ນະຄອນຫຼວງ ເລັ່ງສະໜອງນ້ຳຊົນລະປະທານ ໃຫ້ເນື້ອທີ່ການຜະລິດລະດູແລ້ງຢ່າງພຽງພໍ

1.167 13 ທ.ວ. 2019 ຂ່າວໜ້າ​ໜຶ່ງ
ນະຄອນຫຼວງ ເລັ່ງສະໜອງນ້ຳຊົນລະປະທານ ໃຫ້ເນື້ອທີ່ການຜະລິດລະດູແລ້ງຢ່າງພຽງພໍ

   ປັດ­ຈຸ­ບັນ​ຊາວ​ກະ­ສິ­ກອນ​ເຂດ​ທີ່​ມີ​ເງື່ອນ­ໄຂ ເປັນ­ຕົ້ນ ເຂດ​ທີ່​ມີ​ຊົນ­ລະ­ປະ­ທານ​ໄປ​ຮອດ​ໄປ​ເຖິງ​ໄດ້​ຂຸ້ນ­ຂ້ຽວ​ສຸມ​ໃສ່​ການ​ຜະ­ລິດ​ລະ­ດູ­ແລ້ງ​ສົກ​ປີ 2019-2020 ຢ່າງ​ເປັນ​ຂະ​ບວນ​ຟົດ­ຟື້ນ ໂດຍ​ໄລ­ຍະ​ນີ້​ຂະ­ແໜງ​ຊົນ­ລະ­ປະ­ທານ​ຜູ້​ຮັບ​ຜິດ ຊອບ​ຊົນ­ລະ­ປະ­ທານ​ໄດ້​ເລັ່ງ​ສະ­ໜອງ​ນ້ຳ​ຊົນ­ລະ­ປະ­ທານ​ໃຫ້​ຊາວ­ນາ​ໄດ້​ຕົກ­ກ້າ​ນາ­ແຊງ ເພື່ອ​ໃຫ້​ບັນ­ລຸ​ເນື້ອ­ທີ່​ການ​ຜະ­ລິດ​ທີ່​ວາງ​ໄວ້.

   ທ່ານ ສຸ­ວັນ ຂັນ​ທະ​ວົງ ຮອງ​ຫົວ­ໜ້າ​ຂະ­ແໜງ​ຊົນ­ລະ­ປະ­ທານ  ພະ​ແນກ​ກະ­ສິ­ກຳ ແລະ ປ່າ­ໄມ້ ນະ­ຄອນ­ຫຼວງ​ວຽງ​ຈັນ (ນວ)  ຮັບ­ຜິດ­ຊອບ​ວຽກ​ງານ​ຄຸ້ມ​ຄອງ​ນຳ​ໃຊ້​ຊົນ­ລະ­ປະ­ທານ ໃຫ້​ສຳ­ພາດ​ວັນ​ທີ 11 ທັນ­ວາ 2019 ວ່າ: ທົ່ວ ນວ ມີ​ຊົນ­ລະ­ປະ­ທານ​ທັງ​ໝົດ 84 ແຫ່ງ ມາ​ຮອດ​ປັດ­ຈຸ­ບັນ​ໄດ້​ເປີດ​ນ້ຳ​ຊົນ­ລະ­ປະ­ທານ 32 ສະ­ຖາ­ນີ ສ່ວນ​ທີ່​ຍັງ​ເຫຼືອ​ຈະ​ສືບ­ຕໍ່​ເປີດ​ໃຫ້​ສຳ­ເລັດ​ພາຍ​ໃນ​ເດືອນ​ທັນ­ວາ 2019 ເພື່ອ​ສະ­ໜອງ​ນ້ຳ​ຊົນ­ລະ­ປະ­ທານ​ໃຫ້​ເນື້ອ­ທີ່​ການ​ຜະ­ລິດ​ລະ­ດູ­ແລ້ງ​ປີ​ນີ້ ຕາມ​ແຜນ​ສູ້​ຊົນ​ທີ່​ໄດ້​ສົມ­ທົບ​ກັບ​ຂະ­ແໜງ​ປູກ­ຝັງ​ເນື້ອ­ທີ່​ເຂົ້າ­ນາ­ແຊງ 14.300 ເຮັກ­ຕາ ແລະ ເນື້ອ­ທີ່​ປູກ​ພືດ 1.350 ເຮັກ­ຕາ ເຊິ່ງ​ປີ​ນີ້​ການ​ຜະ­ລິດ​ພົບ​ບັນ­ຫາ​ຍ້ອນ​ແຫຼ່ງ​ນ້ຳ​ທີ່​ນຳ​ໃຊ້​ເຂົ້າ​ໃນ​ການ​ຜະ­ລິດ​ມີ​ນ້ຳ­ຂອງ ແລະ ນ້ຳ​ງື່ມ​ໄດ້​ບົກ​ແຫ້ງ​ໄວ​ຜິດ​ປົກ­ກະ­ຕິ​ກວ່າ​ປີ­ຜ່ານ­ມາ ແຕ່​ເຖິງ​ຢ່າງ­ໃດ​ກໍ​ຕາມ​ຂະ­ແໜງ​ຊົນ­ລະ­ປະ­ທານ ກໍ​ຄື ພະ​ແນກ​ກະ­ສິ­ກຳ ແລະ ປ່າ­ໄມ້ ນວ ກໍ​ບໍ່​ໄດ້​ລົດ​ລະ ໃນ​ເມື່ອ​ມີ​ສະ­ພາບ​ນ້ຳ​ແຫ້ງ­ແລ້ງ​ຄື​ແນວ​ນັ້ນ​ກໍ​ໄດ້​ມີ​ວິ­ທີ​ແກ້​ໄຂ ໂດຍ​ສະ­ເພາະ​ໄດ້​ສົມ­ທົບ​ກັບ​ອຳ­ນາດ​ການ​ປົກ­ຄອງ​ທ້ອງ­ຖິ່ນ ແລະ ປະ­ຊາ­ຊົນ​ກຸ່ມ​ຜູ້­ນຳ​ໃຊ້​ນ້ຳ ລະ­ດົມ​ຊອກ​ທ່າ­ແຮງ​ທາງ​ອອກ​ດ້ວຍ​ການ​ຂຸດ​ເປັນ​ຜົ້ງ​ເກັບ​ນ້ຳ ຕໍ່​ທໍ່​ລົງ​ໄປ​ໃສ່​ໃຫ້​ສາ­ມາດ​ດູດ​ນ້ຳ​ຂຶ້ນ​ມາ​ໄດ້​ຄື​ນ້ຳ​ງື່ມ​ໄດ້​ແກ້​ໄຂ​ແບບ​ນີ້ 3 ສະ­ຖາ­ນີ ຄື ສະ­ຖາ­ນີ​ນາ​ກຸງ-ທົ່ງ​ມັ່ງ ສະ­ຖາ­ນີ​ນາ​ບົງ-ໂຄກ​ສາ ແລະ ສະ­ຖາ­ນີ​ນາ​ພອກ-ດົງ​ບັງ ທີ່​ໄດ້​ຂຸດ​ເປັນ​ຜົ້ງ​ຢູ່​ກາງ​ນ້ຳ​ງື່ມ​ແລ້ວ​ຕໍ່​ທໍ່​ຕໍ່​ສາຍ​ໄຟ­ຟ້າ​ໄປ​ໃສ່ ສາ­ມາດ​ມີ​ຄວາມ​ພ້ອມ​ສະ­ໜອງ​ນ້ຳ​ໃຫ້​ເນື້ອ­ທີ່​ການ​ຜະ­ລິດ​ໄດ້ 100% ສ່ວນ​ນ້ຳ­ຂອງ​ທີ່​ມີ​ການ​ບົກ​ແຫ້ງ​ບໍ່​ຫຼາຍ​ກວ່າ​ນ້ຳ​ງື່ມ ກໍ​ມີ​ການ​ແກ້​ໄຂ​ໃຫ້​ທັນ​ການ​ດ້ວຍ​ການ​ຕໍ່​ທໍ່​ເຫຼັກ​ລົງ​ໄປ​ຫາ​ກາງ​ນ້ຳ­ຂອງ​ສາ­ມາດ​ແກ້​ໄຂ​ໄດ້ ນອກ​ນີ້ ຈັກ­ສູບ­ນ້ຳ 84 ສະ­ຖາ­ນີ​ກໍ​ໄດ້​ມີ​ການ​ກວດ­ກາ​ດ້ານ​ເຕັກ­ນິກ​ທີ່​ຈະ​ຕ້ອງ​ໄດ້​ສ້ອມ­ແປງ​ຈຸດ​ທີ່​ເປ່​ເພ​ມີ 12 ສະ­ຖາ­ນີ ແຕ່​ປັດ­ຈຸ­ບັນ ສາ­ມາດ​ສ້ອມ­ແປງ​ສຳ­ເລັດ 8 ສະ­ຖາ­ນີ ແລະ ຍັງ​ອີກ 4 ສະ­ຖາ­ນີ ຄາດ​ວ່າ​ຈະ​ສ້ອມ­ແປງ​ໃຫ້​ສຳ­ເລັດ​ໃນ​ທ້າຍ​ເດືອນ​ທັນ­ວາ​ນີ້ ເພື່ອ​ສະ­ໜອງ​ນ້ຳ​ໃຫ້​ເນື້ອ­ທີ່​ການ​ຜະ­ລິດ​ໄດ້ 100%.

