ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 09-01-2020

1.531 09 ມ.ກ. 2020 ຫົວຂໍ້ຂ່າວອື່ນໆ

   ບົດ​ປະ­ຈຳ​ວັນ​ນີ້​ມີ 2 ເລື່ອງ​ຢູ່​ກຳ­ປູ­ເຈຍ ຄື: ແຜນ​ຫັນ​ຂີ້​ເຫຍື້ອ​ເປັນ​ພະ­ລັງ­ງານ ເລື່ອງ​ຄະ­ດີ​ຄົນ ສ ອາ​ເມ​ຣິ​ກາ ປຸ້ນ​ສະ­ຫວາດ​ເດັກ​ກຳ­ປູ­ເຈຍ ສຸດ​ທ້າຍ​ແມ່ນ​ເລື່ອງ​ອາ​ຍຸ­ຄົນ​ຣັດ​ເຊຍ​ຍືນ​ຂຶ້ນ ຍ້ອນ​ຫຼຸດ​ການ​ດື່ມ​ເຫຼົ້າ.

   ທີ່ ກຳ­ປູ­ເຈຍ: ໃນ​ອະ­ນາ­ຄົດ​ອັນ​ໃກ້ໆ​ນີ້ ແຂວງ​ເປຼຍ ສີ​ຫາ​ນຸກ (Preah Sihanouk) ຈະ​ໄດ້­ຜົນ​ປະ­ໂຫຍດ​ສອງ​ຊັ້ນ​ຈາກ​ການ​ຫັນ​ຂີ້​ເຫຍື້ອ​ເປັນ​ພະ­ລັງ­ງານ​ໄຟ­ຟ້າ ຄື: ໜຶ່ງ ແມ່ນ​ປະ­ໂຫຍດ​ໃນ​ການ​ແກ້​ໄຂ​ບັນ­ຫາ​ຂີ້​ເຫຍື້ອ​ລົ້ນ​ເມືອງ ແລະ ສອງ ກໍ​ຄື ຈະ​ໄດ້​ກະ­ແສ​ໄຟ­ຟ້າ​ໃຊ້​ສອຍ ແລະ ປ້ອນ​ໂຮງ​ຈັກ​ໂຮງ­ງານ​ທີ່​ພວມ​ເບັ່ງ​ບານ​ໃນ​ແຂວງ​ນີ້ ໂຄງ­ການ​ແປ​ຮູບ​ຂີ້​ເຫຍື້ອ​ເປັນ​ພະ­ລັງ­ງານ​ນີ້ ແມ່ນ​ບໍ­ລິ­ສັດ​ກໍ່­ສ້າງ ລີ​ຢູ​ເຮັງ ທີ່​ຄົນ​ຈີນ​ເປັນ​ເຈົ້າ​ຂອງ​ຈະ​ຮັບ­ຜິດ­ຊອບ​ດຳ­ເນີນ​ກິດ­ຈະ­ການ.

   ຂ່າວ​ບອກ​ສັ້ນໆ​ວ່າ: ທ່ານ ຢັງ ຮົງ ຮ່າວ ປະ­ທານ​ບໍ­ລິ­ສັດ​ນີ້​ໄດ້​ຮ່ວມ​ປະ­ຊຸມ ແລະ ຕົກ­ລົງ​ກັບ​ທ່ານ ກວກ ຈຳ ເຣີນ ເຈົ້າ­ແຂວງ ແຂວງ​ເປຼຍ ສີ​ຫາ​ນຸກ ກ່ຽວ​ກັບ​ເລື່ອງ​ນີ້​ເປັນ​ທີ່​ຮຽບ​ຮ້ອຍ​ແລ້ວ (ແຫຼ່ງ​ຂ່າວ​ວຽງ​ຈັນ​ທາມ 27 ພະ­ຈິກ 2019).

