ເພີ່ມທະວີການເຄື່ອນໄຫວວຽກງານຕ່າງປະເທດ ໃຫ້ເປັນຮູບປະທຳ

1.356 13 ທ.ວ. 2019 ຂ່າວໜ້າ​ໜຶ່ງ
ເພີ່ມທະວີການເຄື່ອນໄຫວວຽກງານຕ່າງປະເທດ ໃຫ້ເປັນຮູບປະທຳ

   ກະ­ຊວງ​ການ​ຕ່າງ­ປະ­ເທດ ຈັດ​ກອງ​ປະ­ຊຸມ​ວຽກ​ງານ​ການ​ຕ່າງ­ປະ­ເທດ ຄັ້ງ​ທີ XIV ພາຍ​ໃຕ້​ຄຳ​ຂວັນ “ການ​ທູດ​ປ້ອງ​ກັນ​ເຫດ ແລະ ບຸກ​ທະ­ລຸ ເພື່ອ​ປົກ​ປັກ​ຮັກ­ສາ ແລະ ສ້າງ­ສາ​ພັດ­ທະ­ນາ​ປະ­ເທດ​ຊາດ ເພີ່ມ​ທະ­ວີ​ປະ­ສິດ­ທິ­ພາບ​ການ­ຈັດ­ຕັ້ງ​ປະ­ຕິ­ບັດ ​ຜົນ​ການ­ເຄື່ອນ­ໄຫວ​ການ​ຕ່າງ­ປະ­ເທດ​ໃຫ້​ປາ­ກົດ​ຜົນ​ເປັນ​ຮູບ​ປະ​ທຳ” ຂຶ້ນ​ວັນ​ທີ 12-13 ທັນ­ວາ 2019 ຢູ່​ສູນ​ຮ່ວມ​ມື​ສາ­ກົນ ແລະ ການ​ເຝີກ​ອົບ­ຮົມ (ICTC) ໂດຍ​ເປັນ​ປະ­ທານ​ຂອງ​ທ່ານ ສະ­ເຫຼີມ​ໄຊ ກົມ​ມະ​ສິດ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ມີ​ທີ່​ປຶກ­ສາ​ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ ບັນ­ດາ​ລັດ­ຖະ­ມົນ­ຕີ ຮອງ​ລັດ­ຖະ­ມົນ­ຕີ ແຂວງ ແລະ ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

   ທ່ານ ສະ­ເຫຼີມ​ໄຊ ກົມ​ມະ​ສິດ ກ່າວ​ວ່າ: ກອງ​ປະ­ຊຸມ​ຄັ້ງ​ນີ້ ເປັນ​ໂອ­ກາດ​ອັນ​ດີ​ທີ່​ຜູ້​ເຂົ້າ​ຮ່ວມ​ຈະ​ໄດ້​ພ້ອມ​ກັນ​ຕີ​ລາ­ຄາ ວິ­ເຄາະ-ວິ­ໄຈ​ຢ່າງ​ເລິກ­ເຊິ່ງ​ຕໍ່​ສະ­ພາບ​ແວດ​ລ້ອມ​ໃນ​ພາກ​ພື້ນ ແລະ ສາ­ກົນ ທີ່​ສົ່ງ​ຜົນ​ກະ­ທົບ​ໂດຍ​ກົງ ແລະ ທາງ​ອ້ອມ​ຕໍ່​ຄວາມ​ໝັ້ນ­ຄົງ ແລະ ການ​ພັດ­ທະ­ນາ​ຂອງ ສປປ ລາວ ທັງ​ເປັນ​ການ​ທົບ​ທວນ­ຄືນ​ຜົນ​ການ­ເຄື່ອນ­ໄຫວ​ວຽກ​ງານ​ການ​ຕ່າງ­ປະ­ເທດ ​ໃນ​ໄລ­ຍະ​ທ້າຍ​ຂອງ​ການ­ຈັດ­ຕັ້ງ​ຜັນ​ຂະຫຍາຍ​ມະ­ຕິ X ຂອງ​ພັກ ກໍ​ຄື​ການ­ຈັດ­ຕັ້ງ​ປະ­ຕິ­ບັດ​ມະ­ຕິ​ຂອງ​ກອງ​ປະ­ຊຸມ​ວຽກ​ງານ​ການ​ຕ່າງ­ປະ­ເທດ ຄັ້ງ​ທີ XIII ປີ 2017-2019 ແລະ ປຶກ­ສາ​ຫາ­ລື​ເພື່ອ​ກຳ­ນົດ​ທິດ​ທາງ​ແຜນ­ການ ແຜນ​ງານ ແລະ ໂຄງການ​ຈຸດ​ສຸມ​ໃນ​ການ­ເຄື່ອນ­ໄຫວ​ວຽກ​ງານ​ການ​ຕ່າງ­ປະ­ເທດ ປີ 2020-2022 ເພື່ອ​ເຮັດ​ໃຫ້­ການ​ເຄື່ອນໄຫວ​ວຽກ​ງານ​ດັ່ງ­ກ່າວ ມີ​ຜົນ­ສຳ­ເລັດ​ໃໝ່​ໃຫຍ່​ຫຼວງ​ກວ່າ​ເກົ່າ ສືບ­ຕໍ່​ປະ­ກອບ­ສ່ວນ​ໃນ​ພາ­ລະ­ກິດ​ປົກ​ປັກ​ຮັກ­ສາ ແລະ ພັດ­ທະ­ນາ​ປະ­ເທດ​ຊາດ ຕາມ​ແນວ­ທາງ​ນະ­ໂຍ­ບາຍ​ຂອງ​ພັກ ແລະ ລັດ­ຖະ­ບານ ທັງ​ເປັນ​ການ​ສ້າງ​ຜົນ­ງານ​ໃໝ່​ຕ້ອນ­ຮັບ​ກອງ​ປະ­ຊຸມ​ໃຫຍ່ ຄັ້ງ​ທີ XI ຂອງ​ພັກ.

