ສ ເກົາຫຼີ ໃຫ້​ທຶນ​ສ້າງ​ໂຄງການ​ພັດທະນາ​ຊົນນະບົດ ແລະ ສູນ​ເຕັກນິກ​ກະສິກຳ

1.010 12 ທ.ວ. 2019 ຂ່າວໜ້າ​ໜຶ່ງ
ສ ເກົາຫຼີ ໃຫ້​ທຶນ​ສ້າງ​ໂຄງການ​ພັດທະນາ​ຊົນນະບົດ ແລະ ສູນ​ເຕັກນິກ​ກະສິກຳ

    ພິທີ​ມອບ-ຮັບ​ໂຄງການ​ພັດທະນາ​ຊົນນະບົດ ແລະ ສູນ​ເຕັກນິກ​ກະສິກຳ ບ້ານ​ໃຫຍ່​ນາ​ຈະເລີນ ເມືອງ​ສັງ​ທອງ ນະຄອນຫຼວງ​ວຽງ​ຈັນ (ນວ) ຈັດ​ຂຶ້ນ​ວັນ​ທີ 10 ທັນວາ 2019 ຢູ່​ບ້ານ​ເຕົາ​ໄຫ ເຊິ່ງ​ມອບ​ໂດຍ Song Kiheon ຜູ້​ຈັດການ​ທົ່ວ​ໄປ​ລັດ​ວິ​ສາ​ຫະ​ກິດ​ພັດທະນາ​ຊຸມ​ຊົນ ຊົນນະບົດ (KRC) ແລະ ຮັບ​ໂດຍ​ທ່ານ ບຸນ​ຄຳ ສີດາ​ວົງ ຫົວໜ້າ​ກົມ​ຊົນລະປະທານ ໂດຍ​ມີ​ທ່ານ ທອງ​ພັດ ວົງ​ມະນີ ຮອງ​ລັດຖະມົນຕີ​ກະຊວງ​ກະສິກຳ ແລະ ປ່າໄມ້ ທ່ານ KIM Insik ປະທານ KRC ພ້ອມ​ດ້ວຍ​ພາກສ່ວນ​ກ່ຽວຂ້ອງ ເຂົ້າ​ຮ່ວມ.

    ທ່ານ ແສງ​ເມືອງ ສິດທິ​ໂວຫານ ຜູ້​ປະສານ​ງານ​ຂັ້ນ ນວ ພະ​ແນກ​ກະສິກຳ ແລະ ປ່າໄມ້ ນວ ກ່າວ​ວ່າ: ໂຄງການ​ພັດທະນາ​ຊົນນະບົດ ແລະ ສູນ​ບໍລິການ​ກະສິກຳ ບ້ານ​ໃຫຍ່​ນາ​ຈະເລີນ ຕັ້ງ​ຢູ່​ບ້ານ​ໃຫຍ່​ນາ​ຈະເລີນ ແລະ ຫົວ​ງານ​ເຂື່ອນ​ດິນ ຕັ້ງ​ຢູ່​ນ້ຳ​ພຸກ ໂດຍ​ມີ​ນ້ຳ 2 ສາຍ​ໄຫຼ​ຈອດ​ກັນ ຄື: ຫ້ວຍ​ເຮ້ຍ ແລະ ນ້ຳ​ພຸກ ໂຄງການ​ເປັນ​ຫົວ​ງານ​ອ່າງເກັບນ້ຳ (ເຂື່ອນ​ດິນ) ເນື້ອທີ່​ອ່າງ​ໂຕ່ງ 450 ເຮັກຕາ ບໍ​ລິ​ມາດ​ເກັບ​ນ້ຳ 2.790.000 ແມັດ​ກ້ອນ ປະລິມານ​ນ້ຳ​ທີ່​ສາມາດ​ໃຊ້​ໃນ​ການ​ຜະລິດ 2.596.000 ແມັດ​ກ້ອນ ລວງ​ສູງ​ຂອງ​ເຂື່ອນ 21,5 ແມັດ ຍາວ 250 ແມັດ ລວງ​ກວ້າງ​ສັນ​ເຂື່ອນ 5 ແມັດ ຄອງເໝືອງ​ແມ່​ຍາວ 5.200 ແມັດ ສາມາດ​ສະໜອງ​ນ້ຳ​ໃນ​ລະດູຝົນ​ໄດ້ 250 ເຮັກຕາ ລະດູແລ້ງ 160 ເຮັກຕາ ໂຄງການ​ດັ່ງກ່າວ ເປັນ​ລັກສະນະ​ນ້ຳ​ໄຫຼ​ເອງ ເຊິ່ງ​ບ້ານ​ທີ່​ໄດ້​ຮັບ​ຜົນ​ປະໂຫຍດ​ປະກອບ​ມີ ບ້ານ​ເຕົາ​ໄຫ ນາ​ໜ້ຽງ ນາ​ທຽມ ແລະ ນາ​ລາດ ລວມ 120 ຄອບຄົວ ປັດຈຸບັນ​ໄດ້​ໂຮມ​ເປັນ​ບ້ານ 3 ສ້າງ ຄື: ບ້ານ​ໃຫຍ່​ນາ​ຈະເລີນ (ນາ​ໜ້ຽງ ນາ​ທຽມ ແລະ ນາ​ລາດ).

