ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 31-12-2019

722 31 ທ.ວ. 2019 ຫົວຂໍ້ຂ່າວອື່ນໆ

   ມື້­ນີ້ ຂໍ​ພາ​ທ່ານ​ຜູ້​ອ່ານ​ໄປ​ຮູ້​ກັບ​ກົດ­ໝາຍ​ຄຸ້ມ​ຄອງ​ຄົນ​ຕ່າງ­ປະ­ເທດ​ຢູ່ ຣັດ​ເຊຍ ຕໍ່​ໃສ່​ບັນ­ຫາ​ຫ້ອງ​ນ້ຳ​ຢູ່​ເນ​ປານ ແລະ ມາດ​ຕະ­ການ​ເດັດ­ຂາດ​ຂອງ ສປ ຈີນ ໃນ​ການ​ຄຸ້ມ​ຄອງ​ການ​ໃຊ້​ສື່​ສັງ­ຄົມ.

   ທີ່ ຣັດ​ເຊຍ: ປີ 2017 ມີ​ຂ່າວ​ວ່າ ທາງ​ການ​ຂອງ​ປະ­ເທດ​ນີ້​ໄດ້​ເລີ່ມ​ຄົ້ນ­ຄວ້າ​ຄວາມ​ເປັນ​ໄປ​ໄດ້​ໃນ​ການ​ສ້າງ​ກົດ­ໝາຍ​ໃໝ່​ທີ່​ມີ​ສິດ​ເດັດ­ຂາດ​ໃນ​ການ​ເນ­ລະ­ເທດ​ຊາວ​ຕ່າງ­ປະ­ເທດ​ທີ່​ມີ​ພຶດ­ຕິ​ກຳ​ບໍ່​ເໝາະ​ສົມ (ໜັງ­ສື­ພິມ​ຜູ້​ແທນ​ປະ­ຊາ­ຊົນ​ສະ­ບັບ 13-16 ກັນ­ຍາ 2017) ທີ່​ເປັນ​ການ​ແຊກ​ແຊງ​ວຽກ​ງານ​ພາຍ​ໃນ​ປະ­ເທດ ສະ­ຫະ­ພັນ ຣັດ​ເຊຍ ທ່ານ ອານ​ເດຼ ກະ­ລີ​ໂມ ສະ­ມາ­ຊິກ​ອາ­ວຸ­ໂສ​ສະ­ພາ​ສູງ​ຣັດ​ເຊຍ ໄດ້​ເປີດ­ເຜີຍ​ກ່ຽວ​ກັບ​ການ​ສ້າງ​ກົດ­ໝາຍ​ສະ­ບັບ​ນີ້ ສ່ວນ​ທ່ານ ກະ­ລິນ​ນົບ ສະ­ມາ­ຊິກ​ສະ­ພາ​ຈາກ​ພັກ ຣັດ​ເຊຍ ເອ­ກະ​ພາບ ເຊິ່ງ​ເປັນ​ພັກ​ກຳ​ອຳ­ນາດ​ໄດ້​ຕອກ​ຢ້ຳ​ຄວາມ​ຈຳ­ເປັນ​ທີ່​ຕ້ອງ​ໄດ້​ປັບ­ປຸງ​ກົດ­ໝາຍ​ສະ­ບັບ​ເກົ່າ​ໃນ​ປີ 2015 ຍ້ອນ​ວ່າ ໃນ​ປັດ­ຈຸ­ບັນ ບັນ­ດາ​ຄູ່​ຮ່ວມ​ຕ່າງ­ປະ­ເທດ​ໄດ້​ແຊກ​ແຊງ​ເຂົ້າ​ວຽກ​ງານ​ພາຍ​ໃນ​ຂອງ​ຣັດ​ເຊຍ​ຢ່າງ​ເປັນ​ລະ­ບົບ ຂ່າວ​ໃນ​ໄລ­ຍະ​ຕໍ່​ມາ ໄດ້​ເວົ້າ​ເຖິງ​ການ​ຮັບ­ຮອງ ແລະ ປະ­ກາດ​ໃຊ້​ກົດ­ໝາຍ​ດັ່ງ­ກ່າວ​ເປັນ​ທີ່​ຮຽບ​ຮ້ອຍ​ແລ້ວ ພາຍ​ໃຕ້​ກົດ­ໝາຍ​ສະ­ບັບ​ນີ້ ທາງ​ການ​ຣັດ​ເຊຍ ມີ​ອຳ­ນາດ​ໃນ​ການ​ປະ­ກາດ​ຊື່​ຂອງ​ບັນ­ດາ​ອົງ​ການ­ຈັດ­ຕັ້ງ​ສາ­ກົນ​ທີ່​ມີ​ພຶດ­ຕິ​ກຳ​ບໍ່​ເໝາະ​ສົມ ແລະ ມີ​ສິດ​ປິດ​ອົງ­ການ​ເຫຼົ່າ­ນັ້ນ ຖ້າ​ພົບ​ວ່າ​ອົງ­ການ​ທີ່​ກ່ຽວ­ຂ້ອງ​ເປັນ​ໄພ​ຂົ່ມ­ຂູ່​ຕໍ່​ຄວາມ​ໝັ້ນ­ຄົງ​ແຫ່ງ​ຊາດ ຣັດ​ເຊຍ.

