ລາວ-ຫວຽດ­ນາມ ເສີມ​ຂະ­ຫຍາຍ​ການ​ຮ່ວມ​ມື​ຮອບ­ດ້ານ

944 12 ທ.ວ. 2019 ຂ່າວໜ້າ​ໜຶ່ງ
ລາວ-ຫວຽດ­ນາມ ເສີມ​ຂະ­ຫຍາຍ​ການ​ຮ່ວມ​ມື​ຮອບ­ດ້ານ

    ທ່ານ ບຸນ​ທອງ ຈິດ​ມະ­ນີ ຮອງ​ນາ­ຍົກ­ລັດ­ຖະ­ມົນ­ຕີ ສປປ ລາວ ຕ້ອນ­ຮັບ ແລະ ພົບ​ປະ​ກັບ​ທ່ານ ເຈືອງ ຮ່ວ​າ ບີ່ງ ຮອງ​ນາ­ຍົກ­ລັດ­ຖະ­ມົນ­ຕີ ຜູ້​ປະ­ຈຳ­ການ​ລັດ­ຖະ­ບານ ສສ ຫວຽດ­ນາມ ພ້ອມ​ຄະ­ນະ ວັນ​ທີ 10 ທັນ­ວາ 2019 ຢູ່​ຫ້ອງ​ວ່າ­ການ​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ໃນ​ໂອ­ກາດ​ທີ່​ຄະ­ນະ​ຜູ້​ແທນ​ດັ່ງ­ກ່າວ​ເດີນ­ທາງ​ມາ​ຢ້ຽມ­ຢາມ ແລະ ເຮັດ​ວຽກ​ຢູ່ ສປປ ລາວ ແຕ່​ວັນ​ທີ 10-12 ທັນ­ວາ​ນີ້ ເພື່ອ​ເສີມ​ຂະ­ຫຍາຍ​ການ​ຮ່ວມ​ມື ແລະ ຮັດ​ແໜ້ນ​ສາຍ​ພົວ­ພັນ​ມິດ­ຕະ­ພາບ​ອັນ​ດີ­ງາມ ລະ­ຫວ່າງ ລາວ-ຫວຽດ­ນາມ ໃຫ້​ແໜ້ນ​ແຟ້ນ​ຍິ່ງ​ຂຶ້ນ.

    ທ່ານ ບຸນ​ທອງ ຈິດ​ມະ­ນີ ໄດ້​ສະ­ແດງ​ຄວາມ​ຕ້ອນ­ຮັບ ຊົມ­ເຊີຍ ພ້ອມ​ທັງ​ຕີ​ລາ­ຄາ​ສູງ​ທີ່​ທ່ານ​ຮອງ​ນາ­ຍົກ ລັດ­ຖະ­ມົນ­ຕີ ສສ ຫວຽດ­ນາມ ໄດ້​ນຳ​ເອົາ​ໄມ­ຕີ​ຈິດ​ມິດ­ຕະ­ພາບ ຄວາມ​ສາ­ມັກ­ຄີ​ຮັກ­ແພງ​ອັນ​ສະ­ໜິດ­ສະ­ໜົມ​ຂອງ​ພັກ-ລັດ ແລະ ປະ­ຊາ­ຊົນ​ຫວຽດ­ນາມ ມາ​ຍັງ​ພັກ-ລັດ ແລະ ປະ­ຊາ­ຊົນ​ລາວ ເຊິ່ງ​ການ​ມາ​ຢ້ຽມ­ຢາມ​ລາວ​ຄັ້ງ​ນີ້ ເປັນ​ການ​ປະ­ກອບ­ສ່ວນ​ສຳ­ຄັນ​ໃນ​ການ​ເພີ່ມ​ທະ­ວີ ແລະ ເສີມ​ຂະ­ຫຍາຍ​ມູນ­ເຊື້ອ​ອັນ​ດີ­ງາມ ແຫ່ງ​ສາຍ​ພົວ­ພັນ​ມິດ­ຕະ­ພາບ​ອັນ​ຍິ່ງ​ໃຫຍ່ ຄວາມ​ສາ­ມັກ­ຄີ​ພິ­ເສດ ແລະ ການ​ຮ່ວມ​ມື​ຮອບ­ດ້ານ ລະ­ຫວ່າງ​ສອງ​ພັກ ສອງ​ລັດ ແລະ ປະ­ຊາ­ຊົນ​ສອງ​ຊາດ ລາວ-ຫວຽດ­ນາມ ທີ່​ມີ​ມາ​ແຕ່​ດົນ​ນານ ໃຫ້​ແໜ້ນ​ແຟ້ນ ແລະ ມີ​ປະ​ສິດ­ທິ​ຜົນ​ສູງ​ຂຶ້ນ​ກວ່າ​ເກົ່າ.

