ເພີ່ມ​ທະວີ​ການ​ພັດທະນາ​ຊາວ​ໜຸ່ມ ນັກຮຽນ-ນັກ​ສຶກ​ສາ ເຊື່ອມ​ໂຍງ​ພາກ​ພື້ນ-ສາກົນ

541 12 ທ.ວ. 2019 ຂ່າວໜ້າ​ໜຶ່ງ
ເພີ່ມ​ທະວີ​ການ​ພັດທະນາ​ຊາວ​ໜຸ່ມ ນັກຮຽນ-ນັກ​ສຶກ​ສາ ເຊື່ອມ​ໂຍງ​ພາກ​ພື້ນ-ສາກົນ

    ຄະນະ​ບໍລິຫານ​ງານ​ຊາວ​ໜຸ່ມ ກະຊວງ​ສຶກ​ສາ​ທິ​ການ ແລະ ກີລາ (​ສສກ) ຈັດ​ພິທີ​ພົບ​ປະ​ຊາວ​ໜຸ່ມ ພະນັກງານ ແລະ ນັກຮຽນ-ນັກ​ສຶກ​ສາ ຫົວຂໍ້: “ເພີ່ມ​ທະວີ​ການ​ພັດທະນາ​ຊາວ​ໜຸ່ມ ນັກຮຽນ-ນັກ​ສຶກ​ສາ ໄລຍະ​ແຫ່ງ​ການ​ເຊື່ອມ​ໂຍງ​ພາກ​ພື້ນ ແລະ ສາກົນ” ຂຶ້ນ​ວັນ​ທີ 11 ທັນວາ  2019 ຢູ່​ມະຫາວິທະຍາໄລ​ແຫ່ງ​ຊາດ (​ມຊ) ໂດຍ​ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ພັນ​ຄຳ ວິພາ​ວັນ ຮອງ​ປະທານ​ປະເທດ ມີ​ທ່ານ ທອງ​ສະ​ລິດ ມັງ​ໜໍ່​ເມກ ຫົວໜ້າ​ຫ້ອງ​ວ່າການ​ສູນ​ກາງ​ພັກ ທ່ານ ອາ​ລຸນ​ໄຊ ສູນ​ນະລາດ ເລຂາ​ຄະນະ​ບໍລິຫານ​ງານ​ສູນ​ກາງ​ຊາວ​ໜຸ່ມ ປະຊາຊົນ​ປະຕິວັດ​ລາວ ພ້ອມ​ດ້ວຍ​ພາກສ່ວນ​ກ່ຽວຂ້ອງ ເຂົ້າ​ຮ່ວມ.

    ທ່ານ​ນາງ ແສງ​ເດືອນ ຫຼ້າ​ຈັນທະ​ບູນ ລັດຖະມົນຕີ​ກະຊວງ ​ສສກ ກ່າວ​ວ່າ: ໄລຍະ​ຜ່ານ​ມາ ກະ ຊວງ ​ສສກ ໄດ້​ສຸມ​ໃສ່​ຢ່າງ​ຕັ້ງໜ້າ​ໃນ​ການ​ພັດທະນາ​ການ​ສຶກ​ສາ​ຕາມ​ຂະແໜງການ​ຍ່ອຍ​ຂອງ​ການ​ສຶກ​ສາ ກໍ​ຄື ການ​ຍົກ​ລະດັບ​ຄວາມ​ຮູ້-ຄວາມ​ສາມາດ​ຂອງ​ໄວ​ໜຸ່ມ ນັກ​ສຶກ​ສາ​ແຕ່​ລະ​ຂັ້ນ​ໃຫ້​ເຂົ້າ​ເຖິງ​ຂະແໜງການ​ສຶກ​ສາ ແລະ ກີລາ​ຫຼາຍ​ຂຶ້ນ ມາ​ຮອດ​ປີ 2019 ກະຊວງ ​ສສກ ສາມາດ​ຂະຫຍາຍ​ໂຮງຮຽນ​ລ້ຽງ​ເດັກ ແລະ ອະນຸບານ​ໃນ​ທົ່ວ​ປະເທດ ໄດ້ 3.432 ແຫ່ງ ມີ​ຄູ 7.955 ຄົນ ນັກຮຽນ 240.384 ຄົນ ມີ​ໂຮງຮຽນ​ປະຖົມ 8.854 ແຫ່ງ ຄູ 33.533 ຄົນ ນັກຮຽນ 770.659 ຄົນ ໂຮງຮຽນ​ມັດທະຍົມ ເພີ່ມ​ຂຶ້ນ​ເປັນ 1.792 ແຫ່ງ ຄູ-ອາຈານ 32.334 ຄົນ ນັກຮຽນ 659.850 ຄົນ ປັດຈຸບັນ​ທົ່ວ​ປະເທດ​ມີ​ພະນັກງານ​ໃນ​ຂະແໜງການ​ສຶກ​ສາ 85.812 ຄົນ ຍິງ 44.455 ຄົນ.