   ທີ່ ເນ​ປານ: ໃນ​ໂອ­ກາດ​ວັນ​ຫ້ອງ​ນ້ຳ​ໂລກ (World Toilet Day) ຊຶ່ງ​ສະ­ຫຼອງ​ກັນ​ໃນ​ວັນ​ທີ 19 ພະ­ຈິກ​ຂອງ​ທຸກໆ​ປີ​ນັ້ນ ກໍ​ມີ​ຂ່າວ​ອອກ​ມາ​ຈາກ​ປະ­ເທດ​ເນ​ປານ ໃນ​ທ້າຍ​ເດືອນ​ພະ­ຈິກ 2018 ວ່າ ຢູ່​ປະ­ເທດ​ນີ້​ຍັງ​ມີ​ຄົນ​ຖ່າຍ​ຊະ­ຊາຍ​ຕາມ​ປ່າ­ດົງ ຫຼື ທ້ອງ​ທົ່ງ​ຈຳ­ນວນ​ສູງ​ເຖິງ 2,6 ລ້ານ​ຄົນ ຫຼື ເທົ່າໆ​ກັບ 9% ຂອງ​ພົນ­ລະ­ເມືອງ​ເນ​ປານ​ທົ່ວ​ປະ­ເທດ ເຫດ­ຜົນ​ທີ່​ຕ້ອງ​ໄດ້​ປົດ​ທຸກ​ຊະ­ຊາຍ​ຕາມ​ມີ​ຕາມ​ເກີດ ກໍ​ເພາະ­ວ່າ​ພວກ​ເຂົາ​ເຫຼົ່າ­ນັ້ນ​ບໍ່​ມີ​ຫ້ອງ​ນ້ຳ ເວົ້າ​ໄດ້​ວ່າ​ເລື່ອງ​ຄົນ​ບໍ່​ມີ​ຫ້ອງ​ນ້ຳ​ສຳ­ລັບ​ຖ່າຍ​ຢູ່​ເນ​ປານ​ນັ້ນ ມີ​ຈຳ­ນວນ​ສູງ​ລະ­ດັບ​ຫົວ​ແຖວ​ຂອງ​ໂລກ ອັນ​ສະ­ແດງ​ໃຫ້​ເຫັນ​ວ່າ​ບັນ­ຫາ​ສຸ­ຂາ­ພິ­ບານ​ໃນ​ປະ­ເທດ​ນີ້​ຍັງ​ຕ່ຳ​ທີ່​ສຸດ ແນວ­ໃດ​ກໍ​ດີ ທາງ​ການ​ຂອງ​ເນ​ປານ​ໄດ້​ມີ​ຄວາມ​ພະ­ຍາ­ຍາມ​ສູງ ເພື່ອ​ໃຫ້​ທຸກ​ຄົນ​ເຂົ້າ​ເຖິງ​ຫ້ອງ​ນ້ຳ ແນ­ໃສ່​ບັນ­ລຸ​ແຜນ​ລຶ­ບລ້າງ​ການ​ຖ່າຍ​ຊະ­ຊາຍ​ໃຫ້​ໝົດ​ໄປ​ຈາກ​ເນ​ປານ​ພາຍ​ໃນ​ທ້າຍ​ປີ 2017 ທັ້ງໆທີ່​ຮູ້​ຢູ່​ແລ້ວ​ວ່າ​ມັນ​ເປັນ​ໄປ​ບໍ່​ໄດ້ ການ​ຖ່າຍ​ຊະ­ຊາຍ​ໄດ້​ສົ່ງ​ຜົນ​ກະ­ທົບ​ຕໍ່​ຂະ​ບວນ​ສຸ­ຂາ​ນາ​ໄມ ກໍ່­ໃຫ້­ເກີດ​ພະ­ຍາດ​ນາໆ​ຊະ­ນິດ ໂດຍ​ສະ­ເພາະ​ແມ່ນ​ພະ­ຍາດ​ຖອກ­ທ້ອງ ພະ­ຍາດ​ທີ່​ພົວ­ພັນ​ກັບ​ລຳ​ໄສ້ ແລະ ອື່ນໆ ຢູ່​ລາວ​ພວກ​ເຮົາ​ຄວາມ​ສາ­ມາດ​ເຂົ້າ​ເຖິງ​ຫ້ອງ​ນ້ຳ​ນັ້ນ ກວມ​ເອົາ​ອັດ­ຕາ​ສູງ​ສົມ­ຄວນ ແຕ່​ກໍ​ມີ​ພວກ​ບໍ່​ນິ­ຍົມ​ໃຊ້​ຫ້ອງ​ນ້ຳ ໂດຍ​ບອກ​ວ່າ​ມັນ​ອຶດ​ອັດ ບໍ່​ສະ­ດວກ​ສະ­ບາຍ​ເທົ່າ​ນັ່ງ​ງອຍ​ຂອນ​ຖ່າຍ!.

