ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 17-12-2019

1.541 17 ທ.ວ. 2019 ຫົວຂໍ້ຂ່າວອື່ນໆ

   ມື້­ນີ້​ມີ​ເລື່ອງ​ກ່ຽວ​ກັບ​ການ​ບໍ່​ອະ­ນຸ­ຍາດ​ໃຫ້​ຄົນ​ເພດ​ດຽວ​ກັນ​ແຕ່ງ­ດອງ​ກັນ​ໃນ ສປ ຈີນ ບັນ­ຫາ​ການ​ແຈ້ງ​ຊັບ​ສິນ​ຂອງ​ພະ­ນັກ­ງານ​ໃນ​ຫວຽດ­ນາມ ແລະ ເລື່ອງ​ຜູ້­ນຳ​ຣັດ​ເຊຍ ພົບ​ປະ​ກັບ​ປະ­ຊາ­ຊົນ​ບົນ​ໜ້າ​ຈໍ​ວີ​ດີ​ໂອ.

   ທີ່ ສປ ຈີນ: ແຫຼ່ງ​ຂ່າວ​ຈາກ​ໜັງ­ສື­ພິມ​ຜູ້​ແທນ​ປະ­ຊາ­ຊົນ (ສະ­ພາ​ແຫ່ງ​ຊາດ) ສະ­ບັບ 608 ອາ­ທິດ ທ້າຍ​ເດືອນ​ສິງ­ຫາ​ປີ​ນີ້ ໃຫ້​ຮູ້​ວ່າ: ສປ ຈີນ ບໍ່​ອະ­ນຸ­ມັດ​ກົດ­ໝາຍ​ແຕ່ງ­ດອງ​ລະ­ຫວ່າງ​ຄົນ​ເພດ​ດຽວ​ກັນ ການ​ແຕ່ງ­ດອງ​ຕ້ອງ​ມີ​ຂຶ້ນ​ລະ­ຫວ່າງ​ເພດ​ຊາຍ ແລະ ເພດ​ຍິງ​ເທົ່າ​ນັ້ນ ລາຍ​ລະ­ອຽດ​ກ່ຽວ​ກັບ​ບັນ­ຫາ​ນີ້ ມີ​ຂຶ້ນ​ໃນ​ກອງ​ປະ­ຊຸມ​ຖະ­ແຫຼງ​ຂ່າວ ໂດຍ​ຄະ­ນະ​ກຳ­ມາ​ທິ​ການ​ກົດ­ໝາຍ​ຂອງ​ສະ­ພາ​ປະ­ຊາ­ຊົນ​ແຫ່ງ​ຊາດ​ຈີນ ຄັ້ງ​ວັນ​ທີ 21 ສິງ­ຫາ 2019 ຕໍ່​ຄຳ​ຖາມ​ທີ່​ວ່າ ທາງ​ການ​ຈະ​ອະ­ນຸ­ຍາດ​ໃຫ້​ຄົນ​ເພດ​ດຽວ​ກັນ​ແຕ່ງ­ດອງ​ກັນ​ໄດ້ ຫຼື ບໍ່​ນັ້ນ ກໍ​ໄດ້​ມີ​ຄຳ​ຕອບ​ຢ່າງ​ຈະ​ແຈ້ງ­ວ່າ: ກົດ­ໝາຍ​ຂອງ ສປ ຈີນ ອະ­ນຸ­ຍາດ​ໃຫ້­ການ​ແຕ່ງ­ດອງ​ເກີດ​ຂຶ້ນ​ສະ­ເພາະ ລະ­ຫວ່າງ​ເພດ​ຊາຍ​ກັບ​ເພດ​ຍິງ​ເທົ່າ​ນັ້ນ ຊຶ່ງ​ສອດ­ຄ່ອງ​ກັບ​ສະ­ພາບ​ປັດ­ຈຸ­ບັນ ຮີດ­ຄອງ​ປະ­ເພ­ນີ ປະ­ຫວັດ​ຄ່າ​ນິ­ຍົມ​ຂອງ​ສັງ­ຄົມ​ຈີນ​ທີ່​ມີ​ມາ​ແຕ່​ດົນ​ນານ​ແລ້ວ ຂ່າວ​ໃຫ້​ຮູ້​ຕື່ມ​ວ່າ ໃນ​ໄລ­ຍະ​ຜ່ານ​ມາ ສະ­ມາ­ຊິກ​ສະ­ພາ​ປະ­ຊາ­ຊົນ​ແຫ່ງ​ຊາດ​ຈີນ​ຫຼາຍ​ທ່ານ ໄດ້​ພະ­ຍາ­ຍາມ​ຮ່າງ​ກົດ­ໝາຍ​ອະ­ນຸ­ຍາດ​ໃຫ້​ຄົນ​ເພດ​ດຽວ​ກັນ​ມີ​ສິດ​ແຕ່ງ­ດອງ​ກັນ​ໄດ້ ແຕ່​ບໍ່​ປະ­ສົບ​ຜົນ­ສຳ­ເລັດ ປະ­ມວນ​ກົດ­ໝາຍ​ແພ່ງ​ຂອງ ສປ ຈີນ ສະ­ບັບ​ປຸບ​ປຸງ ຊຶ່ງ​ມີ​ມາດ​ຕະ­ການ​ກ່ຽວ​ກັບ​ການ​ແຕ່ງ­ດອງ​ນັ້ນ ຈະ​ປະ­ກາດ​ໃຊ້​ໃນ​ປີ 2020 ບັນ­ດາ​ມາດ­ຕາ​ທີ່​ຈະ​ຖືກ​ແກ້​ໄຂ​ນັ້ນ ແມ່ນ​ກ່ຽວ​ກັບ​ການ​ລ່ວງ​ເກີນ​ທາງ​ເພດ ການ​ຢ່າ​ຮ້າງ ແລະ ການ​ວາງ​ແຜນ​ຄອບ­ຄົວ ແຕ່​ບໍ່​ມີ​ການ​ແກ້​ໄຂ​ມາດ­ຕາ​ກ່ຽວ​ກັບ​ສິດ​ຂອງ​ກຸ່ມ​ຄົນ​ຫຼາກ​ຫຼາຍ​ທາງ​ເພດ.

