ຂ່າວຫຼ້າສຸດ

ຂໍ້ຄິດໃນພົມວິຫານ 4

5.936 20 ທ.ວ. 2019 ນານາສາລະ

   ພົມ­ວິ­ຫານ​ສີ່ ຄື: ຫຼັກ​ທຳ​ມະ​ທີ່​ມີ​ຢູ່​ພຽງ 4 ຂໍ້ ເຊິ່ງ​ກິນ​ຄວາມ​ໝາຍ​ເລິກ​ໃນ​ທາງ​ເນື້ອ​ໃນ ແລະ ພາກ​ປະ­ຕິ­ບັດ ເພາະ​ຖ້າ​ອີງ​ຕາມ​ການ​ຕີ​ຄວາມ​ໝາຍ​ຈາກ​ນັກ­ປາດ​ທາງ​ພຸດ​ທະ​ສາ­ສະ­ໜາ ໃຫ້​ເຫດ­ຜົນ​ວ່າ: ມັນ​ເປັນ​ການ​ແປງ​ຄວາມ​ໝາຍ​ເດີມ​ທີ່​ມີ​ຢູ່​ແລ້ວ​ຂອງ​ສາ­ສະ­ໜາ​ພາມ (ຮີນ​ດູ) ຫຼື ຈະ​ເອີ້ນ​ວ່າ ເປັນ​ວິ­ທີ​ການ​ປະ­ຕິ​ຮູບ​ຄວາມ​ໝາຍ​ໃໝ່​ຂອງ​ພະ­ພຸດ­ທະ­ເຈົ້າ​ທີ່ ມຸ່ງ​ເນັ້ນ​ໃຫ້​ເປັນ​ຫຼັກ​ທຳ​ມະ 4 ຂໍ້ ເພື່ອ​ເປັນ​ແນວ­ທາງ​ການ​ດຳ­ເນີນ​ຊີ­ວິດ​ຂອງ​ຜູ້​ຕ້ອງ­ການ​ເປັນ​ຫົວ­ໜ້າ ຫຼື ຜູ້­ນຳ ດັ່ງ­ນັ້ນ ເຖິງ​ວ່າ​ພົມ­ວິ­ຫານ​ທຳ​ພຽງ​ສີ່​ຂໍ້​ນີ້ ຖ້າ​ອ່ານ​ແລ້ວ​ເຂົ້າ­ໃຈ ພຽງ​ແຕ່​ໃນ​ຄວາມ​ໝາຍ​ຂອງ​ພາ­ສາ ຄົງ​ບໍ່​ພຽງ­ພໍ​ທີ່​ຈະ​ເຂົ້າ­ໃຈ​ແກ່ນ​ທຳ​ມະ.

   ຫຼັກ​ທຳ​ມະ​ພົມ­ວິ­ຫານ 4 ຂໍ້ ນີ້​ເປັນ​ຫຍັງ​ຜູ້​ຂຽນ ຈຶ່ງ​ຢາກ​ນຳ​ມາ​ອະ­ທິ­ບາຍ ເພາະ­ວ່າ​ມີ​ຫຼາຍ​ຄົນ ຜ່ານ​ມາ ຈຳ­ນວນ​ໜຶ່ງ​ອາດ​ເຄີຍ​ບວດ​ຮຽນ ຫຼື ເຄີຍ​ອ່ານ ຄົ້ນ­ຄວ້າ ແຕ່​ກໍ​ຍັງ​ຕີ​ຄວາມ ແລະ ເຂົ້າ­ໃຈ​ຜິດ ຫຼື ຜິວ​ເຜີນ ເພາະ​ໄປ​ແປ​ເອົາ​ທຳ​ມະ​ຂໍ້​ທີ ສີ່ ຄື ອຸ​ເປ​ຂາ ພຽງ​ແຕ່​ວ່າ ໃຫ້​ວາງ​ເສີຍ​ເທົ່າ​ນັ້ນ ເຊິ່ງ​ຄວາມ​ໝາຍ​ເລິກ​ແທ້ ຍ່ອມ​ຕ້ອງ​ຕີ​ຄວາມ​ໝາຍ​ທາງ​ພາກ​ປະ­ຕິ­ບັດ​ໄປ​ດ້ວຍ​ກັນ.

