ຂ່າວຫຼ້າສຸດ

ສະໜາມຮອງຮັບກີລາແຫ່ງຊາດ 2020 ມີຄວາມພ້ອມ 90%

1.329 03 ມ.ກ. 2020 ວົງຈອນກີລາ
ສະໜາມຮອງຮັບກີລາແຫ່ງຊາດ 2020 ມີຄວາມພ້ອມ 90%

   ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ Xl (ຊຽງ​ຂວາງ ເກມ 2020) ທີ່​ແຂວງ​ຊຽງ​ຂວາງ​ເປັນ​ເຈົ້າ­ພາບ ຈະ​ຈັດ​ຂຶ້ນ​ວັນ​ທີ 22 ມີ­ນາ-1 ເມ­ສາ 2020 ປັດ­ຈຸ­ບັນ​ການ​ກະ­ກຽມ​ຄວາມ​ພ້ອມ​ດ້ານ​ຕ່າງໆ ເປັນ­ຕົ້ນ​ໂຮງ­ແຮມ ເຮືອນ​ພັກ ບ່ອນ​ພັກ​ຄູ​ເຝິກ-ນັກ­ກີ­ລາ ສະ­ໜາມ​ກີ­ລາ​ປະ­ເພດ​ຕ່າງໆ ມີ​ຄວາມ​ພ້ອມ 90% ເພື່ອ​ຮອງ​ຮັບ​ໃຫ້­ການ​ຈັດ​ງານ ຂະ­ນະ​ທີ່​ເຈົ້າ­ພາບ​ຈະ​ສົ່ງ​ນັກ­ກີ­ລາ​ຮ່ວມ​ແຂ່ງ­ຂັນ 28 ປະ­ເພດ​ກີ­ລາ ພ້ອມ​ຕັ້ງ​ເປົ້າ​ຕິດ 1 ໃນ 5 ອັນ​ດັບ​ທຳ​ອິດ​ຂອງ​ຕາ­ຕະ­ລາງ​ສະ­ຫຼຸບ​ຫຼຽນ.

   ທ່ານ ບົວ​ລີ ພັນ​ນາ​ວົງ ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ (ສສກ) ແຂວງ​ຊຽງ​ຂວາງ ລາຍ​ງານ​ຕໍ່​ກອງ​ປະ­ຊຸມ​ຄົບ​ຄະ­ນະ​ບໍ­ລິ­ຫານ​ງານ​ຄະ­ນະ​ກຳ­ມະ­ການ​ໂອ​ແລມ​ປິກ​ແຫ່ງ​ຊາດ​ລາວ ປະ­ຈຳ​ປີ 2019 ວັນ​ທີ 24 ທັນ­ວາ ຜ່ານ​ມາ​ວ່າ ການ​ກະ­ກຽມ​ຄວາມ​ພ້ອມ​ຈັດ​ງານ ຊຽງ​ຂວາງ​ເກມ ມາ​ຮອດ​ປັດ­ຈຸ­ບັນ​ດ້ານ​ສະ­ໜາມ​ຈັດ­ການ​ແຂ່ງ­ຂັນ​ມີ​ຄວາມ​ພ້ອມ 90% ໂດຍ​ສະ­ເພາະ ສະ­ໜາມ​ເປີດ-ປິດ ແມ່ນ​ຍັງ​ເຫຼືອ​ແຕ່​ການ​ປູກ​ຫຍ້າ​ເລັກ​ໜ້ອຍ ແລະ ບົວ­ລະ­ບັດ​ເພີ່ມ​ຕື່ມ ສຳ­ລັບ​ທີ່​ພັກ​ນັກ­ກີ­ລາ ໂດຍ​ສະ­ເພາະ ໂຮງ­ແຮມ ເຮືອນ​ພັກ ບ່ອນ​ພັກ​ຄູ​ເຝິກ ແລະ ນັກ­ກີ­ລາ ມີ​ຄວາມ​ພ້ອມ 100% ແລະ ຄາດ​ວ່າ​ຈະ​ສາ­ມາດ​ຮັບ­ຮອງ​ແຂກ​ທັງ​ພາຍ​ໃນ ແລະ ຕ່າງ­ປະ­ເທດ​ໄດ້ 3.030 ຄົນ​ຕໍ່​ຄືນ ໃນ​ນີ້​ລວມ​ທັງ​ເຮືອນ​ພັກ​ທີ່­ຢູ່​ອ້ອມ​ຂ້າງ​ເທ­ສະ​ບານ​ແຂວງ ສ່ວນ​ຮ້ານ​ອາ­ຫານ ມີ 176 ແຫ່ງ ສາ­ມາດ​ຮອງ​ຮັບ­ແຂກ 9.377 ຄົນ​ຕໍ່​ວັນ.

