ຂ່າວຫຼ້າສຸດ

ຄູໂບ້ຕາ ມອບທຶນການສຶກສາໃຫ້ມະຫາວິທະຍາໄລ

565 17 ທ.ວ. 2019 ຂ່າວໜ້າ​ໜຶ່ງ
ຄູໂບ້ຕາ ມອບທຶນການສຶກສາໃຫ້ມະຫາວິທະຍາໄລ

   KUBOTA Laos (Sole) ສືບ­ຕໍ່​ໂຄງ­ການ KUBOTA Sharing The Future ເປັນ​ປີ​ທີ 5 ໂດຍ​ການ​ມອບ​ອຸ­ປະ­ກອນ​ການ​ຮຽນ​ໃຫ້​ເດັກ­ນ້ອຍ ແລະ ເຍົາ­ວະ​ຊົນ​ໃນ​ລາວ ພ້ອມ​ທັງ​ມອບ​ທຶນ​ການ​ສຶກ​ສາ​ໃຫ້​ນັກ​ສຶກ​ສາ 40 ທຶນ ມູນ​ຄ່າ 805.600.000 ກີບ ເປັນ​ປີ​ທຳ​ອິດ​ເພື່ອ​ເປັນ​ສ່ວນ​ໜຶ່ງ​ໃນ​ການ​ພັດ­ທະ­ນາ ແລະ ຕອບ​ແທນ​ສັງ­ຄົມ​ລາວ ເຮັດ​ໃຫ້​ເດັກ­ນ້ອຍ ແລະ ເຍົາ­ວະ​ຊົນ ມີ​ອຸ­ປະ­ກອນ​ການ​ຮຽນ ແລະ ມີ​ຄຸນ​ນະ​ພາບ​ຊີ­ວິດ​ທີ່​ດີ​ຂຶ້ນ.

   ພິ­ທີ​ມອບ-ຮັບ​ທຶນ​ການ​ສຶກ​ສາ​ໃຫ້​ນັກ​ສຶກ​ສາ​ຈາກ​ມະ­ຫາ­ວິ­ທະ­ຍາ­ໄລ​ແຫ່ງ​ຊາດ ມະ­ຫາ­ວິ­ທະ­ຍາ­ໄລ​ສຸ​ພາ­ນຸ​ວົງ ມະ­ຫາ­ວິ­ທະ­ຍາ­ໄລ​ສະ­ຫວັນ​ນະ​ເຂດ ແລະ ມະ­ຫາ­ວິ­ທະ­ຍາ­ໄລ​ຈຳ­ປາ​ສັກ ຈັດ​ຂຶ້ນ​ວັນ​ທີ 16 ທັນ­ວາ 2019 ຢູ່​ນະ­ຄອນ­ຫຼວງ​ວຽງ​ຈັນ ກ່າວ​ມອບ​ໂດຍ​ທ່ານ ພິດ​ສະ​ນຸ ມິ​ລິນ​ທາ​ນຸດ ຜູ້​ຊ່ວຍ​ຜູ້​ຈັດ­ການ​ໃຫຍ່ ຜູ້​ຈັດ­ການ​ທົ່ວ​ໄປ​ສາຍ​ງານ​ຂາຍ​ການ​ຕະ­ຫຼາດ ແລະ ບໍ­ລິ­ການ​ບໍ­ລິ­ສັດ ສະ­ຫຍາມ​ຄູ​ໂບ​ຕ້າ​ຕອບ​ປໍ​ເຣ​ຊັ່ນ ຈຳ­ກັດ ແລະ ກ່າວ​ຮັບ​ໂດຍ​ທ່ານ ກອງ​ສີ ແສງ​ມະ­ນີ ຮອງ​ລັດ­ຖະ­ມົນ­ຕີ​ກະ­ຊວງ​ສຶກ​ສາ​ທິ​ການ ແລະ ກີ­ລາ (ສສກ) ມີ​ຮອງ​ອະ­ທິ­ການ​ບໍ­ດີ​ມະ­ຫາ­ວິ­ທະ­ຍາ­ໄລ ຕົວ​ແທນ​ຈຳ­ໜ່າຍ KUBOTA ແລະ ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

   ທ່ານ ພິດ​ສະ​ນຸ ມິ​ລິນ​ທາ​ນຸດ ກ່າວ​ວ່າ: ຕະ­ຫຼອດ​ໄລ­ຍະ​ການ​ດຳ­ເນີນ​ທຸ­ລະ​ກິດ KUBOTA ໄດ້​ເລັງ​ເຫັນ​ຄວາມ​ສຳ­ຄັນ​ຂອງ​ການ​ສຶກ​ສາ ເພາະ​ເປັນ​ພື້ນ­ຖານ​ສຳ­ຄັນ​ໃນ​ການ​ພັດ­ທະ­ນາ​ປະ­ເທດ​ໃຫ້​ກ້າວ​ໄປ​ຢ່າງ​ໝັ້ນ­ຄົງ ແລະ ເຍົາ­ວະ​ຊົນ​ເປັນ​ກຳ­ລັງ​ສຳ­ຄັນ​ໃນ​ການ​ພັດ­ທະ­ນາ​ສັງ­ຄົມ ແລະ ປະ­ເທດ​ຊາດ ບໍ­ລິ­ສັດ​ຈຶ່ງ​ໄດ້​ຈັດ​ໂຄງ­ການ​ສະ­ໜັບ­ສະ­ໜູນ​ດ້ານ​ການ​ສຶກ​ສາ​ທັງ​ໃນ ແລະ ຕ່າງ­ປະ­ເທດ​ມາ​ໂດຍ​ຕະ­ຫຼອດ ເຊັ່ນ​ດຽວ​ກັນ​ກັບ​ໂຄງ­ການ KUBOTA Sharing The Future ທີ່​ຈັດ​ຂຶ້ນ​ຢູ່​ລາວ​ຕໍ່​ເນື່ອງ 5 ປີ ເພື່ອ​ມອບ​ອຸ­ປະ­ກອນ​ການ​ຮຽນ​ໃຫ້​ເຍົາ­ວະ​ຊົນ​ໃນ​ເຂດ​ທຸ­ລະ­ກັນ­ດານ ລວມ​ເຖິງ​ມອບ​ທຶນ​ການ​ສຶກ​ສາ​ລະ­ດັບ​ມັດ­ທະ­ຍົມ​ຕອນ​ປາຍ​ເປັນ​ຄັ້ງ​ທຳ​ອິດ ເພື່ອ​ໃຫ້​ມີ​ກຳ­ລັງ​ໃຈ​ທີ່​ຈະ​ຮຽນ​ຮູ້ ແລະ ມີ​ຄຸນ​ນະ​ພາບ​ຊີ­ວິດ​ທີ່​ດີ​ຂຶ້ນ.

   ໂດຍ​ໄດ້​ຮັບ​ການ​ຮ່ວມ​ມື​ຈາກ​ກະ­ຊວງ ສສກ ແລະ ຕົວ​ແທນ​ຈຳ­ໜ່າຍ​ທົ່ວ​ປະ­ເທດ​ໃນ​ການ​ມອບ​ອຸ­ປະ­ກອນ​ການ​ສຶກ​ສາ 9.000 ຊຸດ ມູນ​ຄ່າ 665.600.000 ກີບ ເພື່ອ​ຂະ­ຫຍາຍ​ໂອ­ກາດ​ໃຫ້​ເດັກ­ນ້ອຍ ແລະ ເຍົາ­ວະ​ຊົນ​ໃນ​ແຂວງ​ຕ່າງໆ​ໄດ້​ຮັບ​ອຸ­ປະ­ກອນ​ການ​ຮຽນ​ຢ່າງ​ທົ່ວ​ເຖິງ ເຊິ່ງ​ປີ​ນີ້​ໄດ້​ຂະ­ຫຍາຍ​ໂອ­ກາດ​ໃຫ້​ນັກ­ຮຽນ​ລະ­ດັບ​ມັດ­ທະ­ຍົມ​ຕອນ​ປາຍ ໂດຍ​ການ​ມອບ​ທຶນ​ການ​ສຶກ​ສາ​ເປັນ​ປີ​ທຳ​ອິດ ເຊິ່ງ​ໄດ້​ຄັດ​ເລືອກ​ເອົາ​ລູກ​ຫຼານ​ຂອງ​ຊາວ​ກະ­ສິ­ກອນ ທີ່​ກຳ­ລັງ​ສຶກ​ສາ​ຢູ່​ມະ­ຫາ­ວິ­ທະ­ຍາ­ໄລ​ຕ່າງໆ ທີ່​ມີ​ຜົນ​ການ​ຮຽນ​ດີ ແລະ ຄຸນ­ສົມ­ບັດ​ດີ 40 ທຶນ ທຶນ​ລະ 3,5 ລ້ານ​ກີບ ລວມ​ມູນ​ຄ່າ 140 ລ້ານ​ກີບ ມອບ​ໃຫ້​ນັກ​ສຶກ​ສາ 4 ມະ­ຫາ­ວິ­ທະ­ຍາ­ໄລ​ພາກ­ສ່ວນ​ລະ 10 ທຶນ.

ຂ່າວທີ່ກ່ຽວຂ້ອງ