ຂ່າວຫຼ້າສຸດ

ສະຫຼອງວັນສ້າງຕັ້ງໂອແລມປິກແຫ່ງຊາດ ຄົບຮອບ 41 ປີ

1.170 03 ມ.ກ. 2020 ວົງຈອນກີລາ
ສະຫຼອງວັນສ້າງຕັ້ງໂອແລມປິກແຫ່ງຊາດ ຄົບຮອບ 41 ປີ

   ຄະ­ນະ​ກຳ­ມະ­ການ​ໂອ​ແລມ​ປິກ​ແຫ່ງ​ຊາດ​ລາວ (ຄອລ) ຈັດ​ພິ­ທີ​ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ ຄອລ ຄົບ­ຮອບ 41 ປີ ຂຶ້ນ​ວັນ​ທີ 27 ທັນ­ວາ ຜ່ານ​ມາ ຢູ່​ໂຮງ­ຮຽນ​ພອນ​ສະ­ຫວັນ​ກີ­ລາ-ກາ​ຍະ​ກຳ  ບ້ານ​ສີ​ເກີດ ເມືອງ​ນາ​ຊາຍ​ທອງ ນະ­ຄອນ­ຫຼວງ​ວຽງ​ຈັນ ໂດຍ​ມີ​ທ່ານ ບົວ​ລານ ສິ­ລິ​ປັນ­ຍາ ຮອງ​ລັດ­ຖະ­ມົນ­ຕີ​ກະ­ຊວງ​ສຶກ​ສາ​ທິ​ການ ແລະ ກີ­ລາ (ສສກ) ຮອງ​ປະ­ທານ ຄອລ ທ່ານ ສົມ​ພູ ພົງ­ສາ ຜູ້​ຊ່ວຍ​ລັດ­ຖະ­ມົນ­ຕີ​ກະ­ຊວງ ສສກ ຮອງ​ປະ­ທານ ເລ­ຂາ­ທິ­ການ ຄອລ ແລະ ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

   ທ່ານ ສົມ​ພູ ພົງ­ສາ ກ່າວ​ວ່າ: ຄອລ ແມ່ນ​ອົງ​ການ­ຈັດ­ຕັ້ງ​ກີ­ລາ​ຂອງ​ສັງ­ຄົມ ເປັນ​ສະ­ມາ­ຊິກ​ຂອງ​ອົງ​ການ­ຈັດ­ຕັ້ງ​ລະ­ດັບ​ໂລກ ລະ­ດັບ​ທະ­ວີບ ແລະ ລະ­ດັບ​ພາກ​ພື້ນ ມີ​ພາ­ລະ​ບົດ­ບາດ​ປະ­ສານ​ສົມ­ທົບ​ກັບ​ອົງ​ການ­ຈັດ­ຕັ້ງ​ກີ­ລາ​ຂອງ​ລັດ ໃນ​ການ​ພັດ­ທະ­ນາ​ວຽກ​ງານ​ກີ­ລາ-ກາ​ຍະ​ກຳ​ຂອງ​ຊາດ ໃຫ້​ມີ​ລະ­ດັບ​ສູງ​ຂຶ້ນ​ປະ­ກອບ­ສ່ວນ​ໃນ​ການ​ພັດ­ທະ­ນາ​ຊັບ­ພະ­ຍາ­ກອນ​ຂອງ​ຊາດ ຕາມ​ທິດ​ທາງ ແລະ ນະ­ໂຍ­ບາຍ​ຂອງ​ພັກ ແລະ ລັດ­ຖະ­ບານ​ແຕ່​ລະ​ໄລ­ຍະ ນອກ​ນີ້ ຄອລ ຍັງ​ເປັນ​ຕົວ​ແທນ​ຂອງ​ຊາດ ​ໃນ​ການ​ເຂົ້າ​ຮ່ວມ​ແຂ່ງ­ຂັນ​ກີ­ລາ​ຫຼາຍ​ຊະ­ນິດ​ ໃນ​ລະ­ດັບ​ກີ­ລາ​ຊີ­ເກມ ເອ​ຊຽນ​ເກມ ແລະ ກີ­ລາ​ໂອ​ແລມ​ປິກ​ເກມ ພ້ອມ​ທັງ​ຍາດ​ແຍ່ງ​ການ​ຊ່ວຍ­ເຫຼືອ​ຈາກ​ເຄື່ອ​ຄ່າຍ​ຂອງ​ຕົນ ​ມາ​ຊ່ວຍ​ພັດ­ທະ­ນາ​ກີ­ລາ​ຂອງ​ລາວ​ອີກ​ດ້ວຍ.

