ຂ່າວຫຼ້າສຸດ

ອາ​ລິ​ຍາ ຄວ້າ​ແຊັມ ສະໜາມ​ທຳ​ອິດ​ຄຳ​ໂບ​ເດຍ​ເບ​ຊາຍ​ຄຼິງ​ທົວ

648 08 ມ.ກ. 2020 ວົງຈອນກີລາ
ອາ​ລິ​ຍາ ຄວ້າ​ແຊັມ ສະໜາມ​ທຳ​ອິດ​ຄຳ​ໂບ​ເດຍ​ເບ​ຊາຍ​ຄຼິງ​ທົວ

   ທ່ານ ກາບ​ຊ້ອນ ສຸວັນນະ​ຣາ​​ຊ ເລຂາທິການ​ສະຫະພັນ​ກີລາ​ລົດຖີບ​ແຫ່ງ​ຊາດ​ລາວ ທັງ​ເປັນ​ຫົວໜ້າ​ຄະນະ​ນຳພາ​ນັກກີລາ ໃຫ້​ຮູ້​ວ່າ: ວັນ​ທີ 4-6 ມັງກອນ 2020 ການ​ແຂ່ງຂັນ​ລົດຖີບ​ລາຍການ ຄຳ​ໂບ​ເດຍ​ເບ​ຊາຍ​ຄຼິງ​ທົວ 2020 ທີ່​ປະເທດ​ກຳປູເຈຍ ເປັນ​ເຈົ້າພາບ ເຊິ່ງ​ເປັນ​ການ​ແຂ່ງຂັນ​ໃນ​ສະໜາມ​ທີ 1 ມີ​ນັກກີລາ​ເຂົ້າ​ຮ່ວມ​ທັງ​ໝົດ 93 ຄົນ ຈາກ​ຫຼາຍ​ກວ່າ 10 ປະເທດ​ໃນ​ທະວີບອາຊີ ໂດຍ​ເລີ່ມ​ປ່ອຍ​ຕົວ​ເວລາ 11:00 ໂມງ ທ່າມກາງ​ອາກາດ​ຮ້ອນ​ອົບເອົ້າ​ພໍ​ສົມຄວນ ຈາກ​ເມືອງ​ດາລາ​ຊາ​ກໍ ຫາ​ເມືອງ​ໂກະ​ກອງ​ໄລຍະ​ທາງ 153 ກິໂລແມັດ ການ​ແຂ່ງຂັນ​ໃຊ້​ເວລາ​ຫຼາຍ​ກວ່າ 4 ຊົ່ວໂມງ.

    ຜ່ານ​ການ​ແຂ່ງຂັນ​ຜົນ​ປາກົດ​ວ່າ:ທ້າວ ອະລິຍາ ພູນ​ສະ​ຫວັດ ນັກກີລາ​ລົດຖີບ​ທີມ​ຊາດ​ລາວ ສາມາດ​ພາ​ລົດ​ຄູ່​ໃຈ​ເຂົ້າ​ເສັ້ນ​ໄຊ​ເປັນ​ເຈົ້າ​ພູເຂົາ (KOM) ທັງ 2 ຈຸດ ແລະ ໄດ້​ແຊັມ​ສະໜາມ​ທີ 1 ມາ​ຄອງ ແຊງ​ນັກກີລາ​ຈາກ​ມາ​ເລ​ເຊຍ 2 ນາທີ ກັບ 19 ວິນາທີ ແລະ ຫ່າງ​ອັນ​ດັບ 3 ນັກກີລາ​ຈາກ​ຮົງ​ກົງ 2 ນາທີ 25 ວິນາທີ  ຂະນະ​ທີ່​ທ້າວ ຖາວອນ ພົນ​ອາສາ ອີກ​ໜຶ່ງ​ນັກກີລາ​ທີມ​ຊາດ​ລາວ ເຂົ້າ​ມາ​ເປັນ​ອັນ​ດັບ​ທີ 15 ສ່ວນ​ນັກກີລາ​ລາວ​ຄົນ​ອື່ນໆ​ແມ່ນ​ເກາະ​ກຸ່ມ​ຕາມ​ຫຼັງ​ເຂົ້າ​ເສັ້ນ​ໄຊ ປະກອບ​ມີ: ທ້າວ ສຸດທິ​ສັກ ວັນ​ດີ​ລາ ທ້າວ ລຳ​ເງິນ ວັນນະ​ສຸກ ແລະ ທ້າວ ທະວີ​ສັກ ສຸວັນນະ​ຣາ​​ຊ ໂດຍ​ໃນ​ນີ້ ຍັງ​ມີ​ນັກກີລາ​ທີ່​ບໍ່​ສາມາດ​ຖີບ​ບໍ່​ຈົບ​ຕາມ​ເວລາ​ການ​ແຂ່ງຂັນ​ເຖິງ 17 ຄົນ.

   ຄະນະ​ນັກກີລາ​ລົດຖີບ​ລາວ​ທີ່​ເດີນທາງ​ໄປ​ແຂ່ງຂັນ​ຄັ້ງ​ນີ້​ປະກອບ​ມີ: ທ່ານ ກາບ​ຊ້ອນ ສຸວັນນະ​ຣາ​​ຊ ເລຂາທິການ​ສະຫະພັນ​ລົດຖີບ​ແຫ່ງ​ຊາດ​ລາວ ຫົວໜ້າ​ຄະນະ​ນຳພາ​ທ່ານ ບຸນ​ຍະ​ສິດ ວົງ​ຄຳ​ຕາ ຮອງ​ຫົວໜ້າ​ຄະນະ ສ່ວນ​ນັກກີລາ​ມີ​ທ້າວ ອະລິຍາ ພູນ​ສະ​ຫວັດ ທ້າວ ຖາວອນ ພົນ​ອາສາ ທ້າວ ທະວີ​ສັກ ສຸວັນນະ​ຣາ​​ຊ ທ້າວ ລຳ​ເງິນ ວັນນະ​ສຸກ ແລະ ທ້າວ ສຸດທິ​ສັກ ວັນ​ດີ​ລາ.

ຂ່າວທີ່ກ່ຽວຂ້ອງ