ຂ່າວຫຼ້າສຸດ

ສຶກສາຄວາມເປັນໄປໄດ້ການຄົ້ນຄວ້າ ແລະ ພັດທະນາລະບົບເຕັກໂນໂລຊີ BIG DATA

668 16 ທ.ວ. 2019 ຂ່າວໜ້າ​ໜຶ່ງ

    ພິ­ທີ​ລົງ​ນາມ​ບົດ​ບັນ­ທຶກ​ຄວາມ​ເຂົ້າ­ໃຈ​ການ​ສຶກ​ສາ​ຄວາມ​ເປັນ​ໄປ​ໄດ້​ໃນ​ການ​ຄົ້ນ­ຄວ້າ ແລະ ພັດ­ທະ­ນາ​ລະ­ບົບ​ເຕັກ​ໂນ​ໂລ​ຊີ​ຖານ​ຂໍ້​ມູນ​ໃຫຍ່ (BIG DATA) ເພື່ອ​ຄຸ້ມ​ຄອງ​ແຮງ​ງານ ຈັດ​ຂຶ້ນ​ວັນ​ທີ 10 ທັນ­ວາ 2019 ຢູ່​ນະ­ຄອນ­ຫຼວງ​ວຽງ​ຈັນ ລະ­ຫວ່າງ​ທ່ານ ຄຳ​ເພັດ ວົງ​ດາ­ລາ ຫົວ­ໜ້າ​ກົມ​ແຜນ­ການ ແລະ ການ​ຮ່ວມ​ມື ກະ­ຊວງ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ (ກວ​ຕ) ທ່ານ Dae-Young KIM ຜູ້​ອຳ​ນວນ​ການ​ບໍ­ລິ­ສັດ POSCO INTERNATIONAL Corporation ແລະ ທ່ານ Jeong-Hoon OH ປະ­ທານ​ບໍ­ລິ­ສັດ PENTAGATE CO., Ltd ໂດຍ​ມີ​ທ່ານ ບໍ່​ວຽງ​ຄຳ ວົງ​ດາ­ລາ ລັດ­ຖະ­ມົນ­ຕີ ກວ​ຕ ແລະ ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

    ເພື່ອ​ຮ່ວມ​ມື​ກັນ​ສຶກ​ສາ​ຄວາມ​ເປັນ​ໄປ​ໄດ້​ໃນ​ການ​ຄົ້ນ­ຄວ້າ ແລະ ພັດ­ທະ­ນາ ລະ­ບົບ​ເຕັກ​ໂນ​ໂລ​ຊີ BIG DATA ເພື່ອ​ຊ່ວຍ​ໃນ​ການ​ຄຸ້ມ​ຄອງ​ແຮງ​ງານ​ຕ່າງ­ປະ­ເທດ ທີ່​ມາ​ເຮັດ​ວຽກ​ຢູ່ ສປປ ລາວ ແລະ ຄົນ​ລາວ ທີ່​ໄປ​ໃຊ້​ແຮງ​ງານ​ໃນ​ຕ່າງ­ປະ­ເທດ ໃນ​ນີ້ ສຸມ​ໃສ່​ດຳ­ເນີນ​ການ​ສຶກ​ສາ​ຄວາມ​ເປັນ​ໄປ​ໄດ້​ໃນ​ການ​ຄົ້ນ­ຄວ້າ ແລະ ພັດ ທະ​ນາ​ເຕັກ​ໂນ​ໂລ​ຊີ ລະ­ບົບ BIG DATA ເພື່ອ​ສົ່ງ­ເສີມ ແລະ ພັດ­ທະ­ນາ​ການ​ຄຸ້ມ​ຄອງ​ແຮງ​ງານ​ໃນ ສປປ ລາວ ນຳ​ຂໍ້​ສະ­ເໜີ​ຕ່າງໆ​ຈາກ​ຜົນ​ຂອງ​ການ​ສຶກ​ສາ​ຄວາມ​ເປັນ​ໄປ​ໄດ້​ລາຍ​ງານ​ໃຫ້ ກວ​ຕ ເພື່ອ​ສົ່ງ­ເສີມ​ການ​ນຳ​ໃຊ້​ເຕັກ​ໂນ​ໂລ​ຊີ ທີ່​ເໝາະ​ສົມ ໃນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ໃນ ສປປ ລາວ ແລະ ຄົ້ນ­ຄວ້າ​ຂອບ​ເຂດ​ອື່ນໆ ທີ່​ບັນ­ດາ​ຝ່າຍ​ມີ​ຄວາມ​ສົນ­ໃຈ​ພັດ­ທະ­ນາ​ຮ່ວມ​ກັນ.

