ສະມາຄົມຈີນ ຄວ້າແຊັມບານບ້ວງຊີງຂັນທ່ານເຈົ້າຄອງ ນວ

1.418 12 ທ.ວ. 2019 ວົງຈອນກີລາ
ສະມາຄົມຈີນ ຄວ້າແຊັມບານບ້ວງຊີງຂັນທ່ານເຈົ້າຄອງ ນວ

   ການ​ແຂ່ງ­ຂັນ​ກີ­ລາ​ບານ­ບ້ວງ​ທົ່ວ​ນະ­ຄອນ­ຫຼວງ​ວຽງ​ຈັນ (ນວ) ຊີງ​ຂັນ​ທ່ານ​ເຈົ້າ​ຄອງ ນວ ຮອງ​ຊີງ​ຊະ­ນະ​ເລີດ ຈັດ​ຂຶ້ນ​ວັນ​ທີ 7 ທັນ­ວາ 2019 ຢູ່​ໂຮງ­ຮຽນ​ຫຼຽວ​ໂຕ້ ເມືອງ​ຈັນ­ທະ​ບູ​ລີ ໂດຍ​ມີ​ທ່ານ ພູ­ທອນ ແສງ​ດາ​ວົງ ຮອງ​ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ນວ ທ່ານ ໄຊ​ໂລດ ກະ­ມົນ​ລັດ­ຕະ­ນາ ປະ­ທານ​ສະ­ຫະ­ພັນ​ບານ­ບ້ວງ ນວ ແລະ ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

   ເພື່ອ​ສ້າງ​ຂະ​ບວນ​ການ​ສະ­ເຫຼີມ­ສະ­ຫຼອງ ແລະ ຊົມ­ເຊີຍ​ຜົນ­ສຳ­ເລັດ​ວັນ​ສຳ­ຄັນ​ຕ່າງໆ​ຂອງ​ຊາດ ທັງ​ເປັນ​ການ​ຄັດ​ເລືອກ​ເອົາ​ນັກ­ກີ­ລາ​ທີ່​ມີ​ພອນ​ສະ­ຫວັນ ຕາງ­ໜ້າ​ນັກ­ກີ­ລາ ນວ ເຂົ້າ​ຮ່ວມ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ Xl ຢູ່​ແຂວງ​ຊຽງ​ຂວາງ ວັນ​ທີ 22 ມີ­ນາ-1 ເມ­ສາ 2020.

   ການ​ແຂ່ງ­ຂັນ​ລາຍ­ການ​ນີ້ ປະ­ກອບ​ມີ​ຮຸ່ນ​ອາ­ຍຸ 19 ປີ​ຊາຍ ແລະ ຮຸ່ນ​ທົ່ວ​ໄປ​ຍິງ-ຊາຍ ໃນ​ນີ້​ຮຸ່ນ​ອາ­ຍຸ 19 ປີ​ຊາຍ ມີ 7 ພາກ­ສ່ວນ ຮຸ່ນ​ທົ່ວ​ໄປ​ຍິງ ມີ 7 ພາກ­ສ່ວນ ຮຸ່ນ​ທົ່ວ​ໄປ​ຊາຍ ມີ 8 ພາກ­ສ່ວນ ເຂົ້າ​ຮ່ວມ​ເຊິ່ງ​ແຕ່​ລະ​ຮຸ່ນ​ແບ່ງ​ເປັນ 2 ກຸ່ມ ແຂ່ງ­ຂັນ​ພົບ​ກັນ​ໝົດ ຄັດ​ເອົາ​ທີ 1-2 ແຕ່​ລະ​ຮຸ່ນ​ເຂົ້າ​ຮອບ​ຕໍ່​ໄປ ເລີ່ມ​ແຂ່ງ­ຂັນ​ແຕ່​ວັນ​ທີ 20 ພະ­ຈິກ-7 ທັນ­ວາ 2019.

   ຜ່ານ​ການ​ແຂ່ງ­ຂັນ​ປະ­ເພດ​ທີມ​ຊາຍ ທີ 1 ທີມ​ສະ­ມາ­ຄົມ​ຈີນ (ແຊັມ​ເກົ່າ 2 ສະ­ໄໝ) ໄລ່​ເອົາ​ຊະ­ນະ​ທີມ​ອາ­ລີ​ມິກ 63-35 ຄະ­ແນນ ໄດ້​ຮັບ​ຂັນ 1 ໜ່ວຍ ພ້ອມ​ທັງ​ເງິນ​ລາ­ງວັນ 3 ລ້ານ​ກີບ ສ່ວນ ອາ­ລີ​ມິກ ໄດ້​ຮັບ​ຂັນ­ເງິນ​ລາ­ງວັນ 1,5 ລ້ານ​ກີບ ທີ 3 ທີມ​ຟ່າ​ມ້າ ໄດ້​ຮັບ​ຂັນ 1 ໜ່ວຍ ເງິນ​ລາ­ງວັນ 1 ລ້ານ​ກີບ ປະ­ເພດ​ຍິງ ທີ 1 ແມ່ນ​ຟ່າ​ມ້າ 1 ທີ 2 ຟ່າ​ມ້າ 2 ທີ 3 ມສ ຮ່ອງ​ຄ້າ ສ່ວນ ຮຸ່ນ​ອາ­ຍຸ 19 ປີ ທີ 1 ໂຮງ­ຮຽນ​ຫຼຽວ​ໂຕ້ ທີ 2 ໂຮງ­ຮຽນ​ເອ​ໄອ​ເອັດ ທີ 3 ທີມ ບັສ ເຊິ່ງ​ທັງ 2 ຮຸ່ນ ທີ 1 ໄດ້​ຮັບ​ຂັນ 1 ໜ່ວຍ ເງິນ​ລາ­ງວັນ 8 ແສນ​ກີບ ທີ 2 ໄດ້​ຮັບ​ຂັນ 1 ໜ່ວຍ ເງິນ​ລາ­ງວັນ 600.000 ກີບ ທີ 3 ໄດ້​ຮັບ​ຂັນ 1 ໜ່ວຍ ແລະ ເງິນ​ລາ­ງວັນ 400.000 ກີບ.

ຂ່າວທີ່ກ່ຽວຂ້ອງ