​ທທທ ມອບ​ລາງວັນ​ໃຫ້​ຜູ້​ທີ່​ມີ​ສ່ວນ​ຮ່ວມ​ໃນ​ວຽກ​ງານ​ທ່ອງ​ທ່ຽວ

928 12 ທ.ວ. 2019 ຂ່າວໜ້າ​ໜຶ່ງ
​ທທທ ມອບ​ລາງວັນ​ໃຫ້​ຜູ້​ທີ່​ມີ​ສ່ວນ​ຮ່ວມ​ໃນ​ວຽກ​ງານ​ທ່ອງ​ທ່ຽວ

     ການທ່ອງທ່ຽວ​ແຫ່ງ​ປະເທດ​ໄທ (​ທທທ) ຈັດ​ງານ Thank 2 Million ເພື່ອ​ສະແດງ​ຄວາມ​ຂອບໃຈ​ບັນ ດາ​ລູກ​ຄ້າ ບໍລິສັດ​ນຳ​ທ່ຽວ ນັກ​ທ່ອງ​ທ່ຽວ ພັນທະ​ມິດ ແລະ ສື່​ມວນ​ຊົນ ທີ່​ໄດ້​ຮ່ວມ​ກັນ​ສ້າງ ແລະ ພັດທະນາ​ວຽກ​ງານ​ທ່ອງ​ທ່ຽວ​ໃຫ້​ຄົນ​ລາວ​ໄດ້​ຮູ້ຈັກ​ແຫຼ່ງ​ທ່ອງ​ທ່ຽວ​ຂອງ​ປະເທດ​ໄທ​ຫຼາຍ​ຂຶ້ນ ໂດຍ​ໄດ້​ມອບ​ລາງວັນ​ໃຫ້​ບໍລິສັດ​ດີເດັ່ນ​ໃນ​ການ​ຂາຍ​ລາຍການ​ນຳ​ທ່ຽວ​ໄປ​ປະເທດ​ໄທ​ສູງ​ສຸດ ຄື: ບໍລິສັດ ຕົວ​ແທນ​ຈຳໜ່າຍ​ປີ້​ຍົນ​ທຣານ​ເອັກ​​ສ​ເພຣດ ບໍລິສັດ ລິນ​ທຣາ​ເວ​​ລ​ເຊີ​ວິດ​ຈຳກັດ ບໍລິສັດ ອໍ​ທາມ​ທຣາ​ເວ​​ລ​ຈຳກັດ ບໍລິສັດ ຈ່ອຍ​ທຣາ​ເວ​​ລ​ເຊີ​ວິດ​ຈຳກັດ ແລະ ບໍລິສັດ ເອັມ​ພີ​ທຣາ​ເວ​​ລ​ຈຳກັດ ນອກ​ນີ້ ຍັງ​ໄດ້​ມອບ​ລາງວັນ​ໃຫ້​ສື່​ມວນ​ຊົນ​ທີ່​ຊ່ວຍ​ສະໜັບສະໜູນ​ຂໍ້​ມູນ​ຂ່າວສານ​ດ້ານ​ການທ່ອງທ່ຽວ​ໃຫ້​ຄົນ​ລາວ​ໄດ້​ຮັບ​ຮູ້ ແລະ ສຳຜັດ​ກັບ​ສະຖານທີ່​ທ່ອງ​ທ່ຽວ​ໃນ​ປະເທດ​ໄທ ຄື: ໂທລະພາບ​ທີ​ວີ​ລາວ ເວົ້າ​ສູ່​ກັນ​ຟັງ​ອອນ​ລາຍ RDK Group ໜັງສືພິມ​ວຽງ​ຈັນ​ໃໝ່ ບໍລິສັດ​ບິກ​ບຣູ ເອ​ເຈັນ​ຊີ​ລາວ ແລະ ສະມາຄົມ​ທຸລະ​ກິດ​ທ່ອງ​ທ່ຽວ​ລາວ.

    ພິທີ​ດັ່ງກ່າວ ຈັດ​ຂຶ້ນ​ໃນ​ອາທິດ​ຜ່ານ​ມາ​ຢູ່​ຮ້ານ​ອາຫານ​ນາ​ດາວ ໂດຍ​ມີ​ທ່ານ ດຳ​ຣົງ ໄຄຣ່​ຄຣວນ ເອກ​ອັກຄະລາຊະທູດ​ໄທ ປະຈຳ ​ສປປ ລາວ ທ່ານ Chattan kunjara Na Ayudhya ຮອງ​ຜູ້​ວ່າການ​ດ້ານ​ຕະຫຼາດ​ອາຊີ ແລະ ປາ​ຊີ​ຟິກ​ໃຕ້ ​ທທທ ພ້ອມ​ດ້ວຍ​ຕາງໜ້າ​ສະມາຄົມ​ທຸລະ​ກິດ​ທ່ອງ​ທ່ຽວ​ລາວ ແລະ ພາກສ່ວນ​ກ່ຽວຂ້ອງ ເຂົ້າ​ຮ່ວມ.

