ກອງ​ປະຊຸມ​ສະມັດຊາ​ໃຫຍ່​ຂອງ​ສະມາຄົມ​ບັນດາ​ນະຄອນ​ທີ່​ນຳ​ໃຊ້​ພາສາ​ຝຣັ່ງ (AIMF)

1.050 10 ທ.ວ. 2019 ຂ່າວໜ້າ​ໜຶ່ງ
   ກອງ​ປະຊຸມ​ສະມັດຊາ​ໃຫຍ່​ຂອງ​ສະມາຄົມ​ບັນດາ​ນະຄອນ​ທີ່​ນຳ​ໃຊ້​ພາສາ​ຝຣັ່ງ (AIMF)

    ໃນ​ວັນ​ທີ 1-4 ທັນວາ 2019 ຄະນະ​ຜູ້​ແທນ​ນະຄອນຫຼວງ​ວຽງ​ຈັນ ນຳ​ໂດຍ​ທ່ານ  ສິນ​ລະ​ວົງ ຄຸດ​ໄພທູນ ເຈົ້າ​ຄອງ​ນະຄອນຫຼວງ ພ້ອມ​ຄະນະ ໄດ້​ເຂົ້າ​ຮ່ວມ​ກອງ​ປະຊຸມ​ສະມັດຊາ​ໃຫຍ່​ຂອງ​ສະມາຄົມ​ບັນດາ​ນະຄອນ​ທີ່​ນຳ​ໃຊ້​ພາສາ​ຝຣັ່ງ (AIMF) ຄັ້ງ​ທີ 40 ຢູ່​ນະຄອນຫຼວງ​ພະນົມ​ເປັນ ປະເທດ​ກຳປູເຈຍ.

    ໃນ​ກອງ​ປະຊຸມ AIMF ຄັ້ງ​ນີ້​ມີ 120 ກວ່າ​ນະຄອນ​ຈາກ​ທົ່ວ​ໂລກ​ເຂົ້າ​ຮ່ວມ ຊຶ່ງ​ຫົວຂໍ້​ທີ່​ກອງ​ປະຊຸມ​ໄດ້​ຍົກ​ຂຶ້ນ​ມາ​ປຶກສາ​ຫາລື ແລກປ່ຽນ​ບົດຮຽນ​ນຳ​ກັນ​ປະກອບ​ມີ 1. ປະສົບ​ການ​ໃນ​ການ​ຟື້ນ​ຟູ​ບັນດາ​ເຂດ​ໃກ້​ຄຽງ​ທີ່​ດ້ອຍ​ໂອກາດ 2. ບົດບາດ​ຂອງ​ເຈົ້າ​ຄອງ​ນະຄອນ​ໃນ​ການ​ຫັນປ່ຽນ​ຂອງ​ຕົວ​ເມືອງ​ອາຊີ​ຕາເວັນ​ອອກສຽງ​ໃຕ້ ໃນ​ປັດຈຸບັນ ແລະ ໃນ​ອະນາຄົດ 3. ການ​ຫັນປ່ຽນ​ພະລັງງານ ວິທີ​ການ​ພັດທະນາ​ວົງ​ຈອນ​ເສດຖະກິດ 4. ການ​ແລກປ່ຽນ​ຄວາມ​ຮູ້​ບັນດາ​ຕົວ​ເມືອງ​ໃຫຍ່​ໃນ​ອາຊີ​ຕາເວັນ​ອອກສຽງ​ໃຕ້​ຈະ​ຖືກ​ຈັດ​ຢູ່​ບ່ອນ​ໃດ​ໃນ​ບັນດາ​ຂະ​ບວນ​ການ​ມາດຕະຖານ ແລະ ມາດຕະຖານ​ສາກົນ ສຳລັບ​ນະຄອນ​ຕ່າງໆ 5. ຄວາມ​ພະຍາຍາມ​ບູລະນະ​ຕົວ​ເມືອງ ແລະ ນະໂຍບາຍ​ການ​ພັດທະນາ​ຕົວ​ເມືອງ 6. ແລກປ່ຽນ​ບົດຮຽນ​ກ່ຽວ​ກັບ​ຄວາມ​ທົນ​ທານ ແລະ ສິ່ງ​ທ້າ​ທາຍ​ຂອງ​ການ​ກໍ່ສ້າງ​ຫຼັງ​ໄພພິບັດ 7. ຈັດ​ຕັ້ງ​ປະຕິບັດ ແລະ ຄຸ້ມ​ຄອງ​ການ​ຟື້ນ​ຟູ​ບູລະນະ ຄວາມ​ຢືດ​ຢຸ່ນ​ປະຊາຊົນ​ພະນົມ​ເປັນ ການ​ຟື້ນ​ຟູ ແລະ ການ​ຮ່ວມ​ມື​ສາກົນ.

