ເບິ່ງບ້ານເຂົາເອົາບົດຮຽນ 11-12-2019

2.261 11 ທ.ວ. 2019 ຫົວຂໍ້ຂ່າວອື່ນໆ

   ຄໍ​ລຳ​ປະ­ຈຳ​ວັນ​ນີ້ ເລີ່ມ​ຈາກ​ຂ່າວ​ຄະ­ດີ​ລັດ​ຖະ ມົນ­ຕີ​ປະ­ເທດ​ພູ​ຖານ​ທ່ານ​ໜຶ່ງ ພ້ອມ​ດ້ວຍ​ພັກ​ພວກ ຕໍ່​ໃສ່​ເລື່ອງ​ດຳ­ລັດ​ຂອງ​ນາ­ຍົກ​ຫວຽດ­ນາມ ເພື່ອ​ຄວບ​ຄຸມ​ເຄື່ອງ­ກິນ​ປະ­ເພດ​ເຫຼົ້າ ແລະ ປິດ​ທ້າຍ​ກັບ​ຂ່າວ​ມາດ​ຕະ­ການ​ຄຸ້ມ​ຄອງ​ເຮືອນ​ພັກ​ສຳ­ລັບ​ຜູ້​ເຖົ້າ​ຢູ່​ຈີນ.

   ທີ່ ພູ​ຖານ: ຂ່າວ​ຈາກ​ນະ­ຄອນ­ຫຼວງ​ທິມ​ພູ ປະເທດ​ພູ​ຖານ ໃນ​ທ້າຍ​ເດືອນ​ສິງ­ຫາ​ປີ​ນີ້​ນັ້ນ​ຄົງ​ບໍ່​ມີ​ເລື່ອງ​ໃດ​ເດັ່ນ​ດັງ​ເທົ່າ​ກັບ​ຄະ­ດີ​ຂອງ​ທ່ານ ງີ​ມາ​ຊັງ​ເກ ເຊັມ​ໂປ (Ngeema Sangay Tsempo) ລັດ­ຖະ­ມົນ­ຕີ​ແຮງ​ງານ ແລະ ຊັບ­ພະ­ຍາ­ກອນ​ມະ­ນຸດ ພ້ອມ​ດ້ວຍ​ພັນ​ລະ​ຍາ ຫຼານ​ສາວ​ຂອງ​ເຂົາ​ບວກ​ກັບ​ຜູ້​ຈັດ­ການ​ໂຮງ­ແຮມ 1 ຄົນ ທັງ 4 ຄົນ​ທີ່​ກ່າວ​ມາ​ຂ້າງ​ເທິງ​ນີ້ ມີ​ຄວາມ​ຜິດ 4 ກໍ­ລະ­ນີ​ທີ່​ພົວ­ພັນ​ກັບ​ໂຄງ­ການ​ເຝິກ­ອົບ­ຮົມ​ຊາວ​ໜຸ່ມ​ພູ​ຖານ ຢູ່​ປະ­ເທດ​ອິນ​ເດຍ ແລະ ທຸ­ລະ​ກິດ​ວ່າ​ຈ້າງ​ຂ່າວ​ໄດ້​ໃຫ້​ລາຍ​ລະ­ອຽດ​ຕື່ມ​ວ່າ ທາງ​ຫ້ອງ­ການ ໄອ​ຍະ​ການ​ໃຫຍ່​ຂອງ​ພູ​ຖານ​ໄດ້​ສັ່ງ​ຟ້ອງ​ບຸກ­ຄົນ​ທັງ 4 ໃນ​ວັນ​ທີ 23 ເດືອນ​ສິງ­ຫາ​ປີ​ນີ້ ຄວາມ​ຜິດ​ຂອງ​ທ່ານ ລັດ­ຖະ­ມົນ­ຕີ​ນັ້ນ ລວມ​ມີ​ການ​ແຈ້ງ​ຊັບ​ສິນ​ບໍ່​ຖືກ​ຕາມ​ຄວາມ​ເປັນ​ຈິງ ມີ​ການ​ກະ­ທຳ​ທີ່​ເປັນ​ການ​ຫຼອກ​ລວງ​ຕົວະ​ຕົ້ມ ປະ­ພຶດ​ຜິດ​ກົດ​ລະ­ບຽບ​ຂອງ​ພະ­ນັກ­ງານ​ລັດ ແລະ ສໍ້​ໂກງ​ຊັບ​ສິນ​ຢ່າງ​ຜິດ​ກົດ­ໝາຍ ຕອນ​ຄະ­ດີ​ນີ້​ພວມ​ເປັນ​ຂ່າວ​ຢູ່​ນັ້ນ ຍັງ​ບໍ່​ທັນ​ມີ​ການ​ຕັດ­ສິນ​ໂທດ​ຂອງ​ບຸກ­ຄົນ​ທັງ 4 ແຕ່​ກໍ​ເຊື່ອ​ຄົງ​ໜັກ​ບໍ່​ຢອກ ຢູ່​ປະ­ເທດ​ທີ່​ກົດ­ໝາຍ​ເປັນ​ກົດ­ໝາຍ​ແທ້ (ບໍ່​ແມ່ນ​ກົດ​ໝູ່) ນັ້ນ ຜູ້​ກະ­ທຳ​ຜິດ​ເຖິງ​ຈະ​ໃຫຍ່​ເທົ່າ​ຊ້າງ ຫຼື ນ້ອຍ​ສ່ຳ​ແມງ­ມີ່​ກໍ​ໜີ​ບໍ່​ມົ້ມ​ບ້ວງ​ກົດ­ໝາຍ (ຈາກ​ວຽງ​ຈັນ​ທາມ 23 ຕຸ­ລາ 2017).

