ປະດັບ​ຫຼຽນ​ໄຊ ແລະ ຍ້ອງຍໍ​ຜົນງານ 5 ປີ​ຂອງ​ສູນ​ກາງ​ສະຫະພັນ​ແມ່ຍິງ​ລາວ

664 10 ທ.ວ. 2019 ຂ່າວໜ້າ​ໜຶ່ງ
ປະດັບ​ຫຼຽນ​ໄຊ ແລະ ຍ້ອງຍໍ​ຜົນງານ 5 ປີ​ຂອງ​ສູນ​ກາງ​ສະຫະພັນ​ແມ່ຍິງ​ລາວ

   ພິທີ​ປະດັບ​ຫຼຽນ​ໄຊ ແລະ ຍ້ອງຍໍ​ຜົນງານ 5 ປີ (2015-2019) ສູນ​ກາງ​ສະຫະພັນ​ແມ່ຍິງ​ລາວ ໄດ້​ຈັດ​ຂຶ້ນ​ວັນ​ທີ 9 ທັນວາ 2019 ທີ່​ສູນ​ເຝິກອົບຮົມ​ສູນ​ກາງ​ສະຫະພັນ​ແມ່ຍິງ​ລາວ ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ສອນ​ໄຊ ສີ​ພັນ​ດອນ ຮອງ​ນາຍົກລັດຖະມົນຕີ ລັດຖະມົນຕີ​ກະຊວງ​ແຜນການ ແລະ ການ​ລົງທຶນ ພ້ອມ​ດ້ວຍ​ຄະນະ​ບໍລິຫານ​ງານ​ສູນ​ກາງ​ສະຫະພັນ​ແມ່ຍິງ ພະນັກງານ-ລັດຖະກອນ ແລະ ແຂກ​ຖືກ​ເຊີນ ເຂົ້າ​ຮ່ວມ.