    ທ່ານ Chattan kunjara Na Ayudhya ກ່າວ​ວ່າ: ນັກ​ທ່ອງ​ທ່ຽວ​ລາວ ເດີນທາງ​ເຂົ້າ​ໄປ​ທ່ຽວ​ປະເທດ​ໄທ​ເພີ່ມ​ຂຶ້ນ​ເກີນ​ຄາດໝາຍ ບໍ່​ເຖິງ 12 ເດືອນ ມີ​ຕົວ​ເລກ​ເຖິງ 2 ລ້ານ​ຄົນ ເຊິ່ງ​ເປັນ​ປະຫວັດສາດ​ຂອງ​ການທ່ອງທ່ຽວ ລະຫວ່າງ 2 ປະເທດ ຂະນະ​ດຽວ​ກັນ​ນັກ​ທ່ອງ​ທ່ຽວ​ໄທ​ກໍ​ເດີນທາງ​ມາ​ທ່ອງ​ທ່ຽວ​ໃນ​ປະເທດ​ລາວ​ຫຼາຍ​ຂຶ້ນ​ເຊັ່ນ​ດຽວ​ກັນ ເຊິ່ງ​ເປັນ​ການ​ເດີນທາງ 2 ທາງ​ຢ່າງ​ສົມ​ດຸນ ແລະ ສະແດງ​ໃຫ້​ເຫັນ​ການ​ພົວພັນ​ຮ່ວມ​ມື ແລະ ໄປ-ມາ​ຫາ​ສູ່ ຖານ​ບ້ານ​ໃກ້​ເຮືອນ​ຄຽງ​ຢ່າງ​ແທ້​ຈິງ ເຊິ່ງ​ຕ້ອງ​ຂໍ​ສະແດງ​ຄວາມ​ຂອບໃຈ​ບັນດາ​ລູກ​ຄ້າ ບໍລິສັດ ນຳ​ທ່ຽວ ນັກ​ທ່ອງ​ທ່ຽວ ພັນທະ​ມິດ ສື່​ມວນ​ຊົນ ກໍ​ຄື ສະມາຄົມ​ທຸລະ​ກິດ​ທ່ອງ​ທ່ຽວ​ລາວ ທີ່​ໄດ້​ຮ່ວມ​ກັນ​ເຮັດ​ໃຫ້​ເກີດ​ມີ​ວັນ​ນີ້ ເຮັດ​ໃຫ້​ລາວ​ຫຍັບ​ຂຶ້ນ​ເປັນ​ອັນ​ດັບ 3 ຂອງ​ນັກ​ທ່ອງ​ທ່ຽວ​ຕ່າງປະເທດ ທີ່​ເຂົ້າ​ມາ​ທ່ຽວ​ໃນ​ໄທ ຮອງ​ຈາກ ຈີນ ແລະ ມາ​ເລ​ເຊຍ ນອກຈາກ​ຈຳນວນ​ນັກ​ທ່ອງ​ທ່ຽວ​ແລ້ວ ລາຍ​ໄດ້​ທີ່​ເກີດ​ຈາກ​ນັກ​ທ່ອງ​ທ່ຽວ​ລາວ​ໄປ​ທ່ຽວ​ໄທ​ຍັງ​ເພີ່ມ​ຂຶ້ນ​ສູງ​ຫຼາຍ ສະແດງ​ໃຫ້​ເຫັນ​ວ່າ​ຄົນ​ລາວ​ມີ​ເສດຖະກິດ​ດີ​ຂຶ້ນ ຈຶ່ງ​ສາມາດ​ໄປ​ທ່ອງ​ທ່ຽວ ຢູ່​ຕ່າງປະເທດ​ຫຼາຍ​ຂຶ້ນ ແລະ ຫວັງ​ວ່າ​ປີ​ຕໍ່​ໄປ​ນັກ​ທ່ອງ​ທ່ຽວ​ຂອງ 2 ປະເທດ ຍິ່ງ​ຈະ​ເພີ່ມ​ທະວີ​ທ່ອງ​ທ່ຽວ​ລະ ຫວ່າງ 2 ປະເທດ​ຫຼາຍ​ຂຶ້ນ. 

ຂ່າວທີ່ກ່ຽວຂ້ອງ