ຂ່າວຫຼ້າສຸດ

ຈີນ ເລີ່ມ​ຍົກເລີກ​ບັນດາ​ມາດ​ຕະການ​ຈຳກັດ​ການ​ລົງທຶນ​ຂອງ​ຕ່າງປະເທດ

3.278 07 ມ.ກ. 2020 ຂ່າວຕ່າງປະເທດ
ຈີນ ເລີ່ມ​ຍົກເລີກ​ບັນດາ​ມາດ​ຕະການ​ຈຳກັດ​ການ​ລົງທຶນ​ຂອງ​ຕ່າງປະເທດ

    ຕາມ​ຂ່າວ​ຕ່າງປະເທດ ຈີນ​ໄດ້​ເລີ່ມ​ຕົ້ນ​ຍົກເລີກ​ບັນດາ​ມາດ​ຕະການ​ຈຳກັດ​ຕົ້ນຕໍ ຕໍ່​ການເຄື່ອນໄຫວ​ລົງທຶນ​ຂອງ​ຕ່າງປະເທດ ຢູ່​ໃນ​ຂົງເຂດ​ການ​ເງິນ​ຂອງ​ຈີນ. ນີ້​ເປັນ​ການເຄື່ອນໄຫວ ທີ່ ສ ອາ​ເມ​ຣິ​ກາ ສະເໜີ​ໃຫ້​ຈີນ​ປະຕິບັດ ທ່າມກາງ​ທີ່​ພື້ນຖານ​ເສດຖະກິດ​ຂອງ ສ ອາ​ເມ​ຣິ​ກາ ແລະ ຈີນ ທີ່​ມີ​ຂະໜາດ​ໃຫຍ່​ເປັນ​ອັນ​ດັບ 1 ແລະ ອັນ​ດັບ 2 ຂອງ​ໂລກ ຕາມ​ລຳດັບ​ນັ້ນ ຕົກ​ຢູ່​ໃນ​ຄວາມ​ເຄັ່ງ​ຕຶງ​ທາງ​ດ້ານ​ການ​ຄ້າ​ໃນ​ຫຼາຍ​ເດືອນ​ທີ່​ຜ່ານ​ມາ.

     ອົງການ​ຄຸ້ມ​ຄອງ​ການເຄື່ອນໄຫວ​ດ້ານ​ທະນາຄານ​ຂອງ​ຈີນ (CBIRC) ມີ​ຖະແຫຼງການ​ອອກ​ມາ​ເມື່ອ​ວັນ​ທີ 3 ມັງກອນ​ນີ້ ໂດຍ​ຊີ້​ແຈງ​ວ່າ ນັບ​ແຕ່​ຕົ້ນ​ປີ 2020 ເປັນຕົ້ນ​ໄປ ບັນດາ​ທະນາຄານ​ຂອງ​ຕ່າງປະເທດ ສາມາດ​ສ້າງຕັ້ງ​ບັນດາ​ສາຂາ ທີ່​ມີ​ທຶນ​ຕ່າງປະເທດ 100% ຢູ່​ໃນ​ຈີນ ໂດຍ​ທີ່​ບໍ່​ຈຳເປັນ​ຊອກ​ຫາ​ຄູ່​ຮ່ວມ​ຢູ່​ພາຍ​ໃນ​ປະເທດ (ຈີນ) ມາ​ກຳ​ຫຸ້ນ​ສ່ວນ​ໃຫຍ່ ຄື​ກັນ​ກັບ​ເມື່ອ​ກ່ອນ. ໃນ​ເມື່ອ​ກ່ອນ ບັນດາ​ທະນາຄານ​ຂອງ​ຕ່າງປະເທດ ທີ່​ຢາກ​ເຄື່ອນ​ໄຫວ​ຢູ່​ໃນ​ປະເທດ​ຈີນ ແມ່ນ​ຕ້ອງ​ໄດ້​ຊອກ​ຫາ​ຄູ່​ຮ່ວມ​ຢູ່​ໃນ​ຈີນ ແລະ ບໍ່​ໄດ້​ຮັບ​ອະນຸຍາດ​ຄອບ​ຄອງ​ຫຸ້ນ​ສ່ວນ​ເກີນ 49% ຢູ່​ໃນ​ການ​ຮ່ວມ​ທຸລະ​ກິດ​ນັ້ນ.

