ຂ່າວຫຼ້າສຸດ

ສືບຕໍ່ຢຶດໝັ້ນແນວທາງການຕ່າງປະເທດ ແລະ ການຮ່ວມມືສະເໝີຕົ້ນສະເໝີປາຍ

917 16 ທ.ວ. 2019 ຂ່າວໜ້າ​ໜຶ່ງ
ສືບຕໍ່ຢຶດໝັ້ນແນວທາງການຕ່າງປະເທດ ແລະ ການຮ່ວມມືສະເໝີຕົ້ນສະເໝີປາຍ

    ກອງ​ປະ­ຊຸມ​ວຽກ​ງານ​ການ​ຕ່າງ­ປະ­ເທດ ຄັ້ງ​ທີ XIV ພາຍ​ໃຕ້​ຄຳ​ຂວັນ “ການ​ທູດ​ປ້ອງ​ກັນ​ເຫດ ແລະ ບຸກ​ທະ­ລຸ ເພື່ອ​ພາ­ລະ­ກິດ​ປົກ​ປັກ​ຮັກ­ສາ ແລະ ສ້າງ­ສາ​ພັດ­ທະ­ນາ​ປະ­ເທດ​ຊາດ” ແລະ “ເພີ່ມ​ທະ­ວີ​ປະ​ສິດ­ທິ​ຜົນ​ການ­ຈັດ­ຕັ້ງ​ປະ­ຕິ­ບັດ​ຜົນ​ການ­ເຄື່ອນ­ໄຫວ​ການ​ຕ່າງ­ປະ­ເທດ​ໃຫ້​ປາ­ກົດ​ຜົນ​ເປັນ​ຮູບ​ປະ​ທຳ” ອັດ​ລົງ​ດ້ວຍ​ຜົນ­ສຳ­ເລັດ​ອັນ​ຈົບ­ງາມ​ໃນ​ວັນ​ທີ 13 ທັນ­ວາ 2019 ຢູ່​ສູນ​ຮ່ວມ​ມື​ສາ­ກົນ ແລະ ການ​ເຝິກ­ອົບ­ຮົມ (ICTC) ໂດຍ​ເປັນ​ປະ­ທານ​ຂອງ​ທ່ານ ສະ­ເຫຼີມ​ໄຊ ກົມ​ມະ​ສິດ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ມີ​ທ່ານ ບຸນ​ຍັງ ວໍ­ລະ​ຈິດ ປະ­ທານ​ປະ­ເທດ ພ້ອມ​ດ້ວຍ​ທ່ານ​ຮອງ​ນາ­ຍົກ­ລັດ­ຖະ­ມົນ­ຕີ ບັນ­ດາ​ລັດ­ຖະ­ມົນ­ຕີ ແຂວງ ແລະ ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ

