ຂ່າວຫຼ້າສຸດ

ສຳເລັດການຈັດແຂ່ງຂັນກີລາເປຕັງມິດຕະພາບ 4 ແຂວງພາກໃຕ້

459 06 ມ.ກ. 2020 ວົງຈອນກີລາ
ສຳເລັດການຈັດແຂ່ງຂັນກີລາເປຕັງມິດຕະພາບ 4 ແຂວງພາກໃຕ້

   ພະ​ແນກ​ສຶກ​ສາ​ທິ​ການ ແລະ ກີ­ລາ (ສສກ) ແຂວງ​ອັດ​ຕະ​ປື ຈັດ​ແຂ່ງ­ຂັນ​ກີ­ລາ​ເປ​ຕັງ​ມິດ­ຕະ­ພາບ 4 ແຂວງ​ພາກ​ໃຕ້ ຄື: ອັດ​ຕະ​ປື ເຊ​ກອງ ສາ­ລະ​ວັນ ແລະ ຈຳ­ປາ​ສັກ ຄັ້ງ​ທີ V ປະ­ຈຳ​ປີ 2019 ຊີງ​ຂັນ​ທ່ານ​ຫົວ­ໜ້າ​ພະ​ແນກ ສສກ ແຂວງ​ອັດ​ຕະ​ປື ຂຶ້ນ​ວັນ​ທີ 27 ທັນ­ວາ 2019 ຢູ່​ເດີ່ນ​ກີ­ລາ​ພະ​ແນກ​ດັ່ງ­ກ່າວ ໂດຍ​ມີ​ທ່ານ ຄຳ​ພູນ ແກ້ວ​ມາ­ລາ ຫົວ­ໜ້າ​ພະ​ແນກ ສສກ ແຂວງ​ອັດ​ຕະ​ປື ປະ­ທານ​ຈັດ​ງານ​ແຂ່ງ­ຂັນ​ກີ­ລາ ມິດ­ຕະ­ພາບ 4 ແຂວງ​ພາກ​ໃຕ້ ຄະ­ນະ​ນຳ​ພະ​ແນກ ສສກ 4 ແຂວງ ຄູ​ເຝິກ ແລະ ນັກ­ກີ­ລາ ເຂົ້າ​ຮ່ວມ.

   ທ່ານ ອຸ­ດົມ​ສິນ ສີ​ຊາ​ນົນ ຮອງ​ຫົວ­ໜ້າ​ພະ​ແນກ ສສກ ແຂວງ​ອັດ​ຕະ​ປື ກ່າວ​ວ່າ: ການ​ແຂ່ງ­ຂັນ​ກີ­ລາ ດັ່ງ­ກ່າວ ໄດ້​ຜັດ­ປ່ຽນ​ກັນ​ເປັນ​ເຈົ້າ­ພາບ ເພື່ອ​ພົບ​ປະ​ສ້າງ­ສັນ ຮັດ​ແໜ້ນ​ຄວາມ​ສາ­ມັກ­ຄີ ແລະ ແລກ­ປ່ຽນ​ບົດ­ຮຽນ​ເຊິ່ງ​ກັນ ແລະ ກັນ​ດ້ານ​ວຽກ​ງານ​ກີ­ລາ ທັງ​ເປັນ​ການ​ສ້າງ​ຂະ​ບວນ​ການ​ສະ­ເຫຼີມ­ສະ­ຫຼອງ​ສົ່ງ​ທ້າຍ​ປີ​ເກົ່າ ແລະ ຕ້ອນ­ຮັບ​ປີ​ໃໝ່​ສາ­ກົນ 2020 ໃຫ້​ມີ​ບັນ­ຍາ­ກາດ​ຟົດ­ຟື້ນ ແລະ ເບີກ­ບານ​ມ່ວນ­ຊື່ນ ເຊິ່ງ​ຄັ້ງ​ນີ້​ໄດ້​ກຳ­ນົດ​ແຕ່​ກີ­ລາ​ເປ​ຕັງ ປະ­ກອບ​ມີ 3 ລາຍ­ການ​ຄື: ທີມ​ການ​ນຳ ທີມ​ຊາວ​ໜຸ່ມ​ຊາຍ ແລະ ທີມ​ຊາວ​ໜຸ່ມ​ຍິງ.

   ຜ່ານ​ການ​ແຂ່ງ­ຂັນ​ທີມ​ການ​ນຳ​ຊະ­ນະ​ເລີດ​ແຂວງ​ສາ­ລະ​ວັນ ໄດ້​ຮັບ​ຂັນ 1 ໜ່ວຍ ພ້ອມ​ເງິນ​ລາ­ງວັນ 1 ລ້ານ​ກີບ ທີ 2 ແຂວງ​ຈຳ­ປາ​ສັກ ໄດ້​ຮັບ​ເງິນ​ລາ­ງວັນ 800.000 ກີບ ທີ 3 ແຂວງ​ເຊ​ກອງ ໄດ້​ຮັບ​ເງິນ​ລາ­ງວັນ 600.000 ກີບ ສ່ວນ​ທີມ​ຊາວ​ໜຸ່ມ​ຊາຍ ຊະ­ນະ​ເລີດ​ແຂວງ​ສາ­ລະ​ວັນ ໄດ້​ຮັບ​ຂັນ 1 ໜ່ວຍ ພ້ອມ​ເງິນ​ລາ­ງວັນ 1 ລ້ານ​ກີບ ທີ 2 ແຂວງ​ອັດ​ຕະ​ປື ໄດ້​ຮັບ​ເງິນ​ລາ­ງວັນ 800.000 ກີບ ທີ 3 ແຂວງ​ຈຳ­ປາ​ສັກ ໄດ້​ຮັບ​ເງິນ​ລາ­ງວັນ 600.000 ກີບ ສຳ­ລັບ​ທີມ​ຊາວ​ໜຸ່ມ​ຍິງ ຊະ­ນະ​ເລີດ​ແຂວງ​ຈຳ­ປາ​ສັກ ໄດ້​ຮັບ​ຂັນ 1 ໜ່ວຍ ພ້ອມ​ເງິນ​ລາ­ງວັນ 1 ລ້ານ​ກີບ ທີ 2 ແຂວງ​ສາ­ລະ​ວັນ ໄດ້​ຮັບ​ເງິນ​ລາ­ງວັນ 800.000 ກີບ ທີ 3 ແຂວງ​ອັດ​ຕະ​ປື ໄດ້​ຮັບ​ເງິນ​ລາ­ງວັນ 600.000 ກີບ.

ຂ່າວທີ່ກ່ຽວຂ້ອງ