ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 18-12-2019

1.775 18 ທ.ວ. 2019 ຫົວຂໍ້ຂ່າວອື່ນໆ

   ຄໍ​ລຳ​ປະ­ຈຳ​ວັນ​ນີ້ ເວົ້າ​ເຖິງ​ຄວາມ​ກັງ­ວົນ​ໃຈ​ຂອງ​ອົງ­ການ​ອະ­ນາ­ໄມ​ໂລກ ກ່ຽວ​ກັບ​ທາດ​ຫວານ​ໃນ​ອາ­ຫານ​ເດັກ ແລະ ເລື່ອງ​ມາດ​ຕະ­ການ​ປະ­ຢັດ​ຮັດ​ສາຍ­ແອວ ຢູ່​ປະ­ເທດ​ອາກ​ຊັງ​ຕິນ.

   ທີ່ ອົງ­ການ​ອະ­ນາ­ໄມ​ໂລກ: (WHO) ແຫຼ່ງ​ຂ່າວ​ຈາກ​ອົງ­ການ​ອະ­ນາ­ໄມ​ໂລກ (ວຽງ​ຈັນ​ທາມ 17 ກໍ­ລະ­ກົດ 2019) ໃຫ້​ຮູ້​ເຖິງ​ຄວາມ​ກັງ­ວົນ​ໃຈ​ຂອງ​ອົງ­ການ​ດັ່ງ­ກ່າວ ກ່ຽວ​ກັບ​ອາ­ຫານ ແລະ ເຄື່ອງ​ດື່ມ​ທີ່​ມີ​ສ່ວນ​ປະ­ກອບ​ຂອງ​ນ້ຳ­ຕານ​ຫຼາຍ​ເກີນ​ໄປ ໂດຍ​ສະ­ເພາະ​ແມ່ນ ໃນ​ອາ­ຫານ​ສຳ­ລັບ​ເດັກ­ນ້ອຍ ອາ­ຫານ​ສຳ­ລັບ​ເດັກ​ທີ່​ມີ​ທາດ​ນ້ຳ­ຕານ​ເກີນ​ຄວາມ​ພໍ­ດີ​ນັ້ນ ຈະ​ເຮັດ​ໃຫ້​ເດັກ​ມີ​ຄວາມ​ສ່ຽງ​ຕຸ້ຍ ນ້ຳ­ໜັກ​ເກີນ​ມາດ­ຕະ­ຖານ ເປັນ​ພະ­ຍາດ​ແຂ້ວ​ແມງ ແລະ ຕິດ​ອາ­ຫານ-ເຄື່ອງ​ດື່ມ​ທີ່​ມີ​ທາດ​ຫວານ​ຕະ­ຫຼອດ​ຊີ­ວິດ ຄວາມ​ກັງ­ວົນ​ໃຈ​ຂອງ​ອົງ­ການ​ອະ­ນາ­ໄມ​ໂລກ​ມີ​ຂຶ້ນ ພາຍ­ຫຼັງ​ມີ​ຂໍ້​ມູນ​ຈາກ​ການ​ສຳ​ຫຼວດ​ອາ­ຫານ​ເດັກ​ໃນ​ປະ­ເທດ​ຕ່າງໆ ລະ­ຫວ່າງ​ເດືອນ​ພະ­ຈິກ 2017 ແລະ ເດືອນ​ມັງ­ກອນ ໃນ​ປີ 2018 ຜົນ​ການ​ສຳ​ຫຼວດ​ພົບ​ວ່າ ປະ­ມານ​ເຄິ່ງ​ໜຶ່ງ​ຂອງ​ອາ­ຫານ​ເດັກ​ນັ້ນ ມີ​ກາ​ລໍ​ຣີ ກວ່າ 30% ທີ່​ໄດ້​ມາ​ຈາກ​ນ້ຳ­ຕານ ແລະ ອີກ 1/3 