   ເພື່ອ​ລະ­ນຶກ​ເຖິງ​ວັນ​ສ້າງ­ຕັ້ງ ຄອລ ໄດ້​ຈັດ​ກິດ­ຈະ­ກຳ​ສະ­ເຫຼີມ­ສະ­ຫຼອງ​ວັນ​ຄົບ­ຮອບ​ດັ່ງ­ກ່າວ​ຂຶ້ນ​ທຸກ​ປີ ເພື່ອ​ສະ­ແດງ​ໃຫ້​ເຫັນ​ພັນ­ທະ​ທີ່​ສຳ­ຄັນ​ຂອງ ຄອລ ຕໍ່​ພາ­ລະ­ກິດ​ໃນ​ການ​ປະ­ກອບ­ສ່ວນ​ພັດ­ທະ­ນາ​ວຽກ​ວັດ­ທະ­ນະ­ທຳ-ສັງ­ຄົມ​ຂອງ​ລາວ ແລະ ເຊື່ອ​ໝັ້ນ​ວ່າ­ການ​ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ ຄອລ ຄົບ­ຮອບ 41 ປີ ຈະ​ເປັນ​ການ​ເຕົ້າ­ໂຮມ​ຄວາມ​ສາ­ມັກ­ຄີ ຄວາມ​ເບີກ­ບານ​ມ່ວນ­ຊື່ນ​ໃຫ້​ບັນ­ດາ​ທ່ານ​ໄດ້​ອອກ­ກຳ­ລັງ​ກາຍ ແລະ ເຂົ້າ­ໃຈ​ພາ­ລະ​ບົດ­ບາດ​ຄວາມ​ໝາຍ​ຄວາມ​ສຳ­ຄັນ​ຂອງ​ງານ.

   ສຳ­ລັບ​ກິດ­ຈະ­ກຳ​ປີ​ນີ້ ປະ­ກອບ​ມີ​ການ​ອອກ­ກຳ­ລັງ​ກາຍ​ລວມ​ໝູ່​ດ້ວຍ​ການ​ເຕັ້ນ ການ­ສະ­ແດງ​ສິ­ລະ​ປະ ເຕັ້ນ​ເຊຍ ຈາກ​ທີມ​ລະ­ດັບ 1 (ລາຍ­ການ​ມິ​ຣິນ​ດາ) ເທ​ຄວັນ​ໂດ ປັນ​ຈັກ​ສີ​ລັດ ຄາ​ຣາ​ເຕ​ໂດ ມວຍ​ລາວ ແຂ່ງ­ຂັນ​ເຕະ­ບານ​ມິດ­ຕະ­ພາບ ລະ­ຫວ່າງ​ຄະ­ນະ​ນຳ ຄອລ ກົມ​ວິ­ຊາ​ການ​ກີ­ລາ+ສູນ​ເຝິກ​ກີ ລາ​ແຫ່ງ​ຊາດ ແລະ ໂຮງ­ຮຽນ​ພອນ​ສະ­ຫວັນ​ກີ­ລາ-ກາຍ­ຍະ­ກຳ.

ຂ່າວທີ່ກ່ຽວຂ້ອງ