   ສຳ­ລັບ​ພາກ­ສ່ວນ​ຕ່າງໆ ທີ່​ແຈ້ງ​ເຈດ​ຈຳ­ນົງ​ເຂົ້າ​ຮ່ວມ​ງານ​ກີ­ລາ​ແຫ່ງ​ຊາດ​ຄັ້ງ​ນີ້ ແມ່ນ​ຄົບ​ເກືອບ​ທຸກ​ແຂວງ​ແລ້ວ ເຫຼືອ​ແຕ່​ແຂວງ​ຈຳ­ປາ​ສັກ ທີ່​ຍັງ​ບໍ່​ທັນ​ໄດ້​ແຈ້ງ​ມາ ແລະ ມີ 3 ກະ­ຊວງ​ບໍ່​ສາ­ມາດ​ເຂົ້າ​ຮ່ວມ​ດ້ານ​ງົບ­ປະ­ມານ ແມ່ນ​ແບ່ງ​ອອກ​ເປັນ 2 ສ່ວນ​ຄຸ້ມ​ຄອງ ຄື: ແຂວງ​ຄຸ້ມ​ຄອງ 19 ຕື້​ກີບ ແລະ ກະ­ຊວງ ສສກ ຄຸ້ມ​ຄອງ 28 ຕື້​ກວ່າ​ກີບ.

   ໃນ​ໂອ­ກາດ​ງານ​ມະ​ຫະ​ກຳ​ກີ­ລາ​ແຫ່ງ​ຊາດ​ຄັ້ງ​ນີ້ ຈະ​ມີ​ການ​ຮອງ​ຮັບ​ທົ່ງ​ໄຫ​ຫີນ ເປັນ​ມໍ­ລະ­ດົກ​ໂລກ ແລະ ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ​ພັກ​ປະ­ຊາ­ຊົນ ປະ­ຕິ­ວັດ​ລາວ ຄົບ­ຮອບ 55 ປີ ພ້ອມ​ກັນ ເຊິ່ງ​ຄາດ​ວ່າ​ຈະ​ດຶງ​ດູດ​ນັກ​ທ່ອງ​ທ່ຽວ ແຂກ​ທັງ​ພາຍ​ໃນ ແລະ ຕ່າງ­ປະ­ເທດ​ມາ​ທ່ຽວ​ຊົມ​ແຂວງ​ຊຽງ​ຂວາງ​ຢ່າງ​ຫຼວງ­ຫຼາຍ.

   ດ້ານ​ທ່ານ ທອງ​ຜິວ ສີ​ປັນ­ຍາ ຮອງ​ຫົວ­ໜ້າ​ພະ​ແນກ ສສກ ແຂວງ​ຊຽງ​ຂວາງ ໄດ້​ໃຫ້​ສຳ­ພາດ​ກ່ອນ​ໜ້າ​ນີ້​ວ່າ: ແຂວງ​ຊຽງ​ຂວາງ ຈະ​ສົ່ງ​ນັກ­ກີ­ລາ​ຮ່ວມ​ແຂ່ງ­ຂັນ 705 ຄົນ ຍິງ 274 ຄົນ ຄົບ 28 ປະ­ເພດ​ກີ­ລາ ພ້ອມ​ທັງ​ຕັ້ງ​ເປົ້າ​ຍາດ​ໃຫ້​ໄດ້​ຢ່າງ​ໜ້ອຍ 35 ຫຼຽນ​ຄຳ ຕິດ​ອັນ​ດັບ 1 ໃນ 5 ຂອງ​ຕາ­ຕະ­ລາງ​ສະ­ຫຼຸບ​ຫຼຽນ ໃນ​ນີ້​ກີ­ລາ​ຄວາມ​ຫວັງ​ແມ່ນ​ໜ້າ​ເກັກ ໝາກ​ຂ່າງ ແລະ ຍິງ​ທະ­ນູ.

ຂ່າວທີ່ກ່ຽວຂ້ອງ