   ອີກ​ຂ່າວ​ໜຶ່ງ​ກ່ຽວ​ກັບ​ກຳ­ປູ­ເຈຍ​ນັ້ນ ແມ່ນ​ເລື່ອງ​ຄະ­ດີ​ຂອງ​ພົນ­ລະ­ເມືອງ​ສະ­ຫະ­ລັດ​ອາ​ເມ​ຣິ​ກາ ຊື່​ທ້າວ ຣຸບ ເຈມ ຄະ ລາຍ (Rugh James Chine) ອາ­ຍຸ 38 ປີ ຖືກ​ສານ​ກຳ­ປູ­ເຈຍ​ຕັດ­ສິນ​ຈຳ​ຄຸກ​ເປັນ​ເວ­ລາ 2 ປີ​ເຄິ່ງ ຍ້ອນ​ໂທດ​ທີ່​ໄດ້​ລວນ​ລາມ​ທາງ​ເພດ​ຕໍ່​ເດັກ​ກຳ­ປູ­ເຈຍ ອາ­ຍຸ​ບໍ່​ເກີນ 15 ປີ ຈຳ­ນວນ 3 ຄົນ ນອກ­ຈາກ​ຖືກ​ຕັດ​ອິດ­ສະ­ຫຼະ­ພາບ​ຕາມ​ໂທດ​ທີ່​ໄດ້​ກໍ່​ຂຶ້ນ​ແລ້ວ ຊາຍ​ນັກ​ປຸ້ນ​ສະ­ຫວາດ​ຄົນ​ນີ້​ຍັງ​ຖືກ​ປັບ​ໃໝ​ເປັນ​ເງິນ 2 ລ້ານ​ຣຽນ (Riel ສະ­ກຸນ​ເງິນ​ກຳ­ປູ­ເຈຍ) ຫຼື ເທົ່າ​ກັບ 500 ໂດ​ລາ​ສະ­ຫະ­ລັດ ນອກ​ນັ້ນ ຍັງ​ຕ້ອງ​ໄດ້​ຈ່າຍ​ປົວ­ແປງ​ຢຽວ​ຢາ​ໃຫ້​ເດັກ​ທີ່​ຕົກ​ເປັນ​ເຫຍື່ອ​ທັງ 3 ຄົນ ຄົນ​ລະ 15 ລ້ານ​ຣຽນ ອີກ​ດ້ວຍ ກົດ­ໝາຍ​ຕ້ານ​ການ​ຄ້າ​ມະ­ນຸດ ແລະ ການ​ຂູດ​ຮີດ​ທາງ​ເພດ​ຂອງ​ກຳ­ປູ­ເຈຍ​ນັ້ນ​ເຄັ່ງ​ຄັດ​ຮັດ­ກຸມ ແລະ ເດັດ­ຂາດ​ທີ່​ສຸດ.

   ທີ່ ຣັດ​ເຊຍ: ໃນ​ຍຸກ​ສະ­ຫະ­ພາບ​ໂຊ​ວຽດ ກໍ​ຄື ໃນ​ປັດ­ຈຸ­ບັນ ການ​ນຳ​ຣັດ​ເຊຍ​ໄດ້​ມີ​ຄວາມ​ພະ­ຍາ­ຍາມ​ສູງ ເພື່ອ​ຫຼຸດ­ຜ່ອນ​ການ​ບໍ­ລິ­ໂພກ​ເຫຼົ້າ​ຂອງ​ຄົນ​ຣັດ​ເຊຍ ເຊັ່ນ: ໃນ​ຍຸກ​ສະ­ຫະ­ພາບ​ໂຊ​ວຽດ ທ່ານ​ປະ­ທາ­ນາ­ທິ­ບໍ­ດີ ກອກ​ບາ​ຈົບ ກໍ​ໄດ້​ປະ­ກາດ​ຜະ­ເດັດ​ເສິກ​ກັບ​ບັນ­ຫາ​ຂີ້​ເມົາ​ຈາກ​ນ້ຳ​ຕາ​ຜີ​ເຜດ ແຕ່​ກໍ​ບໍ່​ປະ­ສົບ​ຜົນ­ສຳ­ເລັດ ອາດ​ເປັນ​ຍ້ອນ​ລັກ­ສະ­ນະ​ຂອງ​ມາດ​ຕະ­ການ​ແຂງ​ກະ­ດ້າງ​ໂພດ ບໍ່​ເບິ່ງ​ປັດ​ໄຈ ແລະ ເງື່ອນ­ໄຂ​ຕົວ​ຈິງ​ຂອງ​ສັງ­ຄົມ​ໃນ​ເວ­ລາ​ນັ້ນ ໃນ​ຍຸກ​ສະ­ຫະ­ພັນ​ຣັດ​ເຊຍ​ນີ້ ການ​ຈຳ­ກັດ​ການ​ບໍ­ລິ­ໂພກ​ເຫຼົ້າ​ໄດ້​ດຳ­ເນີນ​ໄປ​ດ້ວຍ​ມາດ​ຕະ­ການ​ຂອງ​ລະ­ບຽບ​ກົດ­ໝາຍ ເຊິ່ງ​ຂ່າວ​ຫຼ້າ​ສຸດ (ເດືອນ​ຕຸ­ລາ 2019) ໂດຍ​ອ້າງ​ສະ­ຖິ­ຕິ​ຂອງ​ອົງ ການ​ອະ­ນາ­ໄມ​ໂລກ​ໄດ້​ບອກ​ວ່າ: ການ​ບໍ­ລິ­ໂພກ​ເຫຼົ້າ​ໃນ​ຣັດ​ເຊຍ​ໄດ້​ຫຼຸດ​ລົງ​ເຖິງ 43% ນັບ​ແຕ່​ປີ 2003 ເປັນ­ຕົ້ນ​ມາ ອັນ​ໄດ້​ເຮັດ​ໃຫ້​ອາ­ຍຸ​ຂອງ​ຄົນ ຣັດ​ເຊຍ​ຍືນ​ຂຶ້ນ ໂດຍ​ສະ­ເລ່ຍ ຄື: 78 ປີ ສຳ­ລັບ​ແມ່­ຍິງ ແລະ 68 ປີ ສຳ­ລັບ​ຜູ້​ຊາຍ.

