ຂ່າວຫຼ້າສຸດ

ຈົ່ງພ້ອມກັນສຸມໃສ່ກຳຈັດ ພະຍາດໄຂ້ມາລາເຣຍທຸກຊະນິດ

659 17 ທ.ວ. 2019 ຂ່າວໜ້າ​ໜຶ່ງ
ຈົ່ງພ້ອມກັນສຸມໃສ່ກຳຈັດ ພະຍາດໄຂ້ມາລາເຣຍທຸກຊະນິດ

   ກອງ​ປະ­ຊຸມ​ປະ­ຈຳ​ປີ 2019 ກ່ຽວ​ກັບ​ວຽກ​ງານ​ການ​ຄວບ​ຄຸມ ແລະ ກຳ­ຈັດ​ພະ­ຍາດ​ໄຂ້​ມາ­ລາ​ເຣຍ ຈັດ​ຂຶ້ນ​ວັນ​ທີ 16 ທັນ­ວາ 2019 ທີ່​ເມືອງ​ວັງ​ວຽງ ແຂວງ​ວຽງ​ຈັນ ມີ​ທ່ານ ພູ­ທອນ ເມືອງ​ປາກ ຮອງ​ລັດ­ຖະ­ມົນ­ຕີ​ກະ­ຊວງ​ສາ­ທາ­ລະ­ນະ​ສຸກ ບັນ­ດາ​ຫົວ­ໜ້າ​ກົມ ສູນ ສະ​ຖາ​ບັນ ຜູ້­ຕາງ­ໜ້າ​ພະ​ແນກ​ສາ­ທາ­ລະ­ນະ​ສຸກ​ແຂວງ​ທົ່ວ​ປະ­ເທດ ແລະ ຄູ່​ຮ່ວມ​ງານ ເຂົ້າ​ຮ່ວມ.

   ທ່ານ ວຽງ​ໄຊ ວະ​ນິ​ສິ​ເວດ ຫົວ­ໜ້າ​ສູນ​ໄຂ້­ຍຸງ ແມ່​ກາ​ຝາກ ແລະ ແມງ­ໄມ້ ລາຍ​ງານ​ໃຫ້​ຮູ້​ວ່າ: ເພື່ອ​ຮັບ­ປະ­ກັນ​ໃຫ້​ບັນ­ລຸ​ຕາມ​ແຜນ​ຍຸດ​ທະ​ສາດ​ແຫ່ງ​ຊາດ ແຕ່​ລະ​ໄລ­ຍະ​ວຽກ​ງານ​ການ​ຄວບ​ຄຸມ ແລະ ກຳ­ຈັດ​ພະ­ຍາດ​ໄຂ້​ມາ­ລາ​ເຣຍ ໄດ້​ດຳ­ເນີນ​ກິດ­ຈະ­ກຳ​ໄປ​ຕາມ 5 ຈຸດ­ປະ­ສົງ​ຫຼັກ ຄື: ການ​ບໍ­ລິ­ຫານ​ຄຸ້ມ​ຄອງ​ການ​ຄວບ​ຄຸມ​ກໍ­ລະ­ນີ​ການ​ຕິດ­ເຊື້ອ ການ​ຄວບ​ຄຸມ​ຍຸງ​ພາ­ຫະ​ນຳ​ເຊື້ອ ໂດຍ​ການ­ແຈກ­ຢາຍ​ມຸ້ງ​ເຄືອບ​ຢາ​ຍາວ​ນານ​ໃຫ້​ກຸ່ມ​ສ່ຽງ ການ​ເຝົ້າ​ລະ­ວັງ​ພະ­ຍາດ ແລະ ປຸກ­ລະ­ດົມ​ປະ­ຊາ­ຊົນ ເຊິ່ງ​ເຫັນ​ວ່າ​ການ­ຈັດ­ຕັ້ງ​ປະ­ຕິ­ບັດ​ຍຸດ​ທະ​ສາດ​ໄລ­ຍະ​ທີ I (2016-2020) ເລັ່ງ​ໃສ່​ຫຼຸດ​ການ​ສົ່ງ​ເຊື້ອ ແລະ ກຳ­ຈັດ​ພະ­ຍາດ​ໄຂ້​ມາ­ລາ​ເຣຍ​ມີ​ທ່າ​ອ່ຽງ​ດີ​ຂຶ້ນ ແລະ ຫຍັບ​ເຂົ້າ​ໃກ້​ເປົ້າ​ໝາຍ​ການ​ລົບ​ລ້າງ​ພະ­ຍາດ​ນີ້​ໃນ​ປີ 2030 ເຊິ່ງ​ສະ­ແດງ​ໃຫ້​ເຫັນ​ໃນ​ຕົວ​ເລກ​ພົບ​ເຊື້ອ​ປີ 2019 ທົ່ວ​ປະ­ເທດ​ມີ 5.600 ກໍ­ລະ­ນີ ເສຍ​ຊີ­ວິດ 0 ກໍ­ລະ­ນີ ທັງ​ໝົດ​ທຽບ­ໃສ່​ປີ 2018 ພົບ 8.084 ກໍ­ລະ­ນີ ເສຍ​ຊີ­ວິດ 6 ກໍ­ລະ­ນີ ເຫັນ​ວ່າ​ກໍ­ລະ­ນີ​ພົບ​ເຊື້ອ​ຫຼຸດ​ລົງ 30,73%.