    ສາມາດ​ປະກາດ​ຈົບ​ຊັ້ນ​ບຳລຸງ ​ມ​ຕົ້ນ ໄດ້ 133 ເມືອງ ສົ່ງເສີມ​ການ​ສຶກ​ສາ​ອາຊີວະ​ສຶກ​ສາ ແລະ ອົບຮົມ​ວິຊາ​ຊີບ ໂດຍ​ມີ​ໂຮງຮຽນ​ອາຊີວະ​ພາກ​ລັດ ແລະ ເອກະ​ຊົນ 112 ແຫ່ງ ແລະ ມີ​ມະຫາວິທະຍາໄລ 4 ແຫ່ງ ນັກ​ສຶກ​ສາ 44.802 ຄົນ ຖ້າ​ລວມ​ນັກຮຽນ-ນັກ​ສຶກ​ສາ​ທີ່​ຂຶ້ນ​ກັບ​ກະຊວງ ​ສສກ ມີ 1.715.695 ຄົນ ໄດ້​ປັບປຸງ​ການ​ບໍລິຫານ​ການ​ສຶກ​ສາ ແລະ ກີລາ​ໃຫ້​ເຂົ້າ​ສູ່​ລະບຽບ​ຫຼາຍ​ຂຶ້ນ ໂດຍ​ການ​ແບ່ງ​ຂັ້ນ​ຄຸ້ມ​ຄອງ​ຕາມ​ກົດໝາຍ ແລະ ນິຕິ​ກຳ​ລຸ່ມ​ກົດໝາຍ​ຫຼາຍ​ກວ່າ 200 ສະບັບ ວຽກ​ງານ​ກາ​ຍະ​ກຳ ກໍ​ໄດ້​ຫຼຸດຜ່ອນ​ການ​ກໍ່ສ້າງ​ພື້ນຖານ​ໂຄງ​ລ່າງ​ທີ່​ໃຫຍ່ ມາ​ເປັນ​ການ​ກໍ່ສ້າງ​ທີ່​ຈຳເປັນ ແລະ ສຸມ​ໃສ່​ການ​ແຂ່ງຂັນ​ຢູ່​ພາຍ​ໃນ ແລະ ຕ່າງປະເທດ ປັດຈຸບັນ​ໄດ້​ຮັບ​ຫຼຽນ​ຄຳ 16 ຫຼຽນ ສະເພາະ​ການ​ເຂົ້າ​ຮ່ວມ​ແຂ່ງຂັນ​ຊີເກມ ຄັ້ງ​ທີ 30 ຢູ່​ປະເທດ​ຟິ​ລິ​ປິນ ໄດ້​ສົ່ງ​ນັກກີລາ​ເຂົ້າ​ຮ່ວມ​ຫຼາຍ​ປະເພດ ສາມາດ​ຍາດ​ໄດ້ 34 ຫຼຽນ ໃນ​ນີ້ ມີ​ຫຼຽນ​ຄຳ 1 ຫຼຽນ ຫຼຽນ​ເງິນ 5 ຫຼຽນ ແລະ ຫຼຽນ​ທອງ 28 ຫຼຽນ.

