ຂ່າວຫຼ້າສຸດ

ນະຄອນຫຼວງ ສົ່ງ 14 ນັກ​ແມ້ນ​ປືນ​ຮ່ວມ​ຊຽງ​ຂວາງ​ເກມ

530 07 ມ.ກ. 2020 ວົງຈອນກີລາ
ນະຄອນຫຼວງ ສົ່ງ 14 ນັກ​ແມ້ນ​ປືນ​ຮ່ວມ​ຊຽງ​ຂວາງ​ເກມ

    ທ່ານ ພຸດ​ທະ​ສັກ ສຸກ​ອາ​ລຸນ ປະທານ​ສະຫະພັນ​ກີລາ​ຍິງ​ປືນ ນະຄອນຫຼວງ​ວຽງ​ຈັນ (ນວ)  ປະທານ​ສະໂມສອນ​ຍິງ​ປືນ​ໄອ​ພີ​ເອັດ​ຊີ​ລາວ ທັງ​ເປັນ​ຜູ້ອຳນວຍການ​ສະໜາມ​ເຝິກຊ້ອມ​ກີລາ​ຍິງ​ປືນ 5 ເມ ສາ ແຈ້ງ​ໃຫ້​ຊາບ​ໃນ​ວັນ​ທີ 3 ມັງກອນ 2020 ວ່າ: ປີ​ນີ້​ນັກກີລາ​ເກົ່າ​ທີ່​ເຄີຍ​ສ້າງ​ຜົນງານ​ໃຫ້​ນັກກີລາ​ຍິງ​ປືນ ນວ ໃນ​ງານ​ມະ​ຫະ​ກຳ​ກີລາ​ແຫ່ງ​ຊາດ ຄັ້ງ​ທີ X ທີ່​ແຂວງ​ອຸດົມ​ໄຊ ປີ 2014 ໄດ້​ກັບ​ໄປ​ຫຼິ້ນ​ໃຫ້​ບັນດາ​ກົມ​ກອງ​ຂອງ​ຕົນ​ຈຳນວນ​ໜຶ່ງ ເຊິ່ງ​ພວກ​ເຮົາ​ຈຳເປັນ​ຕ້ອງ​ໄດ້​ສ້າງ​ນັກກີລາ​ຮຸ່ນ​ໃໝ່​ຂຶ້ນ​ມາ​ທົດ​ແທນ ປັດຈຸບັນ​ກໍ​ສາມາດ​ຄັດ​ເລືອກ​ໄດ້ 14 ຄົນ ຍິງ 6 ຄົນ ແລະ ໄດ້​ເກັບ​ຕົວ​ເຝິກຊ້ອມ​ເປັນ​ທີ່​ຮຽບ​ຮ້ອຍ​ທີ່​ສະໜາມ​ເຝິກຊ້ອມ​ກີລາ​ຍິງ​ປືນ 5 ເມສາ ບ້ານ​ສົມ​ສະຫງ່າ ເມືອງ​ໄຊ​ເສດ​ຖາ ຮ່ວມ​ກັບ​ທັບ​ນັກກີລາ​ກະຊວງ​ປ້ອງ​ກັນ​ຄວາມ​ສະຫງົບ ໄດ້​ດຳເນີນ​ການ​ເຝິກຊ້ອມ​ແຕ່​ວັນ​ຈັນ​ຫາ​ສຸກ​ວັນ​ລະ 6 ຊົ່ວໂມງ​ຄື ພາກ​ເຊົ້າ ຊ້ອມ​ເວລາ 9-11:00 ໂມງ ແລະ ພາກ​ແລງ​ຊ້ອມ​ເວລາ 13-15:00 ໂມງ ໃນ​ນັ້ນ​ຄູ​ເຝິກ​ໄດ້​ເນັ້ນ​ທາງ​ດ້ານ​ພະລະ​ກຳລັງ ສະມາທິ ແລະ ເທັກ​ນິກ​ການ​ຍິງ​ປືນ​ປະເພດ​ຕ່າງໆ ຕາມ​ທີ່​ນັກກີລາ​ຖະ​ນັດ​ຍິງ.