ຂອງ​ອາ­ຫານ​ເດັກ​ມີ​ການ​ເພີ່ມ​ນ້ຳ­ຕານ ຫຼື ວັດ­ຖຸ​ທີ່​ມີ​ທາດ​ຫວານ​ປະ­ກອບ​ໃສ່ ການ​ສຳ​ຫຼວດ​ໄດ້​ພົບ​ວ່າ ຕາມ​ຮ້ານ​ຄ້າ​ກວ່າ 500 ແຫ່ງ​ທີ່​ປະ­ເທດ​ອົດ​ຕຼິດ ບູນ​ກາ­ລີ ອິ​ສະ​ລາ​ແອນ ແລະ ຮົງ​ກາ​ຣີ ໄດ້​ຕິດ​ປ້າຍ​ທີ່​ບໍ່​ມີ​ມູນ​ຄວາມ​ຈິງ​ຈຳ­ນວນ 60% ໃສ່​ຜະ­ລິດ​ຕະ​ພັນ​ອາ­ຫານ​ເດັກ ໂດຍ​ມີ​ເນື້ອ​ໃນ​ວ່າ: “ເໝາະ​ສົມ​ສຳ­ລັບ​ເດັກ​ອາ­ຍຸ​ຕ່ຳ​ກວ່າ 6 ເດືອນ” ຕາມ​ຈຸດ​ຢືນ​ຂອງ​ອົງ­ການ​ອະ­ນາ­ໄມ​ໂລກ​ແລ້ວ ກໍ​ແມ່ນ​ວ່າ​ສຳ­ລັບ 6 ເດືອນ​ທຳ​ອິດ​ທີ່​ເກີດ​ມາ​ນັ້ນ ເດັກ​ຕ້ອງ​ໄດ້​ກິນ​ນົມ​ແມ່​ເປັນ­ຕົ້ນ​ຕໍ ດັ່ງ­ນັ້ນ ຈຶ່ງ​ບໍ່​ມີ​ອາ­ຫານ​ຊະ­ນິດ​ໃດ​ຈະ​ເໝາະ​ສົມ​ກັບ​ເດັກ­ນ້ອຍ​ອາ­ຍຸ​ລຸ່ມ 6 ເດືອນ ຄື​ການ​ໂຄ­ສະ­ນາ ຜົນ​ການ​ສຳ​ຫຼວດ​ທີ່​ພົບ​ວ່າ​ອາ­ຫານ​ເດັກ​ຍັງ​ມີ​ສ່ວນ​ປະ­ສົມ​ຂອງ​ນ້ຳ­ຕານ​ຫຼາຍ​ເກີນ​ໄປ​ນີ້ ທາງ​ອົງ­ການ​ອະ­ນາ­ໄມ​ໂລກ ຈຶ່ງ​ໄດ້​ຮຽກ­ຮ້ອງ​ໃຫ້​ຕິດ​ປ້າຍ​ໃສ່​ຜະ­ລິດ​ຕະ​ພັນ​ປະ­ເພດ​ເຂົ້າ­ໜົມ​ອົມ ເຄື່ອງ​ດື່ມ​ທີ່​ມີ​ລົດ​ຫວານ ນ້ຳ­ໝາກ​ໄມ້ ແລະ ນົມ​ຂຸ້ນ ໂດຍ​ໃຫ້​ບອກ​ຢ່າງ​ຈະ​ແຈ້ງ­ວ່າ “ບໍ່​ເໝາະ​ສົມ​ສຳ­ລັບ​ເດັກ​ອາ­ຍຸ​ຕ່ຳ​ກວ່າ 3 ປີ !” ອົງ­ການ​ອະ­ນາ­ໄມ​ໂລກ​ຍັງ​ໄດ້​ແນະ­ນຳ​ວ່າ​ເດັກ​ອາ­ຍຸ​ລະ­ຫວ່າງ 6 ເດືອນ ຫາ 2 ປີ​ນັ້ນ ຄວນ​ລ້ຽງ​ດ້ວຍ​ອາ­ຫານ​ຊຶ່ງ​ອຸ­ດົມ​ໄປ​ດ້ວຍ​ທາດ​ບຳ­ລຸງ​ທີ່​ປຸງ​ແຕ່ງ​ພາຍ​ໃນ​ຄອບ­ຄົວ​ເອົາ​ເອງ.

