ລາວ ຈະ​ໄດ້​ຮັບ​ທຶນ 2 ໂຄງການ​ໃໝ່​ຈາກ​ກອງ​ທຶນ​ໂລກ

964 12 ທ.ວ. 2019 ຂ່າວໜ້າ​ໜຶ່ງ

    ພາຍຫຼັງ​ຜົນສຳເລັດ​ຂອງ​ກອງ​ປະຊຸມ​ລະດົມ​ທຶນ​ເຂົ້າ​ກອງ​ທຶນ​ໂລກ ທີ່​ຈັດ​ຂຶ້ນ​ຢູ່​ລີ​ຢົງ ປະເທດ​ຝຣັ່ງ ສະ ຖານ​ທູດ​ຝຣັ່ງ ປະຈຳ​ລາວ ໄດ້​ເຊີນ​ບັນດາ​ອົງ​ການຈັດຕັ້ງ​ໃນ​ພາກ​ພື້ນ​ເຂົ້າ​ຮ່ວມ​ປະຊຸມ ເພື່ອ​ແລກປ່ຽນ​ກ່ຽວ​ກັບ​ໂອກາດ​ໃນ​ການ​ຕ້ານ​ເຮ​​ັສ​ໄອ​ວີ/ເອດ ວັນນະໂລກ ແລະ ມາລາ​ເລຍ ໃນ​ພາກ​ພື້ນ​ແມ່ນ້ຳ​ຂອງ ວັນ​ທີ 6 ທັນວາ 2019 ຢູ່​ນະຄອນຫຼວງ​ວຽງ​ຈັນ ໂດຍ​ມີ​ຜູ້ຕາງໜ້າ​ອົງ​ການຈັດຕັ້ງ​ຈາກ ​ສປປ ລາວ ກຳປູເຈຍ ຫວຽດນາມ ມຽນ​ມາ ແລະ ໄທ ຮ່ວມ​ປຶກສາ​ຫາລື ແລະ ແລກປ່ຽນ​ກ່ຽວ​ກັບ​ສິ່ງ​ທ້າ​ທາຍ ແລະ ໂອກາດ​ຂອງ​ກອງ​ທຶນ​ໂລກ​ຮອບ​ວຽນ​ໃໝ່ ເພື່ອ​ຕ້ານ​ເຮ​​ັສ​ໄອ​ວີ/ເອດ ວັນນະໂລກ ແລະ ມາລາ​ເລຍ.

     ກອງ​ປະຊຸມ​ລະດັບ​ພາກ​ພື້ນ​ນີ້ ປະກອບ​ມີ 4 ກອງ​ປະຊຸມ​ຍ່ອຍ ທີ່​ສຸມ​ໃສ່​ສົນທະນາ​ແລກປ່ຽນ​ກ່ຽວ​ກັບ​ວິທີ​ການ​ໃໝ່ໆ​ທີ່​ສ້າງສັນ​ທີ່​ໄດ້​ຮັບ​ການຈັດຕັ້ງ​ປະຕິບັດ ເພື່ອ​ເຮັດ​ໃຫ້​ກອງ​ທຶນ​ໂລກ​ມີ​ຄວາມ​ຍືນ​ຍົງ ນອກ​ນີ້ ຍັງ​ໄດ້​ສົນທະນາ​ກ່ຽວ​ກັບ​ການ​ຊ່ວຍເຫຼືອ​ດ້ານ​ເຕັກນິກ ແລະ ໂອກາດ​ດ້ານ​ວິຊາ​ການ​ສຳລັບ​ບັນດາ​ປະເທດ​ທີ່​ໄດ້​ຮັບ​ຜົນ​ປະໂຫຍດ ນຳ​ສະເໜີ​ໂຄງການ​ຕ່າງໆ​ໃນ​ພາກ​ພື້ນ​ທີ່​ໄດ້​ຮັບ​ທຶນ​ຊ່ວຍເຫຼືອ​ຈາກ​ກອງ​ທຶນ​ໂລກ Initiative 5% ພ້ອມ​ກັບ​ວິໄສ​ທັດ​ລວມ​ກ່ຽວ​ກັບ​ທ່າ​ອ່ຽງ​ການ​ລະບາດ​ຂອງ 3 ພະຍາດ​ລະບາດ​ດັ່ງກ່າວ

