ຂ່າວຫຼ້າສຸດ

ປະເມີນວຽກງານຕ້ານການຟອກເງິນ

654 17 ທ.ວ. 2019 ຂ່າວໜ້າ​ໜຶ່ງ

   ສຳ­ນັກ­ງານ​ຂໍ້​ມູນ​ຕ້ານ​ການ​ຟອກ​ເງິນ​ຮ່ວມ​ກັບ​ກຸ່ມ​ອາ­ຊີ-ປາ​ຊີ​ຟິກ ເພື່ອ​ຕ້ານ​ການ​ຟອກ​ເງິນ (Asia/Pacific Group on Money Laundering “APG”) ໄດ້​ຈັດ​ເຝິກ­ອົບ­ຮົມ ແລະ ເຮັດ​ທົດ​ລອງ​ການ​ປະ​ເມີນ​ຜົນ​ຮອບ­ດ້ານ​ວຽກ​ງານ​ຕ້ານ​ການ​ຟອກ​ເງິນ ແລະ ສະ­ໜອງ​ທຶນ​ໃຫ້​ແກ່​ການ​ກໍ່​ການ​ຮ້າຍ (AML/CFT) ຂຶ້ນ​ວັນ​ທີ 10-13 ທັນ­ວາ 2019 ທີ່​ນະ­ຄອນ­ຫຼວງ​ວຽງ​ຈັນ ມີ​ທ່ານ​ນາງ ຂັນ​ທະ​ລີ ວົງ​ໄຊ​ຍະ​ລາດ ຮອງ​ຫົວ­ໜ້າ​ສຳ­ນັກ­ງານ​ຂໍ້​ມູນ​ຕ້ານ​ການ​ຟອກ​ເງິນ ທ່ານ​ນາງ ເອ​ລີນ ລູ​ໂບ​ວິກ ຮອງ​ເລ­ຂາ­ທິ­ການ​ກອງ​ເລ­ຂາ​ກຸ່ມ​ອາ­ຊີ-ປາ​ຊີ​ຟິກ ເພື່ອ​ຕ້ານ​ການ​ຟອກ​ເງິນ (ERIN LUBOWICZ Deputy Executive Secretary) ຕາງ­ໜ້າ​ຈາກ​ກຸ່ມ​ອາ­ຊີ-ປາ​ຊີ​ຟິກ ເພື່ອ​ຕ້ານ​ການ​ຟອກ​ເງິນ ພ້ອມ​ທັງ​ຕາງ­ໜ້າ​ຈາກ​ອົງ­ການ UNODC ຊ່ຽວ­ຊານ​ທາງ​ດ້ານ​ວຽກ​ງານ​ຕ້ານ​ການ​ຟອກ​ເງິນ ແລະ ສະ­ໜອງ​ທຶນ​ໃຫ້​ແກ່​ການ​ກໍ່​ການ​ຮ້າຍ ການ​ນຳ ແລະ ວິ­ຊາ​ການ​ຈາກ​ພາກ­ສ່ວນ​ຕ່າງໆ​ທີ່​ຕິດ​ພັນ ເຂົ້າ​ຮ່ວມ.

   ຊຸດ​ອົບ­ຮົມ​ຄັ້ງ​ນີ້​ຂອງ​ກຸ່ມ​ອາ­ຊີ-ປາ​ຊີ​ຟິກ ເພື່ອ​ຕ້ານ​ການ​ຟອກ​ເງິນ​ເປັນ​ການ​ຊ່ວຍ​ໃຫ້​ລາວ​ເຮົາ ໃນ​ການ​ກະ­ກຽມ​ຄວາມ​ພ້ອມ ເພື່ອ​ຮອງ​ຮັບ​ການ​ປະ​ເມີນ​ຜົນ​ຮອບ­ດ້ານ​ຂອງ​ລາວ ທີ່​ໃກ້​ຈະ​ມາ​ເຖິງ​ນີ້ ໂດຍ​ສະ­ເພາະ ເນັ້ນ​ການ​ສ້າງ​ຄວາມ​ເຂົ້າ­ໃຈ​ໃຫ້​ກັບ​ພາກ­ສ່ວນ​ກ່ຽວ­ຂ້ອງ ຕໍ່​ກັບ​ພາ­ລະ​ບົດ­ບາດ​ຂອງ​ພາກ­ສ່ວນ​ຕົນ ທີ່​ຕ້ອງ​ຮັບ­ຜິດ­ຊອບ​ໃຫ້​ມີ​ຄວາມ​ແນ່​ໃຈ​ວ່າ​ພາກ­ສ່ວນ​ດັ່ງ­ກ່າວ ມີ​ຄວາມ​ເຂົ້າ­ໃຈ​ຕໍ່​ກັບ​ວິ­ທີ​ການ ແລະ ຂະ​ບວນ​ການ​ປະ​ເມີນ ຜ່ານ​ການ​ເຮັດ​ບົດ​ເຝິກ​ຫັດ​ຕົວ​ຈິງ ເພື່ອ​ສ້າງ​ຄວາມ​ເຂົ້າ­ໃຈ​ຕໍ່​ການ­ຈັດ­ຕັ້ງ​ປະ­ຕິ­ບັດ ບັນ­ດາ​ມາດ­ຖານ​ຂອງ​ອົງ­ການ​ຕ້ານ​ການ​ຟອກ​ເງິນ​ສາ­ກົນ ກໍ​ຄື ການ­ຈັດ­ຕັ້ງ​ປະ­ຕິ­ບັດ 40 ຂໍ້​ແນະ­ນຳ ແລະ 11 ປະ​ສິດ­ທິ​ຜົນ​ທີ່​ຕິດ​ພັນ​ກັບ​ພາ­ລະ​ບົດ­ບາດ​ຂອງ​ແຕ່​ລະ​ພາກ­ສ່ວນ​ທີ່​ກ່ຽວ­ຂ້ອງ ແລະ ອັນ​ເປັນ​ພື້ນ­ຖານ​ໃນ​ການ​ກະ­ກຽມ​ການ​ເມີນ​ໃຫ້​ແກ່​ຜູ້​ຈັດ​ຕັ້ງ​ປະ­ຕິ­ບັດ​ຕົວ​ຈິງ ທີ່​ຈະ​ໄດ້​ເຮັດ​ວຽກ​ຮ່ວມ​ກັບ​ຜູ້​ປະ​ເມີນ ເພື່ອ​ເປັນ​ການ​ກະ­ກຽມ​ຄວາມ​ພ້ອມ​ຂອງ ສປປ ລາວ.