    ໂອກາດ​ນີ້ ທ່ານ ພັນ​ຄຳ ວິພາ​ວັນ ກໍ​ໄດ້​ສະແດງ​ຄວາມ​ຊົມເຊີຍ​ຕໍ່​ຜົນສຳເລັດ​ທີ່​ກະຊວງ ​ສສກ ຍາດ​ມາດ​ໄດ້ ພ້ອມ​ທັງ​ໄດ້​ເນັ້ນ​ໜັກ​ໃຫ້​ຊາວ​ໜຸ່ມ ນັກຮຽນ-ນັກ​ສຶກ​ສາ ໃນ​ຍຸກ​ໂລກາ​ພິ​ວັດ ຍຸກ​ເຕັກ​ໂນ​ໂລ​ຊີ​ຂ່າວສານ​ທີ່​ທັນ​ສະໄໝ ໃນ​ການ​ເຊື່ອມ​ໂຍງ​ພາກ​ພື້ນ ແລະ ສາກົນ ຊາວ​ໜຸ່ມ​ຕ້ອງ​ຮັບ​ຮູ້​ມູນເຊື້ອ​ອັນ​ດີງາມ​ຂອງ​ພັກ ຂອງ​ຊາດ ຂອງ​ຊາວ​ໜຸ່ມ ຂອງ​ກອງທັບ ກຳລັງ​ປະກອບ​ອາວຸດ ການ​ອະນຸ​ຮັກ-ຮັກສາ ແລະ ສົ່ງເສີມ​ວັດທະນະທຳ​ອັນ​ດີງາມ​ຂອງ​ບັນດາເຜົ່າ ເພື່ອ​ສະແດງ​ເຖິງ​ຄວາມ​ມີ​ນ້ຳໃຈ​ຮັກ​ຊາດ​ອັນ​ແທ້​ຈິງ ຕັ້ງໜ້າ​ເຝີກ​ຝົນ​ຫຼໍ່​ຫຼອມ​ຕົນ​ເອງ ຍົກ​ລະດັບ​ຄວາມ​ຮູ້-ຄວາມ​ສາມາດ​ດ້ານ​ເຕັກ​ໂນ​ໂລ​ຊີ ຂໍ້​ມູນ​ຂ່າວສານ ພາສາ​ຕ່າງປະເທດ ສ້າງ​ມາດຕະຖານ​ຍົກ​ລະດັບ​ແຮງ​ງານ ນັກວິຊາການ​ມື​ອາຊີບ ສ້າງ​ສາຍ​ພົວພັນ​ຮ່ວມ​ມື​ກັບ​ບັນດາ​ຊາວ​ໜຸ່ມ​ເພື່ອນ​ມິດ​ຍຸດ​ທະ​ສາດ ພາກ​ພື້ນ ແລະ ສາກົນ ຕາມ​ຄວາມ​ສາມາດ ເພື່ອ​ຍາດ​ແຍ່ງ​ເອົາ​ການ​ຊ່ວຍເຫຼືອ ແລະ ແລກປ່ຽນ​ບົດຮຽນ​ໃນ​ການ​ພັດທະນາ​ຊາວ​ໜຸ່ມ​ໃຫ້​ນັບ​ມື້​ກວ້າງຂວາງ  ການ​ປັບປຸງ​ວຽກ​ງານ​ກີລາ-ກາ​ຍະ​ກຳ ຕ້ອງ​ເອົາໃຈໃສ່​ແຕ່​ສູນ​ກາງ​ຮອດ​ທ້ອງຖິ່ນ ສະໜອງ​ພື້ນຖານ​ໂຄງ​ລ່າງ ອຸປະກອນ​ກີລາ ໃຫ້​ໄດ້​ຕາມ​ເງື່ອນໄຂ​ທີ່​ເໝາະ​ສົມ ຍາດ​ແຍ່ງ​ການ​ຊ່ວຍເຫຼືອ​ຈາກ​ສັງຄົມ ຊຸມ​ຊົນ ແລະ ອົງ​ການຈັດຕັ້ງ​ພາຍ​ໃນ-ຕ່າງປະເທດ ໄວ​ໜຸ່ມ​ຕ້ອງ​ຄຽງ​ຄູ່​ກັບ​ການ​ພັດທະນາ​ກີລາ-ກາ​ຍະ​ກຳ​ໃຫ້​ມີ​ການ​ຂະຫຍາຍຕົວ​ນັບ​ທັງ​ຊົນນະບົດ ຕົວ​ເມືອງ ໃຫ້​ມີ​ລັກສະນະ​ວິທະຍາສາດ​ກວ້າງ​ໄກ ສາມາດ​ເຂົ້າ​ຮ່ວມ​ແຂ່ງຂັນ​ກີລາ​ປະເພດ​ຕ່າງໆ​ໃນ​ລະດັບ​ພາກ​ພື້ນ ແລະ ສາກົນ ເພື່ອ​ເຮັດ​ໃຫ້​ບົດບາດ​ກີລາ​ລາວ​ສູງ​ເດັ່ນ​ຂຶ້ນ​ໃນ​ເວທີ​ພາກ​ພື້ນ ແລະ ສາກົນ. 

ຂ່າວທີ່ກ່ຽວຂ້ອງ