ຂ່າວຫຼ້າສຸດ

ເຂດ​ຂຽວ​ໃນ​ນະຄອນຫຼວງ​ແບກ​ແດດ ຖືກ​ໂຈມ​ຕີ

2.545 07 ມ.ກ. 2020 ຂ່າວຕ່າງປະເທດ
ເຂດ​ຂຽວ​ໃນ​ນະຄອນຫຼວງ​ແບກ​ແດດ ຖືກ​ໂຈມ​ຕີ

    ກອງທັບ​ຂອງ​ອີ​ຣັກ ແຈ້ງ​ໃຫ້​ຮູ້​ວ່າ ມີ​ຈະ​ຫຼວດ 3 ນັດ ໄດ້​ຖືກ​ຍິງ​ໄປ​ຕົກ​ໃສ່​ນະຄອນຫຼວງ​ແບກ​ແດດ ໃນ​ວັນ​ທີ 5 ມັງກອນ​ນີ້ ຊຶ່ງ​ໃນ​ນັ້ນ​ມີ 2 ນັດ ໄປ​ຕົກ​ໃສ່​ດ້ານ​ໃນ​ເຂດ​ຂຽວ ທີ່​ໄດ້​ຮັບ​ການ​ປ້ອງ​ກັນ​ຢ່າງ​ເຂັ້ມ​ງວດ ຢູ່​ໃນ​ນະຄອນຫຼວງ​ແບກ​ແດດ ຂອງ​ອີ​ຣັກ ຊຶ່ງ​ເຂດ​ດັ່ງກ່າວ ເປັນ​ທີ່​ຕັ້ງ​ຂອງ​ສຳນັກງານ​ອົງການ​ຂອງ​ລັດຖະບານ​ອີ​ຣັກ​ຫຼາຍ​ແຫ່ງ  ລວມ​ເຖິງ​ຄະນະ​ນັກ​ການ​ທູດ​ຂອງ​ຕ່າງປະເທດ​ຢູ່ນ​ອີ​ຣັກ ໃນ​ນັ້ນ​ມີ​ສະຖານທູດ​ຂອງ ສ ອາ​ເມ​ຣິ​ກາ. ເຖິງ​ຢ່າງໃດ​ກໍ​ຕາມ ຍັງ​ບໍ່​ມີ​ລາຍ​ງານ​ເຖິງ​ຜົນ​ຮ້າຍ​ທີ່​ຕາມ​ມາ​ຈາກ​ການ​ຍິງ​ໂຈມ​ຕີ​ດັ່ງກ່າວ.

    ເຫດການ​ດັ່ງກ່າວ​ເກີດ​ຂຶ້ນ ທ່າມກາງ​ທີ່​ເມື່ອ​ບໍ່​ດົນ​ມາ​ນີ້ ເກີດ​ມີ​ເຫດການ​ໂຈມ​ຕີ​ຫຼາຍ​ຄັ້ງ​ຢູ່​ໃນ​ອີ​ຣັກ ເພື່ອ​ຄັດຄ້ານ​ຕໍ່​ການ​ມີໜ້າ​ຂອງ​ກອງທັບ​ຕ່າງປະເທດ ລວມ​ເຖິງ​ເຫດການ​ໂຈມ​ຕີ​ທາງ​ອາກາດ​ຂອງ ສ ອາ​ເມ​ຫຣິ​ກາ ໃສ່​ສະໜາມ​ບິນ​ສາກົນ ໃນ​ນະຄອນຫຼວງ​ແບກ​ແດດ ທີ່​ໄດ້​ເຮັດ​ໃຫ້​ນາຍ​ພົນ ກາ​ເຊມ ໂຊ​ເລ​ມາ​ນີ ຜູ້​ບັນຊາ​ການ​ກົມ​ກອງ ກຸດ​​ສ ທີ່​ຂຶ້ນ​ກັບ​ກອງ​ກຳລັງ​ປ້ອງ​ກັນ​ປະຕິວັດ​ອິດ​ສະ​ລາມ ອີ​ຣານ (IRGC) ລວມ​ເຖິງ​ທ່ານ ອາ​​ລ-ຮູ​​ສ​ຊາຍ​ນີ ຜູ້​ບັນຊາ​ການ​ກອງ​ກຳລັງ​ທະຫານ​ທ້ອງຖິ່ນ​ຂອງ​ອີ​ຣັກ ນັ້ນ​ເສຍ​ຊີວິດ.

     ໃນ​ວັນ​ທີ 5 ມັງກອນ​ເຊັ່ນ​ກັນ ສະພາ​ແຫ່ງ​ຊາດ​ອີ​ຣັກ ໄດ້​ຮັບຮອງ​ມະຕິ​ສະບັບ​ໜຶ່ງ ໂດຍ​ໄດ້​ເນັ້ນ​ໜັກ​ວ່າ ລັດຖະບານ​ອີ​ຣັກ ຕ້ອງ​ໄດ້​ຢຸດຕິ​ການ​ໃຫ້​ທະຫານ​ຕ່າງປະເທດ​ມີໜ້າ​ຢູ່​ໃນ​ອີ​ຣັກ ແລະ ຮັບປະກັນ​ວ່າ ກອງທັບ​ຂອງ​ຕ່າງປະເທດ ບໍ່​ໃຊ້​ດິນແດນ ເຂດ​ທ້ອງຟ້າ ແລະ ເຂດ​ທະເລ​ຂອງ​ອີ​ຣັກ ເພື່ອ​ເຫດຜົນ​ໃດໆ​ກໍ​ຕາມ.

ຂ່າວທີ່ກ່ຽວຂ້ອງ