ຂ່າວຫຼ້າສຸດ

ພະຍາດ​ປອດ​ອັກເສບ​ທີ່​ບໍ່​ແມ່ນ SARS ແລະ MERS ເກີດ​ລະບາດ​ຢູ່​ໃນ​ຈີນ

3.354 07 ມ.ກ. 2020 ຂ່າວຕ່າງປະເທດ
ພະຍາດ​ປອດ​ອັກເສບ​ທີ່​ບໍ່​ແມ່ນ SARS ແລະ  MERS ເກີດ​ລະບາດ​ຢູ່​ໃນ​ຈີນ

   ຂ່າວສານ​ຣອຍ​ເຕີ ລາຍ​ງານ​ວ່າ ບັນດາ​ອົງການ​ຄຸ້ມ​ຄອງ​ດ້ານ​ສາທາລະນະ​ສຸກ​ຂອງ​ຈີນ ຢູ່​ໃນ​ນະຄອນ ຫວູ​ຮັນ ໃນ​ແຂວງ ຫູ​ເປີຍ ຢືນຢັນ​ວ່າ ການ​ລະບາດ​ຂອງ​ພະຍາດ​ປອດ​ອັກເສບ​ຢູ່​ໃນ​ທ້ອງຖິ່ນ​ນີ້ ບໍ່​ແມ່ນ​ປະເພດ ອັກເສບ​ລະບົບ​ທາງ​ເດີນ​ຫາຍໃຈ​ຮຸນ​ແຮງ (SARS) ແລະ ກໍ​ບໍ່​ແມ່ນ​ອັກເສບ​ທາງ​ລະບົບ​ທາງ​ເດີນ​ຫາຍໃຈ​ສາຍ​ພັນ​ຕາເວັນ​ອອກ​ກາງ (MERS) ພ້ອມ​ທັງ​ບໍ່​ແມ່ນ​ໄຂ້​ຫວັດ​ສັດ​ປີກ ແລະ ວ່າ ອົງການ​ເຫຼົ່ານັ້ນ​ພວມ​ພະຍາຍາມ ກຳນົດ​ເບິ່ງ​ສາເຫດ ແລະ ແຫຼ່ງ​ທີ່​ມາ​ຂອງ​ພະຍາດ.

     ຖະແຫຼງການ​ທີ່​ໄດ້​ລົງ​ພິມ ຢູ່​ໃນ​ເວບ​ໄຊ​ຂອງ​ຄະນະ​ກຳມະການ​ສາທາລະນະ​ສຸກ​ນະຄອນ ຫວູ​ຮັນ ເມື່ອ​ຄ່ຳ​ຄືນ​ຂອງ​ວັນ​ທີ 5 ມັງກອນ​ນີ້ ໃຫ້​ຮູ້​ວ່າ ລວມ​ແລ້ວ​ມີ 59 ກໍລະນີ ທີ່​ມີ​ອາການ​ປອດ​ອັກເສບ​ທີ່​ບໍ່​ຮູ້​ສາເຫດ ທີ່​ໄດ້​ຮັບ​ລາຍ​ງານ​ໃນ​ວັນ​ດຽວ​ກັນ ໃນ​ນັ້ນ​ມີ 7 ກໍລະນີ ຢູ່​ໃນ​ອາການ​ທີ່​ໜ້າ​ເປັນ​ຫ່ວງ. ໃນ​ຂະນະ​ດຽວ​ກັນ ອົງການ​ດັ່ງກ່າວ ກໍ​ໄດ້​ນຳ​ເອົາ 163 ຄົນ ທີ່​ໄດ້​ສຳ​ພັດ​ໂດຍ​ກົງ​ກັບ​ຄົນ​ເຈັບ ນັ້ນ​ໄປ​ຕິດຕາມ​ອາການ​ຢ່າງ​ໃກ້ຊິດ.

     ພະຍາດ​ປອດ​ອັກເສບ​ດັ່ງກ່າວ ໄດ້​ລະບາດ​ຢູ່​ໃນ​ເຂດ​ໃຈກາງ​ນະຄອນ​ຫວູ​ຮັນ ເມື່ອ​ທ້າຍ​ເດືອນ​ທັນວາ ປີ 2019. ເມື່ອ​ວັນ​ທີ 31 ທັນວາ ປີ 2019 ຈີນ​ໄດ້​ດຳເນີນ​ການ​ສືບສວນ​ເຖິງ​ສາ​ເຫດການ​ລະບາດ​ຂອງ​ພະຍາດ​ດັ່ງກ່າວ ທີ່​ຖື​ວ່າ​ພົວພັນ​ກັບ SARS.

ຂ່າວທີ່ກ່ຽວຂ້ອງ