    ຈຸດປະສົງ​ໂຄງການ ເພື່ອ​ຍົກ​ລະດັບ​ປັບປຸງ​ການ​ດຳລົງ​ຊີວິດ ແລະ ເສດຖະກິດ-ສັງຄົມ ໃນ​ການ​ພັດທະນາ​ຊົນນະບົດ​ຂອງ​ເມືອງ​ສັງ​ທອງ ເຊັ່ນ: ເຝິກອົບຮົມ​ວຽກ​ງານ​ສົ່ງເສີມ​ກະສິກຳ​ທີ່​ເໝາະ​ສົມ​ກັບ​ຊາວ​ກະສິກອນ ເພື່ອ​ໃຫ້​ເຂົາເຈົ້າ​ມີ​ຄວາມ​ເຂັ້ມແຂງ​ດ້ານ​ການ​ບໍລິຫານ​ຈັດການ​ຄຸ້ມ​ຄອງ​ນຳ​ໃຊ້​ລະບົບ​ພື້ນຖານ​ໂຄງ​ລ່າງ​ຊົນລະປະທານ ໃນ​ລະດັບ​ຊາວບ້ານ ຫຼື ສະຫະກອນ ຊ່ວຍເຫຼືອ​ດ້ານ​ກະສິກຳ ແລະ ພັດທະນາ​ຊົນນະບົດ ໂດຍ​ຜ່ານ​ການ​ພັດທະນາ​ໂຄງ​ລ່າງ​ພື້ນຖານ​ດ້ານ​ກະສິກຳ ແລະ ສູນ​ເຕັກນິກ​ກະສິກຳ ສົ່ງເສີມ​ໃຫ້​ມີ​ຜະລິດ​ຕະ​ພັນ​ກະສິກຳ​ໃຫ້​ມີ​ລາຍ​ໄດ້ ຍົກ​ລະດັບ​ຊີວິດ​ການ​ເປັນ​ຢູ່​ຂອງ​ປະຊາຊົນ​ໃຫ້​ດີ​ຂຶ້ນ ແລະ ຫຼຸດຜ່ອນ​ຄວາມທຸກ​ຍາກ​ໃນ​ເຂດ​ຊົນນະບົດ ໂດຍ​ຜ່ານ​ການ​ຍົກ​ລະດັບ​ພື້ນຖານ​ການ​ຜະລິດ​ກະສິກຳ​ແບບ​ຍືນ​ຍົງ ແລະ ມີ​ນ້ຳ​ພຽງພໍ​ຕໍ່​ການ​ຜະລິດ​ກະສິກຳ​ເນື້ອທີ່ 250 ເຮັກຕາ.

    ໂຄງການ​ນີ້ ເປັນ​ໂຄງການ​ຮ່ວມ​ມື ລະຫວ່າງ​ລັດຖະບານ ​ສປປ ລາວ ແລະ ສ ເກົາຫຼີ ເຊິ່ງ​ໄດ້​ຮັບ​ທຶນ​ຊ່ວຍເຫຼືອ​ລ້າ​ຈາກ​ລັດຖະບານ ສ ເກົາຫຼີ ກໍ​ຄື ກະຊວງ​ກະສິກຳ ອາຫານ ແລະ ກິດຈະການ​ຊົນນະບົດ ສ ເກົາຫຼີ ໂດຍ​ຜ່ານ KRC ມູນ​ຄ່າ 4,02 ລ້ານ​ໂດ​ລາ​ສະຫະລັດ ຫຼື ປະມານ 35 ຕື້​ກີບ ດຳເນີນ​ແຕ່​ປີ 2016-ເດືອນ​ເມສາ 2019 ໃນ​ນີ້​ບໍລິສັດ dasan consultants ສ ເກົາຫຼີ ຕາງໜ້າ​ໃຫ້ KRC ເປັນ​ຜູ້​ສ້າງ​ແຜນ​ດຳເນີນ​ງານ​ເພື່ອ​ຈັດ​ຕັ້ງ​ປະຕິບັດ​ໂຄງການ ແລະ ເຊັນ​ສັນຍາ​ກໍ່ສ້າງ ລະຫວ່າງ dasan consultants ແລະ ບໍລິສັດ​ລາວ​ຈະເລີນ​ກໍ່ສ້າງ​ຈຳກັດ ສົມທົບ​ກັບ​ກົມ​ຊົນລະປະທານ ພະ​ແນກ​ກະສິກຳ ແລະ ປ່າໄມ້ ນວ ຫ້ອງການ​ກະສິກຳ ແລະ ປ່າໄມ້​ເມືອງ​ສັງ​ທອງ. 

ຂ່າວທີ່ກ່ຽວຂ້ອງ