ຂ່າວຫຼ້າສຸດ

ເພັດ​ສະໝອນ ຫວັງ​ຄວ້າ​ຫຼຽນ​ຄຳ ຊຽງ​ຂວາງ ເກມ

1.146 10 ມ.ກ. 2020 ວົງຈອນກີລາ
ເພັດ​ສະໝອນ ຫວັງ​ຄວ້າ​ຫຼຽນ​ຄຳ ຊຽງ​ຂວາງ ເກມ

    ຕາມ​ການ​ໃຫ້​ສຳພາດ​ຂອງ​ນາງ ເພັດ​ສະໝອນ ພັນທະ​ລີ ນັກກີລາ​ເປ​ຕັງ​ທີມ​ຊາດ​ລາວ ໃນ​ວັນ​ທີ 7 ມັງກອນ 2020 ວ່າ: ເຫດຜົນ​ທີ່​ເລືອກ​ຢາກ​ຫຼິ້ນ​ໃຫ້​ກັບ​ກະຊວງ​ປ້ອງ​ກັນ​ຄວາມ​ສະຫງົບ ຫຼື ​ປກສ ໃນ​ງານ​ມະ​ຫະ​ກຳ​ກີລາ​ແຫ່ງ​ຊາດ ຄັ້ງ​ທີ Xl ຫຼື ຊຽງ​ຂວາງ ເກມ ທີ່​ແຂວງ​ຊຽງ​ຂວາງ ຮັບ​ກຽດ​ເປັນ​ເຈົ້າພາບ ລະຫວ່າງ​ວັນ​ທີ 22 ມີນາ ຫາ 1 ເມສາ 2020 ເນື່ອງ​ຈາ​ກວ່າ​ນ້ອງ​ໄດ້​ຫຼິ້ນ​ທີມ ​ປກສ ມາ​ແຕ່​ປີ 2016 ແລະ ຢາກ​ເຮັດ​ໃຫ້​ຄວາມ​ໃຝ່ຝັນ​ຢາກ​ເຂົ້າ​ສັງກັດ​ເປັນ​ຕຳຫຼວດ​ຍິງ ເຊິ່ງ​ແທດເໝາະ​ກັບ​ກຳລັງ​ສຶກ​ສາ​ຮຽນ​ຕໍ່​ປີ 1 ສາຍ​ວິຊາ​ຄູ​ພະລະ ລະບົບ​ປະລິນຍາ​ຕີ ຈາກ​ຄະນະ​ວິທະຍາສາດ​ການ​ກີລາ-ກາຍຍະກຳ ມະຫາວິທະຍາໄລ​ແຫ່ງ​ຊາດ​ລາວ.