   3 ປີ­ຜ່ານ­ມາ ໂດຍ​ຢຶດ​ໝັ້ນ​ແນວ­ທາງ​ການ​ຕ່າງ­ປະ­ເທດ ສັນ­ຕິ­ພາບ ເອ­ກະ­ລາດ ມິດ­ຕະ­ພາບ ແລະ ການ​ຮ່ວມ​ມືອັນ​ສະ­ເໝີ​ຕົ້ນ​ສະ­ເໝີ​ປາຍ​ຂອງ​ພັກ ສາ­ມາດ​ຍາດ​ໄດ້​ຜົນ­ສຳ­ເລັດ​ທີ່​ສຳ­ຄັນ​ໃນ​ຫຼາຍ​ດ້ານ​ຢ່າງ​ເປັນ​ຮູບ​ປະ​ທຳ ອັນ​ພົ້ນ​ເດັ່ນ​ແມ່ນ​ສາ­ມາດ​ປົກ​ປັກ​ຮັກ­ສາ​ອະ­ທິ­ປະ​ໄຕ ແລະ ຜືນ​ແຜ່ນ­ດິນ​ອັນ​ຄົບ​ຖ້ວນ ສ້າງ​ສະ­ພາບ​ແວດ​ລ້ອມ​ທີ່​ອຳ­ນວຍ ແລະ ຍາດ​ແຍ່ງ​ກຳ­ລັງ​ແຮງ​ໃນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ເຮັດ​ໃຫ້​ບົດ­ບາດ ແລະ ຊື່​ສຽງ​ຂອງ ສປປ ລາວ ໄດ້​ຮັບ​ການ​ເຊີດ​ຊູ​ສູງ​ເດັ່ນ​ຂຶ້ນ​ຢູ່​ເວ­ທີ​ພາກ​ພື້ນ ແລະ ສາ­ກົນ ປັດ­ຈຸ­ບັນ ສປປ ລາວ ໄດ້​ມີ​ສາຍ​ພົວ­ພັນ​ການ​ທູດ​ກັບ 143 ປະ­ເທດ​ທົ່ວ​ໂລກ ມີ​ສຳ­ນັກ­ງານ​ຕາງ­ໜ້າ​ການ​ທູດ ສປປ ລາວ ຢູ່​ຕ່າງ­ປະ­ເທດ 40 ແຫ່ງ ໃນ​ນີ້ ມີ​ສະ­ຖານ​ເອກ​ອັກ​ຄະ​ລັດ​ຖະ​ທູດ 26 ແຫ່ງ ສຳ­ນັກ­ງານ​ຜູ້­ຕາງ­ໜ້າ​ຖາ­ວອນ 3 ແຫ່ງ ສະ­ຖານ​ກົງ­ສຸນ​ໃຫຍ່ 10 ແຫ່ງ ຫ້ອງ­ການ​ກົງ​ສູນ 1 ແຫ່ງ.

ຂ່າວທີ່ກ່ຽວຂ້ອງ