ຂ່າວຫຼ້າສຸດ

ສ້າງເງື່ອນໄຂໃຫ້ຫົວໜ່ວຍທຸລະກິດແຜ່ນແພ ມີຕະຫຼາດສົ່ງອອກສິນຄ້າ

647 16 ທ.ວ. 2019 ຂ່າວໜ້າ​ໜຶ່ງ

    ພິ­ທີ​ລົງ​ນາມ​ບົດ​ບັນ­ທຶກ​ຄວາມ​ເຂົ້າ­ໃຈ​ໂຄງ­ການ​ສົ່ງ­ເສີມ​ແຜ່ນ­ແພ​ລາວ ອອກ​ສູ່​ຕະ­ຫຼາດ​ເອີ​ຣົບ ຈັດ​ຂຶ້ນ​ວັນ​ທີ 11 ທັນ­ວາ 2019 ຢູ່​ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ​ລາວ ລະ­ຫວ່າງ​ທ່ານ ໄຊ​ສົມ​ເພັດ ນໍ​ຣະ​ສິງ ຫົວ­ໜ້າ​ກົມ​ສົ່ງ­ເສີມ​ການ​ຄ້າ ທ່ານ ຫານ​ຊະ­ນະ ສີ​ສານ ປະ­ທານ​ສະ­ມາ­ຄົມ​ຫັດ­ຖະ­ກຳ​ລາວ ແລະ ທ່ານ​ນາງ ແຟມ​ເກ ລອດ​ເກີ​ຣິງ ຜູ້​ຈັດ­ການ​ໂຄງ­ການ​ສົ່ງ­ເສີມ​ແຜ່ນ­ແພ​ລາວ ອອກ​ສູ່​ຕະ­ຫຼາດ​ເອີ​ຣົບ (CBI) ມີ​ທ່ານ ພັນ​ທອງ ພິດ​ທຸມ­ມາ ຮອງ​ລັດ­ຖະ­ມົນ­ຕີ​ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

    ໂຄງ­ການ​ຮ່ວມ​ມື​ລະ­ຫວ່າງ​ສະ­ມາ­ຄົມ​ຫັດ­ຖະ­ກຳ​ລາວ ແລະ ສູນ​ສົ່ງ­ເສີມ​ການ​ນຳ​ເຂົ້າ​ສິນ­ຄ້າ​ຈາກ​ບັນ ດາ​ປະ­ເທດ​ກຳ­ລັງ​ພັດ­ທະ­ນາ​ຂອງ​ປະ­ເທດ​ໂຮນ​ລັງ ເລີ່ມ​ຈັດ​ຕັ້ງ​ປະ­ຕິ­ບັດ​ແຕ່​ປີ 2016 ເປັນ­ຕົ້ນ​ມາ ພາຍ­ຫຼັງ​ທີ່ CBI ໄດ້​ຮ່ວມ​ເຮັດ​ວຽກ​ກັບ​ປະ­ເທດ​ມຽນ​ມາ ກຳ­ປູ­ເຈຍ ແລະ ຫວຽດ­ນາມ ໂດຍ​ເບື້ອງ​ຕົ້ນ​ສະ­ມາ­ຄົມ​ຫັດ­ຖະ ກຳ​ລາວ​ໄດ້​ເຊີນ​ຜູ້­ຕາງ­ໜ້າ​ຈາກ CBI ມາ​ຢ້ຽມ​ຊົມ​ງານ​ມະ​ຫະ​ກຳ​ສີ­ມື​ຫັດ­ຖະ­ກຳ​ລາວ ເຊິ່ງ CBI ໄດ້​ເຫັນ​ຄວາມ​ຫຼາຍ​ຫຼາຍ​ຂອງ​ສິນ­ຄ້າ​ຫັດ­ຖະ­ກຳ​ລາວ ມີ​ຄວາມ​ປາ­ນີດ ແລະ ມີ​ຄວາມ​ເປັນ​ເອ­ກະ­ລັກ ຈຶ່ງ​ເລືອກ​ເອົາ​ຂະ­ແໜງ​ຫັດ­ຖະ­ກຳ​ລາວ​ເປັນ​ຕົວ​ແບບ​ເພື່ອ​ສ້າງ​ໂຄງ­ການ​ຮ່ວມ​ມື​ກັນ ແລະ ພ້ອມ​ທັງ​ໄດ້​ຈັດ​ເຝິກ­ອົບ­ຮົມ​ໃຫ້​ສະ­ມາ­ຊິກ​ສະ­ມາ­ຄົມ​ຫັດ­ຖະ­ກຳ​ລາວ ປີ 2017 CBI ເລືອກ​ເອົາ 5 ໃນ 12 ຫົວ­ໜ່ວຍ​ຫັດ­ຖະ­ກຳ​ລາວ ໄປ​ເຂົ້າ​ຮ່ວມ​ງານ​ວາງ­ສະ­ແດງ​ສິນ­ຄ້າ​ຫັດ­ຖະ­ກຳ​ຢູ່​ນະ­ຄອນ​ໂຮ່​ຈີ​ມິງ ສສ ຫວຽດ­ນາມ ແລະ ໄດ້​ນຳ​ເອົາ​ສິນ­ຄ້າ 5 ຫົວ­ໜ່ວຍ​ດັ່ງ­ກ່າວ ໄປ​ວາງ­ສະ­ແດງ​ຢູ່​ເມືອງ​ແຟຣງ​ເຟີດ ປະ­ເທດ ເຢຍ​ລະ​ມັນ.