    ເດືອນ​ຕຸລາ ຜ່ານ​ມາ ປະເທດ​ຝຣັ່ງ​ໄດ້​ປະສົບ​ຜົນສຳເລັດ​ໃນ​ການ​ຈັດ​ກອງ​ປະຊຸມ​ລະດົມ​ທຶນ​ເຂົ້າ​ກອງ​ທຶນ​ໂລກ ເພື່ອ​ຕ້ານ​ເຮ​​ັສ​ໄອ​ວີ/ເອດ ວັນນະໂລກ ແລະ ມາລາ​ເລຍ ຄັ້ງ​ທີ 6 ເຊິ່ງ​ສາມາດ​ລະດົມ​ທຶນ​ໄດ້ 14 ຕື້​ໂດ​ລາ​ສະຫະລັດ ຫຼື ປະມານ 124.050,4 ຕື້​ກີບ ຕາມ​ເປົ້າ​ໝາຍ​ທີ່​ວາງ​ໄວ້​ເພື່ອ​ຊ່ວຍ​ຊີວິດ​ຄົນ 16 ລ້ານ​ຄົນ ແລະ ນັບ​ຈາກ​ນີ້ ສິ່ງ​ທ້າ​ທາຍ​ຕ້ອງ​ຮັບປະກັນ​ໃຫ້​ກອງ​ທຶນ​ດັ່ງກ່າວ ສາມາດ​ປະກອບສ່ວນ​ໃນ​ການ​ລຶບລ້າງ​ສາມ​ພະຍາດ​ລະບາດ​ດັ່ງກ່າວ​ໃຫ້​ໝົດ​ໄປ​ກ່ອນ​ປີ 2030 ຕາມ​ເປົ້າ​ໝາຍ​ການ​ພັດທະນາ​ແບບ​ຍືນ​ຍົງ.

    ປະເທດ​ຝຣັ່ງ ເປັນ​ຜູ້​ສະໜັບສະໜູນ​ກອງ​ທຶນ​ໂລກ​ລາຍ​ໃຫຍ່​ອັນ​ດັບ 2 ແລະ ໄດ້​ໃຫ້​ຄຳ​ໝັ້ນ​ສັນຍາ​ວ່າ ຈະ​ເພີ່ມ​ການ​ຊ່ວຍເຫຼືອ​ດ້ານ​ທຶນຮອນ​ຕື່ມ​ອີກ 20% ໃນ​ກອງ​ທຶນ​ຮອບ​ວຽນ​ຕໍ່​ໄປ ນອກ​ນີ້ ປະເທດ​ຝຣັ່ງ​ຍັງ​ເປັນ​ຜູ້​ລິ​ເລີ່ມ​ຈັດ​ຕັ້ງ​ກອງ​ທຶນ 5% ໃນ​ປີ 2012 ປະກອບສ່ວນ​ໂດຍ​ກົງ​ເຂົ້າ​ໃນ​ກອງ​ທຶນ​ໂລກ ເພື່ອ​ສະໜອງ​ການ​ຊ່ວຍເຫຼືອ​ດ້ານ​ເຕັກນິກ ແລະ ສະໜັບສະໜູນ​ດ້ານ​ທຶນຮອນ​ແກ່​ໂຄງການ​ຕ່າງໆ.

    ນັບ​ແຕ່​ປີ 2012 ເຖິງ​ປັດຈຸບັນ ​ສປປ ລາວ ໄດ້​ຮັບ​ທຶນ​ຊ່ວຍເຫຼືອ 5 ລ້ານ​ເອີ​ໂຣ ຫຼື ປະມານ 49 ຕື້​ກີບ ຜ່ານ​ກອງ​ທຶນ 5% ທີ່​ສຸມ​ໃສ່​ການ​ຄົ້ນຄວ້າ ແລະ ເສີມ​ສ້າງ​ຄວາມ​ສາມາດ​ໃຫ້​ບັນດາ​ອົງ​ການຈັດຕັ້ງ​ທາງ​ສັງຄົມ​ຂອງ​ລາວ ໃນ​ປີ 2020 ມີ 2 ໂຄງການ​ໃໝ່​ໃນ ​ສປປ ລາວ ຈະ​ໄດ້​ຮັບ​ທຶນ​ຊ່ວຍເຫຼືອ​ຈາກ​ກອງ​ທຶນ 5% ໂຄງການ​ໜຶ່ງ​ແມ່ນ​ຈັດ​ຕັ້ງ​ປະຕິບັດ​ໂດຍ​ອົງການ​ມະນຸດສະທຳ ແລະ ການ​ມີ​ສ່ວນ​ຮ່ວມ ອີກ​ໂຄງການ​ໜຶ່ງ​ແມ່ນ​ຈັດ​ຕັ້ງ​ປະຕິບັດ​ໂດຍ​ສະມາຄົມ​ເພື່ອ​ສຸຂະພາບ. 

ຂ່າວທີ່ກ່ຽວຂ້ອງ