ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 19-12-2019

1.828 19 ທ.ວ. 2019 ຫົວຂໍ້ຂ່າວອື່ນໆ

   ໃນ​ບົດ​ປະ­ຈຳ​ວັນ​ນີ້ ທ່ານ​ຜູ້​ອ່ານ​ຈະ​ໄດ້​ຮູ້​ກ່ຽວ​ກັບ​ລະ­ບຽບ​ເຫຼັກ​ຂອງ​ເອ​ຢິບ ເພື່ອ​ຄຸ້ມ​ຄອງ​ບັນ­ດາ​ອົງ­ການ​ທີ່​ບໍ່​ຂຶ້ນ​ກັບ​ລັດ­ຖະ­ບານ ຂໍ້​ຫ້າມ​ຂອງ​ອີ​ຕາ​ລີ ສຳ­ລັບ​ນັກ​ທ່ອງ​ທ່ຽວ ແລະ ເລື່ອງ​ທາງ​ການ​ຍີ່­ປຸ່ນ ມີ​ນະ­ໂຍ­ບາຍ​ສອນ​ພາ­ສາ​ຍີ່­ປຸ່ນ​ໃຫ້​ຄົນ​ຕ່າງ­ປະ­ເທດ ທີ່​ອາ­ໄສ​ຢູ່​ພາຍ​ໃນ​ປະ­ເທດ.

   ທີ່ ເອ​ຢິບ: ໃນ​ທ້າຍ​ປີ 2016 ປະ­ເທດ​ເອ​ຢິບ ໄດ້​ຮັບ­ຮອງ​ເອົາ​ກົດ­ໝາຍ​ຄຸ້ມ​ຄອງ​ອົງ​ການ­ຈັດ­ຕັ້ງ​ທີ່​ບໍ່​ຂຶ້ນ​ກັບ​ລັດ­ຖະ­ບານ ຫຼື ເອັນ​ຈີ​ໂອ (NGO) ດ້ວຍ​ສຽງ​ສ່ວນ​ຫຼາຍ​ໃນ​ລັດ​ຖະ​ສະ­ພາ​ກົດ­ໝາຍ​ໄດ້​ໃຫ້​ອຳ­ນາດ ແລະ ສິດ​ຢ່າງ​ກວ້າງ­ຂວາງ​ແກ່​ອົງ­ການ​ດ້ານ​ຄວາມ​ໝັ້ນ­ຄົງ​ຂອງ​ລັດ ໃນ​ການ​ກວດ​ສອບ​ແຫຼ່ງ​ທຶນ​ທີ່​ໄດ້​ຮັບ​ການ​ຈົດ​ທະ­ບຽນ ກໍ​ຄື ກິດ­ຈະ­ກຳ​ການ­ເຄື່ອນ­ໄຫວ​ຂອງ​ບັນ­ດາ​ອົງ­ການ NGO ແລະ ກຸ່ມ​ສິດ­ທິ​ມະ­ນຸດ ກົດ­ໝາຍ​ໄດ້​ກຳ­ນົດ​ບົດ​ລົງ­ໂທດ​ຜູ້​ກະ­ທຳ​ຜິດ​ດ້ວຍ​ການ​ຕັດ​ອິດ­ສະ­ຫຼະ­ພາບ​ສູງ​ສຸດ​ເປັນ​ເວ­ລາ 5 ປີ ພ້ອມ​ທັງ​ປັບ​ໃໝ​ເປັນ​ເງິນ​ຈຳ­ນວນ​ສູງ​ສຸດ ປະ­ມານ 1 ລ້ານ​ປອນ ເອ​ຢິບ ຊຶ່ງ​ມີ​ມູນ​ຄ່າ​ປະ­ມານ 55.564 ໂດ​ລາ​ສະ­ຫະ­ລັດ ກົດ­ໝາຍ​ກຳ­ນົດ​ໃຫ້​ມີ​ການ​ສ້າງ­ຕັ້ງ​ໜ່ວຍ​ງານ​ຕິດ­ຕາມ​ກວດ­ກາ ພາຍ​ໃຕ້​ການ​ຊີ້​ນຳ​ບັນ­ຊາ​ຂອງ​ອົງ­ການ​ຄວາມ​ໝັ້ນ­ຄົງ​ແຫ່ງ​ຊາດ ເພື່ອ​ເຮັດ​ໜ້າ­ທີ່​ກວດ​ສອບ​ທຸກ​ການ­ເຄື່ອນ­ໄຫວ​ຂອງ​ອົງ­ການ NGO ກົດ­ໝາຍ​ສະ­ບັບ​ນີ້ ໄດ້​ປະ​ເຊີນ​ກັບ​ສຽງ​ຄັດ­ຄ້ານ​ຢ່າງ​ແຂງ­ແຮງ ຈາກ​ກຸ່ມ​ສິດ­ທິ​ມະ­ນຸດ​ພາຍ​ໃນ​ອົງ­ການ​ນິ­ລະ­ໂທດ​ກຳ​ສາ­ກົນ ແລະ ອົງ​ການ­ເຄື່ອນ­ໄຫວ​ສິດ­ທິ​ມະ­ນຸດ​ລະ­ຫວ່າງ​ປະ­ເທດ ໂດຍ​ບອກ​ວ່າ​ເປັນ​ກົດ­ໝາຍ​ທີ່​ຈຳ­ກັດ​ສິດ​ເສລີ­ພາບ ແລະ ສິດ­ທິ​ມະ­ນຸດ ບໍ່​ຕ່າງ​ຫຍັງ​ກັບ “ຄຳ​ສັ່ງ​ປະ­ຫານ​ຊີ­ວິດ” ແຕ່​ສຽງ​ຄັດ­ຄ້ານ​ເຫຼົ່າ​ນີ້​ທາງ​ການ ເອ​ຢິບ ບໍ່​ສົນ ເພາະ​ຖື​ວ່າ­ຄວາມ​ໝັ້ນ­ຄົງ​ຂອງ​ຊາດ​ນັ້ນ ມີ​ຄວາມ​ສຳ­ຄັນ​ຫຼາຍ​ກວ່າ.

