ລາວ-ຫວຽດນາມ ເພີ່ມ​ທະວີ​ແລກປ່ຽນ​ວຽກ​ງານ​ສາສະໜາ

649 10 ທ.ວ. 2019 ຂ່າວໜ້າ​ໜຶ່ງ
   ລາວ-ຫວຽດນາມ ເພີ່ມ​ທະວີ​ແລກປ່ຽນ​ວຽກ​ງານ​ສາສະໜາ

    ສະ​ຖາ​ບັນ​ຄົ້ນຄວ້າ​ສັງຄົມ​ສາດ ສະ​ຖາ​ບັນ​ວິທະຍາສາດ​ສັງຄົມ​ແຫ່ງ​ຊາດ (ສວ​​ສຊ) ຮ່ວມ​ກັບ​ສະ​ຖາ​ບັນ​ຄົ້ນຄວ້າ​ສາສະໜາ ສະ​ຖາ​ບັນດິດ​ວິທະຍາສາດ​ສັງຄົມ​ຫວຽດນາມ ຈັດ​ກອງ​ປະຊຸມ​ສາກົນ​ຫົວຂໍ້ “ພຸດ​ທະ​ສາ​ສະ​ນິ​ກະ​ຊົນ​ຫວຽດນາມ​ຢູ່​ລາວ ປະຫວັດ​ຄວາມ​ເປັນ​ມາ ສະພາບ​ຄວາມ​ເປັນ​ຈິງ ແລະ ທ່າ​ອ່ຽງ​ການ​ພັດທະນາ” ຂຶ້ນ​ວັນ​ທີ 9 ທັນວາ 2019 ຢູ່ ສວ​​ສຊ ໂດຍ​ເປັນ​ປະທານ​ຂອງ​ທ່ານ ຄຳ​ແພງ ທິບ​ມູນ​ຕາ​ລີ ຫົວໜ້າ ສວ​​ສຊ ທ່ານ ຈູ​ວັນ ຕ້ວນ ຫົວໜ້າ​ສະ​ຖາ​ບັນ​ຄົ້ນຄວ້າ​ສາສະໜາ ສະ​ຖາ​ບັນດິດ​ວິທະຍາສາດ​ສັງຄົມ ຫວຽດນາມ ມີ​ທ່ານ ຫງຽນ​ແທງ ຕຸ້ງ ອຸປະ​ທູດ ​ສສ ຫວຽດນາມ ປະຈຳ​ລາວ ພ້ອມ​ດ້ວຍ​ຜູ້ຕາງໜ້າ​ຈາກ​ກະຊວງ ແລະ ອົງ​ການຈັດຕັ້ງ​ກ່ຽວຂ້ອງ ເຂົ້າ​ຮ່ວມ.

     ທ່ານ ຄຳ​ແພງ ທິບ​ມູນ​ຕາ​ລີ ກ່າວ​ວ່າ: ສາສະໜາ​ພຸດ ແມ່ນ​ສາສະໜາ​ທີ່​ໃຫຍ່​ທີ່​ສຸດ​ໃນ​ລາວ ແລະ ປະຊາຊົນ​ລາວ​ສ່ວນ​ຫຼາຍ ແມ່ນ​ນັບຖື​ສາສະໜາ​ພຸດ ອິດ​ທິ​ພົນ​ຂອງ​ສາສະໜາ​ພຸດ​ໄດ້​ມີ​ຕໍ່​ຊີວິດ​ຈິດໃຈ​ຂອງ​ຄົນ​ລາວ​ຢ່າງ​ເລິກເຊິ່ງ ສາມາດ​ເວົ້າ​ໄດ້​ວ່າ ສາສະໜາ​ຂອງ​ຄົນ​ລາວ​ແມ່ນ​ສາສະໜາ​ພຸດ ອີກ​ດ້ານ​ໜຶ່ງ​ລາວ​ກໍ​ແມ່ນ​ປະເທດ​ທີ່​ມີ​ຄົນ​ຫວຽດນາມ​ອາໄສ​ຢູ່​ຫຼາຍ ປັດຈຸບັນ​ສະມາຄົມ​ຄົນ​ຫວຽດນາມ​ຢູ່​ລາວ ໄດ້​ສ້າງ​ວັດ​ປະມານ 15 ແຫ່ງ.