   ທີ່ ຫວຽດ­ນາມ: ໜຶ່ງ​ໃນ​ມາດ​ຕະ­ການ​ຂອງ​ຫວຽດ­ນາມ ເພື່ອ​ປາບ​ການ​ສໍ້​ລາດ​ບັງ​ຫຼວງ ກໍ​ຄື ການ​ບັງ­ຄັບ​ໃຫ້​ມີ​ການ​ແຈ້ງ​ຊັບ​ສິນ​ຂອງ​ພະ­ນັກ­ງານ​ລັດ ແຕ່​ເພື່ອ​ໃຫ້​ມາດ​ຕະ­ການ​ນີ້​ເກີດ​ຜົນ​ແທ້ ທາງ​ກຳ­ມາ​ທິ​ການ​ຍຸ­ຕິ​ທຳ​ສະ­ພາ​ແຫ່ງ​ຊາດ​ຫວຽດ­ນາມ ຍັງ​ເຫັນ​ວ່າ​ລັດ­ຖະ­ບານ​ຕ້ອງ​ມີ​ກົນ​ໄກ ແລະ ລະ­ບຽບ​ການ​ຕິດ­ຕາມ​ຄຸ້ມ​ຄອງ​ລະ­ອຽດ​ຄົບ​ຊຸດ​ກວ່າ​ເກົ່າ ນອກ­ຈາກ​ນັ້ນ​ຍັງ​ຕ້ອງ​ໄດ້​ກຳ­ນົດ​ກ່ຽວ​ກັບ​ການ​ລົງ​ວິ­ໄນ​ຕໍ່​ຜູ້​ທີ່​ພະ­ຍາ­ຍາມ​ເຊື່ອງ­ອຳ ຫຼື ແຈ້ງ​ຂີ້​ຕົວະ​ກ່ຽວ​ກັບ​ຊັບ​ສິນ​ຂອງ​ຕົນ ທ່ານ​ນາງ ເລ​ທິ​ຫງ່າ ປະ­ທານ​ກຳ­ມາ​ທິ​ການ​ຍຸ­ຕິ​ທຳ ມີ​ຄຳ​ເຫັນ​ກ່ຽວ​ກັບ​ເລື່ອງ​ນີ້​ວ່າ ເຖິງ​ວ່າ​ໃນ​ປີ 2017 ຈຳ­ນວນ​ພະ­ນັກ­ງານ​ແຈ້ງ​ຊັບ​ສິນ​ໄດ້​ເພີ່ມ​ຂຶ້ນ​ຢ່າງ​ຫຼວງ­ຫຼາຍ ແຕ່​ການ​ກວດ­ກາ​ພິ­ສູດ​ຄວາມ​ເປັນ​ຈິງ​ນັ້ນ​ຍັງ​ເຮັດ​ໄດ້​ໜ້ອຍ ຄື​ໃນ​ຈຳ­ນວນ​ແບບ​ຟອມ​ແຈ້ງ​ຊັບ​ສິນ 1,1 ລ້ານ​ຊຸດ​ນັ້ນ ມີ​ພຽງ 77 ຊຸດ​ເທົ່າ​ນັ້ນ ທີ່​ໄດ້​ຮັບ​ການ​ກວດ­ກາ​ຄືນ ແລະ ຍ້ອນ​ແນວ​ນັ້ນ​ເອງ ຈຶ່ງ​ເວົ້າ​ໄດ້​ວ່າ­ການ​ແຈ້ງ​ຊັບ​ສິນ​ນັ້ນ ສ່ວນ​ໃຫຍ່​ຍັງ​ບໍ່​ມີ​ປະ­ສິດ­ທິ­ພາບ​ໃນ​ການ​ຕ້ານ​ການ​ສໍ້​ລາດ​ບັງ​ຫຼວງ (ຂໍ້​ມູນ​ຈາກ​ໜັງ­ສື­ພິມ​ວຽງ​ຈັນ​ທາມ 7 ພະ­ຈິກ 2017).