   ທີ່ ອີ​ຕາ​ລີ: ໃນ​ຕົ້ນ​ລະ­ດູ​ຮ້ອນ​ຂອງ​ປີ 2019 ສຳ­ນັກ­ງານ​ປົກ­ຄອງ​ນະ­ຄອນ­ຫຼວງ​ໂຣມ ອີ​ຕາ​ລີ ໄດ້​ອອກ​ກົດ​ລະ­ບຽບ​ຫ້າມ​ບຸກ­ຄົນ ແລະ ນັກ​ທ່ອງ​ທ່ຽວ​ກິນ​ດື່ມ​ຢູ່​ບາງ​ສະ­ຖານ­ທີ່​ທ່ອງ​ທ່ຽວ ຫ້າມ​ອາບ­ນ້ຳ ແລະ ຊັກ​ເສື້ອ​ຜ້າ​ຢູ່​ຕາມ​ນ້ຳ­ພຸ​ແຫ່ງ​ສຳ­ຄັນ​ຕ່າງໆ ນອກ​ນັ້ນ ຍັງ​ຫ້າມ​ລາກ​ລໍ້ ຫຼື ຫີບ​ລົງ​ຂັ້ນ­ໄດ​ສະ­ຖານ­ທີ່ ທີ່​ເປັນ​ຮ່ອງ­ຮອຍ​ປະ­ຫວັດ­ສາດ ແລະ ຫວ່າງ​ບໍ່​ດົນ​ມາ​ນີ້ ກໍ​ໄດ້​ມີ​ຂໍ້​ຫ້າມ​ໃໝ່​ເພີ່ມ​ຕື່ມ​ອີກ​ຄື: ຫ້າມ​ນັກ​ທ່ອງ​ທ່ຽວ​ນັ່ງ​ຢູ່​ເທິງ “ຂັ້ນ­ໄດ​ແອດ​ສະ​ປາຍ” “(Spanish Steps) ຂັ້ນ­ໄດ​ແອດ​ສະ​ປາຍ​ນີ້ ສ້າງ​ສຳ­ເລັດ​ໃນ​ປີ 1725 ມີ​ຂັ້ນ­ໄດ​ຢູ່ 135 ຂັ້ນ ທີ່​ເນັ່ງ​ຈາກ​ສະ­ໜາມ​ຫຼວງ​ປິດ​ຊາ ຫາ​ໂບດ ຕຼິ​ນິ​ຕາ ເດ ມອນ​ຕີ ເປັນ​ສະ­ຖານ­ທີ່​ງົດ​ງາມ ຊຶ່ງ​ຖ້າ​ໃຜ​ບໍ່​ໄດ້​ທ່ຽວ​ຊົມ​ກໍ​ສ່ຳ​ວ່າ​ບໍ່​ໄດ້​ໄປ​ນະ­ຄອນ­ຫຼວງ​ໂຣມ ທີ່​ຕ້ອງ​ໄດ້​ອອກ​ຄຳ​ສັ່ງ​ຫ້າມ​ນັ່ງ​ຕາມ​ຂັ້ນ­ໄດ​ແຫ່ງ​ນີ້ ກໍ​ເພາະ­ວ່າ​ເຄີຍ​ມີ​ນັກ​ທ່ອງ​ທ່ຽວ​ສະ­ຕິ​ແຕກ​ຈຳ­ນວນ​ໜຶ່ງ​ຄາຍ​ເຂົ້າ­ໜົມ​ຫຍ້ຳ (ຊິງ​ອົ່ມ) ຕິດ​ໄວ້​ຕາມ​ຂັ້ນ­ໄດ ນອກ​ນັ້ນ ກໍ​ຍັງ​ມີ​ເສດ​ເຂົ້າ­ໜົມ ຮອຍ​ເປື້ອນ​ຈາກ​ເຄື່ອງ​ດື່ມ​ທີ່​ເຟືອດ​ໃສ່ ຂໍ້​ຫ້າມ​ໄດ້​ກຳ­ນົດ​ໂທດ​ປັບ​ໃໝ​ຕໍ່​ຜູ້​ລະ­ເມີດ​ເປັນ​ເງິນ​ສູງ​ເຖິງ 400 ເອີ​ໂຣ ຫຼື ປະ­ມານ 450 ໂດ​ລາ​ສະ­ຫະ­ລັດ.