   ທີ່ ຫວຽດ­ນາມ: ກ່ອນ​ໜ້າ​ນີ້ ປະ­ມານ 5 ປີ ນາ­ຍົກ­ລັດ­ຖະ­ມົນ­ຕີ ຫວຽດ­ນາມ ໄດ້​ອອກ­ດຳ­ລັດ​ສະ­ບັບ​ເລກ​ທີ 224 ລົງ​ວັນ​ທີ 12 ກຸມ­ພາ 2014 ວ່າ​ດ້ວຍ​ນະ­ໂຍ­ບາຍ​ແຫ່ງ​ຊາດ ເພື່ອ​ປ້ອງ​ກັນ​ອັນ­ຕະ­ລາຍ​ຈາກ​ການ​ບໍ­ລິ­ໂພກ​ເຄື່ອງ​ດື່ມ​ທີ່​ມີ​ທາດ​ເຫຼົ້າ ພໍ​ຕົກ​ມາ​ຮອດ​ຕົ້ນ​ເດືອນ​ກັນ­ຍາ​ປີ​ດຽວ​ກັນ​ນັ້ນ ກໍ​ມີ​ຂ່າວ​ວ່າ​ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ​ຫວຽດ­ນາມ ກໍ​ໄດ້​ທາບ​ທາມ​ເອົາ​ຄຳ​ຄິດ​ເຫັນ​ຂອງ​ສັງ­ຄົມ ເພື່ອ​ເປັນ​ຂໍ້​ມູນ​ສຳ­ລັບ​ສ້າງ​ກົດ­ໝາຍ​ເປັນ​ເຄື່ອງ­ມື​ໃນ​ການ​ປະ­ຕິ­ບັດ​ດຳ­ລັດ​ດັ່ງ­ກ່າວ​ຂອງ​ທ່ານ​ນາ­ຍົກ­ລັດ­ຖະ­ມົນ­ຕີ ກົດ­ໝາຍ​ໄດ້​ກຳ­ນົດ​ຫ້າມ​ຈຳ­ໜ່າຍ​ເບຍ​ຕາມ​ສະ­ຖານ­ທີ່​ຕ່າງໆ ເຊັ່ນ: ຕາມ​ບໍ­ລິ­ເວນ​ໂຮງ­ຮຽນ ໂຮງ­ໝໍ ສຳ­ນັກ­ງານ ອົງ­ການ ແລະ ຮ້ານ​ຄ້າ​ແຄມ​ທາງ​ຍ່າງ ນອກ​ນັ້ນ ຍັງ​ຫ້າມ​ຈຳ­ໜ່າຍ​ເຄື່ອງ​ດື່ມ​ປະ­ເພດ​ເຫຼົ້າ​ໃຫ້​ບຸກ­ຄົນ​ທີ່​ມີ​ອາ­ຍຸ​ຕ່ຳ​ກວ່າ 18 ປີ ຄົນ​ທີ່​ຕິດ​ເຫຼົ້າ​ແລ້ວ ແມ່­ຍິງ​ຖື­ພາ​ທີ່­ຢູ່​ໃນ​ໄລ­ຍະ​ໃຫ້​ນົມ​ລູກ ແລະ ຜູ້​ທີ່​ເຈັບ­ເປັນ​ຈາກ​ການ​ດື່ມ​ເຫຼົ້າ ການ­ຈຳ­ໜ່າຍ​ເບຍ​ຜ່ານ​ເຄື່ອງ​ບໍ­ລິ­ການ​ແບບ​ອັດ­ຕະ­ໂນ­ມັດ​ນັ້ນ ກົດ­ໝາຍ​ສະ­ບັບ​ນີ້​ບໍ່​ອະ­ນຸ­ຍາດ​ເດັດ­ຂາດ ພາຍ​ໃຕ້​ກົດ­ໝາຍ​ນີ້ ຜະ­ລິດ​ຕະ​ພັນ​ເບຍ​ທຸກ​ຊະ­ນິດ​ຍັງ​ຜະ­ລິດ​ຢູ່​ພາຍ​ໃນ ແລະ ນຳ​ເຂົ້າ ຕ້ອງ​ມີ​ກາ​ປະ​ທັບ​ທີ່​ຮັບ­ປະ­ກັນ​ຖາ­ນະ​ຖືກ­ຕ້ອງ​ຕາມ​ກົດ­ໝາຍ ການ​ຜະ­ລິດ​ເບຍ​ບໍ່​ໄດ້​ຮັບ​ອະ­ນຸ­ຍາດ ການ​ຂາຍ​ເບຍ​ຈາກ​ຜູ້​ຜະ­ລິດ​ທີ່​ບໍ່​ໄດ້​ຮັບ​ອະ­ນຸ­ຍາດ ການ​ຂົນ­ສົ່ງ ຫຼື ບໍ­ລິ­ໂພກ​ເບຍ​ທີ່​ບໍ່​ມີ​ປ້າຍ ຫຼື ປ້າຍ​ບໍ່​ຖືກ­ຕ້ອງ ບໍ່​ມີ​ກາ​ປະ​ທັບ ບໍ່​ມີ​ການ​ລົງ­ທະ­ບຽນ ຕາມ​ລະ­ບຽບ​ຄວາມ​ປອດ​ໄພ​ທາງ​ອາ­ຫານ ລ້ວນ​ແຕ່​ເປັນ​ການ​ລະ­ເມີດ​ກົດ­ໝາຍ​ທີ່​ຕ້ອງ​ມີ​ກົດ ໝາຍ​ສະ­ບັບ​ນີ້​ອອກ​ມາ​ກໍ​ແມ່ນ​ເພື່ອ​ຫຼຸດ­ຜ່ອນ​ອັນ­ຕະ­ລາຍ​ຈາກ​ການ​ດື່ມ​ເບຍ ຊຶ່ງ​ສະ­ຖິ­ຕິ​ໄດ້​ຊີ້​ອອກ​ວ່າ ໃນ 10 ປີ­ຜ່ານ­ມາ (2004-2014) ນັ້ນ ການ​ບໍ­ລິ­ໂພກ​ເບຍ​ຂອງ​ຊາວ​ຫວຽດ­ນາມ​ເພີ່ມ​ຂຶ້ນ 200% (ຂໍ້​ມູນ​ຈາກ​ໜັງ­ສື­ພິມ​ຜູ້​ແທນ​ປະ­ຊາ­ຊົນ​ສະ­ບັບ​ກາງ​ເດືອນ​ກັນ­ຍາ 2014).