   ສຳ­ລັບ​ບັນ­ຫາ​ທີ່​ຍັງ​ມີ​ຄວາມ​ຫຍຸ້ງ­ຍາກ​ທີ່​ສະ­ເໜີ​ມາ​ຍັງ​ຂັ້ນ​ເທິງ ສາຍ​ຕັ້ງ​ກົມ​ຊົນ­ລະ­ປະ­ທານ ກະ­ຊວງ​ກະ­ສິ­ກຳ ແລະ ປ່າ­ໄມ້ ແລະ ສາຍ​ຂວາງ ນວ ຊ່ວຍ​ດ້ານ​ງົບ­ປະ­ມານ​ເພື່ອ​ມາ​ຈັດ​ຊື້​ວັດ­ຖຸ​ອຸ­ປະ­ກອນ​ທີ່​ເປັນ​ອາ​ໄຫຼ່​ປ່ຽນ​ຖ່າຍ ສ້ອມ­ແປງ​ຈັກ­ສູບ­ນ້ຳ​ທີ່​ເກົ່າ​ແກ່​ເປ່​ເພ ໂດຍ​ເລັ່ງ​ໃສ່​ປ່ຽນ​ຖ່າຍ​ຕູ້​ບັງ­ຄັບ ແລະ ມໍ​ເຕີ​ເປັນ​ຫຼັກ ທຶນ​ປະ­ມານ 1,5-2 ຕື້​ກີບ ເຖິງ​ວ່າ​ໄລ­ຍະ​ນີ້​ຈະ​ສະ­ໜອງ​ນ້ຳ​ໄດ້​ແຕ່​ກໍ​ຍັງ​ບໍ່​ຮູ້​ວ່າ​ໄລ­ຍະ 2-3 ເດືອນ​ຂ້າງ​ໜ້າ​ເຄື່ອງ​ຈັກ​ຈະ​ມີ​ການ​ເປ່​ເພ​ແບບ​ກະ­ທັນ­ຫັນ ພວກ​ເຮົາ​ຕ້ອງ​ມີ​ທຶນ​ກຽມ­ພ້ອມ​ໄວ້​ເປັນ​ການ​ດີ​ໃນ​ເວ­ລາ​ເຄື່ອງ​ຈັກ​ເປ່​ເພ​ຈະ​ໄດ້​ສ້ອມ­ແປງ​ໃຫ້​ທັນ​ເວ­ລາ ທັງ​ນີ້ ກໍ​ເພື່ອ​ເຮັດ​ໃຫ້­ການ​ຜະ­ລິດ​ຂອງ​ຊາວ​ກະ­ສິ­ກອນ​ແຕ່​ລະ​ທ້ອງ­ຖິ່ນ ໄດ້​ຮັບ​ໝາກ­ຜົນ​ດີ​ບໍ່​ໃຫ້​ມີ​ບັນ­ຫາ​ເລື່ອງ​ນ້ຳ​ຊົນ­ລະ­ປະ­ທານ.