    ຜ່ານ​ການ​ເກັບ​ຕົວ​ເຝິກຊ້ອມ​ເຫັນ​ວ່າ​ນັກກີລາ​ແຕ່ລະຄົນ​ມີ​ຄວາມ​ກະ​ຕື​ລື​ລົ້ນ ແລະ ເອົາໃຈໃສ່​ເປັນ​ຢ່າງ​ດີ ໂດຍ​ທຸກ​ຄົນ​ມີ​ຄວາມ​ມຸ້ງ​ຫວັງ​ຢາກ​ຈະ​ສ້າງ​ຜົນງານ​ເພື່ອ​ເປັນ​ກຽດ​ສັກ​ສີ ແລະ ຊື່​ສຽງ​ໃຫ້​ແກ່​ບ້ານ​ເກີດ​ເມືອງ​ນອນ​ກໍ​ຄື ນວ ເຖິງ​ຢ່າງໃດ​ກໍ​ດີ​ໃນ​ການ​ເຂົ້າ​ຮ່ວມ​ງານ​ມະ​ຫະ​ກຳ​ກີລາ​ແຫ່ງ​ຊາດ ຄັ້ງ​ທີ Xl  ຫຼື ຊຽງ​ຂວາງ​ເກມ​ທີ່​ແຂວງ​ຊຽງ​ຂວາງ​ຮັບ​ກຽດ​ເປັນ​ເຈົ້າພາບ ໃນ​ວັນ​ທີ 22 ມີນາ​ຫາ 1 ເມສາ 2020 ຍັງ​ບໍ່​ສາມາດ​ປະ​ເມີນ​ການ​ສ້າງ​ຜົນງານ​ຂອງ​ນັກກີລາ​ໄດ້ ເນື່ອງ​ຈາກ​ນັກກີລາ​ຄົນ​ເກົ່າ​ທີ່​ເຄີຍ​ສ້າງ​ຜົນງານ 10 ຫຼຽນ​ຄຳ ໄດ້​ກັບ​ໄປ​ຊ່ວຍ​ກົມ​ກອງ ແຕ່​ພວກ​ເຮົາ​ຈະ​ພະຍາຍາມ​ເຮັດ​ໃຫ້​ດີ​ທີ່​ສຸດ ເພື່ອ​ສ້າງ​ຜົນງານ​ໃຫ້ ນວ ສາມາດ​ທວງ​ຕຳແໜ່ງ​ເຈົ້າ​ຫຼຽນ​ຄຳ ໃນ​ຊຽງ​ຂວາງ ເກມ 2020 ກັບ​ມາ​ຍິ່ງ​ໃຫຍ່​ອີກ​ຄັ້ງ.

    ທັງ​ນີ້​ໃນ​ງານ​ຊຽງ​ຂວາງ​ເກມ​ປີ​ນີ້ ສຳລັບ​ການ​ແຂ່ງຂັນ​ກີລາ​ຍິງ​ປືນ​ຈະ​ມີ​ການ​ຊີງ​ໄຊ​ກັນ​ທັງ​ໝົດ 32 ລາຍການ ປະກອບ​ມີ​ປືນ​ມາດຕະຖານ ທັງ​ປະເພດ​ປືນ​ສັ້ນ ແລະ ປືນ​ຍາວ ມີ​ຊີງ​ຫຼຽນ​ຄຳ​ກັນ​ທັງ ໝົດ 24 ລາຍການ​ກໍ​ຄື ປະເພດ​ຍິງ 12 ລາຍການ ແລະ ປະເພດ​ຊາຍ 12 ລາຍການ ສ່ວນ​ປະເພດ​ປືນ​ຍາວ​ອັດ​ລົມ​ເປົ້າ​ເລື່ອນ ມີ​ຊີງ​ໄຊ 8 ລາຍການ ຍິງ 4 ລາຍການ ໃນ​ນີ້​ທີມ​ນັກກີລາ​ຍິງ​ປືນ ນວ 14 ຄົນ ເຂົ້າ​ຮ່ວມ​ແຂ່ງຂັນ​ຄົບ​ທຸກ​ລາຍການ ນອກ​ນີ້​ຍັງ​ມີ​ການ​ແຂ່ງຂັນ​ກີລາ​ຍິງ​ປືນ​ໄອ​ພີ​ເອັດ​ຊີ​ສາທິດ​ອີກ​ເພື່ອ​ຮອງ​ຮັບ​ກຽມ​ຈັດ​ເຂົ້າ​ໃນ​ການ​ແຂ່ງຂັນ​ງານ​ກີລາ​ແຫ່ງ​ຊາດ​ໃນ​ຄັ້ງ​ຕໍ່​ໄປ.   

ຂ່າວທີ່ກ່ຽວຂ້ອງ