    ໃນ​ພິທີ ທ່ານ ນາງ ອິນ​ລາ​ວັນ ແກ້ວ​ບຸນ​ພັນ ປະທານ​ຄະນະ​ບໍລິຫານ​ງານ​ສູນ​ກາງ​ສະຫະພັນ​ແມ່ຍິງ​ລາວ ໄດ້​ຂຶ້ນ​ລາຍ​ງານ​ຜົນງານ​ພົ້ນ​ເດັ່ນ​ຂອງ​ສູນ​ກາງ​ສະຫະພັນ​ແມ່ຍິງ​ລາວ​ໄລຍະ 5 ປີຜ່ານມາ (2015-2019) ວ່າ: ຕະຫຼອດ​ໄລຍະ 5 ປີ ຜ່ານ​ມາ ຄະນະ​ບໍລິຫານ​ງານ​ສູນ​ກາງ​ສະຫະພັນ​ແມ່ຍິງ​ລາວ​ໄດ້​ເອົາໃຈໃສ່​ຊີ້​ນຳ-ນຳພາ​ພະນັກງານ-ລັດຖະກອນ​ພາຍ​ໃນ​ອົງ​ການຈັດຕັ້ງ​ຂອງ​ຕົນ​ປະຕິບັດ​ໜ້າທີ່ ທີ່​ພັກ-ລັດ​ມອບ​ໝາຍ​ໃຫ້​ຈົນ​ສາມາດ​ຍາດ​ໄດ້ຜົນ​ງານ​ສຳເລັດ​ຫຼາຍ​ດ້ານ ເປັນຕົ້ນ ວຽກ​ງານ​ການ​ສຶກ​ສາ​ອົບຮົມ​ການເມືອງ-ແນວ​ຄິດ ພິເສດ ໃນ​ໂອກາດ​ສະເຫຼີມສະຫຼອງ​ເມືອງ​ວຽງ​ໄຊ​ຖານ​ທີ່​ໝັ້ນ​ການ​ປະຕິວັດ​ຄົບຮອບ 50 ປີ ແລະ ວັນ​ສ້າງຕັ້ງ​ກອງທັບ​ປະຊາຊົນ​ລາວ​ຄົບຮອບ 70 ປີ ສະຫະພັນ​ແມ່ຍິງ​ລາວ ໄດ້​ເປັນ​ເຈົ້າ​ການ​ປຸກລະດົມ​ສະມາຊິກ​ແມ່ຍິງ ກໍ​ຄື​ແມ່ຍິງ​ລາວ​ບັນດາເຜົ່າ​ໃນ​ຂອບ​ເຂດ​ທົ່ວ​ປະເທດ​ປະກອບສ່ວນ​ດ້ານ​ທຶນຮອນ​ໂດຍ​ຜ່ານ​ໂຄງການ “ຈຳປາ​ຄຳ​ຮ່ວມ​ນ້ຳໃຈ​ພັດທະນາ​ແມ່ຍິງ” ໃນ​ການ​ປັບປຸງ​ບູລະນະ​ຖ້ຳ​ແມ່ຍິງ​ລາວ​ຮັກ​ຊາດ ເຂົ້າ​ຮ່ວມ​ຂະ​ບວນ​ການ​ຄາ​ລາ​ວານ​ແມ່ຍິງ​ລາວ​ສູ່​ເມືອງ​ວຽງ​ໄຊ ເປັນ​ຂະ​ບວນ​ການ​ທຳ​ອິດ ພ້ອມ​ນັ້ນ​ໃນ​ປີ 2018 ທົ່ວ​ປະເທດ​ໄດ້​ປະສົບ​ໄພ​ນ້ຳ​ຖ້ວມ​ໜັກ​ກວ່າ​ໝູ່​ແມ່ນ​ຢູ່​ເມືອງ​ສະໜາມ​ໄຊ  ຄະນະ​ນຳ​ສະຫະພັນ​ແມ່ຍິງ​ໄດ້​ສ້າງ​ຈຸດ​ປະສານ​ງານ​ລວມ ແລະ ເປັນ​ເຈົ້າ​ການ​ປຸກລະດົມ​ທົ່ວ​ປວງ​ຊົນ​ທັງ​ພາຍ​ໃນ ແລະ ຕ່າງປະເທດ ເພື່ອ​ຊ່ວຍເຫຼືອ ແນະນຳ​ຢ້ຽມຢາມ​ໃຫ້​ກຳລັງ​ໃຈ ອັນ​ພົ້ນ​ເດັ່ນ​ໄດ້​ສ້າງ​ວິໄສ​ທັດ 2030 ຍຸດ​ທະ​ສາດ 2025 ແຜນ​ພັດທະນາ​ແມ່ຍິງ ແຜນ​ດຳເນີນ​ງານ​ແຫ່ງ​ຊາດ​ແມ່ ແລະ ເດັກ ໄດ້​ສຳເລັດ​ການ​ສ້າງ ແລະ ຜ່ານ​ຮ່າງ​ກົດໝາຍ​ວ່າ​ດ້ວຍ​ຄວາມ​ສະເໝີພາບ​ຍິງ-ຊາຍ​ຕໍ່​ກອງ​ປະຊຸມ​ສະໄໝ​ສາມັນ​ເທື່ອ​ທີ 8 ຂອງ​ສະພາ​ແຫ່ງ​ຊາດ​ຊຸດ​ທີ VIII.