   ທີ່ ຍີ່­ປຸ່ນ: ໃນ​ວັນ​ທີ 21 ເດືອນ​ມິ­ຖຸ­ນາ​ປີ​ນີ້ ລັດ​ຖະ​ສະ­ພາ​ຍີ່­ປຸ່ນ ໄດ້​ຮັບ­ຮອງ​ເອົາ​ກົດ­ໝາຍ​ກຳ­ນົດ​ໃຫ້​ລັດ­ຖະ­ບານ ແລະ ທາງ​ການ​ທ້ອງ­ຖິ່ນ​ມີ​ສ່ວນ​ຮັບ­ຜິດ­ຊອບ​ສອນ​ພາ­ສາ​ຍີ່­ປຸ່ນ ໃຫ້​ຄົນ​ຕ່າງ­ປະ­ເທດ​ທີ່​ໃຊ້​ຊີ­ວິດ​ຢູ່​ໃນ​ຍີ່­ປຸ່ນ ຄົນ​ຕ່າງ­ປະ­ເທດ​ທີ່​ຕ້ອງ​ໄດ້​ຮຽນ​ພາ­ສາ​ຍີ່­ປຸ່ນ​ນັ້ນ ກວມ​ລວມ​ເອົາ​ໝົດ​ທຸກ​ກຸ່ມ ເຊັ່ນ: ນັກ​ສຶກ​ສາ​ຜູ້​ອອກ­ແຮງ​ງານ ຊາວ​ອົບ​ພະ​ຍົບ ຜູ້​ລີ້​ໄພ ອີກ​ດ້ານ​ໜຶ່ງ​ກົດ­ໝາຍ​ໄດ້​ກຳ­ນົດ​ເປົ້າ​ໝາຍ​ຍົກ​ສູງ​ຄຸນ​ນະ​ພາບ​ຂອງ​ການ​ສຶກ​ສາ ແລະ ການ​ເພີ່ມ​ເງິນ­ເດືອນ​ໃຫ້​ແກ່​ຄູ-ອາ­ຈານ ທີ່​ສອນ​ພາ­ສາ​ຍີ່­ປຸ່ນ ກົດ­ໝາຍ​ສະ­ບັບ​ນີ້ ອອກ​ມາ​ໃນ​ໄລ­ຍະ​ທີ່​ທາງ​ການ​ຍີ່­ປຸ່ນ ໄດ້​ນຳ​ໃຊ້​ວີ​ຊາ​ແບບ​ໃໝ່ ເພື່ອ​ເປີດ​ໂອ­ກາດ​ໃຫ້​ຄົນ​ຕ່າງ­ປະ­ເທດ​ເຂົ້າ​ໄປ​ເຮັດ​ວຽກ​ຢູ່​ຍີ່­ປຸ່ນ ເພີ່ມ​ຂຶ້ນ.

ຂ່າວທີ່ກ່ຽວຂ້ອງ