    ຜ່ານ​ການ​ເຮັດ​ວຽກ​ຮ່ວມ​ກັນ 2 ປີ­ຜ່ານ­ມາ ເຊິ່ງ​ຊ່ຽວ­ຊານ CBI ໄດ້​ເດີນ­ທາງ​ມາ​ລາວ​ຫຼາຍ​ຄັ້ງ ຈຶ່ງ​ເຫັນ​ວ່າ​ຂະ­ແໜງ​ຫັດ­ຖະ­ກຳ​ແຜ່ນ­ແພ​ພື້ນ­ເມືອງ​ຂອງ​ລາວ ມີ​ຄວາມ​ສາ­ມາດ​ສູງ​ໃນ​ການ​ສົ່ງ­ເສີມ​ສິນ­ຄ້າ​ແຜ່ນ­ແພ ເຊິ່ງ​ລວມ​ມີ​ຜ້າ­ໄໝ ຜ້າ​ຝ້າຍ ເຂົ້າ​ໄປ​ຕະ­ຫຼາດ​ເອີ​ຣົບ​ປີ 2018-2019 CBI ຈຶ່ງ​ໄດ້​ສ້າງ​ໂຄງ­ການ Lao Home Textiles ສະ­ເໜີ​ກົມ​ສົ່ງ­ເສີມ​ການ​ຄ້າ ເພື່ອ​ສະ­ເໜີ​ຕໍ່​ລັດ­ຖະ­ບານ​ຂໍ­ອະ­ນຸ­ຍາດ​ໃຫ້​ສ້າງ​ໂຄງ­ການ​ດັ່ງ ກ່າວ​ຢູ່​ລາວ ໂຄງ­ການ​ນີ້​ຈຶ່ງ​ເກີດ​ຂຶ້ນ ໂດຍ 3 ຝ່າຍ​ໄດ້​ລົງ​ນາມ​ບົດ​ບັນ­ທຶກ​ຄວາມ​ເຂົ້າ­ໃຈ​ຮ່ວມ​ກັນ ແລະ ຈະ​ຈັດ​ຕັ້ງ​ປະ­ຕິ­ບັດ​ໂຄງ­ການ​ຮອດ​ປີ 2024 ໂດຍ​ຄັດ​ເລືອກ​ເອົາ 15 ບໍ­ລິ­ສັດ​ທີ່​ມີ​ເງື່ອນ­ໄຂ​ເຂົ້າ​ໂຄງ­ການ​ເພື່ອ​ເປັນ​ແບບ­ຢ່າງ​ເບື້ອງ​ຕົ້ນ ແລະ ຈະ​ໄດ້​ຂະ­ຫຍາຍ​ຕໍ່​ໄປ ໂດຍ​ໂຄງ­ການ​ຈະ​ໃຫ້­ການ​ຊ່ວຍ­ເຫຼືອ​ດ້ານ​ວິ­ຊາ​ການ​ໃຫ້​ບັນ­ດາ​ບໍ­ລິ­ສັດ​ໃນ​ການ​ສົ່ງ​ອອກ ຊ່ວຍ​ພັດ­ທະ­ນາ​ອົງ​ກອນ ແລະ ການ­ຈັດ­ຕັ້ງ ໂດຍ​ຈະ​ຮ່ວມ​ກັບ​ກົມ​ສົ່ງ ເສີມ​ການ​ຄ້າ ແລະ ສະ­ມາ­ຄົມ​ຫັດ­ຖະ­ກຳ​ລາວ​ຢ່າງ​ໃກ້­ຊິດ ເພື່ອ​ເຮັດ​ໃຫ້​ສິນ­ຄ້າ​ຂອງ​ລາວ ເປັນ​ທີ່​ຮູ້­ຈັກ​ຂອງ​ສັມ​ຄົມ​ທັງ​ພາຍ​ໃນ ແລະ ຕ່າງ­ປະ­ເທດ ໂດຍ​ສະ­ເພາະ​ໃຫ້​ມີ​ຕະ­ຫຼາດ​ສົ່ງ​ອອກ​ຕ່າງ­ປະ­ເທດ ເພື່ອ​ສ້າງ​ລາຍ​ຮັບ​ໃຫ້​ຫົວ­ໜ່ວຍ​ທຸ­ລະ​ກິດ​ລາວ​ນັບ​ມື້​ຫຼາຍ​ຂຶ້ນ.

ຂ່າວທີ່ກ່ຽວຂ້ອງ