ຂ່າວຫຼ້າສຸດ

ນັກກີລາຖີບລົດທີມຊາດລາວ ຮ່ວມແຂ່ງຂັນຢູ່ກຳປູເຈຍ

690 06 ມ.ກ. 2020 ວົງຈອນກີລາ
ນັກກີລາຖີບລົດທີມຊາດລາວ ຮ່ວມແຂ່ງຂັນຢູ່ກຳປູເຈຍ

   ນັກ­ກີ­ລາ​ຖີບ​ລົດ​ທີມ​ຊາດ​ລາວ ສ້າງ​ຜົນ­ງານ​ດີ​ສົມ­ຄວນ​ໃນ​ມະ​ຫະ​ກຳ​ກີ­ລາ​ຊີ­ເກມ ຄັ້ງ​ທີ 30 ຢູ່​ປະ­ເທດ​ຟີ​ລິບ​ປິນ ໂດຍ​ການ​ຍາດ​ໄດ້ 1 ຫຼຽນ​ເງິນ ຈາກ​ທ້າວ ອະ­ລິ­ຍາ ພູນ​ສະ​ຫວັດ ແຕ່​ພາ­ລະ­ກິດ​ຍັງ​ມີ​ຕໍ່​ທັບ​ນັກ­ກີ­ລາ​ລົດ­ຖີບ​ທີມ​ຊາດ​ລາວ ຍັງ​ສືບ­ຕໍ່​ເຂົ້າ​ຮ່ວມ​ແຂ່ງ­ຂັນ​ລາຍ­ການ Combodia Bay Cycling Tour 2020 ຢູ່​ພະ­ນົມ​ເປັນ ປະ­ເທດ​ກຳ­ປູ­ເຈຍ ວັນ​ທີ 4-6 ມັງ­ກອນ 2020 ເພື່ອ​ສະ​ສົມ​ຄະ­ແນນ​ເຂົ້າ​ແຂ່ງ­ຂັນ​ໂອ​ລິມ​ປິກ ປີ 2020 ຢູ່​ປະ­ເທດ​ຍີ່­ປຸ່ນ.

   ການ​ເຂົ້າ​ຮ່ວມ​ແຂ່ງ­ຂັນ​ຄັ້ງ​ນີ້ ໄດ້​ຮັບ​ການ​ສະ­ໜັບ­ສະ­ໜູນ​ຂອງ​ທ່ານ ສຸກ​ສາ­ຄອນ ໃສ​ທິ​ລາດ ປະ­ທານ​ບໍ­ລິ­ສັດ​ໃສ​ທິ​ລາດ​ກຣຸບ ຮອງ​ປະ­ທານ​ສະ­ຫະ­ພັນ​ລົດ­ຖີບ​ແຫ່ງ​ຊາດ​ລາວ ປະ­ທານ​ສະ­ຫະ­ພັນ​ລົດ­ຖີບ​ນະ­ຄອນ­ຫຼວງ​ວຽງ​ຈັນ 24 ລ້ານ​ກີບ ເພື່ອ​ໃຊ້​ຈ່າຍ​ໃນ​ການ​ເດີນ­ທາງ ອາ­ຫານ ແລະ ທີ່​ພັກ ລະ­ຫວ່າງ​ການ​ແຂ່ງ­ຂັນ ເຊິ່ງ​ປະ­ກອບ​ມີ 7 ຄົນ ຄື: ທ່ານ ກາບ​ຊ້ອນ ສຸ­ວັນ­ນະ​ຣາຊ໌ ເລ­ຂາ­ທິ­ການ​ສະ­ຫະ­ພັນ​ລົດ­ຖີບ​ແຫ່ງ​ຊາດ​ລາວ ຫົວ­ໜ້າ​ຄະ­ນະ ທ່ານ ບຸນ​ຍະ​ສິດ ວົງ​ຄຳ​ຕາ ຮອງ​ຫົວ­ໜ້າ​ຄະ­ນະ ທ້າວ ອະ­ລິ­ຍາ ພູນ​ສະ​ຫວັດ ຫົວ­ໜ້າ​ທີມ​ນັກ­ກີ­ລາ ທ້າວ ຖາ­ວອນ ພົນ​ອາ­ສາ ທ້າວ ທະ­ວີ​ສັກ ສຸ­ວັນ­ນະ​ຣາຊ໌ ທ້າວ ລຳ​ເງິນ ວັນ­ນະ​ສຸກ ແລະ ທ້າວ ສຸດ­ທິ​ສັກ ວັນ​ດີ​ລາ.

   ກ່ອນ​ໜ້າ​ນີ້ ສະ­ຫະ­ພັນ​ລົດ­ຖີບ ກໍ​ໄດ້​ລະ­ດົມ​ເງິນ​ສະ­ໜັບ­ສະ­ໜູນ​ນັກ­ກີ­ລາ​ລົດ­ຖີບ ທີ່​ຍາດ​ໄດ້​ຫຼຽນ​ເງິນ​ໃນ​ມະ​ຫະ​ກຳ​ຊີ­ເກມ ຄັ້ງ​ທີ 30 ຈາກ​ໜູ່​ເພື່ອນ ນັກ­ທຸ­ລະ­ກິດ​ໜຸ່ມ ມູນ​ຄ່າ 85 ລ້ານ​ກີບ ມອບ​ໃຫ້​ນັກ­ກີ­ລາ​ໃນ​ກາງ​ເດືອນ​ທັນ­ວາ ຜ່ານ​ມາ.

ຂ່າວທີ່ກ່ຽວຂ້ອງ