     ເມື່ອ​ເດືອນ​ຕຸລາ ປີ 2019 ຈີນ​ໄດ້​ປະກາດ​ການ​ດຳເນີນ​ການ ກ່ຽວ​ກັບ​ຂັ້ນ​ຕອນ​ການ​ຍົກເລີກ​ບັນດາ​ມາດ​ຕະການ​ຈຳກັດ​ການ​ລົງທຶນ​ຂອງ​ຕ່າງປະເທດ ຢູ່​ໃນ​ຂົງເຂດ​ການ​ເງິນ. ມາ​ໃນ​ເດືອນ​ທັນວາ ປີ 2019 ທະນາຄານ UBS ຂອງ​ສະ​ວິດ​ໄດ້​ຮັບ​ໃບ​ອະນຸຍາດ ກ່ຽວ​ກັບ​ການ​ຄອບ​ຄອງ​ສ່ວນ​ໃຫຍ່​ຂອງ​ຫຸ້ນ​ສ່ວນ ຢູ່​ໃນ​ບັນດາ​ສາຂາ​ໃນ​ຈີນ. ນັບ​ແຕ່​ວັນ​ທີ 1 ມັງກອນ ປີ 2020 ເປັນຕົ້ນ​ໄປ ບັນດາ​ບໍລິສັດ​ຂອງ​ຕ່າງປະເທດ ທີ່ຢູ່​ໃນ​ຂົງເຂດ​ສັນຍາ​ດ້ານ​ການ​ເງິນ​ໃນ​ອະນາຄົດ ສາມາດ​ລົງທຶນ​ເຂົ້າ​ໄປ​ໃນ​ຈີນ ໂດຍ​ທີ່​ບໍ່​ຖືກ​ຈຳກັດ​ປະລິມານ​ທຶນ​ທີ່​ໄດ້​ຄອບ​ຄອງ. ສ່ວນ​ບັນດາ​ບໍລິສັດ​ຄຸ້ມ​ຄອງ​ທຶນ ແລະ ບັນດາ​ບໍລິສັດ​ນາຍ​ໜ້າດ້ານ​ການ​ເງິນ ແມ່ນ​ຈະ​ໄດ້​ນຳ​ໃຊ້​ຂໍ້​ກຳນົດ​ໃໝ່​ຕາມ​ລຳດັບ ນັບ​ແຕ່​ວັນ​ທີ 1 ເມສາ ແລະ  1 ທັນວາ ປີ 2020 ເປັນຕົ້ນ​ໄປ.