    ສອງ​ຝ່າຍ​ໄດ້​ພ້ອມ​ກັນ​ທົບ​ທວນ­ຄືນ​ການ​ຮ່ວມ​ມື​ສອງ​ຝ່າຍ​ໃນ​ໄລ­ຍະ​ຜ່ານ​ມາ ແລະ ປຶກ­ສາ​ຫາ­ລື​ການ​ປະ­ຕິ­ບັດ​ທິດ​ທາງ​ແຜນ­ການ​ການ​ຮ່ວມ​ມື​ໃນ­ຕໍ່­ໜ້າ ເປັນ­ຕົ້ນ ຮ່ວມ​ມື​ດ້ານ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະ­ຫງົບ ດ້ານ​ຍຸ­ຕິ​ທຳ ດ້ານ​ການ​ຄ້າ ການ​ລົງ­ທຶນ ວຽກ​ງານ​ກວດ­ກາ ແລະ ຕ້ານ​ການ​ສໍ້​ລາດ​ບັງ​ຫຼວງ ພ້ອມ​ທັງ​ປຶກ­ສາ​ຫາ­ລື​ກັນ​ດ້ານ​ການ­ເມືອງ ການ​ຕ່າງ­ປະ­ເທດ ເຊິ່ງ​ໄດ້​ຮັບ​ການ​ສືບ­ຕໍ່​ເພີ່ມ​ທະ­ວີ​ຢ່າງ​ຕໍ່​ເນື່ອງ ມີ​ຄວາມ​ໄວ້​ເນື້ອ​ເຊື່ອ​ໃຈ ແລະ ສະ­ໜັບ­ສະ­ໜູນ​ເຊິ່ງ​ກັນ ແລະ ກັນ ພ້ອມ​ນີ້ ຍັງ​ໄດ້​ແຈ້ງ​ສະ­ພາບ​ການ​ທີ່​ພົ້ນ​ເດັ່ນ​ໃນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ຂອງ​ແຕ່​ລະ​ປະ­ເທດ​ໃຫ້​ກັນ​ຊາບ ແລະ ແລກ­ປ່ຽນ​ທັດ­ສະ­ນະ​ຕໍ່​ບັນ­ຫາ​ພາກ​ພື້ນ ແລະ ສາ­ກົນ ນອກ​ນີ້ ສອງ​ຝ່າຍ​ຍັງ​ໄດ້​ເອົາ­ໃຈ­ໃສ່​ຊຸກ­ຍູ້​ການ​ພົວ­ພັນ​ຮ່ວມ​ມື​ດ້ານ​ເສດ­ຖະ­ກິດ ລະ­ຫວ່າງ​ສອງ​ປະ­ເທດ​ໃຫ້​ນັບ​ມື້​ນັບ​ເພີ່ມ​ຂຶ້ນ​ທັງ​ປະ­ລິ­ມານ ແລະ ຄຸນ​ນະ​ພາບ ໂດຍ​ຝ່າຍ​ລາວ​ໄດ້​ສະ­ເໜີ​ໃຫ້​ມີ​ການ​ຊຸກ­ຍູ້​ນັກ​ລົງ­ທຶນ​ຈາກ​ຫວຽດ­ນາມ ເຂົ້າ​ມາ​ລົງ­ທຶນ​ຢູ່​ລາວ​ໃຫ້​ຫຼາຍ​ຂຶ້ນ ເປັນ­ຕົ້ນ ໃນ​ຂະ­ແໜງ­ການ​ກະ­ສິ­ກຳ​ທັນ​ສະ­ໄໝ ການ­ບິນ ສາ­ທາ­ລະ­ນະ​ສຸກ ການ​ປຸງ​ແຕ່ງ​ໄມ້ ການ​ຜະ­ລິດ​ເປັນ​ສິນ­ຄ້າ​ສົ່ງ​ອອກ ແລະ ອື່ນໆ ຫວຽດ­ນາມ​ເປັນ​ຄູ່​ຄ້າ​ທີ່​ສຳ­ຄັນ​ຂອງ ສປປ ລາວ ມູນ​ຄ່າ​ການ​ຄ້າ​ລາວ-ຫວຽດ­ນາມ ໃນ 10 ເດືອນ​ຕົ້ນ​ປີ 2019 ບັນ­ລຸ 936 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 8.296,9 ຕື້​ກີບ ເພີ່ມ​ຂຶ້ນ 12,7% ທຽບ­ໃສ່​ໄລ­ຍະ​ດຽວ​ກັນ​ຂອງ​ປີ 2018.