   ພົມ­ວິ­ຫານ 4 ປະ­ການ​ນີ້ ແປ​ວ່າ ຫຼັກ​ທຳ​ມະ​ທີ່​ເປັນ​ເຄື່ອງ­ມື​ອັນ​ປະ­ເສີດ ທຳ​ມະ​ປະ­ຈຳ​ໃຈ​ອັນ​ປະ­ເສີດ ຫຼື ຫຼັກ​ທຳ​ມະ​ທີ່​ຕ້ອງ​ມີ​ໄວ້​ເປັນ​ຫຼັກ​ໃຈ​ຄວບ​ຄຸມ​ການ​ປະ­ພຶດ ເຊິ່ງ​ຄົນ​ທົ່ວ​ໄປ​ເຂົ້າ­ໃຈ​ແຕ່​ພຽງ​ວ່າ ເປັນ​ຫຼັກ​ທຳ​ມະ​ສຳ­ລັບ​ຜູ້­ນຳ​ຢ່າງ​ດຽວ ມັນ​ຈຶ່ງ​ບໍ່​ຖືກ​ກົງ​ປານ­ໃດ ຖ້າ​ຕີ​ຄວາມ​ຕຶ້ນ​ໄປ​ແບບ​ນັ້ນ (1) ເມດ​ຕາ ຄື ຄວາມ​ປາດ​ຖະ​ໜາ​ດີ ຢາກ​ໃຫ້​ຄົນ​ອື່ນ​ມີ​ຄວາມ­ສຸກ ເຊິ່ງ​ຈິດ­ໃຈ​ຍ່ອມ​ຕ້ອງ​ມີ​ໄມ­ຕີ ຄິດ​ສ້າງ​ປະ­ໂຫຍດ​ແກ່​ສັງ­ຄົມ (2) ກະ­ລຸ­ນາ ຄື ຄວາມ​ສົງ­ສານ ຈຶ່ງ​ຄິດ​ຢາກ​ຊ່ວຍ​ຄົນ​ອື່ນ​ໃຫ້​ພົ້ນ​ທຸກ (3) ມຸ­ທິ­ຕາ ຄື ຄວາມ​ຍິນ​ດີ​ເມື່ອ​ຄົນ​ອື່ນ​ເຂົາ​ປະ­ສົບ​ຄວາມ​ສຳ­ເລັດ ບໍ່​ແມ່ນ​ວ່າ​ເຫັນ​ຄົນ​ອື່ນ​ໄດ້​ດີ ປະ­ສົບ​ຜົນ­ສຳ­ເລັດ​ແລ້ວ ຕົນ​ຄິດ​ອິດ­ສາ​ບັງ​ບຽດ​ຄົນ​ອື່ນ ນີ້​ສະ­ແດງ​ວ່າ ບຸກ­ຄົນ​ຜູ້​ນັ້ນ ຂາດ​ຄວາມ​ມຸ­ທິ­ຕາ​ຍິນ​ດີ ເພາະ​ໃຈ​ຄັບ­ແຄບ (4) ອຸ​ເປກ​ຂາ ຄື ຄວາມ​ວາງ­ໃຈ​ເປັນ­ກາງ ເຊິ່ງ​ຈະ​ຕ້ອງ​ຕັ້ງ​ຕົນ​ຢູ່​ໃນ​ຫຼັກ​ທຳ​ຕາມ​ການ​ພິ­ຈາ­ລະ­ນາ​ດ້ວຍ​ປັນ­ຍາ ຄື ມີ​ຈິດ­ໃຈ​ທ່ຽງ​ຕົງ​ດັ່ງ​ຊຶງ ຍ່ອມ​ບໍ່​ອ່ຽນ​ເອນ​ໄປ​ຊ້າຍ ແລະ ຂວາ ຫຼື ລຳ­ອຽງ​ໄປ​ຕາມ​ຄວາມ​ຮັກ ແລະ ຊັງ ພິ­ຈາ­ລະ­ນາ​ດ້ວຍ​ປັນ­ຍາ ຕາມ​ເຫດ­ຜົນ​ດີ-ຊົ່ວ ແລະ ພ້ອມ​ທີ່​ຈະ​ຕັດ­ສິນ​ໃຫ້​ຖືກ­ຕ້ອງ​ຕາມ​ຫຼັກ​ທຳ ຄື ຄວາມ​ເປັນ​ຈິງ​ໃນ​ເຫດ­ຜົນ.

   ຂໍ້​ໜ້າ​ສັງ­ເກດ​ໃນ​ພົມ­ວິ­ຫານ 4 ປະ­ການ​ມີ​ໃນ​ຂໍ້ 3 ໜ້ອຍ​ໜຶ່ງ ທີ່​ສອນ​ບໍ່​ໃຫ້​ອິດ­ສາ ເມື່ອ​ຄົນ​ອື່ນ​ໄດ້​ດີ ແຕ່​ທຳ​ມະ​ຂໍ້​ທີ 4 ຄື ອຸ​ເປກ​ຂາ ນີ້ ຈິດ​ສຳ­ນຶກ​ຂອງ​ຄົນ​ທົ່ວ​ໄປ ຈຶ່ງ​ແປ​ເອົາ​ຕາມ­ໃຈ​ວ່າ ວາງ​ເສີຍ​ເຊິ່ງ​ບໍ່​ຕ້ອງ​ເຮັດ​ຫຍັງ ແຕ່​ແປ​ຕົວ​ຈິງ ຕ້ອງ​ແປ​ວ່າ ວາງ­ໃຈ​ເປັນ­ກາງ ເຊິ່ງ​ຕ້ອງ​ໃຊ້​ປັນ­ຍາ​ປະ­ກອບ​ເປັນ​ເຄື່ອງ​ຄິດ​ພິ­ຈາ­ລະ­ນາ​ບັນ­ຫາ​ຕາມ​ເຫດ­ຜົນ​ຕົວ​ຈິງ ຈຶ່ງ​ເຫັນ​ໄດ້​ວ່າ​ຫຼັກ​ທຳ​ບາງ​ຂໍ້​ບໍ່​ງ່າຍ​ປານ­ໃດ ຕາມ​ທີ່​ບາງ​ຄົນ​ຄິດ ແຕ່​ມັນ​ຕ້ອງ­ການ​ປັນ­ຍາ​ທີ່​ຖືກ­ຕ້ອງ​ໃນ​ການ​ຕີ​ຄວາມ​ໝາຍ !.

ດັ້ນກີບເມກ

ຂ່າວທີ່ກ່ຽວຂ້ອງ