   ສຳ­ລັບ​ການ​ປະ­ຕິ­ບັດ​ວຽກ​ງານ​ການ​ຄວບ​ຄຸມ ແລະ ກຳ­ຈັດ​ພະ­ຍາດ​ໄຂ້​ມາ­ລາ​ເຣຍ​ປີ 2020 ຍັງ​ມີ​ສິ່ງ​ທ້າ​ທາຍ​ທີ່​ຈະ​ໄດ້​ເລັ່ງ​ໃສ່​ແກ້​ໄຂ ເປັນ­ຕົ້ນ ບັນ­ຫາ​ການ​ເຄື່ອນ​ທີ່​ເຄື່ອນ​ຍ້າຍ​ຫຼາຍ​ໄປ​ຕາມ​ທິດ​ທາງ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ປະ­ເທດ ສະ­ພາບ​ເຊື້ອ​ທີ່​ດື້​ຕໍ່​ຢາ​ປິ່ນ­ປົວ​ທີ່​ໃຊ້​ໃນ​ປັດ­ຈຸ­ບັນ ການ​ກວດ​ຄົນ​ເຈັບ​ທີ່​ສົງ­ໄສ​ເປັນ​ພະ­ຍາດ​ໄຂ້​ມາ­ລາ​ເຣຍ ຍັງ​ມີ​ຂໍ້​ຈຳ­ກັດ​ຂອດ​ປະ­ສານ​ງານ ແລະ ການ​ຮ່ວມ​ມື​ແຕ່​ສູນ​ກາງ​ຮອດ​ທ້ອງ­ຖິ່ນ.

   ໂອ­ກາດ​ນີ້ ທ່ານ ພູ­ທອນ ເມືອງ​ປາກ ກ່າວ​ວ່າ: ພະ­ຍາດ​ໄຂ້​ມາ­ລາ​ເຣຍ​ເປັນ​ບັນ­ຫາ​ສາ­ທາ­ລະ­ນະ​ສຸກ ມາ​ແຕ່​ດົນ​ນານ​ແລ້ວ​ຢູ່​ໃນ​ລາວ​ເຮົາ ກໍ​ຄ້າຍ­ຄື​ກັນ​ກັບ​ບັນ­ດາ​ປະ­ເທດ​ລຸ່ມ​ແມ່­ນ້ຳ​ຂອງ ປັດ­ຈຸ­ບັນ​ຍັງ​ພົບ­ພໍ້​ຫຼາຍ​ກໍ­ລະ­ນີ​ຢູ່​ບາງ​ເຂດ​ພາກ​ໃຕ້​ຂອງ​ລາວ ດັ່ງ­ນັ້ນ ຈຶ່ງ​ຕ້ອງ​ໄດ້​ເອົາ­ໃຈ­ໃສ່​ຢ່າງ​ຈິງ​ຈັງ​ໃນ​ການ​ຄວບ​ຄຸມ​ເພື່ອ​ຫຼຸດ­ຜ່ອນ​ການ​ສົ່ງ​ເຊື້ອ​ໃຫ້​ຕ່ຳ​ລົງ ແລະ ໃນ​ຫຼາຍ​ເຂດ​ຕ້ອງ​ໄດ້​ກຳ­ຈັດ​ໃຫ້​ໝົດ​ສິ້ນ​ໄປ​ເປັນ​ແຕ່​ລະ​ໄລ­ຍະ ໂດຍ​ສະ­ເພາະ ໃນ​ບັນ­ດາ​ແຂວງ​ພາກ​ເໜືອ ທັງ​ໝົດ​ນີ້​ເຫັນ​ວ່າ​ມີ​ຄວາມ​ສອດ­ຄ່ອງ​ກັບ​ເປົ້າ​ໝາຍ ແຫ່ງ​ການ​ກຳ­ຈັດ​ພະ­ຍາດ​ໄຂ້​ມາ­ລາ​ເຣຍ​ຂອງ​ພາກ​ພື້ນ ແລະ ຍຸດ​ທະ​ສາດ​ໂລກ​ໃນ​ປີ 2030 ໂອ­ກາດ​ນີ້ ຮຽກ­ຮ້ອງ​ໃຫ້​ວິ­ຊາ​ການ​ແຕ່​ລະ​ຂັ້ນ ແລະ ເພື່ອນ​ຮ່ວມ​ງານ​ສາ­ກົນ ຈົ່ງ​ໄດ້​ພ້ອມ­ພຽງ​ກັນ​ເຂົ້າ­ໃຈ​ຍຸດ​ທະ​ສາດ ແລະ ສ້າງ​ແຜນ​ກິດ­ຈະ­ກຳ​ທີ່​ສອດ­ຄ່ອງ ສາ­ມາດ​ປະ­ຕິ­ບັດ​ໄດ້​ນຳ­ພາ​ຂັ້ນ​ແຂວງ ຂັ້ນ​ເມືອງ ແລະ ຂັ້ນ​ຊຸມ​ຊົນ​ປະ­ສານ​ງານ​ເຊື່ອມ​ສານ ແລະ ຮ່ວມ​ມື​ຢ່າງ​ໜຽວ​ແໜ້ນ​ເປັນ​ອັນ​ໜຶ່ງ​ອັນ​ດຽວ​ກັນ ເພື່ອ​ພ້ອມ​ກັນ​ກຳ­ຈັດ​ພະ­ຍາດ​ດັ່ງ­ກ່າວ.

ຂ່າວທີ່ກ່ຽວຂ້ອງ