   ວຽກ​ງານ​ສ້າງ​ຂະ​ບວນ​ການ​ອະ­ນາ­ໄມ​ຄອງ­ເໝືອງ​ໄດ້​ເປັນ​ຂະ​ບວນ​ຟົດ­ຟື້ນ​ຄື ອະ­ນາ­ໄມ​ດ້ວຍ​ແຮງ​ງານ​ຄົນ​ໄດ້​ຍາວ 9 ກິ­ໂລ­ແມັດ ແລະ ອະ­ນາ­ໄມ​ດ້ວຍ​ກົນ​ຈັກ​ຍາວ 20 ກິ­ໂລ­ແມັດ ເຊິ່ງ​ການ​ອະ­ນາ­ໄມ​ດ້ວຍ​ກົນ​ຈັກ​ຂະ­ແໜງ​ໄດ້​ສົມ­ທົບ​ກັບ​ປະ­ຊາ­ຊົນ​ກຸ່ມ​ຜູ້­ນຳ​ໃຊ້​ນ້ຳ ໂດຍ​ທາງ​ຂະ­ແໜງ​ໄດ້​ລະ­ດົມ​ຜູ້​ປະ­ກອບ​ການ​ຊ່ວຍ​ກົນ​ຈັກ ແລະ ປະ­ຊາ­ຊົນ​ເປັນ​ຜູ້​ສົມ­ທົບ​ນ້ຳ­ມັນ​ລົດ ພ້ອມ​ນີ້ ຍັງ​ຈະ​ສືບ­ຕໍ່​ຊຸກ­ຍູ້​ປະ­ຊາ­ຊົນ​ອະ­ນາ­ໄມ​ຄອງ­ເໝືອງ​ຂັ້ນ​ສາມ ແລະ ຄອງ​ຫົດ​ດ້ວຍ​ແຮງ​ງານ​ຄົນ​ຈຸດ​ທີ່​ຍັງ​ບໍ່​ທັນ​ສຳ­ເລັດ ໂອ­ກາດ​ນີ້ ກໍ​ຮຽກ­ຮ້ອງ​ມາ​ຍັງ​ຫົວ­ໜ້າ​ຫ້ອງ­ການ​ກະ­ສິ­ກຳ ແລະ ປ່າ­ໄມ້​ເມືອງ ໂດຍ​ສະ­ເພາະ 5 ເມືອງ​ນອກ​ໃນ​ການ​ຊ່ວຍ​ຊີ້​ນຳ​ໜ່ວຍ​ງານ​ຊົນ­ລະ­ປະ­ທານ ເອົາ­ໃຈ­ໃສ່​ຕື່ມ​ໃນ​ການ​ຕິດ­ຕາມ​ການ​ສະ­ໜອງ​ນ້ຳ ແລະ ຕິດ­ຕາມ​ກວດ­ກາ​ຈັກ­ສູບ­ນ້ຳ​ທີ່​ເປ່​ເພ​ເພື່ອ​ເຮັດ​ໃຫ້​ວຽກ​ງານ​ບັນ­ລຸ​ຜົນ ແລະ ຊາວ​ກະ­ສິ­ກອນ​ກໍ​ໃຫ້​ເອົາ­ໃຈ­ໃສ່​ບັນ­ຫາ​ການ​ບໍ­ລິ­ຫານ​ຈັດ­ການ ນ້ຳ​ເຮັດ​ໃຫ້­ການ​ນຳ​ໃຊ້​ກະ­ແສ​ໄຟ­ຟ້າ​ໜ້ອຍ​ເທົ່າ​ທີ່​ຈະ​ໜ້ອຍ​ເພື່ອ​ຫຼຸດ­ຜ່ອນ​ລາຍ​ຈ່າຍ​ຄ່າ​ກະ­ແສ​ໄຟ​ຟ້າ­ລົງ ໂດຍ​ສະ­ເພາະ​ຜູ້​ທີ່​ນາ​ຕົນ​ເອງ​ມີ​ນ້ຳ​ພຽງ­ພໍ ກໍ​ໃຫ້​ອັດ​ໄວ້​ແລ້ວ​ປ່ອຍ​ໃຫ້​ຄົນ​ອື່ນໆ​ທີ່​ຖັດ​ນາ​ເຮົາ​ຕໍ່​ໄປ​ໃຫ້​ທຸກ​ຄົນ ໄດ້​ຊົມ­ໃຊ້​ນ້ຳ​ຢ່າງ​ພຽງ­ພໍ​ໃຫ້​ປະ­ຕິ­ບັດ​ຄຳ​ເວົ້າ​ທີ່​ວ່າ: ໃຊ້​ນ້ຳ​ຢ່າງ​ປະ­ຢັດ ແຕ່​ໃຫ້​ມີ​ປະ​ສິດ­ທິ​ຜົນ​ສູງ​ສຸດ ຄື​ກັບ​ເຮົາ​ໃຊ້​ນ້ຳ​ປະ­ປາ​ຈຶ່ງ​ຈະ​ເຮັດ​ໃຫ້​ປະ­ຊາ­ຊົນ​ຫຼຸດ ຜ່ອນ​ລາຍ​ຈ່າຍ​ລົງ​ໄດ້.

ຂ່າວທີ່ກ່ຽວຂ້ອງ