ຂ່າວຫຼ້າສຸດ

ຍີ່ປຸ່ນ ໃຫ້ທຶນຊ່ວຍເຫຼືອວຽກງານເກັບກູ້ລະເບີດ ຢູ່ແຂວງຊຽງຂວາງ

751 16 ທ.ວ. 2019 ຂ່າວໜ້າ​ໜຶ່ງ

   ລັດ­ຖະ­ບານ​ຍີ່­ປຸ່ນ ໃຫ້­ການ​ສະ­ໜັບ­ສະ­ໜູນ​ທຶນ 746.128 ໂດ​ລາ​ສະ­ຫະ­ລັດ ຫຼື ປະ­ມານ 600 ລ້ານ​ກີບ ເພື່ອ​ສະ­ໜັບ­ສະ­ໜູນ​ໂຄງ­ການ​ສົ່ງ­ເສີມ​ການ​ນຳ​ໃຊ້​ເຄື່ອງ​ຈັກ​ທຳ­ລາຍ​ລະ­ເບີດ​ລູກ​ຫວ່ານ​ຢູ່​ແຂວງ​ຊຽງ​ຂວາງ ເຊິ່ງ​ພິ­ທີ​ລົງ​ນາມ​ຮັບ​ເອົາ​ການ​ຊ່ວຍ­ເຫຼືອ​ຄັ້ງ​ນີ້ ຈັດ​ຂຶ້ນ​ວັນ​ທີ 11 ທັນ­ວາ 2019 ຢູ່​ສະ­ຖານ­ທູດ​ຍີ່­ປຸ່ນ ປະ­ຈຳ​ລາວ ລະ­ຫວ່າງ​ທ່ານ ທາ​ເກ​ວາ​ກະ ເຄ​ໂຊ ເອກ​ອັກ­ຄະ­ລາ­ຊະ­ທູດ​ຍີ່­ປຸ່ນ ປະ­ຈຳ​ລາວ ແລະ ທ່ານ ໂດ​ໂກະ ທາ​ກາ​ຮິ​ຊະ ຮອງ​ປະ­ທານ​ອົງ­ການ JMAS ອົງ­ການ​ບໍ່​ສະ­ແຫວງ­ຫາ​ຜົນ​ກຳ­ໄລ ທີ່​ໄດ້​ລິ​ເລີ່ມ ແລະ ຄຸ້ມ​ຄອງ​ໂຄງ­ການ​ດັ່ງ­ກ່າວ ເຊິ່ງ​ການ​ລົງ​ນາມ​ສັນ­ຍາ​ຄັ້ງ​ນີ້ ຈະ​ໃຫ້​ທຶນ​ສະ­ໜັບ­ສະ­ໜູນ​ກິດ­ຈະ­ກຳ​ໃນ​ປີ​ທຳ​ອິດ​ຂອງ​ໂຄງ­ການ​ທີ່​ມີ​ອາ­ຍຸ 3 ປີ ເຊິ່ງ​ມີ​ຊື່­ວ່າ: “ໂຄງ­ການ​ເກັບ​ກູ້​ລະ­ເບີດ​ທີ່​ແຂວງ​ຊຽງ​ຂວາງ”.

   ໂຄງ­ການ​ນີ້ ມີ​ເປົ້າ​ໝາຍ​ເລັ່ງ​ລັດ​ການ​ເກັບ​ກູ້​ລະ­ເບີດ​ຢ່າງ​ປອດ​ໄພ​ ໃນ​ພື້ນ​ທີ່​ມີ​ລະ­ເບີດ​ຢູ່​ແຂວງ​ຊຽງ​ຂວາງ ລວມ​ເຖິງ​ການ​ສົ່ງ­ເສີມ​ການ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ ​ໃຫ້​ສາ­ມາດ​ຈັດ­ການ ແລະ ສອນ​ການ​ນຳ​ໃຊ້​ເຕັກ​ໂນ​ໂລ​ຊີ​ເຄື່ອງ​ຈັກ​ປະ­ມວນ​ຫາ​ລະ­ເບີດ ເຊິ່ງ​ເປັນ​ໜ້າ­ທີ່​ຂອງ​ອົງ­ການ​ຈາກ​ລັດ­ຖະ­ບານ​ລາວ​ທີ່​ຈະ​ຕ້ອງ​ເກັບ​ກູ້​ລະ­ເບີດ​ເຫຼົ່າ​ນີ້ ອົງ­ການ JMAS ຈະ​ຈັດ​ຕັ້ງ​ປະ­ຕິ­ບັດ​ການ​ເກັບ​ກູ້​ລະ­ເບີດ​ໃນ​ພື້ນ​ທີ່​ມີ​ລະ­ເບີດ ຢູ່​ເມືອງ​ແປກ ເມືອງ​ຄຳ ແລະ ເມືອງ​ພູ​ກູດ ແຂວງ​ຊຽງ​ຂວາງ ເຊິ່ງ​ກຳ­ລັງ​ສຸມ​ໃສ່​ການ​ເກັບ​ກູ້​ຢູ່​ເຂດ​ທີ່​ດິນ​ປູກ­ຝັງ ໂດຍ​ຜ່ານ​ມາດ­ຕະ­ຖານ​ຂັ້ນ​ຕອນ​ການ​ປະ­ຕິ­ບັດ​ງານ (SOPs) ເຊິ່ງ​ໄດ້​ຮັບ​ການ​ພັດ­ທະ­ນາ ຜ່ານ​ການ​ປະ­ຕິ­ບັດ​ທາງ​ກົນ​ຈັກ ທີ່​ໄດ້​ຮັບ​ການ­ຈັດ­ຕັ້ງ​ພາຍ​ໃຕ້​ການ​ຮ່ວມ​ມື​ກັບ​ອົງ­ການ UXO ລາວ.

   ອົງ­ການ JMAS ໄດ້​ປະ­ກອບ­ສ່ວນ​ໃນ​ວຽກ​ງານ​ເກັບ​ກູ້​ລະ­ເບີດ​ບໍ່​ທັນ​ແຕກ​ທີ່ ສປປ ລາວ ຢ່າງ​ຫ້າວ­ຫັນ​ເປັນ​ເວ­ລາ​ຫຼາຍ​ປີ ເປັນ­ຕົ້ນ ຢູ່​ແຂວງ​ຊຽງ​ຂວາງ ສາ­ລະ​ວັນ ອັດ​ຕະ​ປື ແລະ ຈຳ­ປາ​ສັກ ລວມ​ເຖິງ​ນະ­ຄອນ­ຫຼວງ​ວຽງ​ຈັນ.

ຂ່າວທີ່ກ່ຽວຂ້ອງ