ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 07-01-2020

1.359 07 ມ.ກ. 2020 ຫົວຂໍ້ຂ່າວອື່ນໆ

   ມື້­ນີ້​ຂໍ​ພາ​ທ່ານ​ຜູ້​ອ່ານ​ໄປ​ຮູ້​ກັບ​ກ້ອງ​ວິ­ເສດ ເພື່ອ​ຈັບ​ຜິດ​ຄົນ​ໃຊ້​ໂທລະ­ສັບ​ມື​ຖື​ເວ­ລາ​ຂັບ​ລົດ​ຢູ່ ອົດ​ສະ​ຕຣາ​ລີ ຕໍ່​ໃສ່​ກົດ­ໝາຍ​ຕ້ານ​ຢາ­ສູບ​ໄຟ­ຟ້າ​ທີ່​ລັດ​ນິວ​ຢອກ ສ ອາ​ເມ​ຣິ​ກາ ແລະ ຂ່າວ​ກ່ຽວ​ກັບ​ຫ້າມ​ດາວ​ໂຫຼດ​ພາບ​ບົດ​ຕ່າງໆ​ແບບ​ຜິດ​ກົດ­ໝາຍ​ຢູ່ ຍີ່­ປຸ່ນ.

   ທີ່ ອົດ​ສະ​ຕຣາ​ລີ: ອີງ​ຕາມ​ແຫຼ່ງ​ຂ່າວ​ໜັງ­ສື­ພິມ ສະ​ແຕນ​ດາດ (Standard) ທີ່​ໃຫ້​ຮູ້​ໃນ​ວັນ​ທີ 1 ທັນ­ວາ ປີ 2019 ວ່າ: ທາງ​ການ​ຂອງ​ລັດ​ນິວ​ຊາວ​ເວນ (New South Wale) ຂອງ​ອົດ​ສະ​ຕຣາ​ລີ ໄດ້​ເລີ່ມ​ນຳ​ໃຊ້​ກ້ອງ​ຕາ​ທິບ​ຄຸນ​ນະ​ພາບ ລະ­ດັບ​ຍອດ​ຢ້ຽມ ເພື່ອ​ກວດ​ຈັບ​ການ​ໃຊ້​ໂທລະ­ສັບ​ມື​ຖື​ໃນ​ເວ­ລາ​ຂັບ​ຂີ່ ນີ້​ຖື​ວ່າ​ເປັນ​ມາດ​ຕະ­ການ​ເດັດ­ຂາດ ເພື່ອ​ດັດ​ສັນ­ດານ​ພວກ​ຕິດ​ນິ­ໄສ​ໃຊ້​ໂທລະ­ສັບ​ເວ­ລາ​ຂັບ​ຂີ່.

   ດ້ວຍ​ມາດ​ຕະ­ການ​ດັ່ງ­ກ່າວ ລັດ​ນິວ​ຊາວ​ເວນ ໄດ້​ກາຍ­ເປັນ​ແຫ່ງ​ທຳ​ອິດ​ຂອງ​ໂລກ​ທີ່​ນຳ​ໃຊ້​ກ້ອງ​ຄຸນ​ນະ​ພາບ​ສູງ ເພື່ອ​ກວດ​ຈັບ​ພວກ​ເສບ​ຕິດ​ມື​ຖື​ເວ­ລາ​ຂັບ​ຂີ່ ອົດ​ສະ​ຕຣາ​ລີ ມີ​ກົດ­ໝາຍ​ວ່າ​ດ້ວຍ​ການ​ຈະ­ລາ­ຈອນ ທີ່​ກຳ­ນົດ​ໃຫ້­ການ​ໃຊ້​ໂທລະ­ສັບ​ມື​ຖື​ເວ­ລາ​ຂັບ​ຂີ່ ເປັນ​ການ​ກະ­ທຳ​ທີ່​ຜິດ​ກົດ­ໝາຍ ໂດຍ​ມີ​ບົດ​ລົງ­ໂທດ​ດ້ວຍ​ການ​ຕັດ​ຄະ­ແນນ ແລະ ດ້ວຍ​ການ​ປັບ​ໃໝ​ເປັນ​ເງິນ​ຈຳ­ນວນ​ຫຼວງ­ຫຼາຍ.