    ໂອກາດ​ນີ້ ທ່ານ ສອນ​ໄຊ ສີ​ພັນ​ດອນ ໄດ້​ໃຫ້​ກຽດ​ໂອ້​ລົມ ເຊິ່ງ​ທ່ານ​ກ່າວ​ວ່າ: ປີ 2020 ເປັນ​ປີ​ມ້ວນທ້າຍ​ການຈັດຕັ້ງ​ປະຕິບັດ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ X ຂອງ​ພັກ ມະຕິ​ກອງ​ປະຊຸມ​ໃຫຍ່​ແມ່ຍິງ​ລາວ​ທົ່ວ​ປະເທດ​ຄັ້ງ​ທີ VII ເພື່ອ​ສ້າງ​ຂະ​ບວນ​ການ​ຄຳນັບ​ຮັບ​ຕ້ອນ​ກອງ​ປະຊຸມ​ໃຫຍ່​ຄັ້ງ​ທີ XI ຂອງ​ພັກ ກອງ​ປະຊຸມ​ໃຫຍ່​ຜູ້​ແທນ​ແມ່ຍິງ​ລາວ​ທົ່ວ​ປະເທດ​ຄັ້ງ​ທີ VIII ຄະນະ​ປະທານ​ສູນ​ກາງ​ສະຫະພັນ​ແມ່ຍິງ​ລາວ​ຕ້ອງ​ໄດ້​ສືບຕໍ່​ສູ້​ຊົນ​ບືນ​ຕົວ​ກ້າວ​ຂຶ້ນ​ໃຫ້​ສຳເລັດ​ຕາມ​ຄາດໝາຍ​ທີ່​ວາງ​ໄວ້ ເອົາໃຈໃສ່​ປັບປຸງ​ກົງຈັກ​ການຈັດຕັ້ງ​ໃຫ້​ໄດ້​ຕາມ​ເງື່ອນໄຂ​ມາດຖານ​ໃໝ່ ອອກແຮງ​ຊຸກຍູ້ ຕິດຕາມ​ກອງ​ປະຊຸມ​ໃຫຍ່ 3 ຂັ້ນ​ຂອງ​ພັກ ແລະ ຂອງ​ສະຫະພັນ​ແມ່ຍິງ ເພື່ອ​ເຮັດ​ໃຫ້​ພະນັກງານ​ນຳພາ-ຄຸ້ມ​ຄອງ​ເພດ​ຍິງ​ທີ່​ມີ​ເງື່ອນໄຂ​ໄດ້​ບັນຈຸ​ສັບ​ຊ້ອນ​ຫຼາຍ​ຂຶ້ນ ກຽມພ້ອມ​ປະຕິບັດ​ໜ້າທີ່ ທີ່​ພັກ-ລັດ​ມອບ​ໝາຍ​ໃຫ້ ປຸກລະດົມ ແລະ ເຂົ້າ​ຮ່ວມ​ຂະ​ບວນ​ການ​ແຂ່ງຂັນ​ຮັກ​ຊາດ ແລະ ພັດທະນາ ເສີມ​ຂະຫຍາຍ 5 ຄຸນ​ລັກສະນະ​ທີ່​ເປັນ​ມູນເຊື້ອ​ຂອງ​ແມ່ຍິງ​ລາວ ການ​ປົກ​ປັກ​ຮັກສາ​ວັດທະນະທຳ​ອັນ​ດີງາມ​ຂອງ​ແມ່ຍິງ ແລະ ຂອງ​ຊາດ ສູ້​ຊົນ​ພັດທະນາ​ຕົນ​ເອງ​ຢ່າງຮອບດ້ານ ສຸມ​ໃສ່​ສ້າງ​ແຜນ​ພັດທະນາ​ແມ່ຍິງ​ລາວ ແຜນ​ດຳເນີນ​ງານ​ແຫ່ງ​ຊາດ ເພື່ອ​ຄວາມ​ສະເໝີພາບ​ຍິງ-ຊາຍ ແຜນ​ດຳເນີນ​ງານ​ແຫ່ງ​ຊາດ​ວຽກ​ແມ່ ແລະ ເດັກ ເຊິ່ງ​ສອດຄ່ອງ​ກັບ​ແຜນ​ພັດທະນາ​ເສດຖະກິດ-ສັງຄົມ​ແຫ່ງ​ຊາດ 5 ປີ ຄັ້ງ​ທີ IX (2021-2025).

ຂ່າວທີ່ກ່ຽວຂ້ອງ