   ທີ່ ສປ ຈີນ: ຂ່າວ​ໜັງ­ສື­ພິມ​ເດິ​ເນ​ເຊິນ ສະ­ບັບ​ວັນ​ທີ 28 ສິງ­ຫາ 2017 ໄດ້​ເວົ້າ​ກ່ຽວ​ກັບ​ຄຳ​ສັ່ງ​ຂອງ​ທາງ​ການ​ຈີນ​ໃຫ້​ໜ່ວຍ​ງານ​ບໍ­ລິ­ການ​ອິນ​ເຕີ​ເນັດ​ທັງ​ໝົດ​ກວດ­ກາ​ຂໍ້​ມູນ​ຕົວ​ຈິງ​ຂອງ​ບັນ­ດາ​ຜູ້​ໃຊ້​ອິນ​ເຕີ​ເນັດ ກ່ອນ​ຈະ​ອະ­ນຸ­ຍາດ​ໃຫ້​ພວກ​ເຂົາ­ເຈົ້າ​ເຜີຍ­ແຜ່​ເນື້ອ​ໃນ​ຕ່າງໆ ຜ່ານ​ເຄືອ​ຄ່າຍ​ສື່​ອອນ​ລາຍ ຄຳ​ສັ່ງ​ນີ້​ໄດ້​ກຳ­ນົດ​ຢູ່​ກົດ​ລະ­ບຽບ​ສະ­ບັບ​ໃໝ່​ຂອງ​ຄະ­ນະ​ຄຸ້ມ​ຄອງ​ອິນ​ເຕີ​ເນັດ​ແຫ່ງ​ຊາດ​ຈີນ ຊຶ່ງ​ມີ​ຜົນ​ບັງ­ຄັບ​ໃຊ້​ນັບ​ແຕ່​ວັນ​ທີ 1 ຕຸ­ລາ 2017 ເປັນ­ຕົ້ນ​ມາ ນອກ­ຈາກ​ຕ້ອງ​ຮູ້​ລະ­ອຽດ​ຂໍ້​ມູນ​ກ່ຽວ​ກັບ​ຜູ້­ນຳ​ໃຊ້​ອິນ​ເຕີ​ເນັດ​ແລ້ວ ໜ່ວຍ​ງານ​ບໍ­ລິ­ການ​ອິນ​ເຕີ​ເນັດ​ຍັງ​ຕ້ອງ​ຕິດ­ຕາມ​ກວດ­ກາ​ຢ່າງ​ຕັ້ງ­ໜ້າ ບັນ­ດາ​ຂ່າວ​ທີ່​ພິມ​ເຜີຍ­ແຜ່​ຕ້ອງ​ລຶ­ບລ້າງ​ທຸກ​ເນື້ອ​ໃນ​ທີ່​ຜິດ​ກົດ­ໝາຍ ພ້ອມ​ທັງ​ແຈ້ງ​ໃຫ້​ທາງ​ການ​ກ່ຽວ­ຂ້ອງ​ຮູ້​ຢ່າງ​ທັນ​ການ​ກ່ຽວ​ກັບ​ບັນ­ຫາ​ດັ່ງ­ກ່າວ.

ຂ່າວທີ່ກ່ຽວຂ້ອງ