     ການ​ຂະຫຍາຍຕົວ​ຂອງ​ສາສະໜາ​ພຸດ​ຫວຽດນາມ ໄດ້​ຮັບ​ຄວາມ​ສົນໃຈ​ຈາກ​ອົງການ​ພຸດ​ທະ​ສາສະໜາ​ສຳພັນ​ຫວຽດນາມ​ຈາກ​ແຕ່​ລະ​ຂັ້ນ ແຕ່​ລະ​ຂະແໜງ​ເປັນ​ຢ່າງ​ຍິ່ງ ເພາະ​ແມ່ນ​ການ​ປະຕິບັດ​ແນວທາງ​ນະໂຍບາຍ​ຂອງ​ພັກ ແລະ ລັດ ສຳລັບ​ຄົນ​ເຊື້ອ​ຊາດ​ຫວຽດນາມ​ທີ່​ອາໄສ​ຢູ່​ຕ່າງປະເທດ ຂະນະ​ທີ່​ສາສະໜາ​ພຸດ​ຫວຽດນາມ​ຢູ່​ລາວ ແມ່ນ​ຫົວ​ເລື່ອງ​ທີ່​ຍັງ​ບໍ່​ທັນ​ມີ​ການ​ສຶກ​ສາ​ຄົ້ນຄວ້າ​ໃນ​ຄວາມ​ເປັນ​ຈິງ ການ​ທີ່​ໃຫ້​ຄວາມ​ສົນໃຈ​ຕໍ່​ຄວາມ​ຕ້ອງການ​ໃນ​ການ​ເຊື່ອ​ຖື​ສາສະໜາ​ຂອງ​ຄົນ​ຫວຽດນາມ​ຢູ່​ປະເທດ​ລາວ ບໍ່​ພຽງ​ແຕ່​ປະກອບສ່ວນ​ໃນ​ຄວາມ​ໝັ້ນຄົງ​ຕໍ່​ຊີວິດ​ການ​ເປັນ​ຢູ່​ຂອງ​ຊຸມ​ຊົນ​ໃນ​ລາວ ແຕ່​ຍັງ​ເປັນ​ການ​ປະກອບສ່ວນ​ຊຸກຍູ້​ສາຍ​ພົວພັນ​ມິດຕະພາບ ການ​ເພີ່ມ​ທະວີ​ແລກປ່ຽນ ລະຫວ່າງ ຫວຽດນາມ ແລະ ລາວ ປະກອບສ່ວນ​ໃນ​ການ​ປັບປຸງ​ສັນຕິພາບ ມິດຕະພາບ​ຂອງ​ສອງ​ປະເທດ ແລະ ພາກ​ພື້ນ​ສາກົນ.

     ກອງ​ປະຊຸມ​ຄັ້ງ​ນີ້ ມີ​ຄວາມ​ສຳຄັນ​ຫຼາຍ​ຕໍ່​ການ​ພັດທະນາ​ສາສະໜາ​ພຸດ​ຫວຽດນາມ​ໃນ​ລາວ ເປັນ​ການ​ປະກອບສ່ວນ​ເສີມ​ສ້າງ ຮັດ​ແໜ້ນ​ຄວາມ​ສາມັກຄີ​ພິເສດ ແລະ ການ​ຮ່ວມ​ມື​ຮອບດ້ານ ລະຫວ່າງ​ລາວ-ຫວຽດນາມ ໃຫ້​ແໜ້ນ​ແຟ້ນ​ຍິ່ງ​ຂຶ້ນ ເຊິ່ງ​ສອງ​ຝ່າຍ​ຈະ​ພ້ອມ​ກັນ​ແລກປ່ຽນ​ບັນຫາ​ຕ່າງໆ​ໃນ​ຂົງເຂດ​ທິດ​ສະ​ດີ    ພຶດຕິ​ກຳ ແລະ ບົດຮຽນ​ໃນ​ການ​ພັດທະນາ​ສາສະໜາ​ຂອງ​ແຕ່​ລະ​ປະເທດ ລວມ​ທັງ​ການ​ຖອດ​ຖອນ​ບົດຮຽນ ເລືອກເຟັ້ນ ການ​ຄົ້ນຄວ້າ ແລະ ຮ່ຳຮຽນ​ເອົາ​ບົດຮຽນ​ເຊິ່ງ​ກັນ ແລະ ກັນ ພ້ອມ​ກັນ​ສ້າງ​ຄວາມ​ກະຈ່າງ​ແຈ້ງ​ໃນ​ບັນຫາ​ຕ່າງໆ​ທີ່​ແຕ່​ລະ​ຝ່າຍ​ໃຫ້​ຄວາມ​ສົນໃຈ ເພື່ອ​ສືບຕໍ່​ເສີມ​ຂະຫຍາຍ​ດ້ານ​ຕັ້ງໜ້າ ກຳຈັດ​ດ້ານ​ຫຍໍ້ທໍ້ ແລະ ຂໍ້ຄົງຄ້າງ​ຕ່າງໆ​ຕາມ​ເງື່ອນໄຂ​ຂອງ​ແຕ່​ລະ​ປະເທດ​ໃຫ້​ເລິກເຊິ່ງ. 

ຂ່າວທີ່ກ່ຽວຂ້ອງ