     ໃນ​ອີກ​ດ້ານ​ໜຶ່ງ ໃນ​ວັນ​ທີ 5 ມັງກອນ​ນີ້ ທະນາຄານ​ປະຊາຊົນ​ຈີນ ຫຼື​ທະນາຄານ​ກາງ​ຈີນ ໄດ້​ເປີດເຜີຍ​ວ່າ  ກອງ​ປະຊຸມ​ວຽກ​ງານ​ທະນາຄານ​ປະຊາຊົນ​ຈີນ ໄດ້​ຈັດ​ຂຶ້ນ​ຢູ່​ນະຄອນຫຼວງ​ປັກ​ກິ່ງ ແຕ່​ວັນ​ທີ 2-3 ມັງກອນ​ນີ້ ໂດຍ​ໄດ້​ກຳນົດ​ວຽກ​ງານ​ສຳຄັນ​ຫຼາຍ​ດ້ານ​ໃນ​ປີ 2020 ນັ້ນ​ກໍ​ຄື​ການ​ຮັກສາ​ນະໂຍບາຍ​ເງິນຕາ​ທີ່​ໝັ້ນ​ທ່ຽງ ໃຫ້​ມີ​ຄວາມ​ຄ່ອງ​ແຄ້ວ​ໃນ​ລະດັບ​ເໝາະ​ສົມ ນຳ​ໃຊ້​ມາດ​ຕະການ​ປັບປຸງ​ເພື່ອ​ຫຼຸດຜ່ອນ​ຄວາມ​ປັ່ນ​ປ່ວນ​ໃນ​ຮອບ​ວຽນ​ເສດຖະກິດ ເຮັດ​ໃຫ້​ສະພາບ​ຄ່ອງ​ຂອງ​ເງິນຕາ​ມີ​ຄວາມ​ພຽງພໍ​ຢ່າງ​ສົມ​ເຫດ​ສົມ​ຜົນ ຊຸກຍູ້​ໃຫ້​ປະລິມານ​ເງິນ​ກູ້​ສິນ​ເຊື່ອ ແລະ ການ​ລະດົມ​ທຶນ​ໃນ​ສັງຄົມ​ຂະຫຍາຍຕົວ​ໃຫ້​ສອດຄ່ອງ​ກັບ​ການ​ພັດທະນາ​ຂອງ​ເສດຖະກິດ; ສູ້​ຊົນ​ຍາດ​ເອົາ​ໄຊຊະນະ​ໃນ​ບັ້ນ​ປ້ອງ​ກັນ ແລະ ແກ້​ໄຂ​ຄວາມ​ສ່ຽງ​ຮ້າຍ​ແຮງ​ດ້ານ​ການ​ເງິນ​ຢ່າງ​ເດັດດ່ຽວ ປະຕິບັດ​ການເຄື່ອນໄຫວ​ສະເພາະ​ກິດ ເພື່ອ​ແກ້​ໄຂ​ຄວາມ​ສ່ຽງ​ດ້ານ​ການ​ເງິນ​ທາງ​ອິນ​ເຕີ​ເນັດ​ຢ່າງ​ຕໍ່​ເນື່ອງ ສ້າງ ແລະ ບູລະນະ​ກົນ​ໄກ​ຕິດຕາມ​ຄຸ້ມ​ຄອງ​ຢ່າງ​ມີ​ປະ​ສິດທິ​ຜົນ​ໃນ​ໄລຍະ​ຍາວ​ໃຫ້​ສົມບູນ​ຂຶ້ນ ເລັ່ງ​ລັດ​ສ້າງ​ກົນ​ໄກ​ຄຸ້ມ​ຄອງ​ການ​ເງິນ​ດ້ານ​ອະສັງຫາລິມະ​ຊັບ​ຢ່າງ​ມີ​ປະ​ສິດທິ​ຜົນ​ໃນ​ໄລຍະ​ຍາວ ຖື​ເອົາ​ການ​ຊ່ວຍ​ແກ້​ໄຂ​ຄວາມ​ຫຍຸ້ງຍາກ​ໃນ​ການ​ລະດົມ​ທຶນ​ໃຫ້​ແກ່​ວິ​ສາ​ຫະ​ກິດ​ຂະໜາດ​ນ້ອຍ ແລະ ຈຸນ​ລະວິ​ສາ​ຫະ​ກິດ​ເປັນ​ວຽກ​ງານ​ຈຸດ​ສຸມ ໃນ​ການ​ເພີ່ມ​ທະວີ​ການ​ສະໜັບສະໜູນ​ດ້ານ​ການ​ເງິນ​ໃຫ້​ແກ່​ການ​ປະຕິ​ຮູບ​ໂຄງ​ປະກອບ​ດ້ານ​ການ​ສະໜອງ.

      ໃນ​ຂະນະ​ດຽວ​ກັນ ກໍ​ເລັ່ງ​ລັດ​ບູລະນະ​ຂອບ​ຄຸ້ມ​ຄອງ​ມະຫາ​ພາກ​ຢ່າງ​ສຸຂຸມ​ຮອບ​ຄອບ; ສືບຕໍ່​ລົງ​ເລິກ​ການ​ປະຕິ​ຮູບ​ດ້ານ​ການ​ເງິນ ລົງ​ເລິກ​ຊຸກຍູ້​ການ​ປະຕິ​ຮູບ​ລະບົບ​ຄຸ້ມ​ຄອງ​ເງິນຕາ​ຕ່າງປະເທດ ສະໜັບສະໜູນ​ເຂດ​ທົດ​ລອງ​ການ​ຄ້າ​ເສລີ ທ່າ​ກຳປັ່ນ​ການ​ຄ້າ​ເສລີ​ແລະ ອື່ນໆ ປະຕິບັດ​ການ​ທົດ​ລອງ​ໄປ​ກ່ອນ​ໃນ​ດ້ານ​ການ​ປະຕິ​ຮູບ​ການ​ຄຸ້ມ​ຄອງ​ເງິນຕາ​ຕ່າງປະເທດ ແລະ ອື່ນໆ.

ຂ່າວທີ່ກ່ຽວຂ້ອງ