   ທີ່ ສປ ຈີນ: ໃນ​ໄຕ​ມາດ​ທີ 3 ຂອງ​ປີ 2017 ທາງ​ການ​ຈີນ​ໄດ້​ອອກ​ລະ­ບຽບ​ຄຸ້ມ​ຄອງ​ສະ­ຖານ­ທີ່​ພັກ​ສຳ­ລັບ​ຜູ້​ອາ­ຍຸ​ສູງ (ຜູ້​ເຖົ້າ) ແນ­ໃສ່​ໃຫ້­ການ​ບໍ­ລິ­ການ​ທີ່​ມີ​ຄຸນ​ນະ​ພາບ ແລະ ໄດ້​ມາດ­ຕະ­ຖານ ບາງ​ເນື້ອ​ໃນ​ຂອງ​ລະ­ບຽບ​ການ​ດັ່ງ­ກ່າວ​ໄດ້​ກຳ­ນົດ​ວ່າ​ເຮືອນ​ພັກ​ຂອງ​ບັນ­ດາ​ຜູ້​ເຖົ້າ​ຕ້ອງ​ມີ​ການ​ບໍ­ລິ­ການ​ເຄື່ອງ­ມື​ສື່­ສານ ເຊັ່ນ: ລະ­ບົບ​ໂທລະ­ສັບ ແລະ ອິນ​ເຕີ​ເນັດ ຖ້າ​ພວກ​ຜູ້​ເຖົ້າ​ມີ​ບັນ­ຫາ​ໃນ​ການ​ໃຊ້​ເຄື່ອງ­ມື​ເຫຼົ່າ​ນີ້ ທາງ​ການ​ກ່ຽວ­ຂ້ອງ​ຕ້ອງ​ຈັດ​ຕັ້ງ​ພະ­ນັກ­ງານ​ມື​ອາ­ຊີບ​ດ້ານ​ໄອ​ທີ​ເຂົ້າ​ໄປ​ຊ່ວຍ ພະ­ນັກ­ງານ​ຕ້ອງ​ປະ­ຕິ­ບັດ​ຕໍ່​ພວກ​ຜູ້​ເຖົ້າ​ຢ່າງ​ສຸ­ພາບ ແລະ ດ້ວຍ​ຄວາມ​ອົດ­ທົນ ຊ່ວຍ​ເກັບ​ຮັກ­ສາ​ຂໍ້​ມູນ​ສ່ວນ​ຕົວ​ຂອງ​ຜູ້​ອາ­ໄສ​ຢູ່​ສູນ ກໍ​ຄື ຄວາມ​ລັບ​ອື່ນໆ​ຂອງ​ບັນ­ດາ​ແຂກ​ທີ່​ມາ​ຢ້ຽມ­ຢາມ.

ຂ່າວທີ່ກ່ຽວຂ້ອງ