   ທີ່ ອາກ​ຊັງ​ຕິນ: (ອາ​ເຈັນ​ຕີ​ນາ) ຂ່າວ​ຕ່າງ­ປະ­ເທດ​ໃນ​ກາງ​ປີ 2018 ໃຫ້​ຮູ້​ກ່ຽວ​ກັບ​ບັນ­ຫາ​ເສດ­ຖະ­ກິດ-ການ​ເງິນ​ຕົກ­ຕ່ຳ​ຈຳ​ດິນ​ໃນ​ປະ­ເທດ​ອາກ​ຊັງ​ຕິນ ຈົນ​ເຖິງ​ຂັ້ນ​ລັດ­ຖະ­ບານ​ຕ້ອງ​ໄດ້​ຮີບ​ຮ້ອນ​ກຳ­ນົດ​ມາດ​ຕະ­ການ​ປະ­ຢັດ​ຮັດ​ສາຍ­ແອວ ມາດ​ຕະ­ການ​ປະ­ຢັດ​ງົບ­ປະ­ມານ​ຂອງ​ລັດ​ນັ້ນ ປະ­ກອບ​ດ້ວຍ: ງົດ​ການ​ຮັບ​ບຸ​ຄະ­ລາ​ກອນ​ຊຸດ​ໃໝ່ ນັບ​ແຕ່​ກາງ​ປີ 2018 ເຖິງ​ເດືອນ​ທັນ­ວາ 2019 ຍົກ­ເວັ້ນ​ອົງ­ການ​ສືບ​ລັດ​ຖະ​ການ​ລັບ​ຂັ້ນ​ສູນ​ກາງ ຄັງ​ເງິນ ກົມ​ຄຸ້ມ​ຄອງ​ຄ້າຍ​ກັກ​ຂັງ​ຂັ້ນ​ສູນ​ກາງ ບັນ­ດາ​ໜ່ວຍ​ງານ​ຄົ້ນ­ຄວ້າ​ວິ­ທະ­ຍາ­ສາດ-ເຕັກ​ໂນ​ໂລ​ຊີ ມະ­ຫາ­ວິ­ທະ­ຍາ­ໄລ​ແຫ່ງ​ຊາດ ກອງ​ກຳ­ລັງ​ປະ­ກອບ​ອາ­ວຸດ ແລະ ໜ່ວຍ​ງານ​ຮັກ­ສາ​ຄວາມ​ສະ­ຫງົບ ສຳ­ລັບ​ບັນ­ດາ​ມະ­ຫາ­ວິ­ທະ­ຍາ­ໄລ​ແຫ່ງ​ຊາດ ສູນ​ການ​ສຶກ​ສາ​ພາກ​ເອ­ກະ​ຊົນ ແລະ ຢູ່​ຕາມ​ແຂວງ​ຕ່າງໆ​ນັ້ນ ລັດ​ໄດ້​ຢຸດ​ໃຫ້­ການ​ສະ­ໜັບ­ສະ­ໜູນ​ທາງ​ດ້ານ​ເຕັກ­ນິກ ນັບ​ແຕ່​ວັນ​ທີ 1 ມັງ­ກອນ​ປີ​ນີ້​ເປັນ­ຕົ້ນ​ມາ ຂ່າວ​ໃຫ້​ຮູ້​ຕື່ມ​ວ່າ ມາດ​ຕະ­ການ​ປະ­ຢັດ​ຍັງ​ຫ້າມ​ການ​ໃຫ້​ເງິນ​ລາ­ງວັນ ການ​ເພີ້ມ​ງົບ­ປະ­ມານ​ໃຫ້​ບັນ­ດາ​ອົງ­ການ​ຂອງ​ລັດ ກໍ​ຄື ສ່ວນ​ບຸກ­ຄົນ ນັບ​ແຕ່​ຕົ້ນ​ປີ 2016 ເປັນ­ຕົ້ນ​ມາ ອາກ​ຊັງ​ຕິນ ປະ​ເຊີນ​ກັບ​ບັນ­ຫາ​ເງິນ​ເຟີ້​ຢ່າງ​ໜັກ ຄື​ຢູ່​ໃນ​ລະ­ດັບ 12,5% ສະ­ເພາະ​ໃນ​ໄຕ​ມາດ​ທີ 14 ປີ 2016 ແລະ ເພີ່ມ​ສູງ​ຂຶ້ນ​ເກືອບ 30% ພາຍ​ໃນ​ປີ 2018.

ຂ່າວທີ່ກ່ຽວຂ້ອງ