   ເພື່ອ​ເຮັດ​ໃຫ້​ກົດ­ໝາຍ​ການ​ຈະ­ລາ­ຈອນ​ມີ​ຜົນ​ສັກ­ສິດ ໃນ​ທາງ​ປະ­ຕິ­ບັດ ລັດ​ນິວ​ຊາວ​ເວນ ໄດ້​ອອກ​ບັດ​ພາ​ທາງ​ໝູ່​ໃນ​ການ​ນຳ​ໃຊ້​ເຄື່ອງ­ມື​ລ້ຳ​ຍຸກ ເພື່ອ​ຈັບ​ຜິດ​ພວກ​ໃຊ້​ໂທລະ­ສັບ​ເວ­ລາ​ຂັບ​ຂີ່​ບໍ່​ໃຫ້​ລອດ​ສາຍ­ຕາ​ໄປ​ໄດ້ ຂ່າວ​ໄດ້​ບອກ​ພຽງ​ວ່າ: ກ້ອງ​ຊະ­ນິດ​ດັ່ງ­ກ່າວ​ນັ້ນ ສາ­ມາດ​ຖ່າຍ​ພາບ​ດ້ວຍ​ເຕັກ​ໂນ​ໂລ​ຊີ​ລະ­ດັບ​ສູງ ທີ່​ສາ­ມາດ​ກວດ​ຈັບ​ຜູ້​ກະ­ທຳ​ຜິດ​ໄດ້​ໃນ​ທຸກໆ​ກໍ­ລະ­ນີ ຢູ່​ລາວ​ພວກ​ເຮົາ​ບໍ່​ຈຳ­ເປັນ​ຕ້ອງ​ໃຊ້​ກ້ອງ​ລາ­ຄາ​ສູງ​ປານ​ນັ້ນ​ກໍ​ໄດ້ ເພາະ​ການ​ໃຊ້​ໂທລະ­ສັບ​ມື​ຖື​ເວ­ລາ​ຂັບ​ຂີ່​ນັ້ນ ເຮັດ​ກັນ​ຢ່າງ​ເປີດ­ເຜີຍ ສາ­ມາດ​ເຫັນ​ຕຳ­ຕາ​ໂດຍ​ກົງ

   ທີ່ ສ ອາ​ເມ​ຣິ​ກາ: ຈາກ​ກໍ­ລະ­ນີ​ມີ​ຜູ້​ເສຍ​ຊີ­ວິດ ຈຳ­ນວນ 5 ຄົນ ຍ້ອນ​ຢາ­ສູບ​ໄຟ­ຟ້າ ລັດ​ຖະ​ສະ­ພາ ລັດ​ນິວ​ຢອກ ສ ອາ​ເມ​ຣິ​ກາ ຈຶ່ງ​ໄດ້​ຮັບ­ຮອງ​ເອົາ​ມະ­ຕິ​ດ້ວຍ​ສຽງ​ສ່ວນ​ຫຼາຍ (42 ສຽງ​ເຫັນ​ດີ ຕໍ່ 2 ສຽງ​ຄັດ­ຄ້ານ) ໃນ​ທ້າຍ​ເດືອນ​ພະ­ຈິກ ປີ 2019 ຮັບ­ຮອງ​ເອົາ​ກົດ­ໝາຍ​ຫ້າມ​ຈຳ­ໜ່າຍ​ຢາ­ສູບ​ໄຟ­ຟ້າ​ທຸກ​ຊະ­ນິດ ໃນ​ທົ່ວ​ລັດ​ນິວ​ຢອກ (ໜັງ­ສື­ພິມ​ຜູ້​ແທນ​ປະ­ຊາ­ຊົນ 9-12/12/2019).