    ທ່ານ ບຸນ​ທອງ ຈິດ​ມະ­ນີ ໄດ້​ຕີ​ລາ­ຄາ​ສູງ​ຕໍ່​ຜົນ­ສຳ­ເລັດ​ຂອງ​ການ​ພົບ​ປະ​ຄັ້ງ​ນີ້ ເຊິ່ງ​ໄດ້​ສ້າງ​ພື້ນ­ຖານ​ອັນ​ໜັກແໜ້ນ ທັງ​ເປັນ​ການ​ຊີ້​ນຳ ແລະ ຊຸກ­ຍູ້​ໃຫ້​ບັນ­ດາ​ພາກ­ສ່ວນ​ກ່ຽວ­ຂ້ອງ​ທັງ​ສອງ​ຝ່າຍ ນຳ­ໄປ​ຈັດ​ຕັ້ງ​ຜັນ​ຂະ­ຫຍາຍ​ໃຫ້​ເກີດ​ດອກ​ອອກ​ຜົນ​ຍິ່ງໆ​ຂຶ້ນ ເປັນ​ການ​ຊຸກ­ຍູ້​ການ​ຮ່ວມ​ມື​ດ້ານ​ເສດ­ຖະ­ກິດ ລະ­ຫວ່າງ​ສອງ​ປະ­ເທດ​ໃຫ້​ສົມ​ຄູ່​ກັບ​ການ​ຮ່ວມ​ມື​ດ້ານ​ການ­ເມືອງ​ທີ່​ດີ­ເລີດ​ໃນ​ປັດ­ຈຸ­ບັນ.

    ໃນ​ໂອ­ກາດ​ຢ້ຽມ­ຢາມ ສປປ ລາວ ຄັ້ງ​ນີ້ ທ່ານ ເຈືອງ ຮ່ວ​າ ບີ່ງ ຍັງ​ໄດ້​ເຂົ້າ​ຢ້ຽມ​ຄຳ­ນັບ​ທ່ານ ບຸນ​ຍັງ ວໍ­ລະ​ຈິດ ປະ­ທານ​ປະ­ເທດ ສປປ ລາວ ຢູ່​ທຳ​ນຽບ​ປະ­ທານ​ປະ­ເທດ ຢ້ຽມ​ຄຳ­ນັບ​ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ສປປ ລາວ ຢູ່​ຫ້ອງ​ວ່າ­ການ​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ຢ້ຽມ​ຄຳ­ນັບ ທ່ານ​ນາງ ປາ­ນີ ຢາ​ທໍ່​ຕູ້ ປະ­ທານ​ສະ­ພາ​ແຫ່ງ​ຊາດ ຢູ່​ສະ­ພາ​ແຫ່ງ​ຊາດ ຕື່ມ​ອີກ.

ຂ່າວທີ່ກ່ຽວຂ້ອງ