    ທ່ານ ສະ­ເຫຼີມ​ໄຊ ກົມ​ມະ​ສິດ ກ່າວ​ວ່າ: ກອງ​ປະ­ຊຸມ​ວຽກ​ງານ​ຕ່າງ­ປະ­ເທດ ຈັດ​ຂຶ້ນ​ແຕ່​ວັນ​ທີ 5 ທັນ­ວາ 2019 ເປັນ­ຕົ້ນ​ມາ ເຊິ່ງ​ໄດ້​ຈັດ​ເປັນ​ຫຼາຍ​ລະ­ດັບ ຄື: ກອງ​ປະ­ຊຸມ​ພາຍ​ໃນ​ກະ­ຊວງ​ການ​ຕ່າງ­ປະ­ເທດ ກອງ​ປະ­ຊຸມ​ເວ­ທີ​ປຶກ­ສາ​ຫາ­ລື​ຮ່ວມ​ກັບ​ພາກ​ທຸ­ລະ​ກິດ ຄັ້ງ​ທີ I ຫົວ­ຂໍ້ “ເພີ່ມ​ທະ­ວີ​ການ­ເຄື່ອນ­ໄຫວ​ການ​ທູດ​ຕິດ​ພັນ​ກັບ​ການ​ພັດ­ທະ­ນາ​ເສດ­ຖະ­ກິດ​ຂອງ ສປປ ລາວ ໃນ​ໄລ­ຍະ​ໃໝ່” ກອງ​ປະ­ຊຸມ​ລະ­ດັບ​ວິ­ຊາ​ການ ກອງ​ປະ­ຊຸມ​ປຶກ­ສາ​ຫາ­ລື​ກັບ​ບັນ­ດາ​ພະ­ແນກ­ການ​ຕ່າງ­ປະ­ເທດ ຫ້ອງ​ວ່າ­ການ​ປົກ­ຄອງ​ແຂວງ  ນະ­ຄອນ­ຫຼວງ ແລະ ກອງ​ປະ­ຊຸມ​ທາງ​ການ ໂດຍ​ໄດ້​ສຸມ​ໃສ່​ປຶກ­ສາ​ຫາ­ລື ແລະ ແລກ­ປ່ຽນ​ຄຳ​ຄິດ​ເຫັນ​ໃສ່​ຜົນ­ສຳ­ເລັດ ແລະ ຂໍ້­ຄົງ­ຄ້າງ​ໃນ​ດ້ານ​ຕ່າງໆ ພ້ອມ​ທັງ​ເປັນ​ເອ­ກະ​ພາບ​ຕໍ່​ທິດ​ທາງ​ແຜນ­ການ­ເຄື່ອນ­ໄຫວ​ວຽກ​ງານ​ການ​ຕ່າງ­ປະ­ເທດ​ໃນ­ຕໍ່­ໜ້າ ໂດຍ​ສືບ­ຕໍ່​ຢຶດ​ໝັ້ນ​ແນວ­ທາງ​ການ​ຕ່າງ­ປະ­ເທດ​ຂອງ​ພັກ ຫັນ​ການ​ພົວ­ພັນ​ຮ່ວມ​ມື​ກັບ​ເປົ້າ​ໝາຍ​ຕ່າງໆ​ໃຫ້​ເຂົ້າ​ສູ່​ລວງ​ເລິກ ແລະ ມີ​ປະ​ສິດ­ທິ​ຜົນ​ກວ່າ​ເກົ່າ ຄົ້ນ­ຄວ້າ​ສ້າງ​ແຜນ​ຍຸດ​ທະ​ສາດ ແລະ ຍຸດ​ໂທ​ບາຍ​ການ​ຕ່າງ­ປະ­ເທດ​ຂອງ ສປປ ລາວ ນອກ​ນີ້ ກະ­ຊວງ​ການ​ຕ່າງ­ປະ­ເທດ​ຍັງ​ໄດ້​ຄົ້ນ­ຄວ້າ​ສ້າງ 5 ແຜນ​ງານ 41 ໂຄງ­ການ ສຳ­ລັບ​ປີ 2020-2021 ເພື່ອ​ຜັນ​ຂະ­ຫຍາຍ​ບັນ­ດາ​ທິດ​ທາງ​ແຜນ­ການ​ເປັນ​ອັນ​ລະ­ອຽດ ເພື່ອ​ຈັດ​ຕັ້ງ​ປະ­ຕິ­ບັດ​ໃຫ້​ເກີດ​ຜົນ​ເປັນ​ຮູບ​ປະ​ທຳ ແລະ ການ​ສືບ­ຕໍ່​ບຸກ​ທະ­ລຸ​ດ້ານ​ຈິນ­ຕະ­ນາ­ການ​ຢ່າງ​ແຂງ­ແຮງ​ໃນ​ວຽກ​ງານ​ການ​ຕ່າງ­ປະ­ເທດ ໄລ­ຍະ 2021-2025 ຍົກ​ສູງ​ຄຸນ​ນະ​ພາບ​ການ​ເປັນ​ເສ­ນາ​ທິ​ການ​ດ້ານ​ການ​ຕ່າງ­ປະ­ເທດ​ໃຫ້​ຂັ້ນ​ເທິງ ແລະ ບັນ­ຫາ​ອື່ນໆ​ທີ່​ກ່ຽວ­ຂ້ອງ.