    ດັ່ງນັ້ນ ນ້ອງ​ຈຶ່ງ​ສືບຕໍ່​ເລືອກ​ຫຼິ້ນ​ໃຫ້ ​ປກສ ເຂົ້າ​ຮ່ວມ ຊຽງ​ຂວາງ ເກມ ປັດຈຸບັນ ກໍ​ໄດ້​ເຂົ້າ​ຮ່ວມ​ນອນ​ສູນ​ເຝິກຊ້ອມ​ກັບ​ນັກກີລາ​ຮຸ່ນ​ເອື້ອຍ ແລະ ອ້າຍ ໃນ​ສັງກັດ​ກຳລັງ ​ປກສ ເປັນ​ທີ່​ຮຽບ​ຮ້ອຍ ໂດຍ  ເລີ່ມ​ຊ້ອມ​ມາ​ແຕ່​ວັນ​ທີ 21 ທັນວາ 2019 ລວມ​ມີ​ທັງ​ໝົດ 11 ຄົນ ຍິງ 5 ຄົນ ອີງ​ຕາມ​ທາງ​ເຈົ້າພາບ ຈັດການ​ແຂ່ງຂັນ ກຳນົດ​ໃຫ້​ແຕ່​ລະ​ພາກສ່ວນ​ສົ່ງ​ນັກກີລາ​ລົງ​ແຂ່ງຂັນ​ຄົນ​ໜຶ່ງ​ໄດ້​ພຽງ 2 ລາຍການ ສະນັ້ນ ນ້ອງ​ຈະ​ໄດ້​ຫຼິ້ນ 2 ລາຍການ ແຕ່​ຍັງ​ບໍ່​ຮູ້​ວ່າ​ຄູ​ເຝິກ​ເພີ່ນ​ຈະ​ໃຫ້​ຫຼິ້ນ​ລາຍການ​ໃດ ແຕ່​ທີ່​ແນ່ໆ ໃນ​ຈຳນວນ 5 ຄົນ ກໍ​ມີ​ນັກກີລາ​ຕົວ​ດີໆອີກ 2 ຄົນ ທີ່​ຮັບ​ໃຊ້​ທີມ​ຊາດ​ນຳ​ກັນ​ມາ ເຊັ່ນ: ນາງ ໂບ​ວິ​ລັກ ເທບ​ພະກັນ ເຈົ້າ​ຂອງ​ຮອງ​ແຊັມ​ຊຸດ​ຕິ້ງ ຊີງ​ແຊັມ​ໂລກ ແລະ ນາງ ລິນ​ດາ ແກ້ວ​ບໍ​ລະ​ກົດ ຄູ່​ຫູ​ທີ່​ເຄີຍ​ສ້າງ​ຜົນງານ​ຄວ້າ​ຫຼຽນ​ທອງ ປະເພດ​ຄູ່​ຍິງ ຊີເກມ ຄັ້ງ​ທີ XXlX ທີ່​ປະເທດ​ມາ​ເລ​ເຊຍ ເມື່ອ​ປີ 2017 ອາດ​ຈະ​ໄດ້​ລົງ​ແຂ່ງຂັນ​ລາຍການ ທີມ​ຊຸດ​ຍິງ ແລະ ທີມ​ຄູ່​ຍິງ ກໍ​ເປັນ​ໄດ້.

    ເຖິງ​ຢ່າງໃດ​ກໍ​ດີ ເຖິງ​ວ່າ​ນ້ອງ​ຈະ​ໄດ້​ລົງ​ຫຼິ້ນ​ລາຍການ​ໃດ​ກໍ​ຕາມ ສິ່ງ​ສຳຄັນ​ແມ່ນ​ຄວາມ​ຕັ້ງໃຈ ແລະ ເອົາໃຈໃສ່​ເຂົ້າ​ໃນ​ການ​ເຝິກຝົນ​ພັດທະນາ​ຕົນ​ເອງ​ໃຫ້​ດີ​ທີ່​ສຸດ ເພື່ອ​ຈະ​ໄປ​ສ້າງ​ຜົນງານ​ຍາດ​ເອົາ​ຫຼຽນ​ຄຳ ໃຫ້​ທັບ​ນັກ​ກິລາ ​ປກສ ເພື່ອ​ເປັນ​ເງື່ອນໄຂ​ສຳຄັນ ທີ່​ຈະ​ເຮັດ​ໃຫ້​ນ້ອງ ຫຼັງ​ຮຽນ​ຈົບ​ກໍ​ຈະ​ໄດ້​ບັນຈຸ​ເຂົ້່າ​ເປັນ​ຕຳຫຼວດ ໃຫ້​ສົມ​ດັ່ງ​ຫວັງ​ຂອງ​ພໍ່​ແມ່​ທີ່​ຕັ້ງໃຈ​ຢາກ​ເຫັນ​ລູກ​ຄົນ​ນີ້ ເປັນ​ຕຳຫຼວດ​ຍິງ ໃນ​ອະນາຄົດ ສະນັ້ນ ຂໍ​ຮຽກຮ້ອງ​ມາ​ຍັງ​ພໍ່​ແມ່​ພີ່ນ້ອງ ກໍ​ຄື ທົ່ວ​ກຳລັງ ​ປກສ ຂໍ​ໃຫ້​ສົ່ງ​ກຳລັງ​ໃຈ ມາ​ເຊຍ​ພວກ​ເຮົາ​ດ້ວຍ ເຊື່ອ​ວ່າ​ກຳລັງ​ໃຈ​ຂອງ​ທຸກ​ຄົນ​ຈະ​ເປັນ​ສ່ວນ​ສຳຄັນ​ໃຫ້​ພວກ​ເຮົາ​ສ້າງ​ຜົນສຳເລັດ​ໃນ​ຊຽງ​ຂວາງ ເກມອາດ​ເປັນ​ໄດ້. 

ຂ່າວທີ່ກ່ຽວຂ້ອງ