    ທ່ານ ຄຳ​ເພັດ ວົງ​ດາ­ລາ ກ່າວ​ວ່າ: ອີງ​ຕາມ​ຄວາມ​ຕ້ອງ­ການ​ໃນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ ສປປ ລາວ ຈຳ­ເປັນ​ຕ້ອງ​ໄດ້​ມີ​ການ​ນຳ​ໃຊ້ ແລະ ການ​ພັດ­ທະ­ນາ​ເຕັກ​ໂນ​ໂລ​ຊີ ເພື່ອ​ຍົກ​ສູງ​ລະ­ດັບ​ຄວາມ​ຮູ້-ຄວາມ​ສາ­ມາດ​ໃຫ້​ນັບ​ມື້​ນັບ​ສູງ​ຂຶ້ນ ປັດ­ຈຸ­ບັນ ວຽກ​ງານ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ນັບ​ມື້​ພັດ­ທະ­ນາ​ກ້າວ​ໄກ ໂດຍ​ສະ­ເພາະ​ເຕັກ​ໂນ​ໂລ​ຊີ​ກ່ຽວ​ກັບ BIG DATA ເຊິ່ງ​ການ​ຮ່ວມ​ມື​ຄັ້ງ​ນີ້ ເປັນ​ໂອ­ກາດ​ທີ່​ດີ​ເພື່ອ​ຈະ​ໄດ້​ຮ່ວມ​ກັນ​ພັດ­ທະ­ນາ ແລະ ເຮັດ​ການ​ສຶກ​ສາ​ຄົ້ນ­ຄວ້າ ພັດ­ທະ­ນາ​ການ​ນຳ​ໃຊ້ ເຕັກ​ໂນ​ໂລ​ຊີ Data science ແລະ Big data ເພື່ອ​ຊ່ວຍ​ໃນ​ການ​ຄຸ້ມ​ຄອງ ແຮງ​ງານ​ຕ່າງ­ປະ­ເທດ ທີ່​ມາ​ເຮັດ​ວຽກ​ຢູ່ ສປປ ລາວ ແລະ ຄົນ​ລາວ ທີ່​ໄປ​ໃຊ້​ແຮງ​ງານ​ໃນ​ຕ່າງ­ປະ­ເທດ ຮ່ວມ​ກັນ​ຄົ້ນ­ຄວ້າ​ດ້ານ​ເຕັກ​ໂນ​ໂລ​ຊີ​ໃໝ່ໆ ຍົກ​ລະ­ດັບ​ຄວາມ​ຮູ້​ດ້ານ​ວິ ຊາ​ການ​ໃຫ້​ພະ­ນັກ­ງານ ນັກ​ຄົ້ນ­ຄວ້າ ປະ­ກອບ­ສ່ວນ​ໃນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ເວົ້າ​ສະ­ເພາະ ການ​ຍົກ​ສູງ​ໃນ​ການ​ນຳ​ໃຊ້​ວຽກ​ງານ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ໃນ​ການ​ຄົ້ນ­ຄວ້າ​ພັດ­ທະ­ນາ ຊຸກ­ຍູ້-ສົ່ງ­ເສີມ​ການ​ພັດ­ທະ­ນາ​ເສດ­ຖະ­ກິດ​ຂອງ​ຊາດ ເປັນ​ການ​ແລກ­ປ່ຽນ​ຂໍ້​ມູນ​ຂ່າວ­ສານ ແລະ ຖ່າຍ​ທອດ​ຄວາມ​ຮູ້​ດ້ານ​ວຽກ​ງານ​ເຕັກ​ໂນ​ໂລ​ຊີ ທີ່​ທັນ​ສະ­ໄໝ ຂອງ​ສອງ​ຝ່າຍ​ໃນ​ອະ­ນາ­ຄົດ​ໄດ້.

ຂ່າວທີ່ກ່ຽວຂ້ອງ