ຂ່າວຫຼ້າສຸດ

ເທັນ​ນິດ​ນະຄອນຫຼວງ ຕັ້ງ​ເປົ້າ 3 ຫຼຽນ​ຄຳ ໃນ​ຊຽງ​ຂວາງ​ເກມ

566 08 ມ.ກ. 2020 ວົງຈອນກີລາ
ເທັນ​ນິດ​ນະຄອນຫຼວງ ຕັ້ງ​ເປົ້າ 3 ຫຼຽນ​ຄຳ ໃນ​ຊຽງ​ຂວາງ​ເກມ

       ທ່ານ ຕຸ້ຍ ບຸນ​ທະລາ ປະທານ​ສະຫະພັນ​ເທັນ​ນິດ​ນະຄອນຫຼວງ​ວຽງ​ຈັນ (ນວ) ໄດ້​ໃຫ້​ສຳພາດ​ວັນ​ທີ 4 ມັງກອນ 2020 ວ່າ: ທີມ​ນັກກີລາ​ເທັນ​ນິດ ນວ ຊຸດ​ນີ້​ສາມາດ​ຄັດ​ເລືອກ​ໄດ້​ທັງ​ໝົດ 12 ຄົນ ຍິງ 6 ຄົນ ໄດ້​ມີ​ການ​ເກັບ​ຕົວ​ເຝິກຊ້ອມ​ມາ​ແຕ່​ເດືອນ​ສິງຫາ 2019 ທີ່​ສະໂມສອນ​ກີລາ​ເທັນ​ນິດ​ເຈົ້າ​ອາ​ນຸ​ວົງ ແລະ ຈຳນວນ​ໜຶ່ງ​ໄດ້​ເກັບ​ຕົວ ແລະ ເຄື່ອນ​ໄຫວ​ເຂົ້າ​ຮ່ວມ​ແຂ່ງຂັນ​ທີ່​ປະເທດ​ໃກ້​ຄຽງ ມາ​ຮອດ​ປັດຈຸບັນ​ມີ​ຄວາມ​ພ້ອມ​ເຖິງ 90% ແລະ ໃນ​ອີກ 2 ເດືອນ​ຕໍ່ໜ້າ ເພື່ອ​ເປັນ​ການ​ເສີມ​ຄວາມ​ແຂງ​ແກ່ນ​ໃຫ້​ນັກກີລາ​ສາມາດ​ຮັບປະກັນ​ທີ່​ສະຫະພັນ​ເທັນ​ນິດ ນວ ຕັ້ງ​ເປົ້າ​ໝາຍ​ໄວ້​ສູງ​ຈະ​ຍາດ​ເອົາ 3 ຫຼຽນ​ຄຳ ໃນ​ຊຽງ​ຂວາງ​ເກມ ໃຫ້​ໄດ້ ສະນັ້ນ​ຈຶ່ງ​ໄດ້​ຂຶ້ນ​ແຜນ​ຈະ​ພາ​ນັກກີລາ​ຈຳນວນ​ດັ່ງກ່າວ​ອອກ​ເດີນທາງ​ໄປ​ເຄື່ອນ​ໄຫວ​ເກັບ​ຕົວ​ເຝິກຊ້ອມ ແລະ ແຂ່ງຂັນ​ທີ່​ປະເທດ​ໄທ​ຕື່ມ​ອີກ.

      ທ່ານ ອາລັນ ຄູ​ເຝິກ​ເທັນ​ນິດ ນວ ຊາວ​ອົດ​ສະ​ຕຣາ​ລີ ກ່າວ​ວ່າ: ນັກກີລາ​ເທັນ​ນິດ​ລາວ​ກໍ​ຄື ຂອງ ນວ ທຸກ​ຄົນ​ມີ​ການ​ພັດທະນາ​ໄປ​ໄກ​ພໍ​ສົມຄວນ ຖ້າ​ຫາກ​ຢາກ​ເຫັນ​ນັກກີລາ​ເທັນ​ນິດ​ລາວ ສາມາດ​ກ້າວ​ໄປ​ເຖິງ​ລະດັບ​ມື​ອາຊີບ​ໄດ້​ນັ້ນ​ສິ່ງ​ສຳຄັນ​ທຸກ​ຄົນ​ຕ້ອງ​ໄດ້​ມີ​ການ​ເຝິກຊ້ອມ​ຢ່າງ​ຕໍ່​ເນື່ອງ ຕ້ອງ​ໄດ້​ເອົາ ໃຈ​ໃສ່​ຕໍ່​ການ​ຮຽນ​ຮູ້​ທາງ​ດ້ານ​ທັກ​ສະ ເທັກ​ນິກ ແລະ ຈິດຕະວິທະຍາ​ໃຫ້​ຫຼາຍ ເຊື່ອ​ວ່າ​ອະນາຄົດ​ໄປ​ໄກ​ທີ່​ຫວັງ ສ່ວນ​ການ​ກະກຽມ​ຄວາມ​ພ້ອມ​ຂອງ​ທັບ​ນັກກີລາ​ເທັນ​ນິດ ນວ ຮ່ວມ​ຊຽງ​ຂວາງ​ເກມ 2020 ນັກກີລາ​ມີ​ໂອກາດ​ເປັນ​ໄປ​ໄດ້​ສູງ​ທີ່​ຈະ​ສາມາດ​ສ້າງ​ຜົນງານ​ຄວ້າ 3 ຫຼຽນ​ຄຳ​ມາ​ຄອງ ເຊິ່ງ​ມີ​ເວລາ​ອີກ 2 ເດືອນ ສະນັ້ນ​ຈະ​ພະຍາຍາມ​ເນັ້ນ​ການ​ເຝິກຊ້ອມ​ໃຫ້​ນັກກີລາ​ມີ​ຄວາມ​ທົນ ມີ​ຄວາມ​ແຂງ​ແກ່ນ ແລະ ປະສິດທິພາບ​ໃນ​ການ​ຮ່ວມ​ກັນ​ຫຼິ້ນ​ແບບ​ທີມ​ເວີກ ຮັບປະກັນ​ວ່າ ຫຼຽນ​ຄຳ ບໍ່​ຫຼຸດ​ໄປ​ໃສ​ແນ່ນອນ.

    ສຳລັບ​ງານ​ກີລາ​ຊຽງ​ຂວາງ​ເກມ 2020 ຈະ​ມີ​ການ​ແຂ່ງຂັນ​ທັງ​ໝົດ 28 ປະເພດ​ກີລາ​ໃນ​ນັ້ນ ເທັນ​ນິດ ມີ​ການ​ຊີງ​ໄຊ​ເຖິງ 7 ລາຍການ ປະກອບ​ມີ ປະເພດ​ດ່ຽວ​ຍິງ ດ່ຽວ​ຊາຍ ທີມ​ຄູ່​ຍິງ​ຄູ່​ຊາຍ ທີມ​ຊຸດ​ຍິງ​ຊຸດ​ຊາຍ ແລະ ທີມ​ປະສົມ. 

ຂ່າວທີ່ກ່ຽວຂ້ອງ