   ຂ່າວ​ບອກ​ວ່າ: ລັດ​ນິວ​ຢອກ​ເຄີຍ​ມີ​ຮ່າງ​ກົດ­ໝາຍ​ຫ້າມ​ໃຊ້​ຢາ­ສູບ​ໄຟ­ຟ້າ​ມາ​ແລ້ວ ແຕ່​ຮ່າງ​ກົດ­ໝາຍ​ທີ່​ວ່າ​ນັ້ນ ບໍ່​ໄດ້​ຫ້າມ​ການ­ຈຳ­ໜ່າຍ ດັ່ງ­ນັ້ນ ຈຶ່ງ​ມີ​ຊ່ອງ​ຫວ່າງ ຊ່ອງ​ໂຫວ່ ບໍ່​ສາ­ມາດ​ຈຳ­ກັດ ການ​ບໍ­ລິ­ໂພກ​ຢາ­ສູບ​ຊະ­ນິດ​ນີ້​ໄດ້ ສຳ­ລັບ​ກົດ­ໝາຍ​ສະ­ບັບ​ປັບ­ປຸງ​ນີ້ ໄດ້​ກຳ­ນົດ​ຫ້າມ​ລະ­ອຽດ​ການ​ສູບ ແລະ ການ­ຈຳ­ໜ່າຍ​ຢາ­ສູບ​ໄຟ­ຟ້າ​ທຸກ​ຊະ­ນິດ ເປົ້າ​ໝາຍ​ຂອງ​ກົດ­ໝາຍ​ສະ­ບັບ​ນີ້​ແມ່ນ ເລັງ​ໃສ່​ປົກ​ປ້ອງ​ຊາວ​ໜຸ່ມ​ຈາກ​ຜົນ​ຮ້າຍ​ຂອງ​ຢາ­ສູບ​ໄຟ­ຟ້າ ເວົ້າ​ລວມ​ແລ້ວ ໃນ​ປັດ­ຈຸ­ບັນ​ຄົນ​ໃນ ສ ອາ​ເມ​ຣິ​ກາ ຈຳ­ນວນ​ຫຼວງ­ຫຼາຍ ນິ­ຍົມ​ຊົມ​ຊອບ​ຢາ­ສູບ​ໄຟ­ຟ້າ​ທີ່​ມີ​ຫຼາຍ​ຊະ­ນິດ ມີ​ຫຼາຍ​ກິ່ນ​ໃຫ້​ເລືອກ ແຕ່​ທັງ​ໝົດ​ລ້ວນ​ແຕ່​ບັນ­ຈຸ​ສານ​ເຄ​ມີ​ທີ່​ເປັນ​ອັນ­ຕະ­ລາຍ​ຕໍ່​ສຸ­ຂະ­ພາບ​ຂອງ​ຄົນ​ເຮົາ.

   ທີ່ ຍີ່­ປຸ່ນ: ມີ​ຂ່າວ​ຈາກ​ຍີ່­ປຸ່ນ​ໃນ​ຕົ້ນ​ເດືອນ​ທັນ­ວາ ປີ 2019 ທີ່​ບອກ​ວ່າ: ລັດ­ຖະ­ບານ​ຍີ່­ປຸ່ນ ໄດ້​ອະ­ນຸ­ມັດ​ແຜນ​ຄວບ​ຄຸມ​ການ​ດາວ​ໂຫຼດ​ຂໍ້​ມູນ​ຂ່າວ­ສານ ທີ່​ລະ­ເມີດ​ກົດ­ໝາຍ​ວ່າ​ດ້ວຍ​ລິ​ຂະ​ສິດ ເຊັ່ນ: ການ​ດາວ​ໂຫຼດ​ພາບ​ວິ​ດີ​ໂອ​ກາ​ຕູນ ເກມ​ຄອມ​ພິວ​ເຕີ ບົດ​ຂຽນ ກໍ​ຄື ບົດ​ເລື່ອງ​ຕ່າງໆ​ທີ່​ໄດ້​ມີ​ການ​ຈົດ​ທະ­ບຽນ​ລິ​ຂະ​ສິດ​ຖືກ­ຕ້ອງ​ຕາມ​ກົດ­ໝາຍ.

   ໃນ­ຕໍ່­ໜ້າ ແຜນ​ຄວບ​ຄຸມ​ດັ່ງ­ກ່າວ ຈະ​ຂະ­ຫຍາຍ​ກວມ​ເອົາ​ຂໍ້​ມູນ​ຂ່າວ­ສານ​ທັງ​ໝົດ ທີ່​ໄດ້​ຈົດ​ທະ­ບຽນ​ລິ​ຂະ​ສິດ​ຖືກ­ຕ້ອງ​ຕາມ​ກົດ­ໝາຍ ແລະ ຈະ​ມີ​ບົດ​ລົງ­ໂທດ​ລະ­ອຽດ​ຕໍ່​ຜູ້​ລະ­ເມີດ.

ຂ່າວທີ່ກ່ຽວຂ້ອງ