບາຍ​ທີ່​ວ່າ​ນີ້​ມີ​ເປົ້າ​ໝາຍ​ເກັບ​ກຳ​ຂໍ້​ສະ­ເໜີ ຄຳ​ຄິດ​ຄຳ​ເຫັນ​ຂອງ​ເຫຼົ່າ​ປັນ­ຍາ​ຊົນ ນັກ­ປາດ ອາ­ຈານ ນັກ­ທຸ­ລະ­ກິດ ນັກ­ວິ­ທະ­ຍາ­ສາດ​ຂັ້ນ​ຫົວ​ກະ­ທິ ທັງ​ຢູ່​ພາຍ​ໃນ ແລະ ຢູ່​ຕ່າງ­ປະ­ເທດ ເພື່ອ​ເຮັດ​ໃຫ້​ນະ­ໂຍ­ບາຍ “ຜະ­ລິດ​ທີ່​ຫວຽດ­ນາມ” ກາຍ­ເປັນ​ຮູບ​ປະ​ທຳ.

   ໂດຍ​ສືບ­ຕໍ່​ນະ­ໂຍ­ບາຍ​ດັ່ງ­ກ່າວ ໜັງ­ສື­ພິມ​ວຽງ​ຈັນ​ທາມ (ວັນ​ທີ 19 ພະ­ຈິກ 2019) ໄດ້​ລາຍ​ງານ​ໃຫ້​ຊາບ​ວ່າ: ໃນ​ວັນ​ທີ 16 ເດືອນ​ພະ­ຈິກ 2019 ຢູ່​ນະ­ຄອນ­ຫຼວງ​ໂຕ​ກຽວ ຍີ່­ປຸ່ນ ໄດ້​ມີ​ກອງ​ປະ­ຊຸມ​ເພື່ອ​ລະ­ດົມ​ຄວາມ​ຄິດ​ເຫັນ​ຈາກ​ເຫຼົ່າ​ປັນ­ຍາ​ຊົນ​ຄົນ​ຫວຽດ­ນາມ ທີ່​ພວມ​ສຶກ​ສາ ແລະ ເຮັດ​ວຽກ​ຢູ່​ຍີ່­ປຸ່ນ ເຊິ່ງ​ມີ​ຜູ້​ເຂົ້າ​ຮ່ວມ​ເກືອບ 1.000 ຄົນ ຂ່າວ​ບອກ​ວ່າ: ກອງ​ປະ­ຊຸມ​ລະ­ດົມ​ຄຳ​ຄິດ​ເຫັນ​ນີ້​ແມ່ນ​ການ​ຈັດ​ຂຶ້ນ​ຕາມ​ຄຳ​ຮຽກ­ຮ້ອງ​ຂອງ​ເຫຼົ່າ​ປັນ­ຍາ​ຊົນ​ຫວຽດ­ນາມ-ຍີ່­ປຸ່ນ ທີ່​ຕ້ອງ­ການ​ປະ­ກອບ ສ່ວນ​ເຂົ້າ​ໃນ​ການ​ພັດ­ທະ­ນາ​ສ້າງ­ສາ​ບ້ານ​ເກີດ​ເມືອງ​ນອນ​ຂອງ​ພວກ​ຕົນ ໃນ​ກອງ​ປະ­ຊຸມ ທ່ານ ຟານ​ເຕິມ (Phan Tam) ຮອງ​ລັດ­ຖະ­ມົນ­ຕີ​ກະ­ຊວງ​ຖະ­ແຫຼງ​ຂ່າວ ແລະ ໂທລະ​ຄົມ­ມະ­ນາ­ຄົມ ຫວຽດ­ນາມ ໄດ້​ມີ​ຄຳ​ເຫັນ​ຕອນ​ໜຶ່ງ​ວ່າ ລັດ­ຖະ­ບານ​ຫວຽດ­ນາມ ມຸ່ງ​ໝັ້ນ​ສ້າງ​ເງື່ອນ­ໄຂ​ແວດ​ລ້ອມ​ທີ່​ໂປ່ງ​ໃສ ຂາວ​ສະ­ອາດ​ສຳ­ລັບ​ເຫຼົ່າ​ປັນ­ຍາ​ຊົນ ແລະ ນັກ­ທຸ­ລະ­ກິດ​ຫວຽດ ນາມ ຈາກ​ທົ່ວ​ມຸມ​ໂລກ ເພື່ອ​ຮ່ວມ​ສ້າງ​ຫວຽດ­ນາມ ໃຫ້​ກາຍ­ເປັນ​ປະ­ເທດ​ຈະ­ເລີນ​ຮຸ່ງ­ເຮືອງ.

   ທີ່ ມາ​ເລ​ເຊຍ: ມີ​ຂ່າວ​ຈາກ​ເມືອງ​ເມ​ລາ​ກາ ມາ​ເລ​ເຊຍ ທີ່​ບອກ​ວ່າ: ຍ້ອນ​ພະ­ຍາດ​ຕັນ­ຫາ​ໜ້າ​ມືດ ຊາຍ​ອາ­ຍຸ 60 ປີ ຊື່ ຟູ​ຊີ ຊູ​ກໍ (Fuzi Shukor) ໄດ້​ກໍ່​ຄະ­ດີ​ໜ້າ​ອັບ­ອາຍ​ຂາຍ­ໜ້າ​ກັບ​ແມ່­ຍິງ​ອາ­ຍຸ 49 ປີ ທີ່​ເປັນ​ພີ່­ນ້ອງ​ຂອງ​ຕົນ​ແທ້ໆ ຄວາມ​ຜິດ​ຂອງ​ຕູ້ ຟູ​ຊີ ນີ້ ລວມ​ມີ​ການ​ໃຊ້​ພາ­ສາ​ລາ­ມົກ ຫຍາບ​ຄາຍ​ກັບ​ຍິງ​ທີ່​ຕົກ​ເປັນ​ເຫຍື່ອ ນອກ​ນັ້ນ ຍັງ​ລວນ​ລາມ​ດ້ວຍ​ການ​ລູບ­ຄຳ​ຂອງ​ສະ­ຫງວນ​ຂອງ​ຍິງ​ຄົນ​ນັ້ນ​ອີກ ສຸດ​ທ້າຍ​ເຖົ້າ​ຫົວ​ງູ​ກໍ​ເລີຍ​ຕິດ​ແຮ້ວ​ຄະ­ດີ​ຕາມ​ກົດ­ໝາຍ​ອາ­ຍາ ໝວດ 354 ວ່າ​ດ້ວຍ​ການ​ໃຊ້​ກຳ­ລັງ​ເພື່ອ​ທຳ­ລາຍ​ກຽດ​ສັກ​ສີ​ຂອງ​ຄົນ​ອື່ນ ເຊິ່ງ​ມີ​ໂທດ​ຈຳ​ຄຸກ​ສູງ​ສຸດ 10 ປີ ຫຼື ຖືກ​ຂ້ຽນ ຫຼື ທັງ​ຖືກ​ຄຸກ ທັງ​ຖືກ​ຂ້ຽນ (ຂ່າວ​ວຽງ​ຈັນ​ທາມ 5 ທັນ­ວາ 2019).

ຂ່າວທີ່ກ່ຽວຂ້ອງ