     ຕາງໜ້າ​ຈາກ​ນະຄອນຫຼວງ​ວຽງ​ຈັນ ​ສປປ ລາວ ໄດ້​ຂຶ້ນ​ປະກອບ​ຄຳ​ເຫັນ​ໃນ​ຫົວຂໍ້: ຄວາມ​ທ້າ​ທາຍ​ໃນ​ການ​ພັດທະນາ ຂອງ​ນະຄອນຫຼວງ​ວຽງ​ຈັນ ນອກຈາກ​ນັ້ນ ຄະນະ​ຜູ້​ແທນ ນະຄອນຫຼວງ​ວຽງ​ຈັນ ຍັງ​ໄດ້​ເຂົ້າ​ຢ້ຽມ​ຄຳນັບ​ນາຍົກລັດຖະມົນຕີ​ຂອງ​ກຳປູເຈຍ​ອີກ​ດ້ວຍ ພ້ອມ​ນີ້ ຍັງ​ໄດ້​ມີ​ການ​ພົບ​ປະ​ເປັນ​ທາງ​ການ​ລະຫວ່າງ ນະຄອນຫຼວງ​ວຽງ​ຈັນ ກັບ​ນະຄອນຫຼວງ​ພະນົມ​ເປັນ ໃນ​ຖານະ​ທີ່​ເປັນ​ນະຄອນ​ແຮກສ່ຽວ​ນຳ​ກັນ​ມາ​ແຕ່​ດົນ​ນານ​ແລ້ວ​ນັ້ນ ທັງ​ສອງ​ຝ່າຍ​ໄດ້​ທົບ​ທວນຄືນ​ການ​ພົວພັນ​ຮ່ວມ​ມື​ລະຫວ່າງ​ສອງ​ນະຄອນ​ໃນ​ໄລຍະ​ຜ່ານ​ມາ ແລະ ປຶກສາ​ຫາລື ກ່ຽວ​ກັບ​ແຜນການ​ຮ່ວມ​ມື​ໃນຕໍ່ໜ້າ ການ​ຢ້ຽມຢາມ​ຄັ້ງ​ນີ້ ຍັງ​ເປັນ​ການຈັດຕັ້ງ​ປະຕິບັດ​ຖະແຫຼງການ​ຮ່ວມ​ລະຫວ່າງ 2 ລັດຖະບານ ລາວ-ກຳປູເຈຍ ທີ່​ໄດ້​ລົງ​ນາມ​ຮ່ວມ​ກັນ​ລະຫວ່າງ​ສອງ​ນາຍົກລັດຖະມົນຕີ​ຂອງ​ສອງ​ປະເທດ ໂດຍ​ສະເພາະ ກ່ຽວ​ກັບ​ການ​ຊຸກຍູ້​ການ​ຮ່ວມ​ມື​ຂອງ​ແຂວງ​ແຮກສ່ຽວ ລະຫວ່າງ​ນະຄອນຫຼວງ​ວຽງ​ຈັນ ແລະ ນະຄອນຫຼວງ​ພະນົມ​ເປັນ ແລະ ລະຫວ່າງ ແຂວງ​ຈຳປາ​ສັກ ແລະ ແຂວງ​ສຽມ​ຣຽບ ເພື່ອ​ສົ່ງເສີມ​ການ​ຮ່ວມ​ມື​ຢ່າງ​ໃກ້ຊິດ ແລະ ຊ່ວຍເຫຼືອ​ເຊິ່ງ​ກັນ ແລະ ກັນ.