   ໃນ​ຊຸມ​ປີ​ຕົ້ນໆ​ຂອງ​ທົດ​ສະ​ວັດ 1990 ນັ້ນ ອາ­ຍຸ​ສະ­ເລ່ຍ​ຂອງ​ຜູ້​ຊາຍ​ໃນ​ຣັດ​ເຊຍ​ມີ​ພຽງ 57 ປີ​ເທົ່າ​ນັ້ນ ສາ­ເຫດ​ທີ່​ເຮັດ​ໃຫ້­ການ​ບໍ­ລິ­ໂພກ​ເຫຼົ້າ​ໃນ​ຣັດ​ເຊຍ​ຫຼຸດ​ລົງ​ແບບ​ກະ­ໂດດ​ຂັ້ນ​ນັ້ນ ແມ່ນ​ຍ້ອນ​ມີ​ມາດ​ຕະ­ການ​ຄວບ​ຄຸມ​ຄັກ­ແນ່ ຄື: ເລີ່ມ​ຈາກ​ການ​ກຳ­ຈັດ​ບັນ­ຫາ​ເຫຼົ້າ​ເຖື່ອນ ຕໍ່​ໃສ່​ການ​ເກືອດ​ຫ້າມ​ການ​ໂຄ­ສະ­ນາ​ຂາຍ​ເຫຼົ້າ ການ​ຫ້າມ​ຂາຍ​ເຫຼົ້າ​ຫຼັງ 11 ໂມງ​ກາງ­ຄືນ ນອກ​ນັ້ນ ກໍ​ຍັງ​ໄດ້​ມີ​ການ​ໂຄ­ສະ­ນາ​ກ່ຽວ​ກັບ​ສຸ­ຂະ­ພາບ ແລະ ຊີ­ວິດ​ທີ່​ດີ ໂດຍ​ປາ­ສະ­ຈາກ​ນ້ຳ​ຕາ​ຜີ​ເຜດ​ໄປ​ພ້ອມໆ​ກັບ​ການ​ປັບ​ຂຶ້ນ​ລາ­ຄາ​ຂາຍ­ຍ່ອຍ​ເຫຼົ້າ​ທຸກ​ປະ­ເພດ ວ່າ​ກັນ​ວ່າ ຜົນ­ງານ​ໃນ​ບັ້ນ​ຮົບ​ຕ້ານ​ເຫຼົ້າ​ນີ້ ສ່ວນ​ໃຫຍ່​ໄດ້​ມາ​ຈາກ​ການ​ເປັນ​ຕົວ​ແບບ​ຂອງ​ທ່ານ​ປະ­ທາ­ນາ­ທິ­ບໍ­ດີ ປູ​ຕິນ ຂອງ​ຣັດ​ເຊຍ ທີ່​ມັກ​ຫຼິ້ນ​ກີ­ລາ​ເປັນ​ຊີ­ວິດ​ຈິດ­ໃຈ​ນັ້ນ​ເອງ.

ຂ່າວທີ່ກ່ຽວຂ້ອງ