   ພ້ອມ​ນີ້ ຄະ­ນະ​ກອງ​ເລ­ຂາ​ກຸ່ມ​ອາ­ຊີ-ປາ​ຊີ​ຟິກ ເພື່ອ​ຕ້ານ​ການ​ຟອກ​ເງິນ​ໄດ້​ເຂົ້າ​ຢ້ຽມ​ຄຳ­ນັບ​ຄະ­ນະ​ກຳ­ມະ­ການ​ແຫ່ງ​ຊາດ ເພື່ອ​ຕ້ານ​ການ​ຟອກ​ເງິນ ແລະ ສະ­ໜອງ​ທຶນ​ໃຫ້​ແກ່​ການ​ກໍ່​ການ​ຮ້າຍ ມີ​ທ່ານ ໄຊ​ສີ ສັນ­ຕິ​ວົງ ລັດ­ຖະ­ມົນ­ຕີ​ກະ­ຊວງ​ຍຸ­ຕິ​ທຳ ທ່ານ ພົນ​ຕີ ກົງ​ທອງ ພົງ​ວິ­ຈິດ ຮອງ​ລັດ­ຖະ­ມົນ­ຕີ​ກະ­ຊວງ​ປ້ອງ​ກັນ​ຄວາມ​ສະ­ຫງົບ ທ່ານ ບຸນ​ໂຈມ ອຸ­ບົນ​ປະ­ເສີດ ຮອງ​ລັດ­ຖະ­ມົນ­ຕີ​ກະ­ຊວງ​ການ​ເງິນ ແລະ ທ່ານ ພຸດ​ທະ​ໄຊ ສີ­ວິ­ໄລ ຮອງ​ຜູ້​ວ່າ­ການ​ທະ­ນາ­ຄານ​ແຫ່ງ ສປປ ລາວ ໂດຍ​ການ​ລາຍ​ງານ​ແມ່ນ​ຕິດ​ພັນ​ກັບ 4 ວຽກ​ຕົ້ນ­ຕໍ ໃນ​ນີ້ ມີ​ຄະ­ນະ​ວຽກ​ງານ​ເຜີຍ­ແຜ່ ແລະ ເຊື່ອມ​ຊຶມ​ວຽກ​ງານ​ນິ­ຕິ​ກຳ ແລະ ກົນ​ໄກ ວຽກ​ງານ​ຄຸ້ມ​ຄອງ ແລະ ວຽກ​ງານ​ດຳ­ເນີນ​ຄະ­ດີ ຜົນ​ການ​ເຝິກ­ອົບ­ຮົມ ພ້ອມ​ທັງ​ແນະ­ນຳ​ຂັ້ນ​ຕອນ ຂະ​ບວນ​ການ​ປະ​ເມີນ ລວມ​ທັງ​ຈຸດ­ປະ­ສົງ ຄວາມ​ໝາຍ ແລະ ຄວາມ​ສຳ­ຄັນ​ຂອງ​ການ​ປະ​ເມີນ​ຮອບ­ດ້ານ​ກ່ຽວ​ກັບ​ວຽກ​ງານ​ຕ້ານ​ການ​ຟອກ​ເງິນ ແລະ ສະ­ໜອງ​ທຶນ​ໃຫ້​ແກ່​ການ​ກໍ່​ການ​ຮ້າຍ​ໃຫ້​ຂັ້ນ​ນຳ​ໄດ້​ຮັບ​ຊາບ.

ຂ່າວທີ່ກ່ຽວຂ້ອງ