    ໃນ​ໂອກາດ​ນີ້ ທ່ານ​ເຈົ້າ​ຄອງ ນວ ໄດ້​ຕີ​ລາຄາ​ສູງ ແລະ ຊົມເຊີຍ​ຕໍ່​ຜົນສຳເລັດ​ອັນ​ໃຫຍ່​ຫຼວງຫຼາຍ​ດ້ານ ທີ່​ປະຊາຊົນ​ນະຄອນຫຼວງ​ພະນົມ​ເປັນ ກໍ​ຄື​ປະຊາຊົນ​ກຳປູເຈຍ ຍາດ​ມາ​ໄດ້​ໃນ​ໄລຍະ​ຜ່ານ​ມາ ເສດຖະກິດ​ມີ​ການ​ຂະຫຍາຍຕົວ​ຢ່າງ​ຕໍ່​ເນື່ອງ ຊີວິດ​ການ​ເປັນ​ຢູ່​ຂອງ​ປະຊາຊົນ​ໄດ້​ຮັບ​ການ​ປັບປຸງ​ດີ​ຂຶ້ນ​ເປັນ​ກ້າວໆ ຊື່​ສຽງ​ຂອງ​ພະນົມ​ເປັນ ນັບ​ມື້​ນັບ​ໄດ້​ຮັບ​ການ​ຍົກ​ສູງ​ຂຶ້ນ ແລະ ເປັນ​ນະຄອນ​ໜຶ່ງ​ທີ່​ດຶງ​ດູດ​ການທ່ອງທ່ຽວ​ໄດ້​ດີ​ຫຼາຍ.

     ສຳລັບ​ການ​ຮ່ວມ​ມື​ກັນ​ໃນຕໍ່ໜ້າ​ນັ້ນ ສອງ​ນະຄອນຫຼວງ ຈະ​ສືບຕໍ່​ໃຫ້​ມີ​ການ​ແລກປ່ຽນ​ລະຫວ່າງ​ຄະນະ​ຜູ້​ແທນ​ຂັ້ນ​ສູງ ລວມ​ທັງ​ຂັ້ນ​ຂະແໜງການ​ຕ່າງໆ​ນຳ​ກັນ​ຢ່າງ​ເປັນ​ປົກກະຕິ ແລະ ຈະ​ຊຸກຍູ້​ສົ່ງເສີມ​ການ​ຮ່ວມ​ມື​ດ້ານ​ການ​ຄ້າ ການ​ລົງທຶນ ການທ່ອງທ່ຽວ ການ​ຮ່ວມ​ມື​ດ້ານ​ວັດທະນະທຳ ແລະ ການ​ສຶກ​ສາ ສືບຕໍ່​ຮັກສາ​ສາຍ​ພົວ​ມິດຕະພາບ​ທີ່​ເປັນ​ມູນເຊື້ອ ເປັນ​ບ້ານ​ໃກ້​ເຮືອນ​ຄຽງ ບ້ານ​ແກ່ວ​ເຮືອນ​ດອງ ໃຫ້​ດີ​ຕະຫຼອດ​ໄປ.

    ນອກຈາກ​ນັ້ນ ໃນ​ການ​ຢ້ຽມຢາມ​ຄັ້ງ​ນີ້ ຍັງ​ໄດ້​ຈັດ​ໃຫ້​ມີ​ກອງ​ປະຊຸມ​ພົບ​ປະ​ລະຫວ່າງ​ນັກທຸລະກິດ​ຂອງ​ສອງ​ນະຄອນ: ວຽງ​ຈັນ ແລະ ພະນົມ​ເປັນ ແລະ ໄດ້​ໄປ​ຢ້ຽມຢາມ​ໂຄງການ​ພັດທະນາ​ເສດຖະກິດ ແລະ ແຫຼ່ງ​ທ່ອງ​ທ່ຽວ​ທາງ​ວັດທະນະທຳ​ຈຳນວນ​ໜຶ່ງ​ອີກ​ດ້ວຍ.

ຂ່າວທີ່ກ່ຽວຂ້ອງ