    ທ່ານ ບຸນ​ຍັງ ວໍ­ລະ​ຈິດ ໄດ້​ສະ­ແດງ​ຄວາມ​ຊົມ­ເຊີຍ​ຕໍ່​ຜົນ­ສຳ­ເລັດ​ທີ່​ຂະ­ແໜງ­ການ​ຕ່າງ­ປະ­ເທດ​ຍາດ​ມາ​ໄດ້​ໃນ 3 ປີ­ຜ່ານ­ມາ ແລະ ຊົມ­ເຊີຍ​ແນວ​ຄວາມ​ຄິດ​ລິ​ເລີ່ມ​ຈັດ​ກອງ​ປະ­ຊຸມ​ເວ­ທີ​ປຶກ­ສາ​ຫາ­ລື​ຮ່ວມ​ກັບ​ພາກ​ທຸ­ລະ​ກິດ ເພື່ອ​ເພີ່ມ​ທະ­ວີ​ການ­ເຄື່ອນ­ໄຫວ​ການ​ທູດ ຕິດ​ພັນ​ກັບ​ການ​ພັດ­ທະ­ນາ​ເສດ­ຖະ­ກິດ​ຂອງ​ປະ­ເທດ ພ້ອມ​ທັງ​ໄດ້​ເນັ້ນ​ໃຫ້​ຂະ ແໜງ​ການ​ຕ່າງ­ປະ­ເທດ ສືບ­ຕໍ່​ຢຶດ​ໝັ້ນ​ແນວ­ທາງ​ການ​ຕ່າງ­ປະ­ເທດ ສັນ­ຕິ­ພາບ ເອ­ກະ­ລາດ ມິດ­ຕະ­ພາບ ແລະ ການ​ຮ່ວມ​ມື​ຢ່າງ​ສະ­ເໝີ​ຕົ້ນ​ສະ­ເໝີ​ປາຍ ເປັນ​ເຈົ້າ​ການ​ສົ່ງ­ເສີມ​ການ​ພົວ­ພັນ​ຮ່ວມ​ມື​ກັບ​ຕ່າງ­ປະ­ເທດ​ແບບ​ຫຼາຍ​ທິດ ຫຼາຍ​ຝ່າຍ ຫຼາຍ​ລະ­ດັບ ແລະ ຫຼາຍ​ຮູບ​ແບບ ບົນ​ພື້ນ­ຖານ​ຫຼັກ­ການ​ເຄົາ­ລົບ​ເຊິ່ງ​ກັນ ແລະ ກັນ ຕ່າງ​ຝ່າຍ​ຕ່າງ​ມີ​ຜົນ​ປະ­ໂຫຍດ ເພີ່ມ​ທະ­ວີ​ຈັດ​ຕັ້ງ​ປະ­ຕິ­ບັດ​ຍຸດ​ທະ​ສາດ​ເພີ່ມ​ມິດ​ຫຼຸດ­ຜ່ອນ​ສັດ­ຕູ ໂດຍ​ມີ​ການ​ພົວ­ພັນ​ຮ່ວມ​ມື​ກັບ​ທູດ​ປະ­ເທດ​ເພື່ອນ​ມິດ​ໃຫ້​ມີ​ຄວາມ​ສະ­ໜິດ​ແໜ້ນ ແລະ ຍາດ​ແຍ່ງ​ເອົາ​ການ​ຊ່ວຍ­ເຫຼືອ​ສະ­ໜັບ­ສະ­ໜູນ​ຈາກ​ຕ່າງ­ປະ­ເທດ ຈັດ​ຕັ້ງ​ຜັນ​ຂະ­ຫຍາຍ​ຂໍ້​ຕົກ­ລົງ​ຕ່າງໆ​ທີ່​ໄດ້​ເຊັນ​ຂໍ້​ຕົກ­ລົງ​ກັບ​ບັນ­ດາ​ປະ­ເທດ​ໃຫ້​ມີ​ໝາກ­ຜົນ ເສີມ​ຂະ­ຫຍາຍ​ວຽກ​ງານ​ການ​ຕ່າງ­ປະ­ເທດ​ໃຫ້​ກວ້າງ­ຂວາງ ເພີ່ມ​ທະ­ວີ​ການ​ພົວ­ພັນ​ຮ່ວມ​ມື​ກັບ​ປະ­ເທດ​ເພື່ອນ​ມິດ​ຍຸດ​ທະ​ສາດ ໂດຍ​ສະ­ເພາະ ສສ ຫວຽດ­ນາມ ແລະ ເສີມ​ຂະ­ຫຍາຍ​ຍຸດ​ທະ​ສາດ​ການ​ຮ່ວມ​ມື​ໃຫ້​ໝັ້ນ­ຄົງ​ຍາວ​ນາມ ລະ­ຫວ່າງ ລາວ-ຈີນ ຕາມ​ທິດ 4 ດີ ໃຫ້​ເກີດ​ດອກ​ອອກ​ຜົນ ເພີ່ມ​ທະ­ວີ​ການ­ເຄື່ອນ­ໄຫວ​ໃນ​ອາ​ຊຽນ ແລະ ຍົກ​ລະ­ດັບ​ການ​ຮ່ວມ​ມື​ກັບ​ປະ­ເທດ​ເພື່ອນ​ມິດ ເປັນ­ຕົ້ນ ດ້ານ​ການ­ເມືອງ ເສດ­ຖະ­ກິດ-ສັງ­ຄົມ ສູ້​ຊົນ​ແກ້​ໄຂ​ບັນ­ຫາ​ຊາຍ​ແດນ​ກັບ​ປະ­ເທດ​ໃກ້​ຄຽງ ດ້ວຍ​ສັນ­ຕິ​ວິ­ທີ ສືບ­ຕໍ່​ວຽກ​ງານ​ປັກ​ຫຼັກ​ໝາຍ​ໃຫ້​ສຳ­ເລັດ ແລະ ສ້າງ​ຊາຍ​ແດນ​ແຫ່ງ​ມິດ­ຕະ­ພາບ ແລະ ການ​ຮ່ວມ​ມື ສືບ­ຕໍ່​ຜັນ​ຂະ­ຫຍາຍ​ຄຳ​ຂວັນ​ການ​ທູດ​ປ້ອງ​ກັນ​ເຫດ ແລະ ບຸກ​ທະ­ລຸ ເພື່ອ​ປົກ​ປັກ​ຮັກ­ສາ ແລະ ພັດ­ທະ­ນາ​ປະ­ເທດ​ຊາດ.

ຂ່າວທີ່ກ່ຽວຂ້ອງ