   ທີ່ ຣັດ​ເຊຍ: ໃນ​ຍຸກ​ດີ​ຈີ​ຕອນ​ອອນ​ລາຍ​ທີ່​ລ້ຳ​ຍຸກ​ຄື​ຊູ່​ມື້­ນີ້ ຜູ້­ນຳ​ຂອງ​ຫຼາຍໆ​ປະ­ເທດ​ໄດ້​ເລືອກ​ໃຊ້​ວິ­ທີ​ພົບ​ປະ​ໂອ້​ລົມ​ກັບ​ປະ­ຊາ­ຊົນ ໂດຍ​ຜ່ານ​ເຄືອ​ຄ່າຍ​ອິນ​ເຕີ​ເນັດ ຕົວ­ຢ່າງ ກໍ​ຄື ຂ່າວ​ຕ່າງ­ປະ­ເທດ​ໃນ​ວັນ​ທີ 24 ເດືອນ​ມິ­ຖຸ­ນາ​ປີ​ນີ້​ທີ່​ບອກ​ວ່າ ທ່ານ ວະ​ລາ​ດີ​ເມຍ ປູ​ຕິນ ປະ­ທາ­ນາ­ທິ­ບໍ­ດີ​ສະ­ຫະ­ພັນ​ຣັດ​ເຊຍ ໄດ້​ພົບ​ປະ​ທາງ​ອອນ​ລາຍ​ກັບ​ປະ­ຊາ­ຊົນ ບົນ​ໜ້າ​ຈໍ​ວີ​ດີ​ໂອ ຄັ້ງ​ວັນ​ທີ 20 ເດືອນ​ມິ­ຖຸ­ນາ​ຜ່ານ​ມາ ກ່ອນ​ໜ້າ​ມີ​ການ​ພົບ​ປະ­ກັນ​ບົນ​ໜ້າ​ຈໍ ປະ­ຊາ­ຊົນ​ໄດ້​ສົ່ງ​ຄຳ​ຖາມ​ຜ່ານ​ເວັບ​ໄຊ Moskva Putinru ຄຳ​ຖາມ​ທີ່​ທ່ານ​ປະ­ທາ­ນາ­ທິ­ບໍ­ດີ ໄດ້​ຮັບ​ໃນ​ປີ​ນີ້​ນັ້ນ ລວມ​ມີ 1.315.763 ຂໍ້​ທີ່​ພົວ­ພັນ​ກັບ​ບັນ­ຫາ​ພາຍ​ໃນ ແລະ ຕ່າງ­ປະ­ເທດ ພາຍ­ຫຼັງ​ພົບ​ປະ​ຕອບ​ຄຳ​ຖາມ​ແລ້ວ ທ່ານ ປູ​ຕິນ ກໍ​ໄດ້​ສັງ​ລວມ​ບັນ­ຫາ​ເປັນ​ແຕ່​ລະ​ປະ­ເພດ ເພື່ອ​ມອບ​ໃຫ້​ຜູ້​ຮັບ­ຜິດ­ຊອບ​ສະ­ເພາະ​ແກ້​ໄຂ​ໃຫ້​ທັນ​ກັບ​ກຳ­ນົດ​ເວ­ລາ.

ຂ